ХАБАРИ ДОҒ
Панҷшанбе, Июн 21 2018


Узви Ихвон-ал-СССР, таърихшинос Тӯра Ниёзов аз шаҳри Панҷакент дар меҳмонии СССР гуфт, оид ба пошхӯрии оилаҳои ҷавон чанд мушоҳидаву шунидаҳоямро ба шумо қисса карданиям.
1.Чанд вақт пеш додар ба хонаи апааш ба хостгорӣ рафт, ки “духтаратро ба писарам диҳед”. Қудо шуданд. Тӯй шуд. Ҳама хурсанд. Аммо писар дар Русия зани рус доштааст. Аз ҳам ҷудо шуданд. Апаву додар бо ҳам то ҳол ҷангианд.
2.Акову уко бо ҳам қудо шуданӣ шуданд. Ако назди уко омада, духтарашро барои писараш хостгорӣ кард. Розӣ шуданд. Тӯй шуд. Вақте келин ҳомиладор буд, аз ҳам ҷудо шуданд. Чаро? Барои он ки хислаташон ба ҳам мувофиқ наомадааст.
3.Апаву хоҳар бо ҳам қудо шуданд. Хоҳар назди апа рафту гуфт: “Духтаратро барои писарам деҳ”. Апа хурсандона розӣ шуд. Тӯй шуд. Аммо 15 сол зиндагӣ карданд, Худованд ба ин ҷуфт фарзанд надод. Аз ҳам ҷудо шуданд. Домод бо духтари дигар хонадор шуд, ҳоло соҳиби 3 фарзанд аст...
Ин хел мисолҳоро ман бисёр медонам. Вақте фарзандони хешу табор аз ҳам ҷудо шуданд, бо ҳам ҷангӣ мешаванд, ҳатто ба тӯйю ҷанозаи якдигар намераванд. Барои ҳамин дар масъалаи хонадоркунӣ падару модар аз эҳтиёт кор бигиранд!

Панҷшанбе, Июн 14 2018

Омӯзгор Раҳмат Шералиев, сокини пойтахт (тел: 98 723 06 76) дар меҳмонии СССР гуфт, ки хабари варзишкории Эмомҳусайни 7-сола, сокини н.Рӯдакиро аз ВАО шунида, фикре ба сарам зад. Ҳатман, ин кӯдаки 7-соларо ба сайёҳони хориҷӣ муаррифӣ ва ба онҳо пешниҳод кунем, ки аксу наворҳои варзишии Эмомро тариқи интернет ба ҷаҳониён нишон бидиҳанд. Мақсад чист? Бояд ба ҷомеаи ҷаҳонӣ нишон бидиҳем ва исбот намоем, ки Тоҷик ҳоло ҳам чунин фарзандоне мисли Спитамену Темурмалику Абӯмуслим дорад. Бубинед, ки дар Аврупо ба хотири ифтихор аз Искандари Мақдунӣ номи фарзандонро Александр мегузоранд. Пас чаро мо ба фарзандони худ исми қаҳрамонҳои таърихиро нагузорем? Аз аврупоиҳо бояд омӯхт! Ҳамин ҳоло дар сарам омад, ки воқеан вожаи русии «спортсмен» ин бардошт аз ҳамон номи тоҷикии Спитамен аст. Замоне, ки ҳамсолони Эмом Ҳусайн дар хоби нозанд, ӯ ҳар саҳар аз соати 5-и субҳ машғули давидан асту машқу тамрин. Ва ин маҳорати ӯ ба меҳнати мунтазами ҳаррӯза ба даст омадааст. Чунин кӯдакони фавқулодда дар ҷомеаи мо зиёданд, аммо онҳоро бояд ёфта, зери парасторӣ бигирем. Онҳо сарвати варзишии миллатанд! Умедворам, ки Эмом ба китоби Реккордҳои Гиннес шомил хоҳад шуд.

Панҷшанбе, Май 31 2018


Хоменко Юлия Анатолиевнаи 23-сола (с.тав.21.10.1995), сокини ноҳияи Шоҳмансур, маҳаллаи Миралӣ Маҳмадалиев-3, хонаи №14 (тел: 901 09 11 07) дар меҳмонии газетаи мардумии СССР гуфт, ки “Ман аз соли 2007 дар Тоҷикистон ҳастам. Аз Ҷумҳурии Украина, аз ноҳияи Старосинявськийи вилояти Хмельницька, омада будам. Аз синфи 6 то синфи 11 дар мактаби миёнаи №36-и ноҳияи Рӯдакӣ хонда, номаи камол-аттестат гирифтам. Аммо то ҳол паспорт-шиносномаи шаҳрвандӣ надорам... Шавҳари ман-Рустам Тоҷиддинович Элов тоҷик асту зиндагии якҷоя дорем ва ҳоло соҳиби 1 фарзандем. Хуллас, барои шиносномаи шаҳрвандӣ гирифтан ба мақомоти дахлдори кишвар муроҷиат кардам, онҳо гуфтанд, ки “ту аввал аз Украина ҳуҷҷати тасдиқкунанда биёр, то бидонем, ки ту шаҳрванди куҷоӣ?” Аз Сафорати Украина дар Тоҷикистон низ чанд рӯз пеш маълумотнома гирифтам, аммо боз ҳам паспорт доданӣ нестанд. Барои гирифтани паспорт ба суди ш.Душанбе ва ОВИРи н.Шоҳмансур арз кардам, аммо ягон натиҷа нест. Охир, ман соҳиби 1 фарзандам, пас чаро шаҳрванди Тоҷикистон набошам? Аз Дастгоҳи президенти ҶТ эҳтиромона хоҳиш дорам, ки ба ин мушкили ман кӯмак намоянд, зеро мехоҳам шаҳрванди Тоҷикистони биҳиштосо бошам...”.

Чоршанбе, Май 23 2018


Хонанда ва мухлиси хурдсоли газетаи СССР Мирсаид Шарифзода, хонандаи синфи 6-и литсейи ДМТ (тел: 901 01 07 26) бо 1 даста грамота ва медалҳои варзишӣ дар гардан меҳмони газетаи СССР шудаву гуфт: Ман бо ин Ватан ва ин Ватан низ бо чунин фарзандаш ифтихор дорад. Зеро ояндаи ин Миллату ин Ватанем! Ва бояд на танҳо ман, ки тамомии ҳамнаслонам чунин бошанд! Барои варзишии ману садҳо наврасони ин Ватан боиси сарфарозист, ки чунин Ватану давлати тинҷу осоишта дорем… Бояд гӯям, ки 2 ҳафта пеш дар н.Дангара дар риштаи варзиши гӯштини озод, дар вазни 38 кг ҷои 1-ро гирифтам. Аз ин пештар (моҳи ноябри соли 2017) дар Ҷумҳурии Қазоқистон дар ҳамин навъи варзиш дар вазни 38 ҷои 1 насиби ман шуд. Қаблтар аз ин дар ш.Қӯрғонтеппа низ ҷои якум насиби ман шуда буд… Шояд хонандагон фикр кунанд, ки аз чандсолагӣ дар гӯштин будам? Ба ин савол бояд гӯям, ки ман аз синфи 3 дар ин навъи варзиш-гӯштини тарзи озод завқу хоҳиши зиёд доштам. Аз падарам низ хело миннатдорам, ки барои гӯштингирии ман кӯмаки зиёд намуд ва хоҳиш дорад, то охир давом диҳам! Ва бовар дорам, Чемпиони Ҷаҳон хоҳам шуд, зеро Мо Метавонем! Аз ҳамаи ҳамнаслони худ хоҳиш дорам, ки худро аз варзиш дур нагиранд. Ҳама навъи варзиш барои мову Ватани азизамон имтиёз хоҳад овард!!!

Панҷшанбе, Май 17 2018


Маҷид Сафарови 82-сола, аз деҳаи Фалҳободи ноҳияи Темурмалик (тел: 904 10 55 58) дар меҳмонии СССР гуфт, ки ман 5 сол боз 1 буққаи нари 3-солаи аз дастдодаамро гирифта наметавонам. Ҳодиса ин тавр рӯй дод: Саидов Саидумар ном марде аз деҳаи Солмолдашти н.Балҷувон с.2013 говашро гум мекунад. Ӯ моҳи январи с.2014 бо писараш-Азиз ба н.Данғара раҳсипор мешаваду дар деҳаи мо, пеши мазоре говҳои чаронро дида, сӯи писараш мегӯяд, ки «ҳамин буққаи гумкардаи мост!». Вақте бурданӣ мешавад, инро духтарам дида мегӯяд, ки буққаи моро куҷо мебаред? Хуллас, Саидов бо аризабозиҳои тӯлонӣ буққаи маро аз худ карду хело дар ғаму ташвишам гузошт. Болои ин ба ҳама ҷо эълон кард, ки гӯё ман гови ӯро дуздида бошам. Ҳол он ки нишонаҳои буққаи гумкардаи ӯ тибқи нишондодаш комилан дигар аст. Барои ҳақро ба ҳақдор расонидан борҳо ба ШКД, Суд ва Прокуратураи навоҳии Балҷувону Данғараву Темурмалик арз кардам, аммо ягон натиҷа нест! Борҳо нисбати Саидов дело кушода, боз пӯшониданд. Дар 4 соли даводав аз пушти 1 буққаи аздастрафтаам чандин ҳазор сомониро аз даст додам! Аммо барои ман муҳим ин аст, ки номи некамро барқарор кунам. Аз масъулини н.Темурмалик хоҳиш дорам, ки буққаи маро баргардонанд, зеро ман дузд нестам! Саидумар низ бояд зарари расонидаи 4-солаашро ҷуброн кунад!

Панҷшанбе, Май 10 2018


Узви Ихвон-ал-СССР, табиби собиқадори атфол Шамсов Вайсиддин Котибович аз шаҳри Роғун дар меҳмонии газетаи мардумии СССР (тел: 93 196 45 30) гуфт, ки дар курорти Оби Гарм беш аз 20 сол боз дӯкони рӯзномафурӯшӣ вуҷуд надорад. Баъди он ки 1 матлаби ман оид ба «Раиси мардумӣ кист?» чанд моҳ пеш дар СССР чоп шуд, раиси ноҳия-Билол Иброҳим маро даъват намуда, бо сиёсату дӯғу пӯписа ва ангуштонашро рӯи мизаш зада гуфт: «Барои чӣ ба редаксияи СССР рафта арз кардӣ? Кӣ туро фармон дод?». Ба раис гуфтам, ки «ман шуморо танқид накардаам, ин ҳамту пешниҳод барои рушди сайёҳӣ ва ҳунарҳои мардумӣ буд». Хуллас, раис аз ман сахт ранҷид… Газетаи СССРро дар Роғун бисёр бад мебинанд. Ман 100% бовар дорам, баъде, ки ҳамин шумораи СССР чоп шавад маро аниқ боз раиси ноҳия даъват карда, сиёсат мекунад! Охир, ман ҳич намефаҳмам, ки чаро сухани ҳақ ва ҳамту пешниҳод ба ягон кас намефорад??? Дили ман месӯзад, ки барои чӣ камбудиҳоро мебинему дар фикри ҳаллу баррасиаш намешавем? Мушкилоти ҷамъиятро ману шумо бинему ба Ҳукумати марказӣ нарасонем, кӣ мерасонад? Чаро дар ин хусус руасои шаҳру навоҳӣ фикр намекунанд?

саҳ 10 аз 32

Китобҳо

Flag Counter