Имрӯз дар ш.Душанбе, дар Кохи Сомон Конференсияи байналмилалӣ оид ба оғози Даҳсолаи байналмилалии амал «Об барои рушди устувор», солҳои 2018-2028 ба кори худ шуруъ кард. Бояд қайд намуд, ки Даҳсолаи байналмилалии амал «Об барои рушди устувор» бо ибтикори Президенти Ҷумҳурии Тоҷикистон Эмомалӣ Раҳмон аз ҷониби СММ қабул шуда, ҳадафи асосии қабули Қатъномаи Маҷмаи умумии СММ оид ба Даҳсолаи байналмилалии амал «Об барои рушди устувор», солҳои 2018-2028 ташкили ҳамкории судманди байни кишварҳо дар сатҳи байналмилалӣ барои кам кардани хатарҳои бамиёномада аст. Дар Конференсия 65 ҳайати расмӣ бо фарогирии 1100 нафар аз 118 кишвари ҷаҳон ҷиҳати иштирок дар ин ҳамоиши байналмилалӣ ба қайд гирифта шудаанд. Аз ҷумла, дар иштироки сарварони давлатҳо ва ҳукуматҳо аз 4 мамлакат-Туркманистон, Покистон, Афғонистон ва Ҷибутӣ, вазирону муовинони вазирон аз 35 кишвар, инчунин роҳбарону намояндагони беш аз 41 созмони байналмилалӣ дар назар дошта шудааст. Ҳайати СММро дар ин ҳамоиш муовинони Дабири кулли СММ роҳбарӣ хоҳанд намуд. Дар назар аст, дар кори Конференсия то 1500 нафар аз саросари олам ширкат кунанд.