ХАБАРИ ДОҒ
Чоршанбе, Июл 17 2019

«Кадом супермаркет, ошхона ё тарабхонаи пойтахт худ ферма дораду ҳамарӯза чорво забҳ мекунад? Ҳамаи ин нуқтаҳо аз бозорҳои коммуналӣ омада гӯшт-асосан биқин ва гӯшти хубу беҳтаринро бо нархи арзон харидорӣ карда, пасон бо нархи дучанд ба фурӯш мегузоранд. Ҳоло мавсими истироҳат дар Варзобу Ромит низ оғоз шудаасту 1 қисми асосии гӯшт аз қассобхона рост ба он тарафҳо меравад...».

 

Гӯшт фаровон аст, агар…

Болоравии нархи гӯшт, хосса, гӯшти гов дар 2 ҳафтаи охир то 47-50 сомонӣ дар бозорҳои кишвар боиси нигаронии сокинон гашта, мардум аз он тарс доранд, ки пешопеши иди Қурбон имкон дорад ин нарх то ба 60-70 сомонӣ расад. Омилҳои асосии болоравии нархи гӯшт дар бозор кадомҳоянд ва қассобон дар арафаи иди Қурбон бо кадом нархҳо истеъмолкунандагонро ба ҳайрат хоҳанд гузошт? Ин буд мавзӯе, ки мо дар оғози ҳафтаи гузашта пайгирӣ намуда, дар мавридаш маҳз аз қассобон пурсидем.

Сабаби №1: Кунҷора… №2: Сӯзишворӣ!!!

Амирбек Назаров-фурӯшандаи дӯконҳои гӯштфурӯшӣ дар бозори «Саховат»-и пойтахт дар сӯҳбат бо мухбири СССР яке аз омилҳои болоравии бесобиқаи нархи гӯштро дар гароншавии нархи кунҷора-хӯроки асосии чорво ва маводи сӯхт мебинад.

-Бубинед, нархи кунҷора дар бозори хӯроки чорво имрӯз аз 4-4,20 сомонӣ барои 1 кг кам нест. 3-4 сол пеш нархи кунҷора 2,70-2,80 сомониро ташкил медоду нархи бензину солярка низ ба маротиб арзонтар буд. Ҳоло барои бурдан ва ё овардани 1 гов аз Хуҷанд ба Душанбе то 200-250 сомонӣ пардохт кардан лозим меояд, солҳои гузашта ин нарх то 100-120 сомониро ташкил медод ва он қадар ба киссаи қассоб зарба намезад. Дар Тоҷикистон кунҷора кам истеҳсол мешавад. Аз куҷо ҳам зиёд шавад, вақте пахтаро кам мекорем? Кунҷора дар Ӯзбекистону Туркманистон хеле зиёд ва арзон аст, вале содир карданаш мушкил. Хуб, ки имсол баҳор сербориш омаду дар кӯҳу пуштаҳо алаф афзуд, вагарна вазъи хӯроки чорво ҳам бад мешуд, -мегӯяд А.Назаров.

№3: Каллаву пӯсту дилу ҷигар ҳам арзон шуд

Чуноне ки Сайфулло Назиров-қассоби бозори «Деҳқон» мегӯяд, яке аз омилҳои дигари қиматшавии нархи гӯшт ин арзон шудани каллаву пӯсту дилу ҷигари чорвост.

-Қаблан қассоб чорворо забҳ ва вақти фурӯш маблағи гӯшти тозаи онро ҳисоб карда, ба савдо мегузошт. Ӯ медонист, ки каллаи гов, пӯсти он, дилу ҷигару гурда ва шушу пояшро метавонад алоҳида ва бо нархи хуб ба фурӯш гузорад. Имрӯз бошад нархи 1 пӯсти гов, ки соли гузашта то 150 сомонӣ арзиш дошт, то ба 50-60 сомонӣ афтода, нархи каллаву дилу ҷигару шуш ва пою забон низ ба маротиб арзон шуда, аз 5 то 20 сомонӣ нарх дорад. Манъи содироти пӯст ва коркарди хеле ками он боиси арзон ва гоҳо хароб шудани пӯсти гов шуда истодааст. Қассоб маҷбур аст акнун пули инҳоро низ ба нархи гӯшт зам кунад. Ғайр аз ин харидор бояд донад, ки чорво пас аз забҳ шудан дар муддати 3-4 соат метавонад то 4-5 кг вазни худро аз ҳисоби бухор шудани обҳои бадану равған кам кунад. Маблағи ин килоҳо низ ба арзиши гӯшт зам карда мешавад. Ҷуз ин маблағҳои дигар, амсоли шаҳодатномаи соҳибкорӣ, хизмати коммуналии бозорҳо ва даҳҳо харҷи дигар низ ба арзиши гӯшт ҳамроҳ карда мешаванд,-таъкид медорад фурӯшанда.

№4: Тарабхонаҳо…

Шодӣ Наботов-гӯштфурӯши бозори «Меҳргон»-и пойтахт омили камшавии гӯштро дар бозорҳои пойтахт дар зиёдшавии тарабхонаву ошхонаҳо медонад. Ӯ мегӯяд, маҳз ҳамин муассисаҳои хӯроки умумӣ ва супермаркетҳо сабабгори асосии гароншавии нархи гӯшт дар бозор шудаанд.

-Кадом супермаркет, ошхона ё тарабхонаи пойтахт худ ферма дораду ҳамарӯза чорво забҳ мекунад? Ягонто! Ҳамаи ин нуқтаҳо аз бозорҳои коммуналӣ омада гӯшт-асосан биқин ва гӯшти хубу беҳтарини говро бо нархи арзон харида, пасон бо нархи дучанд ба фурӯш мегузоранд. Ҳоло мавсими истироҳат дар Варзобу Ромит низ оғоз шудаасту 1 қисми асосии гӯшт аз қассобхона рост ба он тарафҳо меравад. Пештар ошхонаву тарабхонаҳо дар баробари гӯшти тоза гӯшти яхиро низ истифода мебурданд, ҳоло пурра ба гӯшти наву тоза гузаштаанд. Ин аст, ки гӯшт дар бозорҳо кам шудааст. Айни замон нисбати нарх ва хариди гӯшт ҳаёҳӯй нест, мардум ҳам кам мехаридагӣ шудаанд, шояд пул надоранд, ё дар Рамазон хуб хӯрданду сер шудаанд, - меафзояд Наботов.

Гӯшт гарон намешавад!

Сайвалӣ Сабзаев-директори КВД «Бозори «Саховат» дар сӯҳбат бо мухбири СССР афзуд, ки таъминоти гӯшт дар бозори зертобеаш ба таври лозимӣ ба роҳ монда шуда, ҳамарӯза ба бозор то 2200-2400 кг гӯшти тозаву нав ворид мешавад. Ин нишондод аз омори мавсими пеш аз моҳи Рамазон тағийр наёфта, 21 дӯкони гӯштфурӯшии ин бозор аз субҳ то шом фаъоланд:

-Мо талош дорем, нархи имрӯзаро бетағйир нигоҳ дорем ва бояд мардумро мутмаин созем, ки нархи он ҳеҷ гоҳ то 60-70 сомонӣ нахоҳад баромад. Аз рӯи таҷрибаҳои бисёрсолаи чорводорон то 3 ҳафтаи дигар алаф дар талу теппаву адирҳо хушк шуда, чорворо хароб гардонида, танҳо пас аз ин соҳибони чорво ба забҳашон сар мекунанд. Баъдан бояд гуфт, дар арафаи иди Қурбон мардум аз гӯшти гов ба гӯшти гӯсфанд мегузаранд ва талабот ба гӯшти гов камтар мешавад. Ин тамоюл ба таври автоматӣ нархи гӯштро танзим мекунад! Ғайр аз ин воридоти гӯшт низ аз вил.Суғд ба бозорҳои пойтахт пас аз моҳи шарифи Рамазон афзуда, имкон дода истодааст, ки нарх нигоҳ дошта шавад, - таъкид дошт С.Сабзаев.

Эрка шудаем!

Гӯштфурӯшон ва қассобоне, ки тайи 2 рӯзи охир бо эшон ҳамсӯҳбат шудем, аз 1 омили дигар низ ёдовар шуданд, ки ин ҳам эрка шудани мардум аст. Ба гуфтаи Амирбек Назаров, мардум, хосса, мардуми деҳот имрӯз эрка шудаасту дигар дар хона гову молу мурғ парвариш намекунад. «Аз пойтахт баровардани чорвои хонагӣ боиси ҳайф шудану пӯсидани ҳазорҳо тонна пучоқ дар партовгоҳҳо ва бозорҳои пойтахт шуда, мардуми дурдасттарин шаҳру ноҳия низ ҳамакнун хариди гӯшту тухму сабзавотро низ аз пойтахт супориш медиҳанд. Эрка шудаем, дигар хонаҳоямон ифлос мешавад гуфта, молу ҳол намекунем, гӯштро аз Душанбе супориш медиҳем, то ронандаи мусофиркаш бароямон биёрад, ин ҳам яке аз омилҳост!»- таъкид медорад ӯ.

Ҷамила Ҳусейнова, СССР

PS: Барои арзоншавии гӯшт бояд чанд омилро матраҳ кард:

1.Бояд иҷозат дод, ки дар канори шаҳр, дуртар аз марказ, сокинони пойтахт чорводорӣ кунанд. Ин имкон медиҳад, ки гӯшт фаровон ва шаҳр аз пасмондаи меваҷоту тарбузу харбуза пок гардад;

2.Хитоиҳо, ки усулан бо коркарди пахта сару кор доранд, бояд муваззаф гарданд, ки кунҷораро арзон ва дар Тоҷикистон фурӯшанд;

3.Тарабхонаҳо фермаҳои худро дар музофот кушоянд;

4.Фурӯши пӯстро ба хориҷа иҷозат диҳанд, то рақобати солим барқарор гардаду қассоб аз пули пӯст нархи гӯштро танзим кунад;

5.Ба қассобон, мисле ки ба чорводорони соҳибмансаб, имтиёзи андоз дода шавад…

 

Чоршанбе, Июл 10 2019

Мақсади мулоқоти мазкур баррасии фаъолияти сохторҳои марбута ва дарёфти роҳҳои бартараф намудани камбудиҳои ҷойдошта ва ҳалли мушкилоти соҳаҳои мазкур буд, ки барои рушди минбаъдаи иқтисоди миллӣ зарур аст. Пешвои миллат таъкид намуданд, ки ҷиҳати ноил шудан ба ҳадафи олии давлат, яъне баланд бардоштани сатҳу сифати зиндагии мардуми кишвар ва ҳифзи иҷтимоии аҳолӣ мо бояд пешрафти бахшҳои воқеии иқтисодиёт, такмили низоми идораи давлатӣ, суботи молиявӣ, беҳтар кардани фазои сармоягузорӣ ва дастгирии соҳибкорӣ, дар маҷмӯъ рушди муназзаму устувори иқтисодиёти мамлакатро таъмин намоем. Илова бар ин, қайд намуданд, ки низоми молияву бонкии кишвар ҳамчун омили муҳими рушди иҷтимоиву иқтисодии Тоҷикистон бояд ба афзалиятҳои давлат ва ба манфиати ҷомеа равона шуда, барои бо сармоя таъмин намудани соҳаҳои воқеии иқтисодиёт, ҳавасманд намудани соҳибкорону тоҷирон ва умуман, баланд бардоштани фаъолнокии иқтисодӣ дар ҷомеа, ташкили ҷойҳои корӣ ва ҳифзи иҷтимоии аҳолӣ хизмат намояд. Зимни мулоқот Асосгузори сулҳу ваҳдати миллӣ андешидани чораҳои заруриро дар самти татбиқи самараноки ислоҳот доир ба низоми идоракунии молияи давлатӣ лозим дониста, тавсеа бахшидани риояи интизоми давлатӣ, баланд бардоштани сатҳи касбият ва масъулияти кормандон ва пешгирӣ кардани амалҳои коррупсионӣ низоми идораи молияро зарур донистанд. Дар баробари ин, Пешвои Миллат қайд карданд, ки дар натиҷаи таъсири омилҳои дохиливу берунӣ, инчунин, ба талаботи замони муосир ҷавобгӯ набудани идораи як қатор бонкҳо ва ба таври зарурӣ ба роҳ намондани назорат вазъи умумии низоми бонкӣ дар кишвар буҳронӣ шуд. Хотирнишон намуданд, ки камбудиҳои мавҷудаи сохторӣ, аз ҷумла зиёд будани хавфҳо дар низоми бонкӣ ва қарзҳои ғайрифаъол, паст будани сатҳи захираҳои софи байналмилалӣ, қобилияти пардохт ва сармояи бонкҳо, сатҳи баланди долларикунонӣ дар иқтисодиёт, лапишҳои асъорӣ, таъмин нагардидани рақобати солим дар бозори хизматрасониҳои бонкӣ ва дастрасии пасти аҳолӣ ба воситаҳои молиявӣ ҳанӯз боқӣ мондаанд. Дар робита ба ин масъала дар БМТ бо иштироки раиси БМТ Ҷамшед Нурмаҳмадзода, раиси Раёсати БДА ҶТ “Амонатбонк” Сироҷиддин Икромӣ, мудирони филиалҳои Бонк аз миқёси кишвар ва сардорони воҳидҳои сохтории Раёсат ҷаласа баргузор шуд. Дар ин ҷаласа Нурмаҳмадзода ба ҳозирин ҷиҳати ислоҳи камбудиҳо ва саривақтӣ иҷро намудани ҳамаи дастуру супоришҳои Пешвои муаззами миллат маърӯза намуданд. Дар маърӯза бо таъкид ба супоришҳои аз ҷониби Пешвои муаззами миллат қайдшуда ва ислоҳи камбудиҳои ҷойдошта ба ҳозирин супоришҳои иловагӣ пешниҳод гардид.

Дар рафти ҷаласа барои баланд бардоштани саҳми низоми бонкӣ дар рушди иқтисодиву иҷтимоӣ, махсусан, саноатикунонии кишвар зиёд намудани ҳаҷми қарзҳо ба соҳибкории истеҳсолӣ, бахусус, ба соҳаҳои истеҳсоли маҳсулоти ивазкунандаи воридот ва ба содирот нигаронидашуда андешидани чораҳои қатъиро лар ин самт талаб намуданд. Зикр шуд, ки БДА ҶТ “Амонатбонк” ҳамчун бонкӣ давлатӣ ва низомсозӣ ҷумҳурӣ бояд дар дастгирии сиёсати давлат пешсаф бошад ва нақши он дар самтҳои зикргардида хеле ҳам муҳим аст. Аз ҷониби Нурмаҳмадзода ба мудирони филиалҳо ҷиҳати бартараф намудани камбудиҳо супоришҳои қатъӣ дода шуд. Инчунин, бояд қайд кард, ки ҷиҳати иҷрои дастуру супоришҳои Асосгузори сулҳу ваҳдати миллӣ, Пешвои миллат, Президенти ҶТ Эмомалӣ Раҳмон Нақшаи чорабиниҳо оид ба бартараф намудани камбудиҳои низомӣ бонкӣ омода карда шуда, барои иҷро ба Бонк ирсол карда шуд. Аз ҷониби раиси БМТ Ҷ.Нурмаҳмадзода таъкид шуд, ки зарур аст камбудиҳои дар фаъолият ҷойдоштаро бартараф карда, иҷрои саривақтӣ ва сифатнокии Нақшаи чорабиниро таъмин намоянд. Ҳамзамон дар идомаи ҷаласа аз ҷониби С.Икромӣ барои саривақтӣ иҷро кардани супоришҳои мазкур ва расидан ба аҳдофи манфиатовар ба ҳозирин маърӯза пешниҳод шуд. Раис иброз доштанд, ки Раёсати Бонки давлатии амонатгузории ҶТ “Амонатбонк” эродҳои асоснок ва дастуру супоришҳои муфиди ба фаъолияти Бонк нигаронидашударо бо як ҳисси масъулият дарк намуда, Ҳукумати ҷумҳурӣ ва БМТро бовар мекунонад, ки ҷиҳати бартараф намудани камбудию норасоиҳои ҷойдошта тамоми тадбирҳои заруриро роҳандозӣ менамояд. Бонк кӯшиш менамояд, нишондиҳандаҳои молиявиро дар соли ҳисоботӣ босифат ва сари вақт таъмин намуда, барои расидан ба натиҷаҳои боз ҳам назаррас талош намояд.  

Маркази матбуоти БДА ҶТ «Амонатбонк»

 

Чоршанбе, Июл 03 2019

Чаро як идда бартариҳоро «бо доман пӯшониданианд»?

Қонуни ҶТ «Дар бораи консессияҳо» муносибатҳои вобаста ба консессияро танзим намуда, салоҳияти мақомоти давлатӣ, шарт ва тартиби ба консессия додани объектҳо, ҳуқуқ ва уҳдадориҳои консессиядор, иҷро ва муҳлати шартномаи консессия, инчунин кафолати дастгирии фаъолияти консессиониро муайян месозад. Консессиядор уҳдадор аст, шартҳои шартномаи консессиониро риоя намояд, фаъолияти хоҷагии худро танҳо дар асоси қонунгузории Ҷумҳурии Тоҷикистон ва шартномаи консессионӣ амалӣ кунад, баҳисобгирӣ ва ҳисоботдиҳиро тибқи тартиби муқарраркардаи қонунгузории ҶТ ба роҳ монад, молу мулк ва объектҳоеро, ки дар асоси шартнома ба ӯ дода шудаанд, дар муҳлати муқарраршуда ба конседент баргардонад, инчунин баъди анҷоми муҳлати амали шартномаи консессионӣ ва ё қатъ шудани он молу мулки худро ихтиёрдорӣ кунад, қонунгузории Ҷумҳурии Тоҷикистонро дар соҳаи меҳнат, шуғли аҳолӣ ва ҳифзи муҳити зист риоя ва дигар уҳдадориҳоро, ки қонунгузории ҶТ пешбинӣ кардааст, иҷро намояд.

Дар доираи талаботи қонуни мазкур Ҳукумати ҶТ 2 шартномаи консессионӣ бастааст, ки натиҷаҳои ин иқдом қобили таваҷҷуҳанд. Мутаассифона, баъзе нафарони «аз ҳама кас ва ҳама чиз норозӣ» моҳият ва бартариҳои татбиқи ин шартномаҳоро нодида гирифта, аксар маврид «офтобро бо доман пӯшонидан» мехоҳанд. Лиҳозо, дар ин матлаб натиҷаҳои ин шартномаҳоро таври мухтасар бозгӯӣ мекунем. С.2002 байни Ҳукумати ҶТ ва ширкати «Помир энержи» шартномаи консессионӣ ба муҳлати 25 сол ба имзо расида буд, ки он ба пешрафти минбаъдаи такони ҷиддӣ бахшид. Яке аз мақсадҳои шартнома дар тӯли 25 сол таҷдиду барқароркунии тамоми шабакаҳои ҳудуди ВМКБ маҳсуб мешуд. Ҷоиз ба зикри алоҳида, аст, ки ширкат дар амалӣ шудани ин шартнома ба комёбиҳои зиёд ноил гашта, то ба имрӯз 31%-и воситаҳои асосии ба ширкат тааллуқдошта пурра азнавсозӣ гашт. Масъулин муътақиданд, ки агар садамаи с.2007 рух намедод, то ба имрӯз шояд 80 дарсади бандҳо иҷро намешуд.

Шартномаи дигари консессионӣ аз ҷониби Ҳукумати ҷумҳурӣ бо Ширкати саҳомии «Иновейтив Роуд Солюшнз ЛТД» баста шудааст. Дар асоси шартнома механизми институтсионалию инноватсионии истифодаи пулакии роҳи автомобилгарди Душанбе-Чанок ҷорӣ шуд. Дарозии умумии лоиҳавии роҳи Душанбе-Чанок 358 км-ро ташкил дода, масири он аз 3 нақб («Майхӯра» 897 метр, «Истиқлол» 4998 метр, «Шаҳристон» 5253 метр), 24 галерея, ҳамчунин 38 кӯпрук иборат аст. Муҳим он аст, ки «IRS» барои дар сатҳи баланд ва ҷавобгӯи талаботи бахши роҳсозӣ амалӣ кардани вазифаҳояш имконият ва шароити зарурӣ, аз қабили мутахассисони болаёқат, корхонаҳои истеҳсоли асфалт, таҷҳизоти замонавӣ, техникаҳои пуриқтидорро доро буда, аз онҳо самаранок истифода намуда истодааст. Барои мисол, айни замон теъдоди техникаҳои филиали Ширкат зиёда аз 200 ададро ташкил дода, имкон фароҳам аст, ки нигоҳдории шоҳроҳ тибқи талаботи мавҷуда амалӣ шавад. Таъмиру таҷдид дар раванди нигоҳдории роҳ падидаи маъмул ба ҳисоб рафта, хароҷоти зиёди маблағ ва сарфи неруи зеҳниву ҷисмонии кормандонро тақозо дорад. Аз далелҳои мавҷуда метавон хулоса кард, ки таъмиру таҷдид дар фаъолияти филиали «IRS» ба раванди муттасил табдил ёфта, дар сурати ба вуҷуд омадани вайроншавии кучактарин дар масири роҳ пайи рафъи он чораҳои бетаъхир андешида мешавад. Ҳамватанони азиз хуб медонанд, ки бинобар дар минтақаи релефаш душвори кӯҳистон ҷойгир будан, роҳи мавриди назар аз офатҳои табиӣ зиёдтар осеб мебинад. Табиист, ки ин омил масъулияти кормандони филиали Ширкатро дучанд намуда, аз онҳо чораандешиҳои фавриро тақозо менамояд. 

Бо мақсади густариш бахшидани ин раванд 4 корхонаи истеҳсоли асфалт ва 2 корхонаи масолеҳи сохтмонӣ бунёд шуд. Ширкати мазкур тӯли фаъолият ҳамасола беш аз 50 км-и роҳро таъмири асосӣ ва зиёда аз 100 километрро таъмири ҷорӣ менамояд. Шоистаи зикр аст, ки аз оғози фаъолият то имрӯз филиали ширкати мавриди назар 11 кӯпруки масири роҳро таъмири ҷорӣ намуда, 2 кӯпрукро аз нав сохт. Ғайр аз ин, дар масофаи 11000 метр деворҳои ҳимоявӣ сохта ё гузошта шуда, дар даҳҳо км корҳои соҳилмустаҳакамкунӣ анҷом дода шудаанд. То имрӯз зиёда аз 800 нафар ба кор ҷалб шудаанд, ки ин омил барои паст кардани шиддати бекорӣ дар мамлакат то андозае саҳмгузор аст. Дар баробари дигар омилҳое, ки моҳияти инсондӯстиро дар худ таҷассум намудаанд, аз ҷониби филиали Ширкат ба аҳолии деҳаҳои ҳамшафати роҳ муқаррар кардани имтиёз аст. Ҳамрадиф бо ин, кормандони филиали Ширкат ва техникаҳои пуриқтидори он дар бартараф ва пешгирӣ кардани офатҳои табиии ноҳияҳои ҳамшафати роҳ саҳми сазовор гузошта, ин омил аз ҷониби мақомоти иҷроияи маҳаллии ҳокимияти давлатии ин ноҳияҳо мавриди арҷгузорӣ қарор гирифт. Дар маҷмӯъ бо итминони комил метавон гуфт, фаъолияти пурмаҳсули филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон на танҳо ба боло рафтани сатҳи хизматрасонии ба бахшҳои роҳу нақлиёт дахлдошта мусоидат намуд, балки андешаи мардумро дар мавриди нигоҳдории роҳ мусбат кард.

Далер Мерганов,

журналист

 

Панҷшанбе, Июн 20 2019

Сохтмони Манораи муназзамӣ, ки дар асоси татбиқи Лоиҳаи грантӣ ва Созишномаи байни Ҳукумати ҶТ ва Ҳукумати Ҷумҳурии Фаронса марти с.2018 дар фурудгоҳи пойтахт барои КВД «Тоҷикаэронавигатсия» оғоз гашта буд, ба охир расида, рӯзҳои наздик маросими ифтитоҳи расмии он баргузор хоҳад гашт. Бояд гуфт, бунёди Манораи муназзамӣ, ки дар таърихи истиқлолияти кишвар иншооти беҳамтост, тӯҳфаи арзандест ба Рӯзи Ваҳдати миллӣ ва 30-солагии Истиқлолияти давлатии ҶТ. Лоиҳаи иншоотро ҷониби Фаронса бо назардошти таклифу пешниҳоди мутахассисони КВД “Тоҷикаэронавигатсия” тарҳрезӣ намуда, ба меъёрҳои сохтмонии ҶТ ва ҷаҳон мутобиқ гардонида, аз ҷониби мақомоти дахлдори тарафайн мувофиқа карда шуда, аз экспертизаи давлатӣ низ гузаронидааст. Дар ин замина Лоиҳаи Созишномаи байнидавлатӣ таҳия гардида, дар байни вазорату сохторҳои 2 ҷониб мувофиқа шуд ва то қадри имкон такмил ёфта, ниҳоят 13.07.2015 аз тарафи намояндагони расмии Ҳукуматҳои Тоҷикистон ва Фаронса дар шахси Вазири нақлиёти ҶТ ва Сафири Ҷумҳурии Фаронса дар Тоҷикистон ба тасвиб расид. Аввали ноябри с.2017 аз ҷониби ширкати франсавии  «MARC MEUNIER” (МАРК МЁНЕ) оғози корҳои сохтмонии Манораи муназзимӣ ба роҳ монда шуд. 

Зимни сафари расмӣ ба ҷумҳуриамон Котиби давлатии Вазорати Аврупо ва корҳои хориҷии Ҷумҳурии Фаронса Жан-Батист Лемуан 18.04.2019 ба КВД “Тоҷикаэронавигатся” ташриф овард. Ба ҳайати расмии Ҷумҳурии Фаронса ҳамчунин сафири Ҷумҳурии Фаронса дар ҶТ хонум Ясмин Гуедар ва 1 қатор меҳмонони олиқадр аз вазорату корхонаҳои мухталифи ин кишвар шомил буданд. Дар мулоқоти мазкур ҷониби Тоҷикистонро, ба ҷуз директори генералии КВД «Тоҷикаэронавигатсия» Ашуров Лоиқ, директори Агентии авиатсияи гражданӣ ҶТ Субҳонзода Икром ва муовини вазири корҳои хориҷии кишвар Ҳусейнзода Музаффар Маҳмурод намояндагӣ намуданд. Ҷонибҳо зимни мулоқот масоили марбут ба дӯстии дуҷонибаи кишварҳо ва тақвияти ҳамкориҳо дар самти рушди соҳаи авиатсияи гражданӣ ибрози назар карда, баъдан меҳмонон аз рафти корҳои сохтмонии Манораи муназимӣ дар фурудгоҳи байналмилалии Душанбе шинос шуда, ба кори анҷомдодаи пудратчии генералии сохтмон ширкати фаронсавии “Марк Мёне” баҳои баланд доданд. Инчунин, КВД “Тоҷикаэронавигатсия” дар с.2018 ҷиҳати амалишавии парвозҳои ҳавопаймоҳо тавассути фазои Ҷумҳурии Тоҷикистон 11 долонҳои ҳавоии нави транзитиро ташкил ва ба истифода дода, чуноне дар Маҷмӯи иттилоотии аэронавигатсионӣ (AIP) низ омадааст, ин амал ба маротиб парвозҳоро афзуд. Аз шумораи умумии хизматрасонӣ 4686 парвоз транзитӣ буда, нисбат ба с.2017 47,5% зиёд аст. Ин нишондиҳанда возеҳ баён менамояд, ки шароити мусоиди лозима барои афзоиши парвозҳои транзитӣ муҳайё карда шуда истодааст. 

Ҳамзамон, дар соли 2018 КВД «Тоҷикаэронавигатсия» модернизатсияи низоми радиостансияҳои оварандаи навъи АРМ-150 МА, насб ва ба истифода супоридани радиоминои масофасанҷи ДМЕ/ДМЕ-таҷҳизоти аэронавигатсионии муосирро дар фурудгоҳҳои байналмилалии Душанбе, Хуҷанд, Бохтар ва Кӯлоб, ш.Истаравшан ва н.Данғара пурра ба анҷом расонид. Дар с.2018 аз ҷониби КВД “Тоҷикаэронавигатсия” ба 51574 адад ҳавопаймо хизмат расонида шудааст, ки нисбат ба с.2017 4,6% ё 2278 адад зиёд аст.

Ҷамилаи Мақсуд, СССР

 

Чоршанбе, Июн 12 2019

27.05.2019 дар толори маҷлисгоҳи Раёсати БДА ҶТ “Амонатбонк”, раиси Раёсат Икромӣ С.С. бо Директори генералии Низоми миллии кортҳои пардохтии (НМКП) «Мир» Владимир Комлев вохӯрӣ анҷом доданд. Бояд қайд намуд, ки дар вохӯрӣ бо намояндагони Низоми миллии кортҳои пардохтии (НМКП) «Мир» ва БДА ҶТ «Амонатбонк» оператори низоми пардохти миллии "Корти миллӣ", ҳамоҳангсозии тарафайн ва шартномаи ҳамкорӣ дар самти пардохтҳо сурат гирифт, ки мақсад аз имзои Созишнома таҳкими равобити байнидавлатии Ҷумҳурии Тоҷикистон ва Федерасияи Руссия ҷиҳати муомилоти ғайринақдӣ бо кортҳои “Корти миллӣ” бо асъорҳои миллии ду кишвар, мусоидат хоҳад кард. Қобили зикр аст, ки (НМКП) «Мир» миёни давлатҳои ИДМ нақши муҳим дорад. 

   Раиси Раёсати БДА ҶТ “Амонатбонк” Икромӣ С.С. низ зимни сӯҳбат таъкид намуданд, ки ҳамкориҳо дар масоили иқтисодиву иҷтимоӣ бо Низоми миллии кортҳои пардохтии (НМКП) «Мир» барои Тоҷикистон муҳим буда, имзои Созишномаи ҳамкориро дар самти муомилоти ғайринақдӣ ва дастгирӣ намудани шаҳрвандони ҳарду кишвар барои бемамоният анҷом додани амалиётҳои пулӣ бо кортҳояшон дар ҳудуди давлатҳои ҳамсоя, хело осон ва қулай мегардонад. Директори генералии (НМКП) «Мир» Владимир Комлев иброз дошт, ки Низоми миллии кортҳои пардохтии (НМКП) «Мир» дорои имкониятҳои технологияҳои пешрафта мебошад, ки пас аз имзои Созишнамаи ҳамкорӣ шарикони мо аз давлатҳои дӯст, дар баробари имкониятҳои муосири истифодаи амалиётҳои кортӣ, инчунин мавқеи худро миёни дигар давлатҳои шарики (НМКП) «Мир» ҳифз менамоянд. Дар хотима ҷонибҳо аз вохӯрӣ, изҳори қаноатмандӣ намуда, танҳо хостори ҳарчи зудтар дар амал татбиқ намудани ҳамкориҳоро дар ҳамаи самтҳои афзалиятноки соҳа, зарур донистанд. 

Маркази матбуоти БДА  ҶТ «Амонатбонк»

 

Ҷумъа, Июн 07 2019

   Чархаи 2-юми НБО «Роғун» ба таври санҷишӣ ба кор оғоз кардааст. Чуноне ки сомонаи хабарии «Азия плюс» менависад, феълан он нерӯи барқ истеҳсол нахоҳад кард. То ба ҳол санаи дақиқи расман фаъол шудани чархаи 2-юми НБО «Роғун» ва истеҳсоли барқи он маълум нест.

   Бояд гуфт, ки ду чархаи НБО «Роғун» ба таври муваққат насб карда шуда, мувофиқи нақша қарор аст то соли 2021 барқ истеҳсол намояд. Чархаи 1-уми ин нерӯгоҳ 16.11.2018 ба истифода дода шуда буд. НБО «Роғун» 6 чарха хоҳад дошт ва дар сурати пурра ба кор даромаданаш ҳамасола то 17 миллиард киловатт-соат барқ тавлид хоҳад кард.

 

 

саҳ 5 аз 40

Китобҳо

Flag Counter