Ширкати ҳавопаймоии миллии «Сомон эйр» парки ҳавопаймоии хешро бо 1 адад чархболи нави H125 ғанӣ гардонид. H125 дар Қазоқистон аз ҷониби ширкати муштараки Eurocopter Kazakhstan Engineering васлу насб гардида, аввалин чархболи Airbus Helicopters дар Ҷумҳурии Тоҷикистон мебошад.
Тавре ба мухбири мо котиби матбуотии ширкати номбурда Тимур Бандишоев хабар дод, роҳандозии лоиҳаи мазкур дар ҳамдастӣ ва маблағгузории ҶС “Ширкати суғуртаи содиротии Казахэкспорт” ва ҶСК “Ориёнбонк”, инчунин иштироки сафорати Ҷумҳурии Тоҷикистон дар Ҷумҳурии Қазоқистон имконпазир гардидааст.
Чархболи H125 дорои амалиётнокии баланд, аёнияти аъло, ларзиши паст дар кабина буда, 5 ҷойи нишасти мусофиронро дорад. Модели H125 аз ҳамаи чархболҳои якмуҳаррикаи класси худ бо хусусиятҳои техникӣ, гуногунҷабҳагӣ, сатҳи бехатарӣ ва арзиши дастрас, инчунин аз ҷиҳати кор дар шароити шадид бартарӣ дошта, барои истифода дар баландкӯҳҳо ва иқлими гарм мутобиқ мебошад.
