ХАБАРИ ДОҒ
Чоршанбе, Апр 29 2020

 

Дар вилояти Хатлон бо вуҷуди эҳтиёткории мардум дар пасманзари авҷгирии коронавирус дар саросари ҷаҳон, хусусан дар Осиёи Марказӣ, фарҳанги хунсупории мардум коҳиш наёфтааст. Масъулини Раёсати тандурустии вилоят мегӯянд, ки дар ҷануби мамлакат шумораи онҳое, ки ихтиёран барои дигарон бидуни подош хун месупоранд, рӯ ба афзоиш аст.

 Саидвалӣ Ватанов,1 сокини 50-солаи шаҳри Бохтар, аз нафаронест, ки чун хунсупорандаи ифтихорӣ ном бароварда, ҳамин ҳоло барои супоридани хун аз ташхис мегузарад. Ин мард дар сӯҳбат бо мухбири СССР гуфт, ҳарчанд хабарҳо дар бораи коронавирус ӯро нигарон кардааст, вале бовар дорад, ки нафаре мисли ӯ гардиши хунаш фаъол аст ба ҳар гуна вирусе метавонад мубориза барад.

- Ман ҳар сол то  6 маротиба хун месупораму ҳарос надорам, тарзи ҳаёти солимро пеш мебарам, кӯшиш мекунам, ки ҳаёти нафареро наҷот диҳам. Хунсупорӣ ба саломатӣ фоида дорад. Барои ман хунсупорӣ одат шудааст, барои кумак ба нафаре, ки рӯзе ба касе лозим мешавад. Гоҳо ба донорҳои собиқадор ҷоизаю унвон медиҳанд, вале аксарияти онҳо на барои ҷоиза ва пул, ки барои наҷоти нафаре, инсоне, одаме хун месупоранд!

 

Донорҳо афзун мешаванд!

Масъулини маркази илмии ҷумхуриявии хун дар шаҳри Бохтар мегӯянд, ки дар 3 моҳи соли ҷорӣ нисбати ҳамин давраи соли гузашта шумораи хунсупорандагон ба теъдоди 60 нафар бештар шудааст. Иброҳим Айниддинов, 1 масъули ин марказ дар сӯҳбат гуфт, ки овозаҳои ахир ва хабарҳои расонаҳо дар бораи коронавирус муштариёни онҳоро коҳиш надода, балки бештар кард, Зеро донорҳо эҳсос карданд, ки имрӯз онҳо ба одамият бештар лозим шудан доранд:

-Ин чиз сафи хунсупорандагонро коҳиш надодааст. Дар ин вилоят ҳолати овозаҳое буд, ки корона то ин ҷо ҳам расидааст. Вале ҳоло ҳама ором аст, чун нафаре бо ин беморӣ сабт нашудааст,- таъкид дошт Иброҳим Айниддинов.

Мутахассисон 1 сабаби дигари рӯ ба афзоиш ниҳодани хунсупорандаҳоро дар таблиғоти дурусту саривақтӣ дидаанд. Гуфта мешавад, шумораи донорон дар вилояти Хатлон ҳоло ба 2130 нафар расидааст.

 

Баҳодури Абдусалом, СССР, ш.Бохтар

 

Ҷумъа, Апр 17 2020

   Бо Қарори Раёсати Шӯрои уламои Маркази исломии ҶТ, ки имрӯз. 17.04.2020 ба тасвиб расид, аз 18 апрели соли ҷорӣ  гузоридани намозҳои ҷамоат-панҷвақта, ҷумъа ва таровеҳ дар масҷидҳои кишвар ва ҷамоатхонаҳо то беҳбуд ёфтани вазъият аз рӯзи 18 апрели соли 2020 манъ карда мешавад. Инчунин, дар моҳи Рамазон баргузор намудани ҳар гуна ҷамъомад-таровеҳ, ифтор, идгардак ва дигар маъракаҳо низ манъ гардида, закот, садақаи фитр ва дигар хайрияҳо ба шахсони ниёзманд, ятимон, бепарасторон, маъюбон дода мешавад. Шахсони саховатманд метавонанд садақа ва закоти худро барои пешгирии бемории сироятии мазкур ба суратҳисоби хазинаи махсус гузаронанд.

Шаҳрвандоне, ки нияти ҳаҷ доштанд, бо сабаби пурра баста шудани зиёрати хонаи Худо “Масҷид-ул-Ҳарам” маблағҳои ба ин ният ҷамъкардаи худро, аввал дар корҳои ободонии хонаву дари хеш, баъдан, барои амалҳои хайру савоб, ба монанди овардани об, кандани чоҳ, сохтани пул ва дигар корҳои хайриявии деҳаву маҳалли худ, ки ҳар кадом садақаи ҷория мебошад, сарф намоянд.

   Раёсати Шӯрои уламои ҶТ мегӯяд, ки вобаста ба вазъияти бавуҷудомада доир ба  паҳншавии бемории сироятии коруно тибқи таҷрибаи кишварҳои исломӣ, аз ҷумла Арабистони Саудӣ, Ҷумҳурии Туркия, Ҷумҳурии Исломии Эрон, Ҷумҳурии Исломии Покистон, ки намозгузориро дар масҷидҳо манъ кардаанд, зарурати муваққатан қатъи хондани намоз дар кишвари мо пеш омадааст. Ҷумҳуриҳои Қазоқистон, Қирғизистон ва Ӯзбекистон низ чунин тадбирро амалӣ кардаанд. Идораи мусулмонони Ӯзбекистон ҳамчунин доир ба манъи маросими ҳаҷ дар соли 2020 қарори дахлдор ба тасвиб расонид.

   Ин ҳама амалҳои фавриву саривақтӣ танҳо ба хотири ҳифзи саломатӣ ва наҷот бахшидани одамон аз бемории сироятии короновирус мебошад, ки дар ҳақиқат то ба имрӯз ҷони ҳазорҳо нафарро аз байн бурда, садҳо корхонаҳо бекор мондааст. 

 

Панҷшанбе, Апр 16 2020

   Мақомоти иҷроияи ҳокимияти давлатии ш.Душанбе ба таваҷҷуҳи сокинон ва  меҳмонони пойтахт мерасонад, ки бо мақсади пешгирии паҳншавии бемории коронавирус ва ҳифзи  солимии  аҳолӣ гузаронидани ҳама гуна чорабиниҳои оммавӣ бахшида ба Рӯзи пойтахт дар шаҳри Душанбе манъ карда мешавад.

Тавре сомонаи расмии МИҲД ш.Душанбе хабар медиҳад, роҳбарияти пойтахт ин амалро бо мақсади солимии сокинон ва меҳмонони пойтахт ҷиҳати пешгирӣ аз паҳншавии  сирояти COVID 19  роҳандозӣ намудааст.

   Бояд гуфт, ки ҳамасола шанбеи сеюми моҳи апрел ҳамчун Рӯзи пойтахт таҷлил карда шуда, дар маросими тантанавӣ бошад ҷамъбасти 1 қатор озмунҳои касбӣ гузаронида мешуданд.

 

Чоршанбе, Апр 15 2020

 

Тавре ба мухбири минтақавии СССР дар МИҲД вилояти Хатлон хабар доданд, бо дастури вежаи Қурбон Ҳакимзода корхонаҳои истеҳсолии "Ресандаи Қӯрғонтеппа" ва "Фарм Текс"-и ноҳияи Данғара барои истеҳсоли 2 миллион адад ниқоби муҳофизатии тиббӣ фармоиш гирифтаанд. Гуфта мешавад, ки корхонаи ҶДММ "Фарм Текс" истеҳсоли ниқобҳои босифати аз дока ва пахтаи маҳаллӣ таҳиягардида ва маводи истифодаи гигиенаи шахсиро афзоиш дода, моҳи марти соли равон ба ҳисоби миёна дар 1 шабонарӯз аз 20 то 25 ҳазор ниқоб ва маҳлули безараргардонӣ истеҳсол намудааст. Айни замон корхона дорухонаҳои шаҳру ноҳия ва муассисаҳои тиббии мамлакатро бо ин маҳсулот таъмин менамояд.   Вале новобаста аз ин боз ҳам камчин ва гарон шудани арзиши ниқобҳои тиббӣ ва маҳлулҳои дигари спиртии зиддисептикӣ дар вилояти Хатлон дар 1 ҳафтаи охир сокинонро нигарон кардааст.

Дар дорухонаҳои «Фаровон» ниқоб нест

02.04.2020. Соат бо вақти Бохтар 15:22 дақиқа. Дар 5 дорухонаи гирду атрофи бозори «Фаровон» ниқоб (маска) дида намешуд. Фурӯшандогони дорухонаҳо дар сӯҳбат мегуянд, пештар дар як рӯз 1-2 дона ниқоб бо нархи 0.60-0.80 сомонӣ ба фурӯш мерафт, ки онро ҳам ҷавонон барои мӯд харидорӣ мекарданд. Пас аз пайдо шудани бемории сироятии коронавирус, ки тамоми миқёси ҷаҳонро ба ташвиш овардааст, талабот ба ниқобҳои тиббӣ ва маҳлулҳои безараргардонӣ ба маротиф афзуд. Ҳоло бошад мо сари вақт аз анборҳои шаҳри Душанбе ва «Фарм Текс»-и ноҳияи Данғара фармоишҳои худро дастрас карда наметавонем. 

Дар дорухонаҳои гирду атрофи бозори «Фаровон»-и шаҳри Бохтар 1 дона ниқобро аз 2 то 5 сомонӣ мефурӯшанд ва он ҳам бо шиносбозӣ!!!   

Ниқоб ҳаст, лек гарон!

02.04.2020. Соат бо вақти Бохтар 15:50 дақиқа. Дар кӯчаи Нариманов, воқеъ дар назди боғи фарҳангӣ ва колеҷи тиббии Бохтар, ки 2 аптекаи калон ва хурд фаъолият мекунанд, ниқобҳои тиббиро бе ягон мушкилӣ пайдо кардан мумкин аст. Лек нархи онҳо гарон шудааст-аз 2,5 то 5 сомонӣ!

Нархи сирпиёзу испандро низ вардоштанд

Дар 2 бозори калонтарини шаҳри Бохтар-«Фаровон» ва «Ҳоҷӣ Шариф» нархи баъзе аз маҳсулоте, ки ҳамчун чораҳои пешгирикунанда аз ҷониби табибон тавсия шудаанд-сирпиёз ва испанд, яку якбора гарон шуд. 1 бандчаи испанде, ки қаблан 0.50-0.80 сомонӣ фурӯхта мешуд, имрӯз дар бозор ба 4-5 сомонӣ расида, нархи 1 кило сирпиёёз то ба 70 сомонӣ баробар шудааст.

100.000 ниқоб ройгон тақсим шуд

Дар ҳамин маврид бояд гуфт, ки Нусратулло Файзуллоев соҳибкори ватанӣ, Муассиси ҶСШК «Ресандаи Қӯрғонтеппа», ки бо исми Нусрати Бетарс маъруф аст, ба муассисаҳои соҳаи тандурустии ш.Бохтари вилояти Хатлон 100.000 ниқоби тиббиро ба таври ройгон тақдим кард. Масъулини ин корхонаи бузурги ресандагӣ афзуданд, ки айни замон корхонаи  «Ресандаи Қӯғонтеппа» пурра ба истеҳсоли ниқобҳои тиббӣ гузашта, дар 1 шабонарӯз  7000 ниқоб истеҳсол менамояд. Ниқобҳо 100% аз маҳсулоти пахта омода карда шуда, ҳамчунин дар ин корхона  ниқобҳо аз рӯи андозаҳои гуногун, аз ҷумла барои кӯдакон низ истеҳсол карда мешаванд.

Нархро кӣ танзим мекунад?

Айни замон барои ҳар 1 сокини ш.Бохтар барои харидорӣ намудани бастаи лозимии ниқоби тиббӣ ва антисептикӣ 13-16 сомонӣ лозим мешавад. Аз рӯи тавсияи мутахассисони соҳаи тиб, ҳар инсон 1 дона ниқобро бояд то 3-4 соат истифода бурда, пасон иваз намояд. Бо чунин нархи осмонбӯси дорухонаҳо ва фурӯшандаҳои бозор чӣ гуна метавон аз рӯи талаботи лозимӣ амал намуда, худу аҳли оиларо аз ҳар гуна бемориҳои сироятӣ эмин нигоҳ дошт? Ку, Хадамоти зиддиинҳисории назди Ҳукумати ҶТ, ки ба кӯча баромада, нархи ягонаро танзим намояд? Мо мавзӯро пайгирӣ хоҳем кард! Мо Метавонем!!!

 

Баҳодур Уроқов, СССР, Хатлон

 

Панҷшанбе, Апр 09 2020

   Ҷумҳурии Ӯзбекистон барои пешгирӣ аз сирояти коронавирус ба Ҷумҳурии Тоҷикистон 18 вагон кумаки башардӯстона фиристод. 

   Ин кӯмак бо супориши президенти ҶӮ Шавкат Мирзиёев сурат гирифта, аз 1000 тонна орд, маводи безараргардонӣ, ба монанди воситаҳои антисептикӣ-дезинфексионӣ, хилъатҳои тиббӣ, респираторҳо, айнакҳои тиббӣ, дастпӯшҳо, ниқоб ва пойафзоли тиббӣ иборат мебошад.

 

Панҷшанбе, Апр 09 2020

Тавре Вазорати тандурустӣ ва ҳифзи иҷтимоии аҳолии ҶТ хабар медиҳад аз 1 феврал то  8 апрел  7 ҳазору 257 нафар шаҳрвандоне, ки аз кишварҳои хориҷӣ ба Тоҷикистон ворид гардиданд, дар беморхонаҳои сироятӣ ва осоишгоҳҳои мамлакат ба карантин фаро гирифта шуданд.

 Аз ин шумора то санаи зикргардида 5 ҳазору 243 нафари онҳо ба хонаҳояшон ҷавоб дода шуда, 2 ҳазору 14 нафари дигар зери назорати карантинӣ  қарор доранд.

 

саҳ 4 аз 125

Китобҳо

Flag Counter