Раҷабалӣ Одинаев-раҳбари “Умед 88” бо 1 нома аз Эмомалӣ Раҳмон-президенти Тоҷикистон хостааст, барои раҳоияш мусоидат кунад ва дар сурати раҳоӣ метавонад ҳам қарзашро аз нирӯгоҳи Роғун баргардонад ва ҳам дар сохтмони ин тарҳи барои Тоҷикистон хело ҳам муҳим ёрӣ расонад. Ин дар ҳолест, ки баррасии парвандаи ӯ ҳамин шабу рӯз дар Суди Олӣ идома дорад. Хотиррасон мекунем, ки Одинаев аз октябри с.2017 то ҳол дар боздошт аст. Ӯро барои напардохтани 171 млн сомонӣ пули сохтмони НБО Роғун, ки Вазорати молияи ҶТ с.2015 ҳамчун қарз ба ширкати зери раҳбарии ӯ дода буд, муттаҳам мекунанд…
Ӯ дар ин номааш гуфтааст, ки тибқи созишнома бо Вазорати молия аз 171 млн сомонии қарз ширкати “Умед 88” ба маблағи 100 млн сомонӣ ба сохтмони нерӯгоҳи Роғун сӯзишвории дизелӣ медод ва 71 млни дигарро дар шакли нақд мепардохт. Ба гуфтаи ӯ, қисме аз сӯзишворӣ барои истифода дар сохтмони Роғун ворид шуда буд ва ин кор бояд то нимсолаи аввали соли 2017 анҷом меёфт.
Одинаев бо илтиҷо аз Пешвои Миллат хостааст, дар озодии ӯ бо шарти берун нарафтан аз маҳалли зисташ кумак кунад. “Тамоми молу амволи ширкати “Умед-88” ба ҳабс гирифта шуда, ба фурӯш гузошта шудааст, ки маблағи он аз пули қарз зиёд мебошад. Аммо монеагузорӣ ба фурӯши амвол ва дар ҳабс нигоҳ доштани мо ба амалӣ гардонидани он имкон намедиҳад. Зеро ҳузур надоштани соҳибмулк ҳангоми фурӯши амволи ширкат, боис ба нобоварӣ ва шубҳанокии харидорон мегардад”, - гуфтааст ӯ дар номааш.