Ғанӣ Сафарзода, муаллиф ва хонандаи доимии газетаи мардумӣ, раиси Шӯрои собиқадорони ҷангу меҳнати н.Темурмалик меҳмони идора шуда, гуфт, ки мехоҳам ёде аз Чиллахон Холови ҳунарманд кунам.

   -    Соли 1967 баъди хатми Институти педагогии ш.Душанбе ба номи М.Т.Шевченко (ҳоло С.Айнӣ) ба муассисаи таълимии №6-и н.Данғара (ҳоло №8 н.Темурмалик) ба сифати муаллими химия ва биология ба кор омадам.

Чиллахон Холов бошад, баъди хатми муассисаи таълимии миёнаи №10-и деҳаи Чавроқ ба интернати давлатии Кангурт омада, таҳсилашро давом дод. Ман ба ӯ аз фанни химия ва биология дарс медодам. Бисёр бачаи зирак, доно буд ва бо баҳои хубу аъло таҳсил мекард.

Рӯзи 08.02.2023 дар дафтари кориам будам, ки писарам Сафаров Бахтиёр (раиси н.Балҷувон) телефон карда гуфт, ки Чиллахон даргузашт. Ман барои рафтан тайёрӣ дида, ба роҳ баромадем, ки ногаҳон дилам зад, беёд шудам, маро ба беморхонаи марказии ноҳия бурданд. 15 рӯз дар табобат будам. Хуллас, насиби ҷанозаи шогирдам Чилахон набудааст...