Замоне муаллим қадру қимат дошт, лек афсӯс, ки имрӯз бо айби баъзе садрнишинон «пулҷамъкунак» шудааст. Аз аввали соли хониш оғоз меёбад «пулталбӣ»-и муаллим. Аввал маблағи китобҳои иҷораро ҷамъ мекунем. Сипас пули дафтари роҳбари синф (журналҳоро). Соли дуюм аст, ки пули рӯзномаҳои хонандагон ҳам ба гардани роҳбарони синф бор шудааст. Баъдан, барои «обуна» пул мечинем, ҳол он ки ягон хонанда чӣ будани обунаро намедонад. Зеро нашрияҳое, ки хонандагон ба он обуна мешаванд, соле 1-2 бор дастрас мекунанд. Дере нагузашта ба хонандагон марка тақсим мекунанд. Бо ҳамин то охири соли хониш роҳбарони синф бо амри «боло» пули чиптаи филму консертҳоро меғундоранд. Дар натиҷа муаллим «пулҷамъкунак» ном мегирад, лек фоидаи онро ким-кӣ мебинаду номи мо бад. Кормандони раёсати ВКДи вил.Хатлон барои тафтиши кори омӯзгорон ба мактабҳои ноҳия, аз ҷумла, ба мактаби мо омаданд. Нақшаи тақвимии солона, нақшаи дарси яксоата, дарсҳои тарбиявӣ, дафтарҳои гардишии хонандагон ва корҳои хаттиро тафтиш карданд. Ҳини «санҷиш» аз зери нохун чирк кофтанд. Чун ба шӯъбаи маорифи ноҳия муроҷиат кардем, онҳо ҳайрон шуданд, яъне хабар надоштанд. Магар раёсати маорифи вилоят аз уҳдаи рисолати хеш баромада наметавонад, ки кормандони ҳифзи ҳуқуқ барои тафтиши омӯзгорон меоянд?! Бо ин гуна тафтишҳои бемаънӣ дар қатори иди асалу харбузаю оши палав Иди Касбии Омӯзгорро ба расмият дароварда ҷашн мегирифтанд, муаллим рӯҳбаланд мешуд.

Аминҷон Муҳаббатов,

ҷонишини директор оид ба таълими мактаби №2,

Садбарг Салимова, омӯзгори ҳамин мактаб, н.Ёвон