ХАБАРИ ДОҒ
Панҷшанбе, Март 28 2019


   Дирӯз дар асоси дастури Раиси ш.Душанбе Рустами Эмомалӣ гурӯҳи кории МИҲД ш.Душанбе дар робита ба муроҷиати шаҳрвандон бо вазъи санитарӣ-экологӣ ва фаъолияти муассисаи давлатии “Боғи ҳайвонот”-и пойтахт аз наздик шинос шуд. 
    Бино ба иттилои дар сомонаи www.dushanbe.tj нашр шуда, зимни боздид аз МД “Боғи ҳайвонот”-и пойтахт гурӯҳи кории МИҲД бо шароити нигоҳдошти ҳайвонот, ҳолати санитариву тозагии ҳуҷраҳо барои нигоҳдошт, панҷараҳо, ҳавзҳои парадагон ва роҳравҳо барои сайру гашти сокинон таваҷҷуҳ зоҳир намуд.
    Муайян карда шуд, дар самти таъмини шароити нигоҳдории ҳайвонот ва тозагии ҳуҷраҳо, инчунин роҳравҳои боғ баъзе аз камбудиҳо ҷой доранд. Аъзои гурӯҳи корӣ тамоми ҳуҷраҳо, панҷараҳо ва ҷойҳои махсуси нигоҳдории ҳайвонотро аз назар гузаронида, ба масъулин ҷиҳати таъмини шароити хуби санитариву экологии боғ, аз ҷумла нигоҳубини дурусти ҳайвонот, таъмини шароит нигоҳдошт бо риояи меъёрҳои марбута, таъмини масоҳати зарурӣ бо инобати ҳар як ҳайвони мавҷуда, пайваста тозаву озода нигоҳ доштани ҳуҷраҳои ҳайвонот, бартараф намудани бӯйи ғализ дар баъзе аз мавзеъҳои боғ, таъмини пурраи низоми корезӣ, нигоҳубин ва ба тартиб даровардани ниҳолу дарахтон ва майсазору гулзорҳо дар доираи имкониятҳои Муассиса дастур дода шуд.
   Гурӯҳи кории МИҲД ш.Душанбе бо инобати он, ки имрӯз Боғи ҳайвоноти шаҳр ба яке аз ҷойҳои дидании сокинон ва меҳмонони пойтахт табдил гардидааст, роҳбарият ва кормандони Муассисаро муваззаф сохт, ки дар баробари таъмини тозагиву озодагӣ ва беҳсозии шароити санитариву экологӣ баҳри ба роҳ мондани хизматрасонии муосирр чораандешӣ намоянд.
   Дар ин робита, ба масъулини Муассиса тавсия дода шуд, ки баҳри ҷорӣ намудани хизматрасонии муосир ба меҳмонону тамошобинон ба таври ғайринақдӣ-тавассути кортҳои электронӣ чораҳои заруриро роҳандозӣ намояд.   
Роҳбарияти МД  “Боғи Ҳайвонот”- и шаҳр вазифадор гардид, ки тамоми нуқсону камбудиҳои ҷойдоштаро дар кӯтоҳтарин муҳлат бартараф намуда, ҷиҳати роҳ надодан ба чунин ҳолатҳо назорати доимиро ба роҳ монад.

Аз идора:
   Муассисаи давлатии “Боғи ҳайвонот”-и ш.Душанбе соли 1960 бунёд гардида, то имрӯз ба таври мунтазам фаъолият мекунад. Ҳоло дар ин макони вуҳуш 135 навъи ҳайвонот бо шумораи умумии 985 сар маскун мебошанд. Баҳри таъмини тозагиву ободонӣ ва нигоҳубини ҳайвонот 50 нафар кормандон фаъолият намуда, аз ҷумла 32 нафар мутахассисони варзида сафарбар гардиданд.
Давоми чанд соли охир дар асоси созишномаҳои байниҳукуматӣ аз як қатор кишварҳои хориҷӣ ба боғ намудҳои гуногуни ҳайвонот ворид карда шудаанд, ки диққати сокинонро ба худ ҷалб намудааст.

Чоршанбе, Март 27 2019


   Дар арафаи ҷашни байналмилалии Наврӯзи хуҷастапай дар Фурудгоҳи байналмилалии Душанбе Гӯшаи иттилоотии сайёҳӣ ифтитоҳ гардид. Ин иқдоми наврӯзӣ ба «Соли рушди деҳот, сайёҳӣ ва ҳунарҳои мардумӣ» бахшида шуда, дар якҷоягӣ бо Мақомоти иҷроияи ҳокимиятӣ давлатӣ дар ш.Душанбе амалӣ карда шудааст. Дар ин бора ба мухбири СССР дар маркази матбуоти ҶСК “Фурудгоҳи байналмилалии Душанбе” хабар доданд.
   Минбаъд меҳмонону сайёҳони дохиливу хориҷӣметавонанд аз ин Гӯшаи иттилоотӣ дар бораи минтақаву мавзеъҳои тамошобоб, имкониятҳои сайёҳиву гардишгарии ҶТ, истироҳатгоҳу осоишгоҳҳои кишвар, ёдгориҳои таърихиву фарҳангӣ ва фароғатӣ маълумоти кофӣ бигиранд. Гӯшаи мазкур ба таври шабонарӯзӣ фаъол буда, дар он бо се забон-тоҷикӣ, русӣ ва англисӣ барои хоҳишмандон маълумот ва иттилооти лозима дастрас карда мешавад.

Чоршанбе, Март 27 2019


 Пагоҳ дар Кохи “Борбад”- и пойтахт Намоишгоҳи байналмилалии универсалии «Тоҷикистон-2019. Баҳор» оғоз ёфта, дар он молистеҳсолкунандагони ватанию хориҷӣ маҳсулоти худро ба намоиш хоҳанд гузошт.
     Гуфта мешавад, ки дар Намоишгоҳи байналмилалии мазкур корхонаю ширкатҳои молистеҳсолкунандаи  ватанию хориҷӣ маҳсулоти худро дар бахшҳои энергетика, технологияю таҷҳизот, саноати кимиё, мошинсозӣ, кишоварзӣ, сохтмон, хӯроки умумӣ, тиб ва дорусозӣ, технологияҳои иттилотӣ ва коммуникатсионӣ, нақлиёт ва логистика,  технология ва хизматрасонии бонкӣ, маснуоти заргарӣ, бастабандӣ ва табъу нашр, сайру саёҳат ва ҳунармандӣ ба намоиш мегузоранд.

Чоршанбе, Март 20 2019


Салом, СССРи гиромӣ ва мардумӣ! Ин, ки СССР нашрияи мардумист ва шарик дар шодиву мусибати ҷамъият, ягон шубҳа надорам. Лиҳозо, мехоҳам аз 1 мушкили худ ба СССР муроҷиат кунам. Чанд суол ба Акбар Насимзода-раҳбари БДАи ҷумҳурӣ дорам ва хоҳишмандам посух диҳанд, то мисли ман садҳо нафар, ки бо ин мушкилот дар роҳ рӯбарӯянд, огоҳ бошанду аз ҳаққу ҳуқуқи худ бархурдор.
1.Кормандони БДА бояд барои айбдор кардани ронанда чӣ исбот дошта бошанд? Масалан, дар дигар давлатҳо барои исбот акс ё «видеофиксация» доранд…
2.Дар протоколе, ки нозири роҳ тартиб медиҳад, агар ронанда розӣ набошад онро чӣ гуна пур намояд, то ин ки бе ҷарима «права»-ашро бозпас гирад?
3.Дар ҷои мо бисёр вақт кормандони БДА одат кардаанд, ки протоколро пур накарда ба ронанда медиҳанду «имзо мон!» мегӯянд. Бояд нозири роҳ ҷойҳои холиро пур карда, сипас, он ҷоеро, ки ронанда бояд пур намояд, бидиҳад. Оё ронанда ҳақ дорад, ҷойҳои холии протоколро хат занад ва дар онҷо нависад, ки «холӣ» буд?
4.Ҳолати баҳсу нофаҳмиро байни ронандаю нозири роҳ бо видеорегистратор ё бо телефон навор гирифтан ҷоиз аст? Баъзан, онҳо дар ин ҳолат доду дӯғу даранг мезананд ва «ҳақ надорӣ» гуфта, ҳатто телефонро аз дастат кашида мегиранд.
Дар чунин ҳолатҳои ҳуқуқвайронкуниҳо ронанда ба куҷо муроҷиат намояд?
5.Ҳангоми манъ кардани мошин агар нозири БДА назди ронанда наояд, то чи қадар вақт (сония) ронанда дар даруни мошини худ интизор шаваду баъди гузашти вақт мошинро ҳай карда равад? Зеро дар Кодекси мурофиавии ҳуқуқвайронкунии маъмурии ҶТ (фасли 2, боби 7, моддаи 72) гуфта шудааст, ки
«манъ кардани воситаҳои нақлиёт дар 4 ҳолат аст». Баъзан мешавад, ки нозирони роҳ сабаби манъ кардани худро намедонанд. Дар охир, «тафтиши ҳуҷҷат» мегӯянд. Ман ба онҳо борҳо гуфтаам, ки «шумо сабаби манъ карданро аз рӯи қонун надоред, дуюм ин ки тафтиши ҳуҷҷат фақат дар постҳои доимӣ (статсионарӣ) мешавад, ё ки бо фармони раёсат муваққатан амалиёти тафтиши ҳуҷҷат гузаронида мешавад. Агар фармон бошад, маро бо он шинос намоед». Оё дуруст аст, чунин рафтор бо нозири роҳ?
6.Барои тартиб додани протокол чӣ қадар вақт лозим аст?
7.Пешниҳоди ҳуҷҷатҳо чигуна бояд бошад? Яъне дар дасти ронанда бояд бинад, ё ба дасти нозири роҳ ҳуҷҷатро додан ҳатмист? Чаро, ки онҳо одат кардаанд, ки ҳуҷҷатҳоро гирифта, бе парво ба мошини худ рафта мешинанд ва вақтро кашола медиҳанд. Гоҳе ҳолат, мошинро монда, баъди чанд вақт, меоям, ки рақами давлатии мошинамро канда гирифтаанд... Дар ин ҳолат тибқи қонун чӣ бояд кард? Дар дигар давлатҳо агар нозирони роҳ сабаби манъ карданашонро аниқ карда натавонанд ронанда ҳақ дорад аз нозири роҳ «бланка барои рапорт» талаб карда, аз болои ӯ ба роҳбараш шикоят барад.

Фаридун Ализода,
ҷамоати Ҳайдар Усмонов, куч.Шариф Қаландаров-231, н.Б.Ғафуров,
тел: 92 888 28 37

Чоршанбе, Март 13 2019


  Ширкати миллии ҳавопаймоии Тоҷикистон-ҶСК «Тоҷик Эйр» аз 31.03.2019 парвозҳои худро сар ва дигарбора барқарор менамояд. Тамоми санадҳои меъёрию ҳуқуқии танзимшаванда ва иҷозатдиҳандаи ширкати ҳавопаймоии  «Тоҷик Эйр» аз ҷониби Агентии авиатсияи граждании назди Ҳукумати ҶТ дастрас карда шудааст. Пас аз мувофиқа бо дигар сохторҳои марбута парвози ҳавопаймоҳои ширкати ҳавопаймоии «Тоҷик Эйр» дар самти Душанбе –Москва барқарор карда мешаванд.
   Тавре ба мухбири СССР дар маркази матбуотии ширкати мазкур хабар доданд, сар аз 11 март дар тамоми нуқтаҳои чиптафурӯшии кишвар фурӯши чиптаҳои ширкат дар хатсайри Душанбе-Москва ва Москва-Душанбе оғоз гардида, парвози нахустин дар ин самт рӯзи 31-уми марти соли равон  дар назар дошта шудааст.
Пас аз анҷоми расмиёти муайян моҳи апрели соли равон давра ба давра парвозҳои ширкати ҳавопаймоии «Тоҷик Эйр» дар дигар хатсайрҳо низ барқарор карда мешаванд.

Чоршанбе, Март 06 2019


Хатлон яке аз вилоятҳои калонтарини мамлакат ба шумор рафта, то ба имрӯз дар он зиёда аз 68,436 хоҷагии деҳқонӣ ба кишоварзӣ машғуланд. Новобаста аз ин ҳамасола теъдоди зиёди заминҳои корам аз киштукор монда истодаанд. Чунончи, тибқи маълумоти оморӣ аз с.2012 ин сӯ зиёда аз 10,571 га замин аз гардиши кишт мондаанду бо сабабҳои зерин истифода нашудаанд:
1.Шӯршавӣ ва ботлоқшавӣ;
2.Аз кор баромадани шабакаҳои каналу иншоот;
3.Дар натиҷаи селоб зер кардан, нагузарондани корҳои мелиоративӣ;
4.Аз нав таъмир ва таҷдид намудани шабакаҳои обёрикунанда;
5.Набудани шабакаҳо барои обёрӣ.
Тибқи маълумоти Кумитаи замини вил.Хатлон дар 7 соли охир бештар аз 1500 га замини корам дар ноҳияи Дӯстӣ (собиқ Ҷиликул) 1699 га, н.Қубодиён 1192 га, н.Ҷ.Балхӣ 1127, н.Панҷ 1342 га аз коркарду гардиш мондаанд. Масъулини кумита мегӯянд, нисбати солҳои 2012 заминҳои аз гардиши кишоварзӣ монда истода 1 маротиба кам шудааст ва мутахассисон тамоми талошҳоро мекунанд, ки аз ин раванд пешгирӣ намоянд. Дар соли 2018 аз майдони умумии вилоят 4653 га замин аз гардиши кишоварзӣ берун мондааст. Замини партов бошад ба ҳолати 1.01.2019 дар марзи маъмурии шаҳру навоҳии вилоят 20,292 га-ро ташкил мекунад. Сабабҳои асосии бекоршавӣ ин баланд будани обнокии замин аст.
Тибқи маълумоти расмӣ дар 5 соли охир бо мақсади нигоҳ доштани заминҳои кишт дар ҳолатӣ корӣ, беш аз 10.000 техникаву таҷҳизоти кишоварзӣ ба маблағи 570 млн сомонӣ ворид шуда, барои ин дар ҳаҷми беш аз 200 млн сомонӣ имтиёзҳо татбиқ шудаанд. Аз ҷониби Ҳукумати ҶТ ба Вазорати кишоварзӣ, Кумитаи давлатии идораи замин ва геодезӣ, Агентии беҳдошти замин ва обёрӣ, мақомоти иҷроияи маҳаллии ҳокимияти давлатӣ супориш дода шудааст, ки бо ҷалби соҳибкорони ватаниву хориҷӣ ҷиҳати беҳтар намудани ҳолати мелиоративии заминҳо, ба роҳ мондани усулҳои интенсивии истеҳсолоти кишоварзӣ, пурра ба гардиши кишоварзӣ ворид намудани замин, махсусан, баланд бардоштани маданияти истифодаи замин чораҷӯӣ намоянд. Дар баробари ин, супориш шудааст, ки дар самти зиёд намудани майдони боғу токзор ва ба ин васила афзун гардонидани истеҳсоли меваҳои аз ҷиҳати экологӣ тоза, ба стандартҳои ҷаҳонӣ мутобиқ ва ба содирот нигаронидашуда тадбирҳо андешида шаванд.

Баҳодури Абдусалом, СССР, вилояти Хатлон

саҳ 17 аз 113

Китобҳо

Flag Counter