ХАБАРИ ДОҒ
Чоршанбе, Март 30 2016

25.03.3016. Соат бо вақти Душанбе 15:17 дақиқа. 

Шодибеки Халилзода, сокини шаҳри Душанбе меҳмони СССР шуд ва гуфт, ман миннатдории худро ба шаҳрдори Душанбе-Маҳмадсаид Убайдуллоев мерасонам, зеро дар ҳар Наврӯзӣ ба номи паҳлавонони номии кишвар шоҳҷоизаҳо мегузорад ва бо ин рӯҳи онҳоро болида месозад. Бале, бузургонро бузургон зинда медоранд. Ҳамчун мӯсафед дилбохтаи гӯштин, бузкашӣ, пойгаю футбол ҳастам ва 1 таклиф ба Кумитаи ҷавонон дорам. Чӣ мешавад, барои онҳое, ки дар вазни 60-70-75 рақобат мекунанд, низ шоҳҷоиза ташкил шавад, зеро паҳлавонон дар вазни 90-100 кг дар кишвар шояд 5-10 нафар бошанду аксарият сабуканд. Беш аз 100 нафар паҳлавонони тайи 60-70-75 кг-ро ноумед кардан аз рӯи инсоф нест. Умедворам, ки шаҳрдори пойтахт ва масъулини Кумитаи ҷавонон сари ин масъала андеша хоҳанд кард. Ҳамчунин, сари ин мавзуъ бояд раисони шаҳру навоҳии кишвар низ ба хулосае биёянд. Ман гӯштини наврӯзии имсоларо тамошо ва эҳсос кардам, ки мухлисон аз ин мусобиқа ягон кайфияте набурданд. Паҳлавонон часпу талоши беҳуда карда, суст гӯштин мегирифтанд. 2-3 нафар гӯштини ҳалол гирифту халос. Дар охир, гӯштингир Муҳаммад Абдураҳмоновро аҳсан ва таҳният мегӯям, ки ҳарифонашро дар байни 2-3 дақиқа аз по меафтонид. Ҳалолаш бод!

Чоршанбе, Март 16 2016

26.02.2016. Соат бо вақти Душанбе 13:19 дақиқа.

Ҷанговари башардӯсти Афғонистон, Ҳикматулло Мирзоев, аз муборизони фаъоли Фронти халқӣ дар «нуқтаҳои даргир»-и Қурғонтеппа, аз барқароркунандагони Ҳокимияти конститутсионӣ дар Тоҷикистон меҳмони газетаи мардумии СССР шуд ва гуфт, ки дар матбуоти даврӣ, аз ҷумла, дар газетаи СССР зиёд перомуни таърихи ҷанги гражданӣ менависанд. Бештари навиштаҳо хато, дурӯғ ва фарсахҳо дур аз ҳақиқатанд. Ман хотираи зиёд дорам аз ҷангҳои бемаънӣ дар шаҳру навоҳии Кӯлоб, собиқ вилояти Қӯрғонтеппа, перомуни муҳорибони маъруфи даврони ҷанги гражданӣ-Сангак Сафаров, Файзалӣ Саидов, Қурбони Чол, дар хусуси аввалин митингҳо дар Кӯлоб ва Майдони Озодии Душанбе. Ҳоло тасмим гирифтаам, ки ёддошти худро ба тафсил барои СССР бигӯям. Дуруст, агар он таърихро мо нагӯем, дар оянда он афсона ва дурӯғ мешавад ва бегонаҳо аз номи худ бофтаву тофта таърихи моро навиштан мегиранд… Хонандаи СССР интизор шавад, дар наздиктарин шумора тибқи ваъда хоҳам навишт.

Чоршанбе, Март 16 2016

29.02.2016. Соат бо вақти Душанбе 11:04 дақиқа. 

Нависандаи шинохтаи Тоҷик Мирзонасриддин Саидов дар меҳмонии газетаи СССР аз нашри романи «Оташ дар хонаи қадим»-аш пайғом дод ва гуфт: Чанд сол пеш дар маҷаллаи Садои Шарқ бо номи «Шаби душвор» повест чоп кардам. Повест дар хусуси сабабҳои ҷанги шаҳрвандии соли 1992 буд. Пас аз чоп ба фикр рафтам, ки асоси ҳамин ҷанг ба солҳои 1920 мерасад. Баъд нишастам ба таҳлилу тадқиқ. Ва 1 романи калон навиштам бо номи «Оташ дар хонаи қадим». Китобро аввал 300 саҳифа навишта, хонаи устод Урун Кӯҳзод рафтам. Он кас гуфтанд: «Ин роман нест, зеро воқеаҳо нопурраанд». Баъд ҷиддӣ машғул шудам. Ба Бухорову Самарқанд, ба Афғонистон рафта, чандин вилоятҳоашро гаштам. Бо онҳое вохӯрдам, ки дар хурдӣ бо Иброҳимбек нишастаанд. Девори Балхро низ дидам. Хуб, омадаму 6 сол аз хона набаромада навиштам. 1 қисмашро Садои Шарқ чоп кард. Ҳоло китоб бо тиражи 500 нусха чоп шудааст. Дар китоб ба ҷанги Иброҳимбек, Анварпошшо, Давлатманд, аскарони сурх, босмачигарӣ, муносибат бо ҷадидҳо… ба диди дигар нигаристаам. Худо хоҳад дар шумораҳои баъдӣ пораҳое аз ин китобро пешкаши хонандаи СССР мекунам. Мо Метавонем!

 

Чоршанбе, Март 09 2016

19.02.2016. Соат бо вақти Душанбе 11:08 дақиқа.

 Хусрав Худойназаров, коргардони кино ва ТВ (тел: 900 63 02 03, 917 94 86 80) дар меҳмонии СССР гуфт, 1 нақшаи ҷиддии эҷодӣ дорам. Ба таваҷҷӯҳи сарватмандоне, ки мехоҳанд, барои ба наворгирии филмҳои миллӣ сармоягузорӣ кунанд, расонданиям, дар сурати майлу хоҳиш ба камина муроҷиат кунанд. Нақшаи ман офаридани филм доир ба тӯю сурҳои арӯсӣ дар ҳамаи шаҳру навоҳии Тоҷикистон аст. Дар ин робита шавқмандонро низ ба ҳамкорӣ даъват карданиям. Филм тибқи нақша «бадеӣ-мустанад» буда, таҳти унвони «Тӯй дар ин хона муборак шавад» сабт хоҳад шуд. Дар аксари давлатҳои мутараққӣ барои рушди синамо ашхоси сарватманд барои таҳияи филмҳо сармоягузорӣ мекунанд ва албатта манфиати хуб ҳам мебинанд. Бовар дорам, ки ин филм даромади хуб меорад ва саҳҳом метавонад, манфиат аз саҳмияи худро осон ба даст оварад. Дар сурати амалӣ шудани нақша метавонем, ки продюссери касбиро низ даъват кунем. Мо Метавонем!

Чоршанбе, Март 09 2016

22.02.2016. Соат бо вақти Душанбе 14:33 дақиқа.

 

Донишманди Тоҷик, собиқадори маориф, Ҳабибулло Искандаров, мухлиси ашаддии газетаи мардумии СССР, сокини пойтахт дар меҳмонии СССР гуфт, ки ман хело хушҳолам, дар замони нав, яъне дар асри 21 нобиғаҳои ҷавон-рӯшанфикрони нав кам нестанд, мисли раҳматӣ Акбари Саттор, Сайёфи Мизроб, Раҷаби Мирзо, Нуралӣ Давлат, Сафват Бурҳонов, Хуршеди Атовулло. Бояд ба қалами Сайёф қоил шуд, зеро ӯ ҳам чизҳои кӯҳнашудаю аз хотиррафтаи моро тагурӯ карда аз нав ба ёд меорад ва ҳам мавзуъҳоеро мебардорад, ки дар фикри касе нест, яъне ҷадиданд. Вале афсӯси ман аз он аст, ки имрӯз мардуми мо кам ба театр мераванд ва намедонанд, театр чист. Ҳол он ки театр ин худ мактаб асту бинандаро таълиму тарбия медиҳад. Ҳамин проблемаро бояд ҳарчӣ ҷиддӣ бардоштан даркор. Ин бадбахтӣ аст, ки мардум ҳам аз театр ва ҳам аз китоб рӯ метобанд. Актёрҳои пурқуввату шинохта ва донишманд зиёд дорем, аммо театр мухлисонашро аз даст додааст…

Чоршанбе, Март 09 2016

23.02.2016. Соат бо вақти Душанбе 14:20 дақиқа.

Узви Ихвон-ал-СССР, Фариза Шарипова, донишҷӯ, сокини ноҳияи Рӯдакӣ дар меҳмонии СССР гуфт, ки дар шумораи гузаштаи СССР андешаи Ангела Меркел-сарвазири Олмонро дар бораи дин, қатлу куштор ва таассуби мазҳабӣ хондам. Меркел 100% ҳақ аст ва ҷони гапро гуфтааст. Охир, вақте қатлу куштор дар давлатҳои мусалмонӣ-Сурияву Ироқ, Миср, Яман, Либияро мебинам, ба фикр меравам: Наход мусалмонӣ ҳамин бошад?! Қатли модар аз дасти писаре, ки ӯро 9 моҳ дар батнаш гардонидаву шир додаву ба воя расонидааст, чӣ маънӣ дорад? Ба гуфти шоир Беҳрӯзи Забеҳулло, ҳамон дину ақлро мо ҳам дорем, мардуми Ғарб низ. Вале дину ақл дар мо фақат ҷангу хунрезӣ дораду дар Ғарб хизмати фарҳанг мекунад! Ҳусни мақтаъи сухани хонум Ангела бошад, аҷиб аст: «Ин дард аст, ки таваҷҷӯҳ намекунем, дин чист!» Дар Тоҷикистони мо низ дину мазҳабро дар ришу сатр дидаанд...

саҳ 33 аз 34

Китобҳо

Flag Counter