Шавкат Мирзиёев-президенти Узбакистон дар вохӯрӣ бо фаъолони динии кишвараш гуфтааст, ҳар муллое, ки маросими акди никоҳи зани 2-умро мехонад, назди қонун ҷавоб хоҳад гуфт: "Вақтҳои охир ҳодисаҳои дузанагӣ бо роҳи никоҳи мусалмонӣ хеле зиёд шудааст. Бештар аз ҳама ин падида дар Тошканд ба чашм мерасад. Ояндаи кӯдаконе, ки занони 2-ум ба гунаи ғайриқонунӣ ба дунё меоранд, чӣ мешавад? Имомҳои муҳтарам, мушкилоти ин кӯдакон доғи виҷдони мо хоҳад шуд”.
Санаи 13 - уми июни соли ҷорӣ Президенти Ҷумҳурии Озарбойҷон Илҳом Алиев роҳбарони хадамотҳои гумруки Федератсияи Руссия Белорусия, Тоҷикистон, Ӯзбекистон, Қирғизистон ва Қазоқистонро, ки дар шаҳри Боку бо сафари корӣ барои иштирок намудан дар ҷаласаи 65 - уми Шӯрои роҳбарони хадамотҳои гумруки Иттиҳоди Давлатҳои Мустақил қарор доштанд, ба ба ҳузур пазируфт.
Президент Илҳом Алиев изҳори қаноатманди намуд, ки дар ҷаласаи 65-уми Шӯрои роҳбарони хадамотҳои гумруки Иттиҳоди Давлатҳои Мустақил муҳокимаи самарабахш гузаронида шуда, аз натиҷаи он қарорҳои дахлдор қабул мегардад.
Сарвари давлат Илҳом Алиев зикр намуд, ки хадамотҳои гумруки Иттиҳоди Давлатҳои Мустақил барои рушди кишварҳо нақши муҳим дошта, ҷиҳати таъмини даромади Буҷет ва ҷараёни инкишофи иқтисодиёт саҳми калон доранд.
Инчунин санаи 14 - уми июни соли 2017 дар шаҳри Бокуи Ҷумҳурии Озарбойҷон ҷаласаи 65 - уми Шӯрои роҳбарони хадамотҳои гумруки Иттиҳоди Давлатҳои Мустақил баргузор гардид.
Дар ҷаласаи мазкур Абдуфатоҳи Ғоиб- Сардори Хадамоти гумруки назди Ҳукумати Ҷумҳурии Тоҷикистон ва Зайдуллоев Иззатулло – Сардори Раёсати батанзимдарории тарифию гумрукӣ ва назорати арзӣ иштирок доранд.
Рӯзномаи маҷлис аз як қатор масъалаҳои муҳими соҳа иборат мебошад. Аз ҷумла:
Дар бораи ворид намудани таъғиру иловаҳо ба Созишнома дар бораи ҳамкорӣ ва расонидани кӯмаки мутақобила дар фаъолияти гумрукӣ.
Оид ба мубодилаи маълумот барои муайян намудан ва назорати арзиши гумрукии мол дар давлатҳои Иттиҳоди Давлатҳои Мустақил.
Оид ба тартиби ҷорӣ намудани системаи идораи таваккал дар фаъолияти мақомотҳои гумруки давлатҳои ИДМ.
Дар чорабинии мазкур инчунин дигар масъалаҳои муҳими ҳамкориҳоии байналмиллалии гумрукӣ баррасӣ мегарданд.
Қобили зикр аст, ки дар ҳошияи иҷлосияи мазкур дар доираи гуфтушуниди корӣ ба имзо расонидани Протоколҳо байни мақомотҳои гумруки Ҷумҳурии Тоҷикистон ва Ҷумҳурии Ӯзбекистон оид ба ҳамкорӣ ва ёрии байниҳамдигарӣ дар фаъолияти гумрукӣ ва доир ба тартиби ҳамкори байни Хадамоти гумруки назди Ҳукумати Ҷумҳурии Тоҷикистон ва Кумитаи давлатии гумруки Ҷумҳурии Ӯзбекистон ҳангоми муқоисаи маълумоти омори гумрукии савдои дутарафа дар назар аст.
Маркази матбуоти Хадамоти гумруки назди Ҳукумати Ҷумҳурии Тоҷикистон
Зайнура Азимова, ки директории мактаби рақами 1-и шаҳри Панҷакентро ба зима дошт, ба мансаби муовини раиси шаҳр таъин гардид.
Дар ин бора аз Ҳукумати шаҳри Панҷакент иттилоъ доданд.
Мансаби муовини раиси шаҳри Панҷакент, тӯли 4 моҳ холӣ буд ва пеш аз ин Маҳбуба Ҳабибӣ дар ин мансаб фаъолият дошт.
Эҳтимоли таъин шудани Зайнура Азимова ба курсии муовини раиси шаҳрро мо дар СССР аз забони коршиносони маҳаллӣ баён дошта будем.
Имрӯз расо соати 10:50 дақиқа бо вақти Душанбе ҳавлопаймои ширкати давлатии ҳавопаймоии "Туркманистон" дар фурудгоҳи Душанбе нишаст. Он парвоз дар 25 соли Истиқлолияти Тоҷикистон бори якум сурат гирифта, характери техникӣ дорад. Бо ин парвоз наздики 100 нафар зиёиёну тоҷирон ва масъулин аз доираҳои кории Туркманистон ба Душанбе омада, имрӯз дар 1 ҷаласаи муштарак ҳамкориҳои ояндаро баррасӣ хоҳанд кард…
Санаи 27-28 майи соли равон дар ш.Кӯлоб мусобиқаи ҷумҳуриявӣ байни ҷавонони соли таваллуди 2001-2003 бахшида ба «Соли ҷавонон» доир шуд. Аз ш.Панҷакент 6 нафар гӯштингир дар ин мусобиқа ҷойҳои намоёнро ишғол кард. Темиров Руслан дар вазни 85 кг, ҷои якум, Аҳмадҷони Аскар дар вазни 76 кг, Оқилҷони Бобомурод дар вазни то 69 кг ва Бобоев Алишер дар вазни 100 кг ҷойҳои дуюмро соҳиб шудаанд. Ҷои 3-юм дар вазни 100 кг ба Шодиев Сулаймон ва дар вазни 85 кг ба Ардамеҳри Рустам насиб шудааст. Дастоварди гӯштингирони Панҷакент дар ҳолест, ки ин ҳама ғолибиятҳоро на ягон намояндаи ҳукумати маҳаллӣ ва на ягон намояндаи бахши ҷавонон, варзиш ва сайёҳӣ дар ш.Панҷакент дастгирӣ ва қадр накард. Ба замми ин ба варзишгарон на раҳпулӣ додаанду на маблағи ҷои хоб. Мураббиёни ин варзишгарон Ҳасанов Саъдулло, Бобомуллоев Улуғбек, Ҳасанов Зоир ва Раҷабов Шариф тӯли солҳост, ки шогирдонро тарбия мекунанд, лек баъзе аз онҳо изҳор медоранд, ки аз рӯи қоида бояд пас аз соҳиби ҷои аввал шудани шогирд маоши мураббӣ ба андозаи аз 10 то 30% зиёд карда шавад. Аммо мегӯянд онҳо, соли гузашта низ чанд шогирдонамон ҷои аввалро гирифтанд, вале маоши мо зиёд нашуд, ки нашуд. Ба мусобиқаҳо меравем, мураббиёни гӯштингирони дигар шаҳру навоҳӣ варақаи сафархидматии (командировочный)-ро мӯҳр мезананд. Вале мо нигоҳ карда мешинем. Барои мо на сафархарҷӣ медиҳанду на маошамонро зиёд мекунанд.
Некрӯз Кенҷаев-мудири навтаъини бахши ҷавонон, варзиш ва сайёҳӣ дар ш.Панҷакент вобаста ба масъалаи мазкур гуфт, «чанд нафар варзишгароне, ки ба мусобиқа рафтаанд, бе мувофиқа бо мо рафтанд. Аз ин рӯ, аз рафтану омадани онҳо мо хабар надорем. Аммо ҳамеша мекӯшем ва омодаем бо варзишгарон ҳамкорӣ кунем. Вале мо варзишгаронро ҳамеша дастгирӣ мекунем».
Дар ҳамин ҳол коршиносони соҳаи варзиш мегӯянд, солҳои пешин нисбатан варзишгарони панҷакентӣ натиҷаҳои назаррасу дастовардҳои шоён нишон медоданд. Соли 2017 бо ибтикори президенти мамлакат «Соли ҷавонон» эълон шудааст ва агар масъулини соҳаи варзиши Панҷакент воқеан мехоҳанд варзишгарон дастовардҳои назаррас дошта бошанд, бояд ҳамкорӣ ва дастгирии онҳоро фаромӯш насозанд.
Хуршед Фозилов,
Панҷакент, махсус барои СССР
Ҷалолиддини Балхӣ ноҳияи хушбоду ҳаво ва сарсабз буда, ҳама ҷо сабзу хуррам, талу теппаҳо сабзпӯш, гандум расидаву мардум ба даравидани он саргарм. Ҳар нафар бо кори худ андармону барои худ шароити беҳтаре муҳайё месозад ва барои ин ҳақ ҳам дорад. 
Чуноне ки хонандагони газетаи мардумии СССР медонанд, тайи 2 моҳ аст, ки лоиҳа-озмуни «Раиси мардумӣ» идома дорад ва мухбирони газета ҳар ҳафта рӯзи шанбе ба қабули ин ё он раиси шаҳру ноҳия рафта, сипас дар ҳамон ноҳия меҳмон мешаванд. Ин маротиб мо ноҳияи Ҷалолиддини Балхиро интихоб намудем ва рӯзи шанбеи 27.05.2017 ба қабули раиси он Убайдуллои Файзулло рафтем.
«Ман ҳаминам, ки мебинед…»
Субҳи рӯзи 27.05.2017. Соат бо вақти Ҷ.Балхӣ 07:45 дақиқа. Мо, ки субҳи барвақт аз пойтахт ба роҳ баромада будем, аллакай ба назди бинои Мақомоти иҷроияи ҳокимияти давлатӣ дар н.Ҷ.Балхӣ ҳозир шудему рост ба сӯи утоқи кории раис Убайдуллои Файзулло рафтем. Фикр намекардам, ки қабулгоҳи раиси ноҳия 1 утоқи оддӣ ва хоксорона асту дар назди дар мардуми зиёд дар интизори қабул нишастаанд. Пас аз 5 дақиқа Убайдуллои Файзулло моро қабул кард ва шод аз он гаштем, ки эшон сари фурсат газетаи СССР-ро мехондаасту номи ҳар яки моро ғоибона мешиносад.
-«Ман ҳаминам, ки мебинед, бо мардум мушкил надорам, зеро фарзанди ин диёрам ва қариб, ки ҳамаи сокинонро шахсан мешиносам, медонам, ки кӣ чӣ проблема дорад, кӣ бо фиреб меояд ва кӣ бо мушкили ҳақиқӣ, пас аз 3 дақиқа қабул сар мешавад. Биёед, бо ҳам равем, раис бояд дер накунад!» - гуфт Убайдуллои Файзулло ва мо бо ҳам аз утоқаш баромадем. Мардуми дар қабулгоҳ ҷамъшударо низ раис бо худ ба толори калони барои қабули шаҳрвандон пешбинишуда бурд...
Раисе, ки ҳамаро шахсан мешиносад
27.05.2017. Соат бо вақти Ҷ.Балхӣ 8:00 дақиқа. Ба қабули раиси ноҳия 13 нафар аз сокинон омада буданд. Мушкили №1-и аксарияти ин мардум замин ва ҷудо намудани қитъаи наздиҳавлигӣ буд. Раиси рост гуфт, тамоми мардуми ба қабул омадаро Убайдулло Файзулло шахсан мешинохт:
«Ту фалонӣ нести? Ту писари фалониӣ, а? Бародарат хуб аст? Падарат чӣ ҳол дорад?»-гуфта вай ба ҳар 1 сокин муроҷиат мекард. Аҷиб он буд, ки раис бо мардум бештар шӯхӣ карда, онҳоро рӯҳбаланд менамуд, таъкид мекард, ки то метавонад дасти кӯмаки хешро хоҳад расонид. Латифа мегуфту мардумро механдонд, то ин ки онҳо аз назди ӯ бо табъи болида бираванд. Чунин бархӯрдро то ҳол надида будем. Қабули шаҳрвандон аз 1,5 соат тӯл накашид ва пас аз он мо баромада, боз ба утоқи кори раис рафтем.
Инҷо низ чанд нафар омада буданд, ки мехостанд мушкили хешро дар танҳоӣ бо раис матраҳ намоянд. Убайдулло Файзулло ҳар яки онҳоро шахсан пешвоз ва гусел карда, боз таъкид менамуд, ки «ба ин ё он салом расон, аз ҳоли вай маро огоҳ кунед, гӯед ба хабаргирияш меравам, расонед худаш биёяд, интизорам». Раис дар ҳақиқат ҳар 1 сокини ноҳияашро мешинохт, ки ин хеле хуб аст!
Шаҳраке, ки тартиб дорад
27.05.2017. Соат бо вақти Ҷ. Балхӣ 10:00 дақиқа. Бо ҳамкорам Баҳодур Уроқов, ки мухбири газета дар вилояти Қӯрғонтеппа аст, аз бинои ҳукумати ноҳия баромада, ба тамошои шаҳрак ва маркази ноҳия рафтем.
Маркази ноҳияи Ҷ. Балхӣ 1 шаҳраке будааст бо тартиб, ором, бе ҳаёҳӯи мошинҳову ронандаҳо, ҳар кас дар ҷойи худ, ҳар кас бо кори худ. Касе аз сокинон ба аксбардории мо аҳамият ҳам надод. Мо бо Баҳодур аз беморхонаи наву замонавӣ, бозори марказӣ, марказҳои савдо, терминали нақлиётӣ, ки ноҳияро бо пойтахт ва дигар шаҳру навоҳӣ мепайвандад, дидан кардем. Ҷалолиддини Балхӣ ноҳияи хушбоду ҳаво ва сарсабз будааст. Ҳама ҷо сабзу хуррам, талу теппаҳо сабзпӯш, гандум расидаву мардум ба даравидани он саргарм. Ҳар нафар бо кори худ андармону барои худ шароити беҳтаре муҳайё месозад ва барои ин ҳақ ҳам дорад.
Толори тренажери апаи Давлатмоҳ
27.05.2017. Соат бо вақти Ҷ.Балхӣ 11:00 дақиқа. Бо Баҳодур ба тарафи деҳоти Калинини ноҳия роҳ гирифтем. Гуфтанд, ки он ҷо 1 зане ҳаст, ки аз ҳисоби худ барои мардуми деҳа 1 маркази маишӣ бунёд карда, онро бо тамоми имконоти муосир муҷаҳҳаз намуда, барои истифодаи ройгон пешкаш кардааст. Хостем бо ин зан ошно шавем ва аз толори варзишии бунёд кардааш боздид намоем.
Апаи Давлатмоҳ Мирзомуродоваро дар ошёнаи 2-юми марказ, ки ҳам барои толори варзишӣ ва ҳам барои маркази дӯзандагиву адрасбофӣ ҷудо шудааст, пайдо намудем. Ӯ кори зани ҷавонеро, ки дар дастгоҳи махсус адрас мебофид, назорат мекард. Таҷҳизоти нав, имконияти хуби корӣ, толори варзишӣ бо тренажерҳои замонавӣ, ки ҳатто дар пойтахт камтар дидан мумкин аст, барои ҷавонони ноҳияи мазкур ба таври ройгон пешкаш шуда буд. Апаи Давлатмоҳ мегӯяд, к мехоҳад ҷавононро аз ҳар гуна амалҳои нопок дур ва ба варзишу касбомӯзӣ ҷалб намояд. Кори ӯ боиси таҳсин аст!
Фурудгоҳ барои авиатсияи хурд
Дар баробари рушд додани истеҳсолоту кишоварзӣ, тиҷорату савдо, маорифу илм, касбомӯзӣ ва бунёди иншоотҳои ҳаётан муҳим, Убайдулло Файзулло азм дорад дар ноҳия боз 1 иншооти дигари муҳим-фурудгоҳ бунёд намояд. Бояд қайд кард, ки дар ин ноҳия қаблан дар замони шӯравӣ фурудгоҳ будааст ва то ҳол ҳам хати парвози он арзи вуҷуд дорад. Акнун онро азнавсозӣ намуда, бо шароити лозима муҷаҳҳаз карда, барои авиатсияи хурд омода кардан лозим аст, - чунин тасмим дорад раиси ноҳия.
- Ҳар гуна ҳолат метавонад пеш ояд, барои ҳамин мо бояд 1 фурудгоҳ дошта бошем, ки барои чархболу ҳавопаймоҳои хурд фароҳам бошад. На танҳо омилҳои инсонӣ, балки барои пешбурди иқтисодиёту кишоварзӣ низ фурудгоҳ ва алоқаи ҳавоӣ нақши муҳим мебозад ва мо бояд онро таҷдиду азнавсозӣ намоем, иброз медорад Убайдуллои Файзулло, раиси н. Ҷ. Балхӣ.
Боздиди мухбирони СССР аз ноҳияи мазкур идома дорад. Мо метавонем!
Ҷамила Ҳусейнова, Баҳодур Уроқов,
н.Ҷ.Балхӣ, 27.05.2017
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
