Шомгоҳи 25.06.2019 аз ҷониби кормандони прокуратураи ш.Бохтар Бурҳонова Рӯзигул-раҳбари Ёрии таъҷилии тиббии ш.Бохтар боздошт шуд. Ӯ аз ваколатҳои худ берун баромада, ҳазорҳо сомониро аз буҷаи корхона ба ҷайби худ задааст. Аз прокуратураи шаҳр бо тасдиқи ин хабар гуфтанд, дар ҳақиқат Бурҳонова бо моддаҳои 316 ва 322-и Кодекси ҷиноятии ҶТ дастгир шудааст. Маврид ба зикр аст, ки Бурҳонова бо ВАО муомилаи хуб надошт ва баҳсҳо низ дар нишастҳои матбуотӣ бо ӯ хело зиёд шуда буданд. Айни ҳол нисбати ӯ парвандаи ҷиноӣ оғоз шуда, тафтишот идома дорад. 

Баҳодур Уроқов СССР, вилояти Хатлон 

 Ба сармуҳаррири ҳафтаномаи «СССР», Сайёфи Мизроб

Аз ҳамкориҳои судманд дар самти инъикос намудани фаъолияти БДА ВКД ҶТ изҳори сипос менамоем. Саволномаи шаҳрванд Фаридун Ализода бо номи «Нозири роҳ ҳаққи сур карданро дорад?» (СССР, 23.05.2019, №21)-ро мавриди баррасӣ қарор дода, ба саволҳои пешниҳодгардида чунин посух медиҳем:

Саволи 1: Баъзан мешавад, ки корманди БДА-ро муҳлати давомнокии ҳуҷҷатҳояш (просроченный действующие срок удостоверение) гузаштагӣ. Бо ӯ чӣ бояд кард?

Ҷавоб: Корманди БДА зимни хизматбарӣ бояд бо худ шаҳодатномаи хизматӣ ва дигар ҳуҷҷатҳои лозимаро дошта бошад. Дар сурати гузаштани муҳлати эътиборнокии шаҳодатномаи хизматӣ ба корманд то бартараф намудани камбудии ҷойдошта барои ба хизмат баромадан иҷозат дода намешавад.

Саволи 2: Пости доимӣ, яъне «статсионарӣ» чӣ гуна бояд бошад? Дар баъзе кӯчаҳо «будка»-еро монда, пости доимӣ-статсионарӣ меноманд. Оё ин дуруст аст?

Ҷавоб: «Постгоҳи статсионарӣ» бинои хизматиест, ки бо техникаи хос муҷаҳҳаз буда, дар он бо сабаби зарурияти танзими ҳаракат дар роҳ, барои назорати бетанаффус аз болои ҳаракати воситаҳои нақлиёт, гузаронидани чорабиниҳои оперативӣ-ҷустуҷӯӣ, таъмини ҳаракати бемамонияти автомобилҳои таъиноти махсус, хизмати хадамоти роҳбонӣ ташкил карда мешавад. Дар ҳолати зарурӣ тибқи нақшаҳои алоҳида постгоҳҳои муваққатӣ ташкил карда, дар онҳо хизматбарии шабонарӯзии якҷояи мақомотҳои таъмини амният, ба роҳ монда мешавад.

Аз Худо талабем, ё аз мазор?

Ман ба домуллои мӯҳтарам, Ҳоҷӣ Мирзо Ибронов 5 савол дорам ва хоҳишам ин аст, ки ба ин пурсишҳо посух нависад.

1.Касе ба хонаи Худо раваду ҳаҷ кунад, тамоми гуноҳҳояш бахшида мешавад. Оё ин ҳақиқат дорад?

2.Намозҳои солҳои пешин (давраи студентӣ, замони хизмати ҳарбӣ…)-ро хонем, ё не? Ва ё ҳамту тавба ҳам кунем мешавад?

3.Мегӯянд, пайғамбар дар қиёмат уммати худро шафоат мекунад, вале агар Худованд розӣ бошад. Ба инаш ҳам бовар кунем? Пас ин чӣ хел шафоат мешавад?

4.Аз мазорҳо талаб мекунем, ки «ба ман фарзанд бидеҳ». Оё дар дини ислом ин дуруст аст? Яъне талабро мо аз мазорҳо кунем, ё аз Худо?

5.Вақте бо ҷамоат намоз мехонем, бархе суннатҳоро алоҳида мехонанд ва баъзе дар масҷид пароканда шуда, ҳар сӯ мераванд ва қисме ҷои худро иваз карда намоз мехонанд. Оё ин дуруст аст?

Мирзоаҳмад Одинаеви 67-сола,

шаҳраки Панҷоб, н.Ҷайҳун, тел: 93 529 26 08

Ҳоҷӣ меҳмони Худост

Посухи суоли 1.Бале, ҳар касе адои ҳаҷ кунад, Аллоҳ гуноҳони ӯро бахшида мегардонад. Паёмбарамон Ҳазрати Муҳаммад (с) мефармояд: «Ҳар кӣ ҳаҷҷи фарзӣ кунад ё умра анҷом диҳад, инҳо меҳмони Аллоҳ ҳастанд. Агар дуо кунад иҷобат мешавад, агар талаби мағфирати гуноҳ кунад, бахшида мешавад».

Посухи суоли 2. Намозҳоеро, ки нахонда бошем, қазои онҳо дар мазҳаби Абуҳанифа воҷиб асту бояд хонда шаванд.

Посухи суоли 3. Бале! Ҳабиби худо рӯзи қиёмат умматонашро шафоъат мекунад. Шафоъат, яъне кумак ё ёрӣ кардан аст, то аз зиллати он рӯз наҷот биёбӣ.

Посухи суоли 4. Сад афсӯс, ки то ҳол мо аз роҳи дурусти зиёрат аз қабристон огаҳӣ надорем. Ба ҷуз Худо касе лоиқ нест, ки ибодат шавад ё аз ӯ кӯмак хоста шавад ё ҳоҷате аз ӯ талаб карда шавад, зеро ғайри Худо ҳама махлуқ ва оҷизанд ва ба зоти худ наметавонанд ба касе нафъ ё зараре бирасонанд. Шайх Аттори валӣ чӣ зебо гуфтааст:

Аз Худо хоҳ ҳар чӣ хоҳӣ, эй писар,

Нест дар дасти халоиқ хайру шар.

Ҳар кӣ хонад ғайри ҳақро, эй писар,

Кист дар олам аз ӯ гумроҳтар?

Дар тафсири Кабир (ҷилди 5, саҳ.33. «Табъи Миср») омадааст, ки «агар фоида ё зарарро аз ғайри Аллоҳ бихоҳӣ, ту золимӣ».

Боязиди Бастомӣ аз машоихи бузург ба шумор меравад, мефармояд: «Кӯмак ё ҳоҷат хостани махлуқ аз махлуқ монанди кӯмак хостани зиндонӣ аз зиндонист».

Аллома Олусӣ мефармояд: «Бидуни шак мадад ҷустан аз мурдагон амрест, ки дурӣ аз вай воҷиб аст ва ин кор зебандаи хирадмандон нест» (Тафсири ибни Касир. 3/335).

Дар китоби «Ал-ғароиб фи таҳқиқил мазоҳиб» навишта шудааст: «Имом Абуҳанифа шахсеро дид, ки бар қабри бузургон омаду ба онҳо салом дод ва гуфт: Эй соҳибони қабр, чандин моҳ аст, ки шуморо садо мезанам, аз шумо кумак мехоҳам. Оё аз саволи ман бохабаред, ё бехабар? Имом Абуҳанифа пурсид: Ба ту чӣ ҷавоб доданд? Гуфт: Ҳеҷ чиз, хомӯшанд! Абуҳанифа гуфт: Нафрин ба ту ва номурод бошӣ. Чаро бо ашхосе суҳбат мекунӣ, ки ҳеҷ чизе дар ихтиёр надоранд. Сипас Имом ин оятро тиловат кард (Сураи Фотир. ояти 22).

Дар бало ёрӣ махоҳ аз ҳеҷ кас,

3-он ки набвад ҷуз Худо фарёдрас

 Шайх Аттор

***

Надорем ғайри ту фарёдрас,

Туӣ осиёнро хатобахшу бас!

 Саъдӣ

Посухи суоли 5. Сафро рост кардан фақат барои намозҳои фарз аст. Барои хондани намозҳое, ки суннатанд, пароканда будан ё ҷойҳоро иваз кардан хуб ва беҳтар аст.

Ҳоҷӣ Мирзо Ибронов

Устоди факултаи физикаи ДМТ Абдуҳамид Нарзиев, сокини н.Рӯдакӣ дар меҳмонии СССР гуфт, дар шумораи гузашта матлаберо бо номи “Мо Тоҷикем ё тАҷик?” хонда, ба муаллиф С.Мизроб аҳсант фиристодам. Ҳоло 4 гуфтанӣ дорам:

1.Ақаллан  ба Гавҳар Шарофзода-раиси Кумитаи ислоҳоти забон бояд барои ин қадар беаҳамиятӣ ва “саҳмаш” дар бахши забон ягон унвони ОЛӢ бидиҳем. Охир, бинед, чаро дар Россия дар ҳама ҳуҷҷатҳо “Россия” менависанд, на “Рассия”, вале мо ТаджикистАн менигорем?!

2.Маркази Миллии Тестӣ катастрофаи миллат аст. Бовар кунед, тамоми студентҳо бесаводанд ва дар санҷишу имтиҳон тестро фақат қориазёд мекунанд ва 1 рӯз пас баргашта бипурсед, чизе намедонанд! Аз мушоҳидаи худам мегӯям. Ва ин фоҷиаи миллати мост!!!

3.Қаблан таҳсил дар мактабҳои миёна то 24 май идома меёфт ва ҳоло бошад то 14 июн! Чаро нисбати муаллимон ин қадар ҷабр мекунанд?

4.Занги охирро бояд барқарор кунем. Занги охир ин иди хатмкунандагон аст ва хонандагон бояд бо ҳамсинфону муаллимонаш дар фазои мутантан хайрухуш кунанд.

(Фелетон)

Барбаросса

«Барбаросса» (ба хотири императори германиҳо Фридрих Барбаросса) маҳз чунин унвон гирифт амалиёте, ки бо он Олмони фашистӣ чун одати ҳамешагӣ бе эълони ҷанг ба СССР ҳамла кард. Банақшагирии амалиёт 21.07.1940 оғоз ёфт. Лоиҳаи амалиёт, ки зери роҳбарии генерал Ф.Паулюс кашида шуда буд, 18.12.1940 бо директиваи №21-и Сарфармондеҳи қувваҳои мусаллаҳи Олмон (Вермахт) тасдиқ карда шуд. Умуман, қарори ҳамла ба СССР ва нақшаи умумии амалиёти ояндаро Фюрери олмонӣ пас аз ғалаба бар Фаронса 31.07.1940 ба генералҳои худ иброз кард: “Умеди Англия танҳо Русия ва Амрикост. Агар умед ба Русия барбод равад Америка низ аз Англия даст мекашад, чун торумори Русия ба пурзӯршавии Япония дар Шарқи Дур меорад. Агар Русия торумор шавад Англия охирин умеди худро аз даст медиҳад. Он вақт дар Аврупо ва дар Балкан мо ҳукмронӣ хоҳем кард. Дар натиҷа Русия бояд аз байн бурда шавад. Муддат: баҳори соли 1941. Ҳар чи зудтар Русияро торумор кунем барои мо беҳтар. Амалиёт танҳо вақте маъно пайдо мекунад ва натиҷа медиҳад, агар мо бо 1 зарбаи тезу пурзӯр тамоми давлатро аз байн бибарем”.Тибқи нақшаи амалиёт қисми асосии артиши шӯравӣ мебоист дар ғарбтари дарёҳои Днепр ва Двинаи Ғарбӣ торумор шуда, ақибнишинии онҳо ба шарқи кишвар бояд пешгирӣ карда мешуд. Дар рӯзи 8-уми амалиёт артиши олмонӣ бояд ба мавзеи Каунас, Барановичи, Лвов ва Могилев-Подольский мерасид. Дар рӯзи 20-уми амалиёт немисҳо мебоист ба соҳилҳои Днепр баромада, мавзеҳои Мозир, Рогачев, Орша, Витебск ва Великие Лукиро ишғол мекарданд. Баъди ин дар амалиёт таваққуфи 20-рӯза эълон карда мешуд, то нерӯҳо аз нав ҷо ба ҷо карда шаванд, аскарон дам гиранд ва базаҳои таъминотии нав ташкил карда шаванд. Дар рӯзи 40-уми ҷанг бошад, тибқи нақша марҳилаи 2-уми амалиёт сар мешуд. Дар ин давра немисҳо бояд Москва, Ленинград ва Донбасро ишғол карда, диққати хос ба ишғоли Маскав дода мешуд. Фармондеҳии олмонӣ гумон доштанд, Артиши Сурх (АС) барои ҳимояи Маскав кулли қувваҳои боқимондаи худро дар ин самт ҷамъ меорад ва ин ба немисҳо имконият медиҳад, ки дар 1 зарба онҳоро торумор кунанд.