Қаблан аз ҳамкориҳои судманд дар самти шаффофона инъикос намудани фаъолияти кормандони БДА изҳори миннатдорӣ менамоем. Оид ба саволҳои Фаридун Ғафуриён-сокини ш.Хуҷанд, дар газетаи мардумии СССР (№35(520), 30.08.2018) ҷавобҳои зеринро манзури Шумо мегардонем.
Ҷавоб ба саволи 1: Дар Вазорати корҳои дохилии ҶТ сомона-сайти интернетии ВКД www.vkd/tj амал менамояд, ки шаҳрвандон метавонанд арзу шикоятҳои худро тариқи ин сомона, ҳамчунин тариқи телефонии боварии Вазири корҳои дохилӣ (221 21 21), телефони «Мадад» (1919) ва «Хабарнигори фаврии ВКД» (93 922 21 11) баён намоянд.
Ҷавоб ба саволи 2: Дар асоси фармони ВКД ҶТ «Дар бораи хушмуомилагӣ ва муносибати бодиққати кормандони мақомоти корҳои дохилӣ ва хизматчиёни ҳарбии қӯшунҳои дохилӣ бо шаҳрвандон», ҳар як корманди мақомоти корҳои дохилӣ, аз ҷумла, БДА вазифадор аст, ки зимни иҷрои вазифаҳои хизматӣ бо шаҳрвандон хушмуомила бошад.
Ҷавоб ба саволи 3: Кормандони Бозрасии давлатии автомобилӣ дар ҳолатҳои зерин метавонанд воситаи нақлиётро манъ намоянд:
- риоя накардани қоидаҳои ҳаракат дар роҳ;
- дар нақлиёт мавҷуд будани нишонаҳои вайронӣ ва ё ба талаботҳои амалкунанда  ҷавобгӯй набудани қисмҳои он;
-ҳангоми ҳаракати воситаи нақлиёт қобилияти идоракунии ронанда шубҳаовар бошад;
-маълумот дар бораи дар кофтуков қарор додани воситаи нақлиёт мавҷуд бошад.
Ҷавоб ба саволи 4: Аз тарафи кормандони БДА бе мақсад манъ намудани  воситаҳои нақлиёт қатъиян мумкин нест. Чунин ҳолат ҳамчун вайронкунии интизоми хизматӣ баҳо дода мешавад.
Ҷавоб ба саволи 5: Шумо бо далелҳои асоснок метавонед тавассути телефони боварии ВКД ҶТ ва ё бо ариза ба унвони роҳбарияти Раёсати БДА ВКД ҶТ муроҷиат намоед.
Ҷавоб ба саволи 6: Корманди БДА ҳангоми боздоштани воситаи нақлиёт вазифадор аст, ки ба назди ронанда равад ва минбаъд вобаста аз сабаби боздошт, ҳолат ва рафтори ронанда амал кунад.

Сардор
Акбар Насимзода

28.09.1925. Дар СССР дастуруламал оид ба таъсиси милитсияи Коргарӣ-Деҳқонӣ қабул карда шуд.
28.09.1939. Дар рафти рафти Ҷанги ҷаҳонии 2 немисҳо пойтахи Полша-шаҳри Варшаваро тасхир намуданд. Худи ҳамин рӯз миёни СССР ва Олмони гитлерӣ "Созишномаи дӯстӣ ва сарҳадот" ба имзо расид.
29.09.1938. Нишасти таърихии Мюнхен. Шаби 29.09.1938 сарони 4 кишвари аврупоӣ-Олмон, Итолиё, Англия ва Фаронса дар шаҳри Мюнхени Олмон ҷамъ омаданд ва Чехословакияро миёни Олмон, Полша ва Венгрия тақсим намуданд.
29.09.1941. Оғози кушторҳои оммавӣ дар Бабий Яри Украина. Артиши олмонӣ дар зарфи 2 рӯз дар сойҳои Бабий Яр (наздикиҳои Киев) наздики 60.000 одамро ба қатл расониданд. Бештари кушташудагонро яҳудиён, лӯлиҳо ва асирони Артиши Сурх ташкил медоданд.

Кишвари сунъӣ
Шаби 29.09.1938 дар ш.Мюнхен-қароргоҳи Фюрербау миёни Олмон, Итолиё, Англия ва Фаронса созишномае ба имзо расид, ки дар таърих бо "созишномаи Мюнхен" маъруф аст. Созишнома, ки дар натиҷаи он Фюрери олмонӣ Чехословакияро ба Олмон ҳамроҳ кард, дар таърихнигории муосир бисёриҳо заминасози аслии ҷанги ҷаҳонии 2 медонанд. Чехословакия дар харитаи сиёсии ҷаҳон баъди ҷанги ҷаҳонии 1, дар натиҷаи созишномаи Версал арзи вуҷуд пайдо кард. Ин кишвари нав аз қисматҳои императории собиқи Австро-Венгрия таъсис дода шуд ва муассисони маънавии он 2 сиёсатмадори чех-Масарик ва Бенеш буданд. Дар ин кишвари навтаъсис чехҳо 46%, словакҳо 13%, немисҳо 28% ва венгерҳо 8%-и аҳолиро ташкил медоданд. 5% боқимонда бошад аз украинҳо, полякҳо ва яҳудиён иборат ёфта буд. Ҷудошавӣ аз Австрия Чехословакияро аз пардохти ҷубронпулии баъдиҷангӣ муоф кард ва ин ба кишвари тозатаъсиси чехҳо имкон дод, дар рушди иқтисодӣ ҳатто аз Олмон ҳам пеш равад. Дар оғоз кишвари чехҳоро танҳо ҳаракати сепаратистии словакҳо азият медод, лек аз с.1933 немисҳо низ таҳти таъсири таблиғоти Олмони ҳамсоя қарор гирифта, ҳаракати ҷудоихоҳиро роҳандозӣ карданд.

Марзи миллӣ-10

Имрӯз, тахминан соати 12:00-дақиқа, дар ҳаммомхонаи хусусии дохили бозори «Корвон»,  мансуб ба шаҳрванд Ризоев Шодибек Амиралиевич, дар вақти гузаронидани корҳои кафшергарӣ дар масоҳати 4 метри мураббаъ сӯхтор ба амал омад.
 Бино ба итиллои маркази матбуоти ВКД ҶТ, бо қабули хабар ба ҷойи ҳодиса Қисми Хадамоти оташнишонии бозори «Корвон» ва дигар ҷузъу томҳои СХДО ВКД ҳозир шуда, сӯхтор дар масоҳати аввалааш сари вақт хомӯш карда шуда, дар натиҷа ягон нафар зарар надидааст.

Бино ба итиллои маркази матбуоти Вазорати маориф ва илми ҶТ  25.09.2018 таҳти № 484 Қарори Ҳукумати Ҷумҳурии Тоҷикистон «Дар бораи ворид намудани тағйирот ба қарори Ҳукумати Ҷумҳурии Тоҷикистон аз 1 июни соли 2016, №237» ба тасвиб расид, ки тибқи он ба Низомномаи намунавии муассисаҳои таҳсилоти умумии Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 1.06. 2016, №237 «Дар бораи Низомномаи намунавии муассисаҳои таҳсилоти умумии Ҷумҳурии Тоҷикистон» тасдиқ шудааст, тағйирот ворид карда шуд.
   Ҳамакнун, тибқи тағйироти роҳандозишуда соли таҳсил 36 ҳафтаи таълимӣ (барои синфҳои якум 35 ҳафта)-ро дар бар гирифта, ба чор чоряк тақсим мешавад. Чоряки якум аз 1 сентябр то 31 октябр, чоряки дуюм аз 11 ноябр то 31 декабр, чоряки сеюм аз 11 январ то 20 март ва чоряки чорум аз 1 апрел то 14 июн идома меёбад.
   Инчунин, таътили тирамоҳӣ 10 рӯз (аз 1 то 10 ноябр), таътили зимистона 10 рӯз (аз 1 то 10 январ), таътили баҳорӣ 7 рӯз (аз 25 то 31 март) ва таътили тобистона пас аз анҷоми соли таҳсил ва ҷамъбасти аттестатсия то 31 август идома ёфта, машғулиятҳо барои хонандагони синфҳои 1 як ҳафта пеш аз анҷоми соли таҳсил ба охир мерасад.