Санаи 21–уми июли соли ҷорӣ тибқи нақшаи муқаррарнамудаи Дастгоҳи иҷроияи Президенти Ҷумҳурии Тоҷикистон дар толор-маҷлисгоҳи Раёсати БДА ҶТ ”Амонатбонк” нишасти матбуотӣ оид ба натиҷаҳои фаъолияти нимсолаи аввали соли 2021, бо иштироки доираи васеъи рӯзноманигорони ВАО-и дохилу хориҷӣ кишвар баргузор гардид. Дар нишасти мазкур Раиси Раёсати БДА ҶТ «Амонатбонк» мӯҳтарам Икромӣ С.С., муовинони Раиси Раёсат Ризвонзода Ф.З., Сайфзода Ш. Ҷ. ва сардорони воҳидҳои сохтории Раёсати Бонк ширкат доштанд.
Дар оғоз Раиси Раёсат Икромӣ С.С. оид ба натиҷаҳои молиявии Бонк дар нимсолаи аввали соли 2021 ба ҳозирин маълумот пешниҳод намуда, иброз доштанд, ки Бонки давлатии амонатгузории Ҷумҳурии Тоҷикистон «Амонатбонк» фаъолияти худро дар нимсолаи аввали соли ҷорӣ дар радифи иҷрои дастуру супоришҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, санаду меъёрҳои амалкунандаи Ҷумҳурии Тоҷикистон, “Самтҳои асосии фаъолияти БДА ҶТ “Амонатбонк” барои соли 2020”, “Самтҳои афзалиятноки фаъолияти БДА ҶТ “Амонатбонк” барои соли 2020” ва “Консепсияи рушди БДА ҶТ “Амонатбонк” барои солҳои 2016-2020” амалӣ намуд.
Гуфта шуд, ки имрӯзҳо «Амонатбонк» ба зиёда ба 23 ҳазор корхонаю ташкилотҳо, зиёда аз 766 ҳазор нафар нафақагирони мақомотҳои ҳифзи иҷтимоии аҳолӣ ва мақомотҳои ҳифзи ҳуқуқ, зиёда аз 1,7 млн. нафар пасандозгузорон тавассути 75 филиал ва 546 адад марказҳои хизматрасонии бонкӣ бо шумораи зиёда аз 2900 нафар кормандон дар тамоми манотиқи ҷумҳурӣ хизматрасонӣ менамояд.
Ба санаи 30 июни соли 2021 дороиҳои Бонк маблағи 4 695 млн. сомонӣ ва уҳдадориҳои Бонк 4 204 млн. сомониро ташкил додааст, ки нисбат ба ҳамин давраи соли 2020 мутаносибан 10,5%-ӣ зиёд мебошад. Дар давраи ҳисоботӣ пардохтпазирии Бонк дар сатҳи баланд нигоҳ дошта шуда, маблағҳо сари вақт ба ҳисобҳои дахлдор гузаронида шуданд. Сармояи Бонк ба андозаи 10,5% афзоиш ёфта, ба 491,2 млн. сомонӣ баробар шудааст. Даромади софи Бонк дар ин давра 33,3 млн. сомониро ташкил намуд, ки нисбат ба ҳамин давраи соли 2020 39,2% зиёд мебошад.
Барномаи мобилии Бонк (“Амонат-мобайл”), ки барои пардохти маблағҳои коммуналӣ, пардохтҳо ба телефонҳои мобилӣ, интиқоли маблағ аз як корт ба корти дигар ва дигар амалиётҳои бонкӣ имкон медиҳад, дар тарҳи нав бо дарназардошти талаботҳои имрӯзаи бозори хизматрасониҳои бонкӣ мавриди истифода қарор дорад.
Ҳамзамон, бо мақсади рушди ҳисоббаробаркуниҳои ғайринақдӣ «Амонатбонк» шумораи 15 адад ташкилотҳои қарзиро ба низоми биллингии худ пайваст намуд. Ташкилотҳои қарзии мазкур имкон пайдо намуданд, ки тавассути низомҳои дохилиии корти бонкӣ, ҳамёни электронӣ ва мобилбонк ба муштариёни худ дар самти пардохти ҳаққи қувваи барқ, об ва шабакаҳои гармидиҳанда хизматрасонӣ намоянд.
Ҳамкориҳои Амонатбонк бо ташкилотҳои молиявии байналмилалӣ ҷиҳати ҷалби бештари сармоягузориҳои хориҷӣ ба иқтисодиёти кишвар идома дошта, аз оғози ҷалби сармоягузориҳо 74,7 млн. доллари ИМА ҷалб намудааст, ки бо истифодаи маблағҳои қарзӣ дар 51 шаҳру ноҳияи кишвар 90 лоиҳаи сармоягузорӣ барои рушди соҳаҳои мухталифи иқтисодиёти мамлакат амалӣ шуда истодааст.
Инчунин, «Амонатбонк» аз ҳисоби хатти қарзии бо Бонки миллии фаъолияти иқтисоди хориҷии Ҷумҳурии Ӯзбекистон дар самти маблағгузории савдо дар ҳаҷми 33 млн. доллари ИМА кушодашуда, ба 11 ширкати ватанӣ дар ҳаҷми 10,6 млн.доллари ИМА барои ворид намудани молу маҳсулот аз Ҷумҳурии Ӯзбекистон, қарзи бонкӣ пешниҳод намудааст.
Илова бар ин, ҷиҳати дастгирии соҳибкорони ватанӣ ва ҷалби бештари сармоягузориҳои хориҷӣ ба иқтисодиёти кишвар, меъёри фоизи қарзҳои аз ҳисоби Бонки миллии фаъолияти иқтисоди хориҷии Ӯзбекистон ҷалбшаванда 4,5-5,5 фоизи солона муқаррар гардида, нисбат ба фоизҳои қаблан амалкунанда 3,5 банди фоизӣ пасттар гардиданд.
Инчунин, Бонк ҷиҳати саҳмгузорӣ дар татбиқи ҳадафи олии кишвар-таъмини зиндагии шоиста ба ҳар як сокинони кишвар, диққати махсус зоҳир намуда истодааст.
Дар ин раванд, Бонк бо дарназардошти талаботи зиёди муштариён қарзҳои имтиёзнокро таҳти унвони «Кишоварз», ки соли 2020 ҷорӣ намуда буд, иловатан аз санаи 1 феврал то 30 июни соли 2021 вобаста ба оғоз гардидани давраи кишту кор роҳандозӣ намуд.
Дар натиҷаи амалӣ намудани иқдомҳои мазкур, Бонк аз ҳисоби захираҳои дохилию хориҷӣ дар 6 моҳи соли 2021 ба зиёда аз 36 ҳазор муштарӣ 661,9 млн. сомонӣ маблағҳои қарзӣ пешниҳод намудааст, ки нисбат ба ҳамин давраи соли гузашта мутаносибан ба андозаи 36,7% ва 23% афзудааст.
Қарзҳои додашудаи Бонк ба соҳаҳои саноат 22,4%, кишоварзӣ 19,9%, истеъмолӣ 18,2%, сохтмон 7,2%, тиҷорат 22,7%, нақлиёт 7,3% ва дигар хизматрасонӣ (сайёҳӣ, тандурустӣ, хӯроки умумӣ) 2,3% рост меояд.
Ҳамзамон, бо мақсади дастрасии қуллай ва фаврии интиқоли маблағҳо, Амонатбонк ба замимаи мобилии “Сбербанк-онлайн” пайваст гардид. Ин имкон медиҳад, ки истифодабарандагони ин барнома тавассути корти миллии Амонатбонк маблағ интиқол диҳанд.
Баъд аз ҳисоботи Раиси Раёсат оиди фаъолияти нимсолаи аввали соли ҷорӣ, рӯзноманигорон вобаста ба фаъолияти соҳа суолҳо пешниҳод намуда ба онҳо посухҳои мушаххас гирифтанд.
Бояд қайд намуд, ки дар нишасти матбуотии навбатӣ 25 нафар рӯзноманигорони васоити ахбори омма иштирок доштанд. Вобаста ба нишасти матбуотӣ оид ба натиҷаҳои фаъолияти БДА ҶТ «Амонатбонк» дар нимсолаи аввали соли 2021 ҳамаи рӯзноманигорон бо Варақаҳои иттилоотӣ (ПРЕСС-РЕЛИЗ) таъмин карда шуданд.
Дар хотимаи нишаст, Раиси Раёсат муҳтарам Икромӣ С.С. аз ҳамаи рӯзноманигорон сипосгузорӣ намуда, таъкид доштанд, ки ҳамкориҳо миёни васоити ахбори омма ва Бонк омили пешравӣ дар соҳа хоҳад буд, ва мо омодаем бо ВАО ҳамкориро дар сатҳи зарурӣ ба роҳ монем.
Вохӯрии дуҷонибаи Раиси Раёсати БДА ҶТ «Амонатбонк» бо ҳайати Корпоратсияи молиявии байналмилалӣ, Гурӯҳи Бонки Ҷаҳонӣ
Санаи 28 июли соли 2021 тариқи видеоконфронс вохӯрии дуҷонибаи Раиси Раёсати БДА ҶТ «Амонатбонк» муҳтарам Икромӣ С.С. бо экспертҳои байналмилалӣ дар бахши ҳисоботҳои қарзӣ гуруҳи Бонки Ҷаҳонӣ, ҷаноби Фабрисио Фрабони ва Фабио Тарантини баргузор гардид.
Дар ҷараёни мулоқот, ҷонибҳо доираи васеи масъалаҳо, аз ҷумла баланд бардоштани самаранокӣ, бехатарӣ ва эътимоднокии системаи ҳисоботи қарзӣ, рушди хизматрасонии молиявии электронӣ ва рақамиро мавриди баррасӣ қарор доданд.
Дар рафти мулоқот қайд карда шуд, ки ҳолати молиявии Амонатбонк дар сатҳи хуб ва устувор қарор дорад, ва Амонатбонк ҷиҳати рушди системаи ҳисобтҳои қарзӣ ва хизматрасонии молиявии рақамӣ ҳамаи тадбирҳои заруриро андешида истодааст ва ҷиҳати татбиқи лоиҳаҳои нав омодагии хешро иброз намуданд.
Дар маҷмӯъ вохӯрӣ дар фазои дӯстӣ ва якдигарфаҳмӣ баргузор гардида, ҷонибҳо баҳри рушди минбаъдаи ҳамкориҳо омодагии хешро изҳор намуданд.
Шуъбаи матбуоти БДА ҶТ «Амонатбонк»
Баъди ба кор қабул шудан маошамро ба корти «Dushanbe City » гузарониданду саргардониям сар шудеее.
16.07.2021. Соат ба вақти Душанбе 17:23 дақиқа. СМС омад, ки ба кортат гузашт. Хеле шод шудам, ки ин шом бо аввалин маоши журналистӣ дар «квартира» тӯй медиҳам!. Аммо орзуҳоям барбод рафт. Дар корт дар ҳисоби ман 0.00 TJS асту халос. Ба худ гуфтам, ки Собирӣ «кидать разбор наъдорад!». Зеро ин нахустин бор набуд, ки маро ин ширкат нороҳат мекард.
Кидати №1
Рӯзе аз деҳаамон барои маҷлиси редаксияро дарёб кардан, соати 5-и субҳ аз хона баромадам. Дар корти DC 200 сомонӣ доштам. Хостам онро роҳкиро кунам. Аз банкомати н.Темурмалик пул гирифта нашуд. Мисли оне, ки 1 рӯз қабл аз иди қурбон мардуми шаҳраки Совет дар назди банкомати холӣ «уф-уф» гӯён интизорӣ мекашиданд, ки кай дар банкомат пул пайдо мешавад. Ҳамин тавр таваккал то н.Восеъ чанд банкомати DC буд, кортро санҷидаму аз ягон банкомат маблағ гирифта нашуд. Соати 07:45 дақиқа аз банкомати н.Восеъ маблағро ба даст овардаму ба маҷлис дер карда, аз устод танбеҳ гирифтам.
Кидати №2
19.07.2021. н. Темурмалик. Шахсе назди масъули DC дар ноҳия равон кард. Номаш дар хотирам нест. Лек марди хушмуомилаву чақ-чақӣ будааст. Гуфтам:
- Ака ба ман CМC омад, ки маблағ гузаштааст, аммо дар корт сӯм нест. Баъди чанде интизорӣ корам… буд нашуду аз он ҷо бадар рафтам.
Ман ҳайрони онам, ки аз Россия чӣ қадар маблағ ба картаи 04.08.2021 DC равон кунанд, ҳамон замон, бе ягон мушкилӣ мегузараду барои чӣ аз дохили ҷумҳурӣ 10 рӯз шуд, ки маошамро намегирам?
Разбор№…
26.07.2021. Бинои Душанбе Ситӣ, ки дар макони Соҳилӣ-5 ҷойгир аст, рафта, ба масъуле муроҷиат кардам. Гуфт, ки маблағ дар барномаат гузаштааст, ман онро ба кортат мегузаронам. Ҳамин тавр ҳам кард. Маблағро гирифтам. Офарин!
Лекин агар ҳамин мушкилии маро дар н.Шамсиддин Шоҳин ягон нафари мисли ман сарфаҳм намерафтагӣ медошт ва дар корташ фарзи мисол 200 сомонӣ бигзараду мутаассуф СМС ояд, вале маблағ дар корти DC 0.00TJ бошад, чӣ кор кунад? 200 сомонӣ сарф карда пойтахт ояд? Хуб нест, ки маблағро ба барнома нею ба корт гузаронанд?
Файзализода Исматулло,
СССР
Дар вилояти Суғд ба истиқболи ҷашни 30-солагии Истиқлоли давлатии Ҷумҳурии Тоҷикистон бунёди зиёда аз 300 корхонаву коргоҳи нави саноатӣ ба нақша гирифта шудааст. Аз ҷумла, тибқи нақша танҳо дар соли 2021 ба истифода додани 120 корхонаву коргоҳҳои нави саноатӣ бо 3027 ҷойи нави корӣ пешбинӣ гардида, дар натиҷаи тадбирҳои андешидашуда давоми 6 моҳи соли 2021 дар миқёси вилоят 61 корхонаву коргоҳҳои нав бо 475 ҷойи корӣ ба фаъолият шурӯъ намуданд. Дар ин бора шуъбаи иттилоотӣ-таҳлилии Дастгоҳи раиси вилояти Суғд хабар медиҳад.
Бояд гуфт, ки давоми 6 моҳи соли 2021 ҳаҷми истеҳсоли маҳсулоти саноатӣ дар вилояти Суғд ба маблағи 8 миллиарду 976 млн. сомонӣ расонида шуда, нисбат ба ҳамин давраи соли гузашта суръати афзоиш бо назардошти индекси нархҳо 133,2%таъмин гардид. Аз ҷумла, дар моҳҳои январ-июни соли 2021 ба миқдори 664,5 ҳазор тонна семент ва 722,5 ҳазор тонна ангишт истеҳсол карда шуда, ҳамзамон, нисбат ба ҳамин давраи соли 2020 суръати афзоиши истеҳсоли ресмони пахтагин 140,6 фоиз ва газвори пахтагини тайёр 105,7% таъмин гардида, дар маҷмӯъ, бо назардошти эҳтиёҷоти худӣ 2835,8 тонна калоба ва 3608,8 ҳазор метри мураббаъ газвори пахтагин истеҳсол карда шуд. Истеҳсоли маҳсулоти хӯроквории ивазкунандаи воридот сол аз сол тавсеа ёфта, дар 6 моҳи соли 2021 ба миқдори 253,1 ҳазор тонна орд ва 1955,3 тонна равғани растанӣ тавлид шудааст.
Афзоиши ҳаҷми истеҳсоли маводи асосии сохтмонӣ аз қабили қубурҳои пластикӣ ба миқдори 668,8 ҳазор метр, рехтаи пӯлодӣ 2833,4 тонна, маҳсулоти кабелӣ 397,7 тонна, профилҳои алюминӣ барои дару тирезаҳо 2782,9 тонна, профилҳои металлӣ 12185,2 тонна, профилҳои пластикӣ 854,0 тонна, халтаҳои полипропиленӣ барои бандубасти маҳсулоти корхонаҳо 23,4 млн. дона, халтаҳои полиэтиленӣ 402,3 тонна, маҳсулоти пластмассагӣ 53,6 млн. дона, бомпӯши оҳанин 41,0 ҳазор метр ва зарфи шишагин ба ҳисоби 0,5 литр 9,6 млн. дона истеҳсол карда шудааст.
Меҳрдоди Мурод, СССР
8 июли соли 2021 Раиси Бонки миллии Тоҷикистон Холиқзода Ҳоким Ҳикматулло бо Сафири Фавқулодда ва Мухтори Ҷумҳурии Туркия дар Ҷумҳурии Тоҷикистон ҷаноби Эмре Зекӣ Карагёл ва мушовири тиҷоратии Сафорати Ҷумҳурии Туркия дар Ҷумҳурии Тоҷикистон Муҳаммад Эмраҳ Соганҷӣ мулоқоти корӣ анҷом дод.
Дар оғози мулоқот Раиси Бонки миллии Тоҷикистон Ҳоким Холиқзода ҷаноби Эмре Зекӣ Карагёлро бо таъйин шудан ба вазифаи Сафири Фавқулодда ва Мухтори Ҷумҳурии Туркия дар Ҷумҳурии Тоҷикистон табрик карда, барои иҷрои вазифаҳои дипломатӣ барору комёбӣ таманно намуд.
“Ҷумҳурии Туркия яке аз шарикони боэътимоди Ҷумҳурии Тоҷикистон ба ҳисоб рафта, муносибатҳои ду кишвар дар ҳамаи бахшҳо, аз ҷумла иқтисодиёту тиҷорат бо маром рушд карда истодааст. Дар оянда низ мо барои ҳамкориҳои мутақобилан судманд ва тақвияти равобити тиҷоратӣ, аз ҷумла дар самти рушди низоми бонкӣ омода ҳастем”,-таъкид дошт Раиси Бонки миллии Тоҷикистон Ҳоким Холиқзода.
Сафири Фавқулодда ва Мухтори Ҷумҳурии Туркия дар Ҷумҳурии Тоҷикистон Эмре Зекӣ Карагёл дар навбати худ, аз фароҳам будани фазои мусоиди тиҷоратӣ ва фаъолияти пурсамари ширкатҳои бонуфузи туркӣ дар Тоҷикистон изҳори хушнудӣ намуда, иброз дошт, ки ташрифи қарибулвуқӯи Президенти Ҷумҳурии Туркия ба Ҷумҳурии Тоҷикистон барои таҳкими муносибатҳои тиҷоратии дуҷониба такони тоза хоҳад бахшид.
Зимни вохӯрӣ, инчунин вазъи мураккаби эпидемиологӣ дар ҷаҳон, таъсири пандемия ба бахши иқтисодиёти кишварҳо ва роҳҳои бартараф намудани паёмадҳои он муҳокима карда шуд.
Раиси Бонки миллии Тоҷикистон Ҳоким Холиқзода оид ба низоми бонкии Тоҷикистон ва дигаргуниҳое, ки дар лоиҳаи Кодекси андози Ҷумҳурии Тоҷикистон барои ҳавасмандгардонии сармоягузорони хориҷӣ, аз ҷумла бахши бонкдорӣ пешбинӣ шудааст, маълумот дода, пешниҳод намуд, ки ҳамкории бонкҳои марказӣ ва ташкилотҳои қарзии ду кишвар тақвият дода шавад.
“Таҳия ва ба имзо расонидани Протоколи ҳамкорӣ байни бонкҳои марказии ду кишвар, кушодани филиалҳои бонкҳои Ҷумҳурии Туркия дар Ҷумҳурии Тоҷикистон ва табодули таҷриба намудани кормандони бонкҳои марказӣ метавонад идомаи ҳамкориҳои пурмаҳсули ду кишвар бошад”,-қайд кард Раиси Бонки миллии Тоҷикистон Ҳоким Холиқзода.
Сафири Фавқулодда ва Мухтори Ҷумҳурии Туркия дар Ҷумҳурии Тоҷикистон Эмре Зекӣ Карагёл низ имзои Протоколи ҳамкорӣ, кушодани филиали бонкҳои Туркия дар Тоҷикистонро ҷонибдорӣ намуда, зикр кард, ки иқдоми мазкур метавонад барои рушди бештари равобити иқтисодию тиҷоратии ду кишвар мусоидат намояд.
Дар рафти мулоқот инчунин, масъалаҳои тавсеаи шабакаи муносибатҳои корреспондентӣ миёни ташкилотҳои қарзии кишварҳо, бо асъори хориҷӣ кушодани суратҳисобҳои корреспондентии бонкҳои тиҷоратии Тоҷикистон дар бонкҳои Туркия, пешниҳоди қарзҳои имтиёзнок барои бонкҳои тиҷоратии Тоҷикистон ҷиҳати афзоиши содирот ва воридоти молу ашё байни ду кишвар муҳокима гардиданд.
Дар анҷоми вохӯрӣ ҷонибҳо бори дигар барои тақвияти бештари ҳамкориҳо дар самти рушди низоми бонкии ду кишвар ва таҳияи лоиҳаи Протоколи ҳамкорӣ байни бонкҳои марказии Ҷумҳурии Тоҷикистон ва Ҷумҳурии Туркия изҳори омодагии хешро баён намуданд.
Мулоқоти Ҷамолиддин Нуралиев бо ҳайати Дафтари Швейтсария оид ба ҳамкорӣ (SECO) дар Ҷумҳурии Тоҷикистон
Санаи 29 июни соли 2021 Муовини якуми Раиси Бонки миллии Тоҷикистон Нуралиев Ҷамолиддин Камолович бо директори Дафтари Швейтсария оид ба ҳамкорӣ (SECO) дар Ҷумҳурии Тоҷикистон хонум Саломе Штайб мулоқоти корӣ анҷом дод. Дар мулоқоти мазкур инчунин мушовири байналмилалӣ оид ба баҳодиҳии самаранокии кӯмакҳои техникии SECO ҷаноби Субхренду Чатарджи, Муовини Раиси Бонки миллии Тоҷикистон Толибзода Фирдавс ва роҳбарони сохторҳои калидии Бонки миллии Тоҷикистон ширкат доштанд.
Мақсад аз ташрифи ҳайати Дафтари Швейтсария оид ба ҳамкорӣ (SECO) дар Ҷумҳурии Тоҷикистон бо ҷалби коршиноси мустақили байналмилалӣ, ин баҳодиҳии иҷроиши лоиҳаи кӯмаки техникӣ, ки тариқи Гурӯҳи Бонки Ҷаҳонӣ ва мушовирони аз ҷониби БАТР ҷалбшуда таҳти унвони “Тоҷикистон: барномаи устуворнамоии бахши молиявӣ” бо маблағгузории SECO мебошад.
Дар ибтидо Муовини якуми Раиси Бонки миллии Тоҷикистон Ҷамолиддин Нуралиев аз дастгириҳои пайвастаи Дафтари Швейтсария оид ба ҳамкорӣ дар бахши иқтисодиёт, бахусус низоми бонкӣ бо роҳандозӣ шудани як қатор кӯмакҳои техникӣ, аз ҷумла пешниҳоди мушовири хориҷӣ, ки аз соли 2016 инҷониб дар сатҳи сифатан нав қарор дорад, изҳори қаноатмандӣ намуда, дар мавриди татбиқи лоиҳаи “Тоҷикистон: барномаи устуворнамоии бахши молиявӣ”, ки аз шаш самт (компонент) иборат буда, дар доираи он корҳои назаррас амалӣ шуда истодааст, маълумоти муфассалро мавриди таваҷҷуҳи ҳайати SECO гардонид.
“Кӯмаки техникӣ ва ҷалби коршиносони байналмилалӣ дар доираи лоиҳаи мазкур имкон доданд, ки ҳисоботҳо оид ба суботи молиявӣ таҳия гардида, омода кардани онҳо ба таври мунтазам роҳандозӣ шуда истодааст. Ҳамзамон, фаъол шудани Шӯрои миллии суботи молиявӣ дар Ҷумҳурии Тоҷикистон, ки дар баробари дигар ниҳодҳои иқтисодӣ Бонки миллии Тоҷикистон дар он нақши калидӣ дорад, таҳия ва қабули заминаи ҳуқуқии фишангҳои макропруденсиалӣ, таҳлилҳо ва тадбирҳои зиддибуҳронӣ, таҳияи методологияҳо барои татбиқи ислоҳоти нав бо мусоидат ва ҳамкориҳои машваратчиёни байналмилалӣ ба Бонки миллии Тоҷикистон комёб шуда истодааст”, - изҳор дошт Ҷамолиддин Камолович.
Муовини якуми Раиси Бонки миллии Тоҷикистон аз татбиқи фаъолият оид ба ҳар як самти (компоненти) лоиҳа дар алоҳидагӣ, аз ҷумла устуворнамоии бахши молиявӣ, механизми танзими бонкӣ, фишангҳои идоракунии қарзҳои ғайрифаъол, назорати низоми пардохт, принсипҳои назоратии ҳимояи ҳуқуқи истеъмолкунандагон ва идоракунии корпоративии низоми бонкӣ таҳлилу натиҷагирии мушаххасро манзури ҳозирин намуд.
Директори Дафтари Швейтсария оид ба ҳамкорӣ дар Ҷумҳурии Тоҷикистон хонум Саломе Штайб аз ҳамкориҳои мусоиди шарикӣ махсусан таъкид дошта, саъю талошҳои Бонки миллии Тоҷикистонро барои ноил шудан ва нигоҳ доштани устувории бахши молиявӣ новобаста аз таъсири фишорҳои берунии иқтисодӣ бо андешидани як қатор тадбирҳо тайи 5 соли охир назаррас ва муҳим арзёбӣ намуд. Ба андешаи хонум Саломе Штайб дар ин давра то ду маротиб коҳиш ёфтани қарзҳои ғайрифаъол дар сандуқи қарзӣ аз натиҷаи муҳим ва таъмини шаффофияти фаъолияти низоми бонкӣ дарак медиҳад. Хонум Саломе Штайб татбиқи лоиҳаҳо дар низоми бонкӣ, аз ҷумла лоиҳаи “Тоҷикистон: барномаи устуворнамоии бахши молиявӣ” тавассути дастрасии аҳолӣ ба маблағгузорӣ, баланд бардоштани маърифати молиявӣ, низоми мубодилаи маълумот дар бораи қарзҳо, баланд бардоштани рақобатпазирӣ дар бахшҳои гуногуни саноат, фароҳам овардани заминаи меъёрии ҳуқуқӣ, содда гардонидани расмиёти андозсупорӣ барои пешбурди тиҷоратро ба иқтисодиёти Тоҷикистон, аз ҷумла низоми бонкӣ муҳим дониста, хостори тақвият додани ҳамкорӣ дар самтҳои барои ҷониби Тоҷикистон афзалиятнокро дар доираи стратегияи ҷорӣ баён дошт.
Дар рафти мулоқот мушовири мустақили байналмилалӣ ҷаноби Субхренду Чатарджи, ки барои баҳогузории раванди иҷроиш ва натиҷаҳои лоиҳаи мазкур, ки аз ҷониби Дафтари Швейтсария оид ба ҳамкорӣ ҷалб шудааст, дар доираи таҳлил ва баррасии тарафҳо суолҳои худро оид ба самтҳои (компонентҳои) алоҳидаи лоиҳа манзур намуда, ба онҳо посухҳои мушаххас гирифт. Инчунин, ҷониби Бонки миллии Тоҷикистон барои коршиноси байналмилалӣ ҷаноби Субхренду Чатарджи имкон фароҳам овард, ки оид ба татбиқи компонентҳои лоиҳа бо сохторҳои масъули Бонки миллии Тоҷикистон мулоқоту машваратҳо доир намуда, маълумоти иловагии пурра ба даст орад ва арзёбии самаранокии кӯмаки техникии SECO-ро воқеъбинона баҳогузорӣ намояд.
Дар охир директори Дафтари Швейтсария оид ба ҳамкорӣ (SECO) дар Ҷумҳурии Тоҷикистон хонум Саломе Штайб ба сатҳу сифати ҳамкории тарафайн баҳои баланд дода, омодагии хешро барои муносибатҳои судманд баҳри рушди низоми бонкии Ҷумҳурии Тоҷикистон яке аз самтҳои афзалиятнок иброз дошт.
Шуъбаи матбуоти БМТ
Вохӯрии дуҷонибаи Раиси Раёсати БДА ҶТ «Амонатбонк» бо ҳайати расмии Дафтари Швейтсария оид ба ҳамкорӣ дар Ҷумҳурии Тоҷикистон
Cанаи 01.07.2021 вохӯрии дуҷонибаи Раиси Раёсати БДА ҶТ «Амонатбонк» муҳтарам Икромӣ С.С. бо намояндагони Дафтари Швейтсария оид ба ҳамкорӣ дар Ҷумҳурии Тоҷикистон ҷаноби Субхренду Чатарҷӣ баргузор гардид.
Дар вохӯрӣ ҷонибҳо масоили васеи ҳамкориҳои дуҷониба, аз ҷумла арзёбии лоиҳаи «Тақвияти бахшҳои молиявӣ дар Тоҷикистон», ки аз ҷониби Бонки Ҷаҳонӣ ва Корпоратсияи байналмилалии молиявӣ бо маблағгузории Котиботи давлатии Швейтсария оид ба иқтисод (SECO) амалӣ мегардад, ҳолати кунунӣ ва стратегияи афзалиятнокии Амонатбонк, сарчашмаҳои даромад, масъалаҳои сармоягузорӣ ва қарздиҳӣ, механизмҳои танзими бонкӣ ва баҳогузории идоракунии корпоративиро мавриди баррасӣ қарор доданд.
Ҳангоми мулоқот қайд карда шуд, ки айни замон ҳолати молиявии Амонатбонк дар сатҳи хуб ва устувор қарор дорад ва Амонатбонк ҷиҳати рушди бизнеси бонкӣ ва роҳандозӣ намудани сиёсати иҷтимоии давлат ҳамаи тадбирҳои заруриро андешида истодааст. Дар маҷмӯъ вохӯрӣ дар фазои дӯстӣ ва якдигарфаҳмӣ баргузор гардида, ҷонибҳо баҳри рушди минбаъдаи ҳамкориҳо омодагии хешро изҳор намуданд.
Иштироки занону бонувони БДА ҶТ “Амонатбонк” дар даври шаҳрии фестивали ҷумҳуриявии “Ҷилваи рангҳо”
Санаи 30.06.2021 бо ибтикори Мақомоти иҷроияи ҳокимияти давлатии ш.Душанбе даври дуюми Фестивали ҷумҳуриявии "Ҷилваи рангҳо" доир гардид. Дар Фестивали мазкур вазорату идораҳо, бонувону сокинони пойтахт бо намоиш додани либосҳои хуштарҳу рангоранг иштирок намуданд.
Занону бонувони БДА ҶТ “Амонатбонк” низ бо муаррифии либоси касбии хеш дар фестивали мазкур фаъолона ширкат намуда, аз ҷониби Мақомоти иҷроияи ҳокимияти давлатии шаҳри Душанбе бо Сипоснома қадрдонӣ гардиданд.
Моҳияти баргузории Фестивали "Ҷилваи рангҳо" тарбияи эҳтироми арзишҳои фарҳанги либоси миллӣ, ҳисси зебоипарастӣ, боло бурдани маданият ва бедор намудани завқи баланди либоспӯшии аҳли ҷомеа, бахусус баланд бардоштани нақшу мақоми либосҳои миллӣ ва муосири кӯдакон, наврасон, ҷавонон, духтарон, занон, бонувон ва мардон мебошад.
Ҷаласаи кории Раиси Раёсати Бонки давлатии амонатгузории ҶТ “Амонатбонк” бо кормандони филиалҳо ва марказҳои хизматрасонии бонкии БДА ҶТ “Амонатбонк” дар ВМКБ
Санаи 19.06.2021 бо иштироки Раиси Раёсати Бонки давлатии амонатгузории Ҷумҳурии Тоҷикистон “Амонатбонк” мӯҳтарам Икромӣ С.С., муовини Раиси Раёсат Ризвонзода Ф.З. ва роҳбарони воҳидҳои сохтории дастгоҳи марказии Раёсати БДА ҶТ “Амонатбонк” бо кормандони филиалҳо ва марказҳои хизматрасонии бонкии БДА ҶТ “Амонатбонк” дар ВМКБ ҷаласаи корӣ баргузор гардид.
Раиси Раёсати БДА ҶТ “Амонатбонк” дар оғози ҷаласа суханронӣ намуда, доир ба фаъолияти филиалҳо ва МХБ-ҳои ВМКБ фикру мулоҳизаҳои худро баён доштанд.
Роҳбарияти Бонк дар ҳар як вохурии хеш бо кормандони филиалҳо ва МХБ-ҳо пайваста таъкид мекунанд, ки фарҳанги волои одобу муошират қатъиян бояд риоя карда шуда, сатҳи баланди хизматрасонии бонкӣ аз ҷониби кулли кормандон ба роҳ монда шавад. Ҳамзамон қайд карда шуд, ки доир ба рушд бахшидани низоми ғайринақдии пардохт дар мамлакат, пайваст намудани корти ҳар як мизоҷи Амонатбонк ба смс паёмак ва ба барномаи мобилии “Амонат-мобайл” корҳо вусъат дода шаванд.
Яке аз воситаи хуби назорати амалиётҳои кортӣ аз ҷониби худи дорандагони корт ин пайваст гардидани мизоҷон ба СМС паёмак мебошад. Аз ин рӯ барои бархӯрдор будани мизоҷони Бонк алалхусус нафақахӯрон аз ин хизматрасонӣ кормандони Бонкро мебояд вобаста ба ин масъала таваҷҷуҳи худро равона намоянд. Ҳамзамон оиди тарзи дурусти истифодабарии барномаи мобилии “Амонат-мобайл” ва анҷом додани амалиётҳои гуногун тавассути он ҳар як мизоҷи Бонк бояд бархӯрдор бошад.
Дар ҷаласа сардори Идораи танзим ва назорати Марказҳои хизматрасонии бонкӣ Ҳақназарзода Ҷурабек низ баромад намуда оиди натиҷаи фаъолияти 5 моҳаи филалиҳо ва МХБ-ҳи ВМКБ ҳисобот доданд. Қайд гардид, ки ба ҳолати имрӯза 9 филиал ва 40 адад марказҳои хизматрасонии бонкии БДА ҶТ “Амонатбонк” ба мардуми ВМКБ хизматрасонии босифат ва зарурии бонкиро пешниҳод менамоянд.
Ҳамзамон тамоми марказҳои хизматрасонии бонкӣ бо таҷҳизотҳои техникӣ муҷҷаҳаз гардонида шудаанд аз ҷумла компютер ва пост терминалҳо. Дар филилҳо ва МХБ-ҳои ВМКБ ҳамарӯза ба аҳолӣ хизматрасониҳои гуногуни бонкӣ расонида мешавад. Аз қабили интиқоли пули шахсони воқеӣ бе кушодани суратҳисоб, хизматрасонии машваратӣ оид ба ҳамагуна амалиётҳои бонкӣ, амалиётҳои хазинавӣ, пардохт намудани маблағҳои нафақа ва кӯмакпулиҳо, қабул ва иваз намудани пулҳои фарсуда, қабули маблағҳои коммуналӣ ва дигар намуди пардохтҳо аз аҳолӣ гузаронида мешавад.
Дар охири ҷаласа маркази хизматрасонии бонкии №594-и филиали №67-и БДА ҶТ “Амонатбонк” дар ш.Хоруғ, маркази хизматрасонии бонкии №596-и филиали №68-и БДА ҶТ “Амонатбонк” дар н.Дарвоз ва маркази хизматрасонии бонкии №621-и филиали №73-и БДА ҶТ “Амонатбонк” дар н.Роштқалъа барои ба даст овардани натиҷаҳои мусбии иқтисодӣ ва дар сатҳи зарурӣ ба роҳ мондани фаъолияти хизматрасониҳои бонкӣ аз ҷониби Раиси Раёсати БДА ҶТ “Амонтабонк” бо Раҳматнома қадрдонӣ гардиданд.
Шуъбаи матбуоти БДА ҶТ «Амонатбонк»
Мехоҳед маблағҳоятонро дар Бонк пасандоз гузоред ва аз он фоизи хуб гирифта бошед?
Пас аз хизматрасонии “Пасандози мӯҳлатнок”-и “Амонатбонк” истифода баред!
Маблағи ҳадди аққал барои кушодани “Пасандози муҳлатнок” аз 500 сомонӣ ба муҳлати аз 3 то 36 моҳ!
Фоизи солона: 11 % (асъори миллӣ)
Маълумоти бештар: 1885, (44) 600 90 29
Бӯҳрони шадиди сабзӣ, онгуна фалаҷии вазорати кишоварзӣ, камфаолиятии «Тоҷикматлубот», нолозимии раванди шахсикунонии хоҷагиҳои дар собиқ колхозу совхозҳоро нишон дод, ки мехоҳӣ фарёд занӣ:
-Колхозу совхозҳоро ақаллан 1 донагӣ дар 1 шаҳру ноҳия барқарор кунед! Заминро аз дасти нео-феодалҳо гирифта, ба Давлат в Ҳукумати ҶТ баргардонед. Танҳо дар ин сурат, мо ақаллан ба бӯҳронҳои сабзиву тушкаву пиёз дар намемонем. Мо Метавонем!
Хатлон: захираи сабзӣ кам аст!
Сокинони кишвар дар сомонаҳои иҷтимоӣ аз гарон шудани нархи сабзӣ, ки то ба сабзӣ захира накунад, пас он барои чӣ ва кӣ лозим аст?11 сомонӣ барои 1 кило ҷаҳидааст, нигаронанду аз Хадамоти зиддиинҳисории назди Ҳукумати ҶТ талаб доранд, ки нархро ба танзим дароранд. Коршинос Сабоҳатулло Музаффаров дар сӯҳбат бо мухбири СССР гуфт, ки соли 2020 танҳо аз ҷониби шарикони рушд 21 сардхона дар вилояти Хатлон сохта шудааст. Вале ин ками дар кам мебошад. Зеро Хатлон ягона вилоятест, ки бояд шабонарӯзӣ аҳолии пойтахт ва шаҳрҳои бузурги ҷануби давлати Тоҷиконро бо маҳсулоти тару тозаи полезӣ таъмин намояд.
Сардхонаҳои холии Хатлон
Савдогарони 2 бозори калони шаҳри Бохтар дар мусоҳиба ба мухбири газетаи мардумӣ гуфтанд, ки сабзиро аз сардхонаҳои ш. Душанбе харидорӣ карда, бо сарфи роҳкиро ба Хатлон меоранд. Вақте пурсидем, ки чаро аз сардхонаҳои вилояти Хатлон харидорӣ намекунед? Дар ҷавоб гуфтанд:
- Чунки дар сардхонаҳои вилояти Хатлон сабзӣ захира карда нашудааст.
Абдулвоҳид Бурунов, муошовир оид ба тарҳрезии маҳсулот ва маркетинг дар ин бора чунин ибрози назар кард:
- Танҳо дар комбинати хӯроквории ш. Бохтар айни ҳол 150 тонна сабзӣ захира асту бас.
Пурсида мешавад, агар сардхона барои ҳамин шабу рӯзҳои бӯҳронӣ, захира надошта бошад, ба кӣ ё чӣ лозим аст?
Дар ҳамин маврид Рустам Саъдуллоев, роҳбари корхонаи мазкур иброз дошт, ки дар ҳақиқат дар сардхона 500 тонна сабзӣ захира карда будем, айни ҳол 100 тоннаи дигар дорем. Намояндагон аз ҳукумати вилоят дастур доданд, ки ба миқдори муйян ба бозор барорем. Ҳангоми ҷамъоварӣ сабзиро 1 сомону 70 дирам харидорӣ карда, ҳоло ба савдогарон 1 кг сабзиро бо нархи 6-7 сомонӣ медиҳем. Чунки тӯли 6 моҳ барқ сарф шуда, низ ба коргарон маош додаем.
Бо забони дигар, масъулини сардхона сабзиро 1-2 сомонӣ харида, захира карда, сипас 400-500% гарон мефурӯшанд. Ана дар куҷо ниҳон аст, сирру асрори гароншавии нархи сабзӣ!!!
Аз сӯи дигар, кишоварзон мегӯянд, сабаби гарон шудани нархи сабзӣ ин кам кишт кардани сабзавот мебошад, яъне хоҷагидорон, ки соли гузашта зарари молиявӣ ва талафоти зиёд дида буданд, кишти сабзиро кам карда, дар ҷояш пиёз коштанд…
Баҳодур Абдусалом,
СССР
Аз СССР: Нархи сабзӣ, сабзӣ-гейт, бӯҳрони сабзӣ, ки бояд бо истеъфои вазири кишоварзиву раиси «Тоҷикматлубот» хатм мешуд, ба фолклор низ роҳ бурдааст. Фарзи мисол:
Дидам санаме нишаста мекард хурӯш,
К-эй мардаки бетаъбири картошкафурӯш,
Хоҳӣ, ки ба коми мо замона гардад,
Ё сабзӣ бикор, ё бирав сабзӣ фурӯш!!!
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
