Гузаштаро ёд надоред?
Ҳамаамон медонем, ки 27 сол пеш ва ҳоло ҳам исломиҳои гузаро, ваҳҳобиҳо, наҳзатиҳо, ансориҳо, салафиҳою палафиҳою калафиҳо давлати исломӣ сохтанӣ шуда, зиёда аз 100 ҳазор Тоҷикро куштанду ҳоло ҳам дар ҳамон фикранд. Аз мақсади зишташон даст накашидаанд. Магар фаромӯш кардаед он рӯзи наҳси моҳи сентябри соли 1992-ро, ки рӯҳониён ба қафои Президенти кишвар Раҳмон Набиев чор шатта зада, аризаи аз мансаб рафтанашро гирифта буданд? Ё ёд надоред, ки чи тавр ваҳҳобиҳо бо дастони худи баъзе коммунистони манфуру лаъин фаъолияти партияи Коммунистиро манъ карда, молу мулкашонро мусодира намуданд?
Куруши Кабир ва яҳудиён
Ман аз Каюмарсу Ҳушанг, Таҳмурасу Ҷамшед, Фаридуну Манучеҳр, Таҳмоси пешдодиён, Кайқубоду Кайковус, Кайхусрави Каёниён, Куруши Кабиру Камбуҷияю Дорои 1, Ардашери 1, 2 ва 3, Ҳахоманишинҳо-аҷдодони пешгузаштаи тоҷикон фахру ифтихор дораму меболам, ки чунин аҷдодони кишваркушою боғуруру далер доштем. Вақте китоби «Таврот»-и яҳудиёнро хонда мебинӣ, ки парвардигори онҳо ба Куруши Кабир пайравӣ кардааст, магар метавонӣ хурсанду болидахотир нашавиву ифтихор накунӣ? Мавриде, ки адабиётҳои таърихию илмӣ, адабию бадеиро хонда, фаҳмида мегирӣ, ки мусулмонҳои араб бо мақсади куштану ғорат кардан тоҷиконро нобуд карданд, оё метавонӣ ғамгин набошӣ ва ба чунин мусулмонҳо нафрат нахонӣ?!
Чаро азону намозро тоҷикӣ нахонем?
Чӣ тавре, ки аз китоби Қуръон бармеояд, Аллоҳ ба мусулмонҳои араб амру фармони ба дигар кишварҳою мамлакатҳо лашкар кашидану ҳамла овардан ва куштану ғорат кардани мардумонро надодааст, бо зӯрию маҷбурӣ ба мусалмонӣ гаравидани онҳоро нафармудааст, вале мусулмонҳои араб паҳн кардани динро баҳона карда, бо мақсади ҷамъоварии пулу молу чорво ва ғанимат гирифтани занону духтарон лашкаркашӣ карданд. Вақте, ки арабҳои мусалмон ба Хуталон ҳамла оварда, шаҳри Ҳулбукро ба хок яксон кардаанд, оё бетараф буда метавонам, ки то имрӯзҳо алфавиту хатту забону динашонро ҳифз намоям? Магар вақте нарасидааст, ки аз ин ҳама даст кашида, азону намозамонро бо забони тоҷикӣ хонем!?
Намегӯям аз ислом бадар равем(д), мегӯям тоҷикӣ ва бо забони фаҳмо намоз хонему даъват ба намоз созем. Мисле, ки тамомии динҳои дигар ба забонҳои миллати ҳукмрони ин ё он давлат намоз мегузоранду китоби Худоро мехонанд.
Комрони Далер, ш.Бохтар
