Бархе аз омӯзгорони шаҳри Душанбе, ки ҳафтаи гузашта ваксинаи зидди бемории COVID-19 гирифтаанд, мегӯянд, баъди дарёфти он, як муддат ҳарорати баданашон баланд шуд.

Вазорат: Шикоятҳо ҷиддӣ нестанд

Дар Вазорати тандурустӣ ва ҳифзи иҷтимоии аҳолии Тоҷикистон аз сабти даҳҳо ҳолати номатлуб, ки дар пай дарёфти ваксинаи "AstraZeneca" ошкор шудааст, хабар доданд. Дар ин ниҳод таъкид намуданд, ҳолатҳоеро, ки ба қайд гирифтаанд, ҷиддӣ нест.

Замира Юсупова, омӯзгори мактаби рақами 21-и Душанбе ҳафтае пеш бо гурӯҳе аз ҳамкоронаш ваксина гирифтааст.

"Хоҳем нахоҳем инро бояд гирем, зеро барои саломатиямон лозим аст. Баъди ваксина задан одам каме сустар мешавад, лекин пас аз ду-се рӯз худамонро хуб ҳис кардем",--гуфт, Замира Юсупова.

Меҳрубон Саидова, омӯзгори дигар, ки дарёфти ваксинаро таҷриба кардааст, афзуд, "бо ваксина задан каме ҳарорати бадан баланд мешавад, вале ин ягон ҷои тарс надорад".

Маъракаи эмкунӣ бар зидди COVID-19 се ҳафта пеш дар Тоҷикистон шурӯъ шуд. Тибқи иттилои расмӣ, аз 15 ҳазору 690 нафар омӯзгор дар Душанбе, беш аз 60 дарсадашон ваксина гирифтаанд. Ба қавли масъулин, ҳамарӯза беш аз ду ҳазор нафар ба ваксиназанӣ фаро гирифта мешаванд, ки инҳо асосан кормандони бахши тандурустӣ, маориф ва фурудгоҳу меҳмонхонаҳои пойтахт ҳастанд.

Беш аз 5 миллион нафар ваксина мегиранд

Асомиддин Бобозода, намояндаи Раёсати маорифи шаҳри Душанбе гуфт, то ҳол дар мавриди паёмадҳои дарёфти ваксина шикояте дастрас накардаанд.

Файзалӣ Саидзода, директори Маркази "Иммунопрофилактика"-и Вазорати тандурустӣ мегӯяд, аз 28 ҳазору 300 нафаре, ки то ҳол эм карда шуданд, 107 ҳолати номатлубро ба қайд гирифтаанд.

“Инҳо ҳамон ҳолатҳое ҳастанд, ки бевосита баъд аз гузаронидани ҳамин ваксинатсия сабт шудааст. Ҳолатҳои ҷиддӣ набуда, ба муддати як ду се рӯз ба монанди ҳароратбаландӣ, дарди сар, дарди буғумҳо, дарди мушакҳо, мумкин қайдкунӣ дида мешавад, ки ҳатман мегузаранд",--афзуд, Файзалӣ Саидзода.

Тоҷикистон дар доираи маъракаи ваксиназанӣ бар зиди коронавируси нав дар се марҳила беш аз 5 миллиону 800 ҳазор нафарро ваксина хоҳад зад. Кишвар 192 ҳазор воя ваксинаи "AstraZeneca"- ро ройгон дастрас кардааст ва қарор аст дар навбати баъдӣ 624 ҳазор воя аз ин навъи ваксинаро ворид кунад. Тибқи нақшаи пешбинишудаи маъракаи ваксиназанӣ, сокинони аз 18 сола болои Тоҷикистон бояд эм карда шаванд.

Назари сокинон чист?

Ҳарчанд дар Вазорати тандурустии кишвар гуфтанд, маъракаи ваксиназанӣ ба хубӣ пеш меравад, вале баъзе сокинон дар ин бора назари дигар доранд.

Усмон Саидов, сокини шаҳри Душанбе аз зумраи онҳоест, ки мепурсад, чаро онҳоро барои гирифтани ваксина касе чизе намегӯяд.

“Аз 55-сола болоро гуфтанд, даъват мекунанд ва эм мекунанд. Лекин моро то ҳол касе даъват накардааст. Ман дар ноҳияи Сино зиндагӣ мекунам. Агар даъват кунанд, рафта ваксина мегирам",--гуфт ӯ.

Намояндагони Вазорати тандурустии Тоҷикистон мегӯянд, талош доранд, фарогирии сокинон ба дарёфти ваксинаро васеъ намоянд.

Як пурсиши хабарнигорони Радиои Озодӣ аз роҳгузарон дар Душанбе нишон дод, ки назари мардум дар бораи дарёфти ваксина мухталиф аст.

Яке аз ҳамсӯҳбатони мо гуфт, “ман ваксина заднӣ нестам. Чунки саломатиам хуб аст, эҳтиёҷ надорам”.

Мусоҳиби дигари мо таъкид намуд, ки "ҳама ҳозир ваксинатсия карда истодааст, агар барои мо мумкин бошад, ман ҳам мегирам.”

Роҳгузари дигаре мегӯяд, " беморӣ, ки нест, ваксина ҳам даркор нест. Бигзор дар куҷое вазнинтар асту бисёртар мурда истодаанд, ҳамон ҷо зананд".

Музокира барои ваксини русӣ ва чинӣ

Ба қавли Файзалӣ Саидзода, масъули Вазорати тандурустӣ бо ворид намудни ваксинаи чинӣ ва русӣ доираи эмкунӣ миёни аҳолӣ васеъ хоҳад шуд.

"Ҳоло музокира бо Чину Русия идома дорад ва боварӣ дорам дар наздиктарин фурсат аз ин кишварҳо ваксина ворид мешавад",--гуфт ӯ.

Тоҷикистон 20 дарсади ваксинаи заруриро дар доираи барномаи COVAX дарёфт карда, боқии ваксинаро бояд харидорӣ кунад.

Бонки Ҷаҳонӣ барои хариди ваксинаҳои зидди COVID-19 барои Тоҷикистон 8,63 миллион доллар кумак ҷудо кардааст. Дар Вазорати тандурустӣ дақиқан дар бораи харҷи маблағҳои грантии Бонки Ҷаҳонӣ, ки барои хариди ваксина пешбинӣ шудааст, посух надоданд.

Ин бонк дар ҷавоб ба як номаи Радиои Озодӣ посух дод, ки бо 8,63 миллион долларе, ки моҳи феврал барои барномаи “Лоиҳаи изтирории СOVID-19 Тоҷикистон” тасдиқ кардаанд, то ҳанӯз хариди ваксина шурӯъ нашудааст. Зеро, ба иттилои Бонки Ҷаҳонӣ, ҳанӯз ин лоиҳа аз сӯи порлумони Тоҷикистон тасвиб нашудааст ва ба иҷро надаромадааст.

Барномаи Бонки Ҷаҳонӣ ва баҳси дарёфти ваксинаҳои дигар

Саидҷаъфа Усмонзода, вакили Маҷлиси намояндагони Тоҷикистон гуфт, чунин тарҳе дар мавриди ҷудо гардидани беш аз 8 миллион доллар гарнти Бонки Ҷаҳонӣ барои харидории ваксина то ҳол дастраси онҳо нашадааст.

Бонки Ҷаҳонӣ дар посухи худ таъкид намудаст, ки "Барномаи ҷаҳонии ҳимоят аз ваксинзании COVAX тақрибан 16 дарсади аҳолиро бо ваксинаҳои ройгон таъмин менамояд ва сармоягузории Бонки Ҷаҳонӣ эмгузаронии 4 дарсади аҳолиро (бо фарогирии зиёда аз 380,000 нафар) таъмин мекунад".

Норушаниҳо дар мавриди хариди дигар навъи ваксинаҳо дар ҳолест, ки баъзе мутахассисони бахши тандурустӣ мегӯянд, дар шароити набудани имкони интихоби шакли эмгирӣ, ночоранд аз "AstraZeneca" истифода кунанд.

Абдухалил Холиқзода, раиси Бемористони Ибни Сино" дар Душанбе ҳафтаи гузашта ба Радиои Озодӣ гуфт, ба хулосае омадаанд, ки дар шароити набудани ваксинаҳои дигар бояд ҳама аз ваксинаи "AstraZeneca" истифода кунанд. Ӯ гуфт, "хубтар мебуд агар бароямон ваксинаҳои дигар низ пешниҳод шавад".

Номи "AstraZeneca" як моҳи пеш дар сархати хабарҳои ҷаҳон қарор гирифт. Як қатор кишварҳои аврупоӣ гуфтанд, баъд аз хабарҳо дар бораи лахташавии хуни баъзе афроде, ки ин ваксинаро дарёфт кардаанд, аз истифодаи ин ваксина муваққатан даст мекашанд. Вале худи ин ширкат ва ҳам Созмони Ҷаҳонии Тандурустӣ гуфтанд, далели мустақими лахташавии хуни муштариён баъд аз қабули ваксинаи "AstraZeneca" вуҷуд надорад. Масъулони Вазорати тандурустии Тоҷикистон ҳам мегӯянд, аз истифодаи ин ваксин то имрӯз ягон шикояти ҷиддӣ аз сокинон нарасидааст.

Дар бештар аз як моҳи ахир мақомоти кишвар аз сабт нашудани ҳолати нави гирифтори ба коронавируси нав хабар медиҳад. Тибқи иттилои Вазорати тандурустӣ, дар Тоҷикистон бемории COVID-19 ба беш аз 13 ҳазор нафар сироят карда, 90 нафарро куштааст. Оморе, ки иддае ба дурустияш шубҳа доранд ва миқёси бемориву талафот аз онро бештар аз рақамҳои эълоншуда медонанд.

Видеоро ин ҷо тамошо кунед.

https://www.ozodi.org/a/31205319.html 

Санаи 2 апрели соли 2021 Раиси Раёсати БДА ҶТ «Амонатбонк» муҳтарам Икроми С.С., бо намояндаи Business & Finance Consulting (BFC) Бонки Аврупоии Таҷдид ва Рушд Шавкат Абдураймжанов мулоқоти фосилавӣ баргузор намуданд.

Дар мулоқоти мазкур Раиси Раёсати БДА ҶТ «Амонатбонк» Икромӣ С.С., Директори Департаменти қарздиҳӣ, Директори Департаменти рушд ва омори бонкӣ ва Сардори Идораи муносибатҳои байналхалқӣ иштирок намуданд.

Зимни мусоҳиба масоили рушд додани ҳамкориҳои муштарак дар низоми бонкӣ, масъалаҳои иҷтимоӣ, сармоягузорӣ ва рушди технологияҳои молиявӣ мавриди баррасӣ қарор гирифтанд.

Ҷонибҳо ҷиҳати ба роҳ мондани ҳамкориҳои судманди мибаъда омодагии худро иброз намуданд.

Ҷаласаи кории Раиси Раёсати БДА ҶТ «Амонатбонк» бо кормандони МХБ ва масъулони филиалҳои БДА ҶТ «Амонатбонк» дар шаҳри Душанбе

Нимаи дуюми рӯзи 03.03.2021 дар бинои асосии Раёсати БДА ҶТ «Амонатбонк» ҷаласаи кории Раиси Раёсати БДА ҶТ «Амонатбонк» бо кормандони МХБ ва масъулони филиалҳои БДА ҶТ «Амонатбонк» дар шаҳри Душанбе баргузор гардид. Дар оғози ҷаласа Раиси Раёсат оид ба фаъолияти марказҳои хизматрасонии бонкии филиалҳои шаҳри Душанбе маълумот пешниҳод гардид.

Шумораи МХБ-и филиалҳои БДА ҶТ “Амонатбонк”дар шаҳри Душанбе ба санаи 31.01.2021с.- 58 адад ташкил медиҳад, ки дар онҳо 158 нафар кормандон ба кор ҷалб гардидааст.

Дар соли гузашта бобати иҷрои саривақтии иҷрои амалиётҳои бонкӣ, бартараф намудани тамбашавии мизоҷон ва беҳтар намудани сифати хизматрасонӣ ҳамаи марказҳои хизматрасонии бонкии филиалҳои шаҳри Душанбе пурра бо компютер ва таҷҳизоти муосири бонкӣ таъмин гардиданд. Инчунин кормандони Марказҳои хизматрасонии бонкӣ пайваста дар тренинг ва курсҳои омӯзишӣ ҷалб гардида, баҳри бартараф намудани камбудиҳои ҷойдошта ҷораҳои зарурӣ андешида шуда истодааст.

Дар доираи ҷаласа натиҷаи нишондиҳандаҳои Марказҳои хизматрасонии бонкӣ дар монитор пешкаши кормандон гардида, барои бартараф намудани камбудиҳо пешниҳодҳои сардорони идора ва кормандон шунида шуд.

Инчунин аз ҷониби роҳбарияти «Амонатбонк» барои пешравии кор ва ҳавасманд намудани кормандони бонк ба Маркази хизматрасонии бонкии фаъол ва намунавӣ “Раҳматнома” супорида шуд.

Тренинг дар мавзӯи «Баҳодиҳии амволи ғайриманқул»

Ҷиҳати баланд бардоштани савияи донишу малака ва касбияти кормандони Бонки давлатии амонатгузории ҶТ “Амонатбонк” дар самти баҳодиҳии амволи ғайриманқул, дар  дар ҷамбастагӣ бо Ассотсиатсияи ташкилотҳои маблағгузории хурди Тоҷикистон (АМФОТ) ва ҷалби мутахассиси соҳа аз санаи 29 марти соли 2021 то 2 апрели соли ҷорӣ тренинги омӯзишӣ баргузор гардид.

Дар тренинги мазкур кормандон аз Идораи баҳогузорӣ, мониторинг ва фурӯши амвол, муовинони мудир аз бахшҳои вилоятӣ ва минтақавӣ инчунин аз филиалҳои ш.Душанбе ва ноҳияҳои тобеи маркази БДА ҶТ «Амонатбонк», иштирок варзиданд.

Тренинги мазкур фарогири мавзуҳо оиди  Стандартҳои баҳодиҳии байналмиллалӣ ва стандарҳои баҳодиҳии ҶТ, Принсипҳои баҳодиҳӣ, моҳияти принсипҳои баҳодиҳӣ, асосҳои математикии баҳодиҳӣ, маълумоти мухтасар дар бораи баҳодиҳии молу мулки манқул ва дастур оид ба баҳодиҳии молу мулки манқул буд.

Баъди хатми тренинги омӯзишӣ аз ҷониби Раиси Раёсати БДА ҶТ “Амонатбонк”, Икромӣ С.С., директори Ассотсиатсияи ташкилотҳои маблағгузории хурди Тоҷикистон (АМФОТ) Фаттидинова З.Б. ва директори ҶДММ «Маркази таълимӣ ва рушди маблағгузории хурди Тоҷикистон» Ибрагимова Г. иштирокчиён бо сертификати  Ассотсиатсияи ташкилотҳои маблағгузории хурди Тоҷикистон (АМФОТ) сарфароз гардиданд.

Иштирок намудан дар тренинги соҳавӣ барои баланд бардоштани малакаи касбии кормандони Бонк натиҷабахш буда, тасмим аст дар оянда низ чунин тренингҳо ташкил ва баргузор карда шаванд.

Эълони озмун барои интихоби ширкати мустақили баҳогузор

Бонки давлатиии амонатгузории Ҷумҳурии Тоҷикистон «Амонатбонк» ҷиҳати гузаронидани азнавбаҳодиҳии амволҳои Бонк барои интихоби ширкати мустақили баҳогузор озмун эълон менамояд.

Ширкатҳои мустақили баҳогузор метавонанд пешниҳодҳои тиҷоратии худро ба суроғаи ш. Душанбе, хиёбони Рӯдакӣ 105, Раёсати БДА ҶТ «Амонатбонк», пешниҳод намоянд.

Муҳлати қабули ҳуҷҷатҳо то 12. 04. 2021с.

Телефон барои тамос : (44) 600-90-62, (44) 600-90-24

Шуъбаи матбуоти БДА ҶТ «Амонатбонк»

Бо фарорасии моҳи шарифи Рамазон мардуми кишвар аз дурустию нодурустии тақвим ва вақту соати даҳонбандӣ ҳангоми рӯзагирӣ фикру ақидаҳои худро иброз намуда истодаанд. Чунки 2-3 соли охир тақвими моҳи рамазон ва вақтҳои ба охир расонидани саҳархӯрӣ тибқи дархости Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон дар кишвар сару садоҳои зиёде ба миён овардааст. Дар ин бора Газетаи СССР низ чанде  эрод гирифта буд. Бо вуҷуди он, аз ҷониби масъулини ин соҳа, ягон хабаре, ки ба Қуръони Карим ва суннати пайғамбар (с) асос  гашта бошад, дарҷ нагашт.

Солҳои пеш, дар давраи Ҳокимияти Советӣ, гарчӣ режими атеистӣ вуҷуд дошта бошад ҳам, бо шунидани азони намози бомдод, муслимин саҳархӯриро бас карда, ба масҷид барои намози ҷамоат мерафтанд. Вақтҳои ахир аз рӯи тақвими тартибдодашуда даҳонбандии рӯзадорон зиёда аз 1 соат пеш то шунидани азони намози бомдод сар мешавад. Дар зимн, калонсолон ва мӯйсафедон аз хоб монда, мунтазири азони бомдод мегарданд, ки ин ҳолат душворӣ ба бор оварда истодааст.

Куръону ҳадис чӣ мегӯяд?

Аз ин рӯ, мехоҳам оиди ҳамин масъала фикри худро дар асоси Қуръони маҷид ва суннати пайғамбар (с), ки ҳарду асос буда, мусалмонони комилро барои адои фарзии он даъват менамоянд, иброз намоям.

Доир ба масъалаи саҳархурӣ дар ин китоби муқаддаси аҳли ислом омадааст:

«… Ва то равшан шудани риштаи сафеди субҳ бароятон аз риштаи сиёҳ (-и шаб) бихӯред ва бинӯшед ва сипас рӯзаро то шаб (то нишасти офтоб) тамом намоед». (Бақара, ояти 187). Дар ин саҳархезии навбаромади тақвими Кумитаи дин риштаи сафед аз сиёҳ фарқ карда намешавад!

 Барои осонтар сохтани саҳархезӣ ва саҳархӯрӣ дар шабҳои Рамазон Паёмбар (с) ба гуфтани 2 азон дастур дод: яке барои бедор сохтани мардум ва дигаре барои муайян намудани дамидани субҳ ва поёни вақти саҳархӯрӣ: «Бо шунидани азони Билол (р) аз саҳархӯрӣ даст накашед, зеро ӯ шаб (барои бедор сохтани хуфтагон) азон мегӯяд ва вақте, ки азони Ибни Уммимактумро шунидед, он гоҳ хӯрдан ва нӯшиданро бас намоед, зеро вай бо дамидани субҳ азон мегӯяд». (Тафсири навини Қуръони карим, ҷ. 1, саҳ. 294, Саҳеҳи Бухорӣ, Саҳеҳи Муслим, Сунани Абӯдовуд, Сунани Тирмизӣ ва ғайраҳо).

Зайд ибни Собит (р) мегӯяд: «Ман бо Набӣ (с) якҷоя саҳархӯрӣ кардем. Баъд Расулуллоҳ (с) барои намози бомдод бархостанд. Анас (р) аз Зайд пурсид, ки муддати байни даҳонбандӣ ва намози бомдод чӣ қадар буд? Зайд мегӯяд: «Муддати 50 ояти Қуръон буд» (Ҳадиси Ал-Бухорӣ, қ. I, саҳ. 517. Тошканд – 1991 с.)

Қуръони карим ва суннатҳои Расули акрам (с) асоси дини мубини ислом аст. Пас, барои чӣ ин фарзия ва суннатҳоро таҳрир бояд кард?! Соату рӯзҳои моҳи Рамазонро каму зиёд менамоем?! Буданд солҳое, ки Иди рамазон ва Иди қурбонро чун дигар кишварҳои исломӣ ва мамолики аҳолиаш мусалмон дар 1 вақт қайд накарда, тафовути якрӯза ба миён меовардем. Ҳол он ки фарқияти соати байни Тоҷикистон ва Маккаи мукаррама ҳамагӣ 2-2,5 соатро ташкил медиҳад, на 1 рӯз (24 соат)-ро.

Кумитаи дин то ба кай мардумро саргардон мекунад? Чаро бо ояту ҳадис бар мо посух нагӯяд ва Тақвимашро шарҳу тафсир насозад?

Ҳоҷӣ Абдуҳамид Назарзода,

ш.Душанбе, тел: 918-63-01-99