Пеш аз оғози маҳфили ёдбуд, ширкаткунандагони чорабинбӣ ба хотири ҷоннисорӣ ва хизматҳои арзандаи 2000 кормандони фавтидаи мақомоти корҳои дохилӣ, ки баҳри сулҳу субот дар кишвар, ҳифзи манфиатҳои давлату миллат ва мубориза бо ҷинояткорӣ ҳалок гардидаанд, дар пояи муҷассамаи хотира гулчанбар гузоштанд. Дар маҳфили ёдбуд хотираи неки собиқ Вазири корҳои дохилии ҶТ, генерал-полковники милитсия, шодравон Ҳомиддин Ҳасанович Шарифов, генерал-майорҳо Абдуллоев Файзулло, Раҳимов Изатулло Негматович, Қосимов Сӯҳроб Абдулҳақович ва Ҷурақулов Маҳмадсаид ёдоварӣ гардид. Маҳфилро вазири корҳои дохилии Тоҷикистон генерал-лейтенанти милитсия Рамазон Раҳимзода ҳусни оғоз бахшида, аз ҷумла чунин гуфт: “Ҳар гоҳе ки сухан аз мавқею мартабаи инсонҳо меравад, бо такя аз фаросату маърифат ва донишу малакаи корбарӣ ба онҳо баҳогузорӣ мекунем. Зеро ҳаёт ва кору фаъолият ин худ баёнгари шарҳи ҳоли ҳар як фард аст, ки бо гузашти солҳо аз онҳо ёдоварӣ карда мешавад. Маҳфиле, ки имрӯз баргузор мегардад, ба хотири ёдбуди фарзандони баруманду некирода, шахсиятҳои бонангу номус ва кормандони қавииродаи мақомоти корҳои дохилӣ мебошад, ки тӯли солҳои зиёд дар мушкилтарин вазъият ва лаҳзаҳои сарнавиштсоз ба нафъи давлату миллат, ҳифзи дастовардҳои даврони истиқлолият, ба хотири осоишу оромиш ва тинҷиву осудагии сокинони кишварамон хизмати арзанда намудаанд”.
Сипас, барои поси хотири тамоми он абадмардони мақомот лаҳзаи хомӯшӣ эълон гардид. Дар идомаи суханрониаш Вазири корҳои дохилӣ Рамазон Раҳимзода қайд намуданд, ки Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳар чорабиниву ҷамъомадҳои тантанавӣ аз саҳми босазои кормандони милитсия, онҳое, ки дар таъмини суботу оромӣ, амнияти шаҳрвандон ва мубориза бо ҷинояткорӣ ҷони хешро нисор карданд, ёдовар мешаванд.
«Милитсия ҳомии назму тартиботи ҷамъиятӣ, муҳофизатгари боэътимоди халқ ва давлати Тоҷикистон, посдори суботу оромӣ ва кафили осудагиву хотирҷамъии мардум аст». Онҳое, ки ба баҳои баланди Сарвари давлат содиқ монданд, ҳастанд ва хоҳанд монд, фарзандони арзандаи ин сарзамин ва ин миллати кӯҳанбунёд ба ҳисоб мераванд. Роҳбарияти давлату миллат, Вазорати корҳои дохилӣ ҳамеша ба онҳое, ки барои пешрафту шукуфоӣ, тинҷиву осоиштагӣ ва ободии ин диёр талош намуданд эҳтиром гузошта, дар симои онҳо фарзандони содиқи ватанро мебинад. Дар маҳфили ёдбуд қайд шуд, ки дар симои шодравон Ҳомиддин Шарифов, Файзулло Абдуллоев, Изатулло Раҳимов, Сӯҳроб Қосимов, Саид Ҷурақулов хизматҳои шоён ва назарраси полковникҳои милитсия Қудратулло Азимов, Донахон Нодирхонов, Ҳамза Маҳмадзода, Шодмон Маҳкамов, Азиз Ятимов, Ҳикматулло Қурбонов, Усмон Ҷумаев, Рауф Норматов, Зоиршо Қаландаров, Абдулло Ҳафизов ва садҳо нафари дигарро, ки барои суботу оромии кишвар ва мубориза бо ҷинояткорӣ заҳмати зиёд ба харҷ доданд ва имрӯз дар миёни мо нестанд, пеши назар оварда мешаванд. Хотираи неки онҳо ҳамеша дар дилу дидаи кормандони милитсия бо некӣ ёдоварӣ гардида, роҳбарияти Вазорат ҳамеша ба наздикон ва пайвандони онҳо кӯмаку дастгирии худро мерасонад. Кормандони милитсия ҳамеша аз ҳолу аҳволи хонаводаи онҳо бохабар гардида, барои идомаи корашон дар ин ҷодаи пурифтихор фарзандонашонро барои таҳсил дар Академия ва кор дар мақомот дастгирӣ менамоянд. Дар идомаи чорабинӣ собиқ Вазири корҳои дохилӣ генерал-полковник Сайдамир Зуҳуров, собиқадорони мақомоти корҳои дохилӣ Раҳмонқул Зоиров, Сафар Соҳибназаров, Шералӣ Давлатов, Ҷумабой Маликов, Абдухалил Азизов, раиси Шӯрои собиқадорони Вазорати корҳои дохилӣ Иззатулло Шарипов баромад намуда, вобаста ба кору фаъолият ва ҳаёти шодравон Ҳомиддин Шарифов, Файзулло Абдуллоев, Изатулло Раҳимов, Сӯҳроб Қосимов ва Саид Ҷурақулов, хислатҳои накӯ ва мактаби зиндагии онҳо ёдовар шуданд. Таҷрибаи бойи ин родмардон ба кадрҳои ҷавон ва наслҳои оянда дарси ибрат буда, хизматҳои арзандаашон ҳеҷ гоҳ фаромӯш нахоҳад гашт. Маҳз натиҷаи ранҷу заҳмати шабонарӯзӣ ва хизмати содиқонаю софдилонаи кормандони мақомоти корҳои дохилӣ ва дигар сохторҳои қудратии кишвар буд, ки ба ҳама он даҳшату нооромиҳо ва амалу кирдори зишти гурӯҳҳои муташаккили ҷинояткор хотима дода шуда, дар кишвар сулҳу амонӣ ҳукмфармо гардидааст.
Қобили қайд аст, ки дар ин маҳфили ёдбуд фарзандон, наздикону пайвандони шодравон Ҳомиддин Шарифов-генерал-полковники милитсия, собиқ Вазири корҳои дохилӣ, генерал-майорони милитсия Иззатулло Раҳимов, Сӯҳроб Қосимов, Файзулло Абдуллоев ва Саид Ҷурақулов иштирок карда буданд, ки зимни суханронӣ барои баргузории чунин кори хайр, гиромидошти ёди наздиконашон ба роҳбарияти Ҳукумати кишвар, Вазорати корҳои дохилӣ ва бевосита ба Вазири корҳои дохилӣ миннатдории худро баён доштанд. Зимни баргузории маҳфили ёдбуд дар иҷрои ҳунармандони шинохтаи ҷумҳурӣ Қурбоналӣ Раҳмонов, Ҷовидон Нозимов ва Абдулхайр Муминов марсия хонда шуд. Барандагии чорабиниро полковники милитсия Ҳасан Шерализода ба зимма дошт. Дар анҷоми чорабинӣ ҷиҳати арҷгузорӣ барои хизматҳои арзандаашон дар мақомоти корҳои дохилӣ бо фармони Вазири корҳои дохилӣ, генерал-лейтенанти милитсия Раҳимзода Рамазон Ҳамро шодравон Ҳомиддин Шарифов, Файзулло Абдуллоев, Изатулло Раҳимов, Сӯҳроб Қосимов ва Саид Ҷурақулов бо медали “Милитсияи Тоҷикистон” сарфароз гардонида шуданд, ки ин мукофотҳои фахриро Вазири корҳои дохилӣ ба фарзандонашон супорид. Ҳамчунин, дар робита бо ин, фармони Вазири корҳои дохилӣ, генерал-лейтенанти милитсия Раҳимзода Рамазон Ҳамро ба имзо расонида шуд, ки минбаъд ҳар сол ҳафтаи охири моҳи март, ҳамчун рӯзи “Ёдбуди кормандони фавтидаи мақомоти корҳои дохилӣ” дар тамоми ҷузъу томҳои Вазорати корҳои дохилӣ дар шаҳру вилоят ва ноҳияҳо таҷлил карда мешавад.
Х.Солиҳов, подполковники милитсия
Р.S. Ба ин матлаби полковники милитсия Хусрав Солиҳов чизеро илова карданӣ нестем, ҷуз аз сипосгузориву баёни арзи эҳтиром ба ҷавонмардӣ ва иқдоми наҷибонаи Генерал Раҳимзода. Қарори ба тавсиб расонидаи Раҳимзода дар бораи таҷлили “Ёдбуди кормандони фавтидаи мақомоти корҳои дохилӣ” далели инсондӯстиву одамшиносӣ, ҷавонмардиву ҳимматбаландӣ ва муҳаббату садоқати самимӣ ба Ватан доштани Вазири корҳои дохилии Тоҷикистон мебошад. Дуруст аст, ки газетаи мардумии СССР Раҳимзодаро вазири №1-и кабинети вазирони Ҳукумати Тоҷикистон мешиносад. Раҳимзода идомадиҳандаи кори неки Ҳомиддин Ҳасановичу Файзулло Абдуллоев, Сӯҳроб Қосимову Изатулло Раҳимов, Саид Ҷурақулову он ду ҳазор нафарест, ки барои амнияту субот ва тинҷиву осудагии ҳар яки мову шумо ҷонбозиву ҷоннисорӣ намуданд. То миллати Тоҷик чунин Генералҳо дорад аз ҳама ноамниҳо вораста аст!!! Мо Метавонем!!!
Нуралӣ Хоркашев, собиқ ёвари Генерал-майор Сӯҳроб Қосимов, дар ФФТ
