Хоменко Юлия Анатолиевнаи 23-сола (с.тав.21.10.1995), сокини ноҳияи Шоҳмансур, маҳаллаи Миралӣ Маҳмадалиев-3, хонаи №14 (тел: 901 09 11 07) дар меҳмонии газетаи мардумии СССР гуфт, ки “Ман аз соли 2007 дар Тоҷикистон ҳастам. Аз Ҷумҳурии Украина, аз ноҳияи Старосинявськийи вилояти Хмельницька, омада будам. Аз синфи 6 то синфи 11 дар мактаби миёнаи №36-и ноҳияи Рӯдакӣ хонда, номаи камол-аттестат гирифтам. Аммо то ҳол паспорт-шиносномаи шаҳрвандӣ надорам... Шавҳари ман-Рустам Тоҷиддинович Элов тоҷик асту зиндагии якҷоя дорем ва ҳоло соҳиби 1 фарзандем. Хуллас, барои шиносномаи шаҳрвандӣ гирифтан ба мақомоти дахлдори кишвар муроҷиат кардам, онҳо гуфтанд, ки “ту аввал аз Украина ҳуҷҷати тасдиқкунанда биёр, то бидонем, ки ту шаҳрванди куҷоӣ?” Аз Сафорати Украина дар Тоҷикистон низ чанд рӯз пеш маълумотнома гирифтам, аммо боз ҳам паспорт доданӣ нестанд. Барои гирифтани паспорт ба суди ш.Душанбе ва ОВИРи н.Шоҳмансур арз кардам, аммо ягон натиҷа нест. Охир, ман соҳиби 1 фарзандам, пас чаро шаҳрванди Тоҷикистон набошам? Аз Дастгоҳи президенти ҶТ эҳтиромона хоҳиш дорам, ки ба ин мушкили ман кӯмак намоянд, зеро мехоҳам шаҳрванди Тоҷикистони биҳиштосо бошам...”.
Хонанда ва мухлиси хурдсоли газетаи СССР Мирсаид Шарифзода, хонандаи синфи 6-и литсейи ДМТ (тел: 901 01 07 26) бо 1 даста грамота ва медалҳои варзишӣ дар гардан меҳмони газетаи СССР шудаву гуфт: Ман бо ин Ватан ва ин Ватан низ бо чунин фарзандаш ифтихор дорад. Зеро ояндаи ин Миллату ин Ватанем! Ва бояд на танҳо ман, ки тамомии ҳамнаслонам чунин бошанд! Барои варзишии ману садҳо наврасони ин Ватан боиси сарфарозист, ки чунин Ватану давлати тинҷу осоишта дорем… Бояд гӯям, ки 2 ҳафта пеш дар н.Дангара дар риштаи варзиши гӯштини озод, дар вазни 38 кг ҷои 1-ро гирифтам. Аз ин пештар (моҳи ноябри соли 2017) дар Ҷумҳурии Қазоқистон дар ҳамин навъи варзиш дар вазни 38 ҷои 1 насиби ман шуд. Қаблтар аз ин дар ш.Қӯрғонтеппа низ ҷои якум насиби ман шуда буд… Шояд хонандагон фикр кунанд, ки аз чандсолагӣ дар гӯштин будам? Ба ин савол бояд гӯям, ки ман аз синфи 3 дар ин навъи варзиш-гӯштини тарзи озод завқу хоҳиши зиёд доштам. Аз падарам низ хело миннатдорам, ки барои гӯштингирии ман кӯмаки зиёд намуд ва хоҳиш дорад, то охир давом диҳам! Ва бовар дорам, Чемпиони Ҷаҳон хоҳам шуд, зеро Мо Метавонем! Аз ҳамаи ҳамнаслони худ хоҳиш дорам, ки худро аз варзиш дур нагиранд. Ҳама навъи варзиш барои мову Ватани азизамон имтиёз хоҳад овард!!!
Маҷид Сафарови 82-сола, аз деҳаи Фалҳободи ноҳияи Темурмалик (тел: 904 10 55 58) дар меҳмонии СССР гуфт, ки ман 5 сол боз 1 буққаи нари 3-солаи аз дастдодаамро гирифта наметавонам. Ҳодиса ин тавр рӯй дод: Саидов Саидумар ном марде аз деҳаи Солмолдашти н.Балҷувон с.2013 говашро гум мекунад. Ӯ моҳи январи с.2014 бо писараш-Азиз ба н.Данғара раҳсипор мешаваду дар деҳаи мо, пеши мазоре говҳои чаронро дида, сӯи писараш мегӯяд, ки «ҳамин буққаи гумкардаи мост!». Вақте бурданӣ мешавад, инро духтарам дида мегӯяд, ки буққаи моро куҷо мебаред? Хуллас, Саидов бо аризабозиҳои тӯлонӣ буққаи маро аз худ карду хело дар ғаму ташвишам гузошт. Болои ин ба ҳама ҷо эълон кард, ки гӯё ман гови ӯро дуздида бошам. Ҳол он ки нишонаҳои буққаи гумкардаи ӯ тибқи нишондодаш комилан дигар аст. Барои ҳақро ба ҳақдор расонидан борҳо ба ШКД, Суд ва Прокуратураи навоҳии Балҷувону Данғараву Темурмалик арз кардам, аммо ягон натиҷа нест! Борҳо нисбати Саидов дело кушода, боз пӯшониданд. Дар 4 соли даводав аз пушти 1 буққаи аздастрафтаам чандин ҳазор сомониро аз даст додам! Аммо барои ман муҳим ин аст, ки номи некамро барқарор кунам. Аз масъулини н.Темурмалик хоҳиш дорам, ки буққаи маро баргардонанд, зеро ман дузд нестам! Саидумар низ бояд зарари расонидаи 4-солаашро ҷуброн кунад!
Узви Ихвон-ал-СССР, табиби собиқадори атфол Шамсов Вайсиддин Котибович аз шаҳри Роғун дар меҳмонии газетаи мардумии СССР (тел: 93 196 45 30) гуфт, ки дар курорти Оби Гарм беш аз 20 сол боз дӯкони рӯзномафурӯшӣ вуҷуд надорад. Баъди он ки 1 матлаби ман оид ба «Раиси мардумӣ кист?» чанд моҳ пеш дар СССР чоп шуд, раиси ноҳия-Билол Иброҳим маро даъват намуда, бо сиёсату дӯғу пӯписа ва ангуштонашро рӯи мизаш зада гуфт: «Барои чӣ ба редаксияи СССР рафта арз кардӣ? Кӣ туро фармон дод?». Ба раис гуфтам, ки «ман шуморо танқид накардаам, ин ҳамту пешниҳод барои рушди сайёҳӣ ва ҳунарҳои мардумӣ буд». Хуллас, раис аз ман сахт ранҷид… Газетаи СССРро дар Роғун бисёр бад мебинанд. Ман 100% бовар дорам, баъде, ки ҳамин шумораи СССР чоп шавад маро аниқ боз раиси ноҳия даъват карда, сиёсат мекунад! Охир, ман ҳич намефаҳмам, ки чаро сухани ҳақ ва ҳамту пешниҳод ба ягон кас намефорад??? Дили ман месӯзад, ки барои чӣ камбудиҳоро мебинему дар фикри ҳаллу баррасиаш намешавем? Мушкилоти ҷамъиятро ману шумо бинему ба Ҳукумати марказӣ нарасонем, кӣ мерасонад? Чаро дар ин хусус руасои шаҳру навоҳӣ фикр намекунанд?
Марзия Чориевна Ҳоҷиеваи 53-сола, сокини деҳаи Чоряккорони ноҳияи Рӯдакӣ (тел: 93 553 35 45) дар меҳмонии газетаи мардумии СССР гуфт, ки писари ман-Наврӯз Каримови 29-сола 4 сол боз бемори бистарӣ-маъюб асту ягон табиб аз ягон поликлиника кӯмаки тиббӣ намерасонад. Асоси маъюбии Наврӯз ин дарахтбурӣ буд. 21.09.2014 (рӯзи якшанбе), ки рӯзи ғайрикорӣ буд, бо супориши Хайрулло Беҳбудов-сардори Кооперативи моликони манзили №6 ба маҳаллаи 82-уми ш.Душанбе барои буридани 3 дарахти калони хушкшуда омаданд. Ин кор он шабу рӯз мувофиқ ба ҷуссаи ҷисмониаш набуд. Хуллас, ҳангоми кор дарахти дувум болои писарам меафтад, сутунмӯҳрааш мешиканад ва осеби вазнин мебинад. Он шабу рӯз Наврӯзи ман бояд хонадор мешуд. Инак, 4 сол боз ӯ бемор асту бе келинам. Оид ба мушкили ӯ делои ҷиноятӣ кушоданд, аммо якбора қатъ карданд. Аз ҷониби дигар ман ҳам беморам ва фишори хун дораму қуввати роҳгардӣ нест. Барои табобати ӯ борҳо ба Поликлиникаи маҳаллаи Чоряккорони н.Рӯдакӣ ва ҳам ба Ҳукумати ноҳияи Сино муроҷиат кардам, аммо ягон натиҷа нест. Ягон масъул ба доди мо намерасад!
Мухлиси доимии СССР-Аброр Соқиев аз н.Ваҳдат (тел: 901 80 43 08) дар меҳмонии СССР гуфт, вақте дар ҷамъият бо баъзе проблемаҳои сунъӣ сар ба сар мезанӣ, сахт аламат мекунад. Агар оид ба чунин мушкилот дар ВАОи Русия ва дигар кишварҳои ҳамсоя нависанд, дилхоҳ вазиру раис истеъфо медиҳад. Дар матбуоту радиову ТВи мо ҳар рӯзу ҳафта оид ба даҳҳо мушкилоти бузург менависанд, ягон раҳбари ниҳод аз пеши виҷдону номуси худ истеъфо намедиҳад. Масалан, 1 раиси бонки маъруфи кишвари мо, мутаассифона, номашро дар ёд надорам, вақте дар 1 маҷлиси калони ҳукуматӣ гуфт, ки «ман 100% гунаҳкорам», ӯ бояд аз маҷлисгоҳ набаромада, аризаи истеъфояшро менавишт. Мисле, ки Аман Тулееви тотор баъди сӯхтори пурқурбонии Маркази Савдо дар вилояти Кемеровои Русия барои азияти виҷдон шуда истеъфо дод. Дар мо чӣ? Дар Тоҷикистони мо дар 1 сол чандин бозор месӯзад, аммо касе натанҳо истеъфо рафтанӣ нест, балки гуноҳро ба гардан намегирад. Охир, истеъфо ҷони одам нест-ку?! Баракс, гоҳо истеъфо ба фоидаи имиҷи мансабдор ҳам шуданаш мумкин.
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
