Ширкатҳои воридкунандаи гази моеъ мегӯянд, аз 1 июл нархҳои яклухт ба ин навъи сӯзишворӣ дар Қазоқистон 22% - аз 82 то ба 101 доллар афзуда, мутаносибан арзиши чаканаи гази моеъ дар нуқтаҳои фурӯши Тоҷикистон низ афзуд. Айни замон ба воридоти ин навъи сӯзишворӣ ба Тоҷикистон 66 ширкат машғуланд. Соли гузашта ба Тоҷикистон 350.000 тонна гази моеъ ворид карда шудааст, ки нисбат ба с.2015 ба миқдори қариб 10.000 тонна зиёдтар аст. Беш аз 70%-и ин навъи сӯзишворӣ аз Қазоқистон ворид шуда, ҳамчунин ба миқдори начандон зиёд гази моеъ аз Русия, Туркманистон ва Қирғизистон низ интиқол мегардад.