ХАБАРИ ДОҒ
Чоршанбе, Июл 08 2020

Духтари амакам аз Кӯлобшаҳр омада, хост, ки ӯро ба назди духтури чашм ба беморхонаи “Қарияи боло”-шаҳраки “Шифобахш” ҳамроҳӣ намоям. Субҳи рӯзи 29.06.2020 якҷоя аз хона баромада, сӯи шаҳраки “Шифобахш” роҳ пеш гирифтем.

Беморхона ё чойхона?

   Соат ба вақти Душанбе 10:47 дақиқа. Ба ҳудуди беморхона даромадан замон дидем, ки одамони зиёд дар байни корпусҳо гаштугузор доранд. Аксарият қоидаҳои беҳдоштӣ ва бехатарӣ-масофаи байни ҳамдигарро риоя намекарданд. Дар майсазори назди яке аз корпусҳо 1 гурӯҳи одамон қолину курпача партофта, баҳузур дастархон кушода нишаста буданд. Бархе болишт зери даст ба қавле ёмбош задаву дигаре хобида, кӯдакони зиёд дар гирди онҳо давутоз доштанд. Маълум аст, ки инҳо бемордоранд-хешутабори беморе, ки шояд дар шуъбаи эҳё хоб аст ва ё ҷарроҳӣ мешавад. Бемуҳобот 30-40 нафарро ҳисоб кардам, ки танҳо барои 1 бемор омада, инҷоро макони хобу хӯроку истироҳати худ интихоб карда буданд. Хӯрокашон низ дар 1 тараф даруни халтаҳои гуногуни салафанӣ гузошта шуда, ҳатто либоси такпӯши кӯдаконашонро ҳам дар шохаҳои дарахтону буттаҳо барои хушк шудан партофтаанд. Оё беҳтар нест, ки дар хона нишаста, барои шифои бемор 1 каф дуо кунему аз даргоҳи Худованд умри дарозашро талаб?

  Тавре ба назар мерасад, ки инҷо беморхона не, балки ягон чойхона,  истироҳатгоҳ ё корвонсарой аст.

Беморхона посбон дорад?

 Ҷамъшавии мардуми бемордор дар беморхонаи “Қарияи боло” падидаи нав нест. Солҳои тӯлонӣ дар гулгашту майсазори байни бахшҳои беморхона ҳамеша бемордорон, ки аз роҳи дур омадаанд, шабу рӯзашонро мегузаронанд. Аммо бо дарназардошти он, ки ҳамин ҳоло ҷаҳон бо пандемияи нави одамкуш даст ба гиребон шудаву ҷони ҳазорҳо нафар аз он ҷумла дар Тоҷикистон ҳамарӯза дар хатар аст, магар дуруст аст, ки беморхонаи калонтарини кишварро ба чойхона ва корвонсарой мубаддал гардонем?

 Магар масъулин ва посбонони шаҳраки “Шифобахш” намедонанд, ки рафтуомади зиёди мардум, боз ҳам шабгузаронии онҳо дар ҳудуди беморхона пеш аз ҳама барои фаъолияти табибон халал мерасонад. Ин посбонҳо бо ин ҳол дигар барои чӣ лозиманд ва кирову чиро посбонӣ мекунанд?

Чаро дар “Истиқлол” тартиб ҳасту дар “Шифобахш” не!

   Чунин ҳол-ҷамъшавиву шабгузаронии бемордоронро шумо ҳеҷ гоҳ дар беморхонаи “Истиқлол”, Ёрии таъҷилӣ ва ё Беморхонаи №3-ву 1-Советский намебинед, зеро масъулин ва муҳофизони ин беморхонаҳо намегузоранд, ки мардуми бемордор рафта, дар таги оинаи палата чақ-чақ ё охувоҳ карда бишинанд. Беморхона тартиби худро дорад ва онро бояд рияо кард! 

Аммо боз ҳам чаро ин тартиб дар шаҳраки “Шифобахш” риоя намегардад, ман нафаҳмидам...

Омиронаи Сайёф, СССР 

 

 

 

Чоршанбе, Июл 01 2020

 

Бозори милливу шарқии «Панҷшанбе»-и ш.Хуҷанд на танҳо рамзи ин шаҳр, балки тамоми вилояти Суғд аст. Ин бозор, ки таърихи беш аз 55 сола дорад, яке аз калонтарин бозорҳои шарқии минтақаи Осиёи Марказӣ ба ҳисоб рафта, бинои имрӯзаи он соли 1965 бунёд ёфтааст. Ин бозор дар замони шуравӣ бозори колхозӣ, пас аз ба даст овардани истиқлолияти давлатӣ ва бо истифода аз вазъият ва буҳронҳои моливу иқтисодӣ бозори овозадорро ба ҷамъияти саҳҳомӣ табдил дода, чанд саҳмгузор бозорро байни худ тақсим карда, онро хусусӣ намуданд. Бо гузашти 28 сол ин бозор дубора ба давлат баргашта, имрӯз бозори «Панҷшанбе» ба тобеияти Иттифоқи Тоҷикматлубот шомил шуда, сарвариашро Хуршеда Бобоева, 1 зани соҳибкори муваффақ бар ӯҳда дорад. Зимни сафари корӣ ба шаҳру навоҳири вилояти Суғд мо мисли ҳамеша аз ин бозор дидан кардем-ин маротиб тағийротҳои зиёд ба назар расида, эҳсос мешавад, ки ин бозори машҳури шарқӣ рузгори наверо оғоз кардааст.

«Панҷшанбе» дигаргун мешавад!

   Тавре дар суҳбати ихтисосии мо Хуршеда Бобоева, иҷрокунандаи вазифаи директори ҶДММ «Бозори «Панҷшанбе»-и ш.Хуҷанд иброз дошт, корҳои азнавсозиву ободониро эшон аз таъмири утоқҳои кори маъмурияти бозор шуруъ кард, зеро шояд даҳсолаи ахир ин қисмати бозор таъмиру ҷобаҷогузориро надида бошад.

   - Бо дастгирии раиси вилояти Суғ Раҷаббой Аҳмадзода ва Раёсати Иттифоқи Тоҷикматлубот ин муддат ба маблағи 79 456 сомонӣ корҳои таъмирӣ ба анҷом расонида, дар ҳудуди бозор 32 камераи мушоҳидавӣ насб кардем. Ба ғайр аз ин дар қади роҳҳои даромади бозор ҷойи нишасти соҳибкорони фурӯши маҳсулоти хӯрока дар растаҳое, ки ба талаботи имрӯза на онқадар ҷавобгӯ буд, қарор дошт, азнавсозӣ гардида, зиёда аз 50 метр соябони оҳанин гирифта шуд. Барои боз ҳам муҳайё намудани шароити мусоид ба соҳибкорон нақша кашидем, ки боми тангкӯчаи фуруши гӯштро, ки дар қисмати чапи бозор ҷойгир аст, ба масоҳати зиёда аз 500 метри квадратӣ азнавсозӣ намуда, бо боми пластмасии замонавии рӯшноидиҳанда иваз намоем. Ҳамзамон дар даромадгоҳи дуюми бозор 63 метр дарозӣ бо 7 метр паҳноӣ соябон бо конструксияи оҳанин сохтаем, ки барои нигоҳ доштан аз барфу борон кумак мекунад. Бубинед, ҳамин ҳоло соҳибкорони бозор худ иқдом карда, дохили растаҳои савдоро таъмир ва сафолакпуш карда истодаанд. Ҳамаи ин корҳои ободониро мо бахшида ба 30-солагии Истиқлолияти давлатии ҶТ оғоз карда, то ҷашни таърихии кишвар ба бозор симои нав хоҳем бахшид, - қайд кард мавриди суҳбат Хуршеда Бобоева.

Безараргардонии шабонарузӣ

 Бинобар сар задани сирояти бемории COVID-19 дар муддати 3 моҳи ахир дар ҳудуди бозори «Панҷшанбе» корҳои безараргардонӣ ба таври шабонарӯзӣ гузаронида шуда, ба воситаи Шуъбаи безараргардонии ш.Хуҷанд ба маблағи умумии 10 554 сомонӣ, бо дастгирии соҳибкорон ба маблағи 26 900 сомонӣ, бо воситаи МНДСЭ-1884 сомонӣ ва баҳри нигоҳдоштани гигиенаи шахсии соҳибкорон ва кормандони фаъолиятбаранда 17 150 адад ниқобҳои тиббӣ ва 1865 антисептикҳо тақсим карда шудаанд. 

   Хуршеда Бобоева мегӯяд, ки ҳар ҳафта рӯзи шанбеву якшанбе дар назди бозори Ситоди вилоятӣ ҷамъ омада, Раҷаббой Аҳмадзода, раиси вилояти Суғд ва Маъруф Муҳаммадзода, раиси ш.Хуҷанд шахсан дар кори ин Ситод ширкат варзида, бо тозагӣ ва шароити бозору гирду атрофи он шинос шуда, бо соҳибкорону харидорон мулоқот мекунанд.

 

Ҷамила Ҳусейнова, СССР,

Душанбе-Хуҷанд-Душанбе

Ҷумъа, Июн 26 2020

(Human Story)

Сари 1 пиёла чой

13.06.2020 бо сафари корӣ дар ноҳияи Мир Саид Алии Ҳамадонӣ қарор доштам. Сари роҳ тасодуфан мӯйсафеди нурониеро дидаму бо эшон ҳамсуҳбат гаштам.  Амиралӣ Мадалиеви 80 сола худро мухлис ва дӯстдори ҳафтаномаи СССР муаррифӣ кард. Ба хонаи амаки Амиралӣ расидан замон зироаткории хоси замини назди ҳавлигияшон диққатамонро ҷалб сохт. Ҳарчанд ҳавлии ин деқони асил на онқадар бузург буд, аммо дар он қариб, ки ҳама намуди сабзавоту полезӣ ва дарахтҳои мевадиҳандаро дидан мумкин аст. Дар 1 тараф картошкаю лубиё, тарафи дигар помидору бодиринг, қаламфури булғориву ҷуворимакка, боимиҷон, сабзаҷот ва кабудӣ. Воқеан ӯ заминро моҳирона ва самаранок истифода намудааст.

Маҷбуран моро сари 1 пиёла чой даъват намуда, дар ҳалқаи ҳамсару фарзандон аз зиндагӣ ва рӯзгори худ суҳбат кард. Аз хотираҳои ширини зиндагияш дар замони Шӯравӣ, хизмат дар артиши СССР нақл намуда, ашкҳояш равон гардид. Хизмати ҳарбиро дар қисми низомии сохтмонӣ-стройбат дар назди кули Балхаши Ҷумҳурии Қазоқистон адо намуда, барои хидмати шоён рутбаи сержанти калон гирифтааст. Ин марди накӯ 32 сол собиқаи корӣ дошта 22 соли охир, аниқтараш аз соли 1976 то 1998 дар автобазаи 27-уми ноҳияи Москва (ҳозира Ҳамадонӣ) чун ронанда, фаъолият карда, соли 1970 оиладор шудааст.

Фирефтаи замин

Ҳамсари амаки Амиралӣ-Сайвалиева Заҳро низ бо хушҳолӣ аз зиндагии ширинашон ёд намуд. Ӯ меӯяд дар ҳама ҳолат бо ҳам тифоқ будем ва якдигарро зиёд дӯст дошта, эҳтиром мекардем. Бо мӯйсафед 9 фарзандро тарбия намуда, ба воя расонидем. Бо нони ҳалол фарзандонро бо хости худашон оиладор карда, ҳар якеро соҳиби хонаву дар намудем ва то ҳол ба қадри тавон ба онҳо ёрӣ мерасонем...

Холаи Заҳро дар бораи зиндагиаш бо ҳамсари меҳрубони худ ба некӣ ёд намуда, таъкид кард, ки “Дар ҳаёти мо кишоварзӣ муҳимтар аз ҳама чиз аст. Мӯйсафед заминро зиёд дӯст медорад ва агар 1-рӯз ба замин надарояд, саломатиаш бад шуда, худашро нотоб ҳис мекунад”. 

Аз 1,5 сотих 1 т. 156 кг картошка

 Ҳосили ғундоштаи картошкаи амаки Амиралиро дида, ҳисси кунҷковиямон боло гирифт ва аз вай дар бораи ҳосили заҳматҳояш пурсидем. Ӯ мегӯяд ҳамагӣ аз 1,5 сотих замини картошка, зиёда аз 1 тоннаю 156 кг ҳосил гирифтааст. Сирри ин муваффақиятро пурсон гардида, посухи аҷоиб гирифтем. 

   -Ман хоҷагии деҳқонӣ надорам, танҳо дар 12 сотих замини наздиҳавлигиям кишти зироатҳои гуногунро гузаронида, зиндагиямро аз ин ҳисоб пеш мебарам. Аз падару бобоёни худ насиҳат гирифтаам, ки баъди ҷамъоварии ҳосил ҳатман “ъушр”-и заминро ба ҳаққу ҳамсояҳо тақсим кунам. Сирри муваффақият ва ҳосилфаровонии замини ман низ маҳз дар ҳамин аст. Ана имсол дар 1,5 сотиқ замин картошка кошта, аз он ҳосили хуб гирифтам ва наздики 200 килограмми онро ба ҳамсояҳо ва хешу табор чун ъушр, яъне андози замин дар пеши Худои Азза ва Ҷалла, тақсим кардам, мегӯяд амаки Амиралӣ. 

   Аз оилаи ҳалиму некандеш 1 ҷаҳон “позитив” гирифта, бо дуои неки пирони рӯзгордида ва меҳрубонии фарзандону келинҳои хонавода роҳ ба сӯи Душанбе гирифтам, то Худотарсиву Худопарастии ишонро манзури якояки аъзои Ихвон ал СССР созам. Тавонистам???

Исмоилҷон Маликов

Душанбе-Ҳамадонӣ-Душанбе 

 

Чоршанбе, Июн 17 2020

Боби 1. Сафар аз Душанбе...

 06.06.2020. Соат ба вақти СССР 09:28 дақиқа. Бо аҳли эҷоди ҳафтаномаи СССР бо нияти истироҳату сайёҳат аз назди бинои “Шарқи озод” роҳ сӯйи Ҳисори шодмон пеш гирифтем. Сурудхонону шӯхикунон хастагии роҳро низ эҳсос накардем. Хоса вақте, ки “ХИДМАТГОР-РОНАНДАИ АСОСИЯМОН” САРДАБИР БУД! Дар наздикии деҳаи Шарора издиҳоми одамонро дида, ба сӯяшон рафтем. Инҷо “Мол-бозор”-и деҳаи Шарора будааст. 

А) Талхаи Озодӣ мекафад!!!

    06.06.2020. Соат ба вақти СССР 10:21 дақиқа. То ин дам  фикр мекардем, ки дар “Мол-бозор” савдогарон фақат ба фурӯши гову гӯсола, бузу гӯсфанд, мурғу хурӯс ва дигар ҳайвони хонагӣ банданд, аммо, не! Дар 1 тараф мардум ба харидуфурӯши ҳайвоноти хонагӣ, дар тарафи дигар ба маҳсули дасти деҳқон амсоли картошкаю пиёз, помидору бодиринг, тарбузу харбуза ва дигар анвои хӯрока машғул буданд. Ҳисси журналистӣ беқарорамон сохту аз пайи пурсидани нарху наво гардидем. Дар ҳақиқат инҷо нархҳо нисбат ба Душанбе арзонтар менамуд. Масалан, 1 кило картошка 3,5-3,8 сомонӣ, 3 кило помидор-10 сомонӣ, 1 дона тарбуз 8-10 сомонӣ, 1 кило пиёз 60 дирам...Нархҳоро дида, нафаре шӯхӣ кард, ки агар аз поинравии нархи пиёз радиои Озодӣ ҳафтаи пор ба таҳлӯка афтода бошад, ин ҳафта аз тарс мекафад. Зеро воқеан ҳам баракси чашминтизориҳои ин радиои “дӯсти Тоҷикистон” нарху наво дар мо поин мераваду меравад...

  Б) Ҳисор равед, мардум!!!

  Ҳисор макони таърихист ва табиати бойю ғанӣ дорад. Аз табиати воло, манзараҳои биҳиштосо, ҳавои тозаву беғубори Ҳисори шодмон як ҷаҳон лаззати маънавӣ бурдем. Мардуми ин шаҳр мардуми хоксору некгумонанд. Ҳарчанд аксари онҳо бо ниқобҳои муҳофизатӣ буданд, вале ҳеҷ кас аз коронавирус наметарсид. Онҳо хушу хурсанд ба назар мерасиданд ва парвои коронавирус ҳам надоштанд. Аҷибаш ин буд, ки дар Ҳисор расидан замон дигар коронавирус на ба ёдамон омаду на эҳсоси хатар намудем. Мардуми инҷо қариб ба куллӣ аз мардуми Душанбешаҳр фарқ мекарданд. Тасвири волои ҳисориҳоро намедонем чи гуна барои шумо хонандагони азиз рӯйи қоғаз орем. Ба чашми худ чизеро, ки набинед бовар намекунед. Зеро ҳатман ҷомаи тарсатонро кашида, Ҳисор равед!  Пушаймон намешавед!

  В) Мардуми меҳмоннавозу меҳнатдуст 

     06.06.2020. Соат ба вақти СССР 10:08 дақиқа. Ба маркази шаҳр расидан замон моро Ният Ҳаёт, масъули робита бо ҷомеа ва ВАО-и МИҲД ш.Ҳисор дидаву дигар “озод накарданд”. Аз боғу роғҳои Ҳисор дидан намуда, каме гелосу олуча низ чидем. Пештоз бояд гуфт, ки барфи аввалиапрелии ғайримунтазира, қариб ҳосили гелосро дар ин ноҳия пурра маҳв кардааст ва сабаби болоравии қимати гелос (ба бахти радиои Озодӣ) маҳз табиат аст, на ҳукумат, на деҳқон ва на вирус...

Дар гӯшаи боғе Ҳикматулло Азизов деҳқони асил ва полезикорро саргарми кор дидему бо эшон каме ҳамсуҳбат гаштем. Дар даст каланд ҷӯйҳои помидорро нарм  мекард. Ӯро марди ҳалиму меҳрубон дарёфтем, ки бо парвардаҳои помидор эҳтиёткорона муносибат доштӣ. Мудом таъкид менамуд, ки “эҳтиёт кунед, мабодо помидорҳоро зер накунед! Он ризқу рузии инсон аст!”. 

Амаки Ҳикматулло мегӯяд, ки аз кор кардан дар сари замин ҳаловати маънавӣ мебарад.  “Ман худ ошпазам, вале боғчакорӣ низ мекунам. Помидору бодиринг ва картошкаю пиёз ба муҳаббати деҳқон ниёз доранд. Гирди онҳоро нарм сохта, мудом обашон медиҳӣ то ҳосили фаровон ба даст орӣ”- таъкид мекард ҳамсуҳбати мо. Дар гӯшаи сояе чойю нон ва каме мева дошту моро ба сари 1 пиёла чой хонд. -Аз заҳмати дасти деҳқони асил нуши ҷон намудан гуворост-гуфта, ҳамкорамон Шералӣ 1 чойник чой ва 2 нони деҳқонро ба 1 дам фурӯ бурду моро ғамину бобои Ҳикматуллоро шод кард...Деҳқонон дӯст доранд, ки шаҳриён бо ишон сари 1 хон шинанд!

Г) Телефон зарар диду айнак гум шуд

   06.06.2020. Соат ба вақти СССР 11:19 дақиқа. Бародари азиз Ният Ҳаёт моро меҳмони худ карда, ба ошхонае бо номи “Ситора” даъват намуданд. Лаззати дастпухти ошпазони ин ошхонаи номдорро намешавад бо навиштан баён кард. Хӯрокҳои хеле олӣ! Дасташон дардро набинад. Инҷо ҳам моро бо қулфинайу мармиҷон, зардолую шафтолу, гелосу себу олу, тарбузу харбуза зиёфат намуданд. Моҳӣ ва чӯҷаи хонагӣ, ки таомҳои урфии ин ошхонаанд, хеле болаззаттар аз ресторанҳои пойтахтанд. Дар назди ҳавзи об нишаста суҳбаткунон мева мехурдем. Чун ҳарвақта шӯхиҳои акаи Идибек болои лаззати меваҳо лаззати дигар зам мекард. Ҳама саргарми ҳазлу мутояба будем, ки духтарон Ситораву Омирона Шералии “қаҳрамони сари хони деҳқон”-ро ба ҳавзи пур аз об партофтанд. Ана, акнун обпошиву оббозиро бубин. Телефони Ситора аз об зарар диду Шералӣ айнакашро дар оби ҳавз гум кард. Вале хандаҳои самимӣ шухиҳои намакин ва насиҳатҳои Ҷамилабону Ҳусейнова ва Сайёфи Мизроб дар хотираҳо то дер боз нақш хоҳанд баст (воқеан ҳам мо бовар кардем, ки сардабир ғайр аз супоришоти қатъии редаксионӣ шӯхӣ ҳам мекардаанд!)... 

1 ҷаҳон сипос ба акои Ният Ҳаёт, ки чунин лаҳзаҳои хушу гувороро тақдими мо сохтанд!

Боби 2. Бозгашт ба Душанбе

  06.06.2020. Соат ба вақти СССР 14:38 дақиқа. Роҳи бозгашт ба Душанбе низ фаромӯшнашуданӣ буд. Аз фурӯшандагони сари роҳ тарбузу харбуза, гелосу помидор харида, ба Душанбе савғо овардем. Муҳимтар аз ҳама устод Сайёф моро дар бозгашт ба зиёрати мазори устоди марҳум Акбар Саттор, ки дар қабристони деҳаи Мортеппа дафн гардидаанд, бурданд. Онҷо устод аз хизматҳои шоёни устод Акбари Саттор ёдовар шуда, лаҳзаҳои хушу хотирмонро аз ҳаёти устод нақл намуданд. Баъди дуову фотиҳа дар мазори устод, ки Исмоил худро чун эшони асил муаррифӣ намуд, сӯи пойтахти зебоямон Душанбе раҳсипор гардида, соати 15:38 дақиқа ба пойтахт расидем. Ба қавле тим-билдингамон хуш гузашту таҷрибаи гузоришнависиро низ машқ кардем, ки хонанда аз ин репортаж ба мо баҳо хоҳад дод. Мо Метавонем!

 

Исмоилҷон Маликов, Омирона Достиева, Шералӣ Давлатов, Ситора Сафарова, СССР

 

 

Чоршанбе, Июн 10 2020

Салом ба аҳли эҷоди «СССР»! Ман 1 чизро намефаҳмам. Дар масҷидҳо, ҳангоми хондани намоз, муллоҳои мо мардуми намозхонро маҷбур мекунанд, ки ҷафс истода, намоз хонанд, то шайтон байни сафҳо надарояд. Дар ин бора бародарам Сайёфҷон чанд маротиба сахт навишта буд. Бовар кунед, баъзе вақтҳо чунон ба ҳамдигар мечаспанд, ки ҳатто шиштаву хеста наметавонӣ. Оё ин тарз намоз хондан дуруст аст?

Дуюмаш ин, ки мегӯянд, агар ҷафс истода, намоз нахонед, аз байнатон шайтон мегузарад? Охир мегӯянд, масҷид хонаи Худост. Пас, вақте масҷид хонаи Худо бошад, шайтон дар хонаи Худо чӣ кор мекунад? Ва агар масҷид пур аз шайтон бошад, пас чӣ хел вай хонаи Худо шуда метавонад? Шояд ба ин суоли ман дар кумитаи дин ё Шӯрои муфтиёт посух медода бошанд? Метарсам, ки боз маро ҳам мисли Комрони Далер кофир набароред!

Ғуломалӣ Асоев, Ихвон-ал-СССР 

 

Чоршанбе, Июн 03 2020

(Human Story)

Дар мавриде, ки занони шаҳрӣ аз бекорӣ кадукорӣ гуфта, интернет даромадаву аз воҳимаву тарс девона мешаванд, бонувони деҳотӣ худу моро кор карда мехӯронанд…

25.05.2020.Соат ба вақти Душанбе 14:28 дақиқа. Барои хочхӯрӣ ба Ғаллаободи Фахробод рафтем. Муҳити деҳа ба куллӣ аз шаҳр фарқият мекард. Хоначаҳои хурд-хурд, катчаҳо барои дам гирифтани меҳмонон, кӯҳу дара, баоси гову гӯсфанд, бӯйи гулу гиёҳ, ғингоси орӯи асал... ба кас рӯҳи болида мебахшид. Дар роҳ духтаракону занони ширфурӯш диққати моро ба худ ҷалб намуданд. Вақте ки аз дохили нақлиёт берун шудем, моро дида зуд ба сӯямон шитофтанд:  “шир харед, норозӣ намешавед, чакаю шири хонагӣ аст”. Мо чакаю ширу ҷурғот харида, бо онҳо ҳамсӯҳбат шудему аз ҳаёти маъмулияшон пурсидем. 

Яке аз онҳо дар посух ба мо гуфт: “Мо танҳо ба воситаи ҳамин ширфурӯшӣ рӯзгорамонро ба пеш бурда истодаем”. Суол додем, ки оё шумо аз ҷони худ сер шудаед магар, ки дар ин вақти ҷонбароӣ-карантин ба кӯча мебароед? Дар баробари суол додан суолборонамон карданд. “Чи ин қадар суол дода истодаед? миллисаед магар?” Гуфтем мо рӯзноманигорем, ҷавоб доданӣ набошед, пас бо иҷозати шумо ба хочхӯрӣ равем. Зани хушсалиқае ба мо нигаристу гуфт: “Эй, вое сарам дар гӯре, акс гирифтӣ чӣ? Бо накунад, ки суратомона дар иннетенете партоӣ”. Духтараки кӯчак ӯро ислоҳ кард “Иннетенете не, интернет, хушру талафуз кун хола, қишлоқа шарманда накун”...

Устод сиёсатмадор бошад!

25.05.2020.Соат ба вақти Душанбе 14:48 дақиқа. Зани дигаре бо номи Алифамо дар рафти суҳбат қайд кард, ки ҷавондухтар ҳастед, аммо кор мекунед, чӣ хуб, кош, ин гуна шароит барои гулдухтарони деҳот низ мебуд. Духтарчае садо бароварда гуфт “оча, роҳбари синфи гандаамро ёд кардам.” Ҳайрон шуда пурсидем муаллимаҳои Ғаллаобод баданд, чӣ? Модараш ҷавоб дод: “Не муаллимаи ин кас хело устоди сиёсатмадор аст. Муаллима Маҳрамой дар ҳақиқат барои дониши шогирдони худ талош мекарду агар дар вақти занг дар коридор шогирдонаш ӯро медиданд, зуд дохили синфхона шуда, омодаи дарс мегардиданд. Вақти дарс мабодо ягон шогирдаш мавзуи дарсро дуруст дарк карда натавонад, такроран мавзуъро ба шогидони худ мефаҳмонид! Барои ҳамин ганда мегӯянд, дар мо ганда ба маънии сахтгир аст!!!”. Дар ин ҳолат пеши рӯям симои устоди бузурги худам Камолиддин Баҳриддин омаду дилам гум зад. Марди хоксору фурӯтан, сухандону маҳфилоро, сахтгир ва дар умум устоди камназир буданд (Равонашон шод бод!).  

Аз онҳо пурсидем, ки оё мо метавонем ин муалимаи сиёсатмадорро бубинем? Ана  он катакчаро дидед дар он ҷоянд-гуфтанд онҳо.

Устоди сахтгир

25.05.2020.Соат ба вақти Душанбе 15:08 дақиқа. Ба назди муаллима Маҳрамой Салимова рафтем, эшон моро хуб пазируфт. Ӯ гуфт, ки қариб 39 сол мешавад, дар мактаби 8- и деҳаи Ғаллаобод ҳамачун омӯзгор кор кардам. Чанд соли охир бемори асаб шуда, аз кор баромадаму бисёр вақт раиси маҳала ба наздам омада мегӯяд дар хона шишта зиқ мешавӣ. Биё, хубаш дар ноҳия раиси кумитаи занон шуда, кор кун! Доимо ҷавоби рад медиҳам. Ҳамин, ки шогирдонам аз ман ёд карда, гоҳ-гоҳе хабарам мегиранд, кофист. Ҳоло бошад давраи пирии худро дар назди наберагонам гузаронда истодаам. 

Дар шаҳр барои мардуми деҳот кор нест....

25.05.2020.Соат ба вақти Душанбе 15:33 дақиқа.Малика, зани ҷурғотфурӯш зимни сӯҳбат қайд кард, ки чандин маротиба писаронам ба шаҳр барои коркунӣ рафтанду кор наёфта баргаштанд. Аз қадимуллайём гуфтаанд, ки гаҳе айшу нӯшу гаҳе ганҷу ранҷ, оилаи мо калон асту аз соли 1998 инҷониб шавҳарам бемори сактаи дил шуда, дар хона хоб. Мо занон кор накунем, кӣ оилаи моро мехуронад? Субҳгоҳон бо занони деҳа ба фурӯши ширу қаймоқ, ҷурғот рафта, 1 пора нони ҳалол меёбем. Аз ҳисоби пули шир, ҷурғоту чакка рӯзгорамонро пеш мебарем. Ӯ лабханд зада гуфт, ки мо занони деҳа бо ин кори худ ифтихор ҳам мекунем, чунки меҳнати ҳалоли дастамон аст. 

Ҳама воҳима дар шаҳр аст!

25.05.2020.Соат ба вақти Душанбе 15:58 дақиқа. Ҳамсӯҳбати дигари мо Салимабону иброз кард, ки мо занони деҳа субҳи барвақт аз хоб хеста, ба рӯбучини хона машғул мешавем, гов меҷӯшем, хамир мекунем, наҳор омода менамоем ва соатҳои 8:30-9:00 ба фурӯши чаккаю маска ва ширу қаймоқ ба сари роҳ мебароем. Дар бобати коронавирус бо боварии комил гуфта метавонам, ки тарсугарие, ки дар мардону занони шаҳр ҳаст-дар мо занони қишлоқ эҳсос карда намешавад. Мо мардуми тоҷик рӯзҳои сангинтар аз инро паси сар кардаем. Худо хоҳад ин вабои асрро низ паси сар мекунем. Имрӯза имрӯз мебинем, фардоро фардо, аз тақдири яздонӣ касе огаҳ нест. Мо шабу рӯзи худро дар кишту кори картошка, нигоҳубини гову мол мегузаронем, аз куҷо вақти фикри коронавируса дорем? Шумо-шаҳриҳо аз бекорӣ тарсончак шудаед!!! 

Ҳалолатон бод, занҳои деҳа!

Дар вақти гапзанӣ 1 мошини ба гуфти худашон бой омаду зану духтаракон дар даст чаккаю шир тозон ба сӯйи харидори нав рафтанду омада, боз сӯҳбаташонро идома доданд. Хуллас, тӯли чанд соате бо занони деҳа ширу чакка фурӯхтаву ҳафр задем, онҳо ҳамеша бо кори хеш банд буданд. Дар вақти сӯҳбат кадом мошине, ки суръати худро паст мекард, мегуфтанд ризқамонро Худо оварду бо шодӣ ба сӯяшон шитоб мекарданд. Хурсандияшон ҳаду канор надошт, агар нафаре чизе мехарид. Эътироф бояд кард бонувони азизи шаҳр, ки мо бояд зиндагониро аз бонувони деҳот омӯзем, натарсем ва аз сафсаттаҳои баъзе нафарон ба таҳлука наафтем. 

Вақти бозгашт ба хона бо худ  ҷурғоту шир харидорӣ намудем; дар ҳақиқат болаззат будааст. Ҳалолатон бод занони деҳа!

 

Омиронаи Сайёф, 

СССР

 

саҳ 10 аз 65

Китобҳо

Flag Counter