Вазорати маориф ва илми ҶТ ба ҳукумати кишвар тавассути ирсоли 1 дархост пешниҳод кардааст, ки масъалаи баргардонидани таътилҳои тирамоҳӣ, зимистона ва баҳориро дар соли хониш барои мактаббачагон баррасӣ намояд. Чуноне ки Раҳматулло Мирбобоев, муовини аввали вазири маориф ва илми мамлакат имрӯз зимни баргузории нишасти матбуотӣ иброз намуд, барои баргардонидани таътилҳои мавсимии мактабӣ тибқи низоми қаблии таҳсил бояд ба баъзе аз ҳуҷҷатҳо, амсоли низомнома оид ба ҷорӣ кардани таътилҳо тағийрот ворид карда шавад ва агар вазорату идораҳои дахлдор ба мувофиқа расида, барои ин кор иҷозат диҳанд, мумкин аст аз соли нави таҳсил таътилҳои тирамоҳӣ, зимистона ва баҳорӣ баргардонида шаванд. Бояд қайд намуд, ки Газетаи мардумии СССР аз оғози фаъолият то ба имрӯз тарафдори баргардонидани таътилҳои мавсимӣ барои хонандагони мактабҳои миёнаи кишвар буда, борҳо дар ин бора матлабу мақолаҳои танқидӣ низ нашр кардааст. Аз ҷумла, муаллифони матлабҳои рӯзнома бар зидди таътили 1-моҳаи мактаббачагон дар моҳи январ буда, аз он тарафдорӣ менамуданд, ки соли хониш бояд тибқи низоми гузашта 25 май ба итмом бирасад.
СССР
Ҷумҳурии Тоҷикистон тасмим гирифтааст дар вилоятҳои Самарқанду Фарғонаи Ҷумҳурии Ӯзбекистон 2 муассисаи таълимӣ - 1 мактаби миёна ва 1 боғчаи кӯдакона сохта ба истифода бидиҳад. Дар ин бора имрӯз ба намояндагони ВАО Раҳматулло Мирбобоев, муовини аввали вазири маориф ва илми кишвар хабар дод. Бино ба иттилои ӯ, ҳамзамон 1 мактаб дар н.Спитамен ва 1 маркази тиббӣ дар н.Қубодиёни вил.Хатлон аз ҷониби Ҷумҳурии Ӯзбекистон сохта ба истифода дода мешаванд. Бояд зикр намуд, ки айни замон дар ҷумҳурӣ 77 муассисаи таълимӣ бо забони ӯзбекӣ фаъолият мекунанд. Инчунин дар 426 муассисаи таълимӣ таҳсил ҳам ба забони тоҷикӣ ва ҳам бо ӯзбекӣ ба роҳ монда шудааст. Айни ҳол дар ҷумҳурӣ 130.000 талаба бо забони ӯзбекӣ ба таҳсил фаро гирифта шудаанд.
СССР
Санаи 17.07.2018 дар бинои асосии Донишгоҳи Миллии Тоҷикистон бо ширкати намояндагони ВАО нишасти матбуотӣ баргузор шуд. Ректори ДМТ, муҳтарам Маҳмадюсуф Имомзода дар оғози нишаст аз дастовардҳои ин Донишгоҳи воқеан ҳам бонуфузи кишвар ёд оварда гуфт, ки «Дар донишгоҳ барои таъмини раванди таълим бо техника ва технологияи информатсионӣ ва иҷрои корҳои илмию тадқиқотӣ 3256 адад компютер ва дар синфхонаҳои таълимӣ 145 адад тахтаи электронӣ, 180 адад видеопроектор, 523 адад принтери бисёрфунксионалии лазерӣ ва 13 адад сканер насб шудааст, ки барои пешбурди фаъолияти таълимию илмӣ ва методӣ ба омӯзгорону донишҷӯён хизмат мерасонанд…».
Имомзода дар идома перомуни фаъолияти таълимӣ дар ДМТ афзуд, ки моҳи марти соли ҷорӣ бо сарпарастии молии Ҷумҳурии Мардумии Чин ҷиҳати пайвасти ноқилҳои хатти интернетии Wi-Fi дар «Шаҳраки донишҷӯён» $396.000 ҷудо карда шуда, корҳои васлкуниро Ҷамъияти дорои масъулияташ маҳдуди «Хуавей» ба роҳ монд. Хатти интернет дар 11 нуқтаи беруна ва 15 нуқтаи дохила пайваст гардид, ки қисми зиёди биноҳои таълимии Шаҳракро фаро гирифт.
Мавсуф дар бахши корҳои илмию таҳқиқотӣ ва диссертатсия гуфт, ки «дар 10 Шӯрои миллии диссертатсионии назди ДМТ 38 рисолаи номзадӣ ва 5 рисолаи докторӣ дифоъ карда шуд. Аз ин шумора, 24 рисолаи номзадӣ ва 3 рисолаи докторӣ аз ҷониби устодону кормандони донишгоҳ навишта шудааст. Дар 7 Шӯрои диссертатсионии Комиссияи олии аттестатсионии Федератсияи Россия 29 рисолаи номзадӣ ва 2 рисолаи докторӣ дифоъ карда шуд…».
Дар ҳамин маврид Маҳмадюсуф Имомзода оид ба фошкориҳои ахири сайти интернетии Диссернети Русия ва вокуниш нишон надодани ҷониби Тоҷикистон гуфт, ки «амали диссернет ҳадафмандона аст. Аз сӯи дигар интернет майдонест, ки он ҷо сиёҳ ҳам ҳаст, сафед ҳам, таҳқир ҳам ҳаст, таъриф ҳаст, сухани қабеҳу дашном низ. Ҳар кас ҳар чӣ хоҳад гуфтан мегирад. Аммо ҳар кас бояд ҳарфи худашро гӯяд ва ба ин мутахассисон бояд вокуниш нишон бидиҳанд. Дар ДМТ, дар бахши илм ва инноватсия беҳтарин мутахассисон фаъолият доранд ва метавонанд, ба ин масъала рӯшанӣ андозанд. Ин мавзӯи сӯҳбати илмӣ ва баҳси илмӣ ҳам нест…».
Хабарнигори мо
Вазорати маориф ва илми мамлакат мегӯяд, ки шояд аз соли нави таҳсил таътили қаблӣ барои хонандагони мактабҳои миёнаи ҷумҳурӣ ва низоми пештараи кории мактабҳо аз сари нав ҷорӣ гашта, айни замон комиссияи махсуси вазорати номбурда барои омӯзиши ин масъала таъсис ва кори хешро оғоз кардааст.
Бино ба итиллои Эҳсони Хушбахт, котиби матбуотии вазорати маориф ва илми ҶТ, тағийрот дар низоми таҳсил ҳатман сурат мегиранд ва шояд аз соли нави таҳсил таътилҳои қаблӣ дубора ҷорӣ карда мешаванд. Ин масъала пас аз омӯзиши комиссия дар коллегияи вазорати мазкур баррасӣ хоҳад шуд.
Бояд қайд намоем, ки ҳафтаи гузашта 1 гурӯҳ фаъолони шабакаи ичтимоиӣ Фейсбук ба номи Озода Раҳмон, роҳбари Дастгоҳи иҷроияи Президенти ҶТ нома навишта, аз эшон хостаанд, ки ба масъалаи баргардонида шудани таътилҳои мактабӣ ва низоми қаблии хониш дар мактабҳои кишвар таваҷҷӯҳ зоҳир намояд. Чуноне ки дар нома навишта мешавад аз байн бурдани таътилҳои тирамоҳӣ ва баҳорӣ, тамдиди соли хониш ва 1 моҳи истироҳат дар фасли зимистон ба вазъи рӯҳӣ ва ҷисмонии хонандагон, алалхусус толибилмони синфҳои ибтидоӣ таъсири манфӣ расонида, ба аз байн рафтани шавқу рағбат нисбат ба хониш оварда мерасонад.
Маъруф Муҳаммадзода, раиси ш.Хуҷанд бахшида ба Рӯзи Ҷавонон дар кишвар 100 нафар наврасону ҷавонони фаъоли шаҳрро ба ҳузур пазируфта, идрорпулии хешро ба эшон тақдим дошт.
Чуноне ки котиби матбуотии раиси ш.Хуҷанд Маъмур Юсуфов хабар дод, Маъруф Муҳаммадзода наврасону ҷавононро бо Рӯзи ҷавонони Тоҷикистон табрику таҳният гуфт, изҳори умедворӣ намуд, ки дар ояндаи наздик низ ҷавонони мо дар дигаргунсозиҳои ҷомеаи навин фаъолона иштирок карда, дар муаррифии давлати тоҷикон ва баланд бардоштани парчами Тоҷикистон дар арсаи ҷаҳонӣ нақши шоиста мегузоранд. Ҷавонони саодатанд, масъулияти бузурги таърихӣ ва қарзи пурифтихори фарзандии худро сарбаландона адо намуда, ба хотири рушди рӯзафзуни кишвари биҳиштосоямон ҳамчун созандагони фардои Ватан хизмати арзандаро ба ҷо меоранд.
Иттилоъ дода шуд, ки ташаббусҳои созандаи ҷавонон аз ҷониби Ҳукумати кишвар ҳамеша дастгирӣ ёфта, ҷавонон дар корҳои роҳбарии шохаҳои ҳокимият, истеҳсолоту тиҷорат, илму таҳсилот ва ғайраҳо пурсамар фаъолият доранд. Аз ҷумла, 75 нафар олимони ҷавон ва 29 нафар ихтироъкорони ҷавон дар донишгоҳҳо фаъолият бурда, саҳми арзандаи худро дар пешрафти ҷомеа мегузоранд. Имрӯзҳо зиёда аз 365 - нафар ҷавонписарону ҷавондухтарони шаҳрамон дар муассисаҳои таҳсилоти олии касбии кишварҳои хориҷи кишвар таҳсил мекунанд.
Падару модарони толибилмони н.Кӯшониён аз муаллимони мактабҳо изҳори норизоӣ доранд, ки ҶДММ «Суҳайл Синамо» барои намоиши 1 филм нархи 1 чиптаро 6 сомонӣ нархгузорӣ кардааст ва бояд онро ҳатман хонандагони мактабҳои ноҳия бихаранд. Ин дар ҳолест, ки на танҳо дар Кушониён, балки дар тамоми шаҳру ноҳияҳои вил.Хатлон чиптаҳои синаморо дар байни мактабҳо тақсим карда, ба фурӯш гузоштаанд. Хонандагон ва волидайни онҳо мегӯянд, 1 чиптаи филм барои хонандагон, ки бояд рӯзҳои наздик намоиш дода шавад, 6 сомонӣ арзиш доштааст. Гулрухсор Ҳусейнова, сокини ҷамоати деҳоти «Бохтариён»-и н.Кушониён дар сӯҳбат бо мухбири СССР изҳор дошт, ки писараш дар муассисаи таълимии №19 таҳсил мекунад ва чанд рӯз аст, мегӯяд «то 3 сомонӣ надиҳӣ ба мактаб намеравам, чунки муаллим маҷбур дорад пули чиптаи киноро пардохт кунам». Билохира, 3 сомонӣ додаму чиптаро оварда гуфт, ки «1 чиптаро 2 нафар харидорӣ кардем». Аз ин маълум мешавад, 1 чипта 6 сомонӣ арзиш доштааст.
Кинои пулакӣ
Мо падару модарон дар ҳайратем, ки чӣ гуна маҷбур ба хонандаҳо кино намоиш медиҳанд? Хуб намешуд, ки дар вақти холигии хонандаҳо дарсҳои иловагӣ гузаранд! Аҷибаш ин, ки чаро филмҳои навро дар кинотеатрҳои шаҳру ноҳияҳо пешкаши мардум намекунанд? Эҳтимол аст, ки филми таҳия кардаи онҳо ба мардум писанд нест, ки харҷи таҳиякардаи филмро аз талабагон бо ситам мегиранд. Аз Вазорати маориф ва илми ҶТ хоҳиш мекунем, манфиатҳои хонанда ва муаллим ҳимоя шавад, на аз филмсозон - гуфт Гулрухсор.
1 сокини деҳаи «Хушвахт»-и ҷамоати деҳоти Заргари ноҳия дар сӯҳбат бо СССР шиква кард, ки кормандони ширкати «Суҳайл Синамо» маҷбур ба фарзадонамон филм нишон дода, барои намоиши он дар 3 сомонӣ чипта мефурӯшанд. Ин дар ҳолест, ки 1 чиптаро 2 хонанда мехарад ва ин ба 6 сомонӣ рост меояд. Гап сари он аст, ки хонандаи синфи 1 ва 2, ки ҳоло қобилияти фаҳмиш надорад, аз кино чиро мефаҳмад?
Умеди Карим, падари 1 хонанда аз ҷамоати деҳоти «Меҳнатобод», ки фарзандаш дар муассисаи таълимии №54 таҳсил мекунад, гуфт:
-Ман зид нестам, ки кӯдакон филм тамошо кунанд, лек тамошои филм дар шароити хона хуб аст, дар гармии синфхона ё зимистон дар сардӣ намехоҳам, ки фарзандам 1 филмро, ки шояд барои ӯ писанд нест, бубинад. ҶДММ «Суҳайл Синамо» филмеро ба хонанда «пешкаш» мекунад, оё мазмуни он барои кӯдакони синни мактабӣ мутобиқат мекарда бошад? Хуб мешуд, пули филмро ба омӯзгороне ҷудо карда, дарси иловагӣ медоданд.
Дар замони шӯравӣ филмҳо дар шаҳру навоҳӣ намоиш дода мешуд, ки он вақт мардум вазъи иқтисодии хуб дошту ҳаваси тамошои филм, вале ҳоло филмро ба 1 мақсад намоиш медиҳанд, ки харҷи наворбардорӣ ва кори ҳунармандонро пардохт кунад. Суоле ба миён меояд, ки аз тамошои филм, ки шояд ба аксар хонандагон чизе намедиҳад, кӣ манфиатдор аст: Мудирони мактабҳо, идораҳои маориф ё филмсозон?
Дар мактуби Вазири маориф ва илми ҶТ ба ҶДММ «Суҳайл Синамо» тавсия дода шудааст, ки бо мудирони маорифи шаҳру ноҳияҳои вил.Хатлон мувофиқа карда шавад ва берун аз дарс ва бо розигии падару модар филмро пешкаши хонанда кунанд. Аммо падару модарон мегӯянд, бо онҳо касе чизеро мувофиқа накардааст.
Мухбири худамон
вилояти Хатлон
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
