ХАБАРИ ДОҒ
Ҷумъа, Июн 01 2018


Гуфта мешавад, ки дар соли 2017 гардиши мол байни Ҷумҳурии Тоҷикистон ва Федератсияи Россия беш аз 900 миллион доллари америкоиро ташкил карда, мавриди зикр аст, ки имрӯз Федератсияи Россия дар самти шарикии тиҷоративу сармоягузории Тоҷикистон мавқеи пешсафро ишғол мекунад. Ин нуқта дар мулоқоти президенти ҶТ Эмомалӣ Раҳмон бо раиси Ҳукумати ФР Дмитрий Медведев, ки бо сафари корӣ рўзи 31.05.2018 ба Душанбе ташриф оварда буд, зикр карда шудааст.
   Бино ба итиллои расмӣ дар ҷараёни сӯҳбати Эмомалӣ Раҳмон ва Дмитрий Медведев ҳолат ва дурнамои маҷмуъи муносибатҳои дӯстиву равобити мутақобилан судманди Тоҷикистону Россия мавриди баррасӣ қарор гирифт.
Эмомалӣ Раҳмон бо дарназардошти аҳамияти шарикии стратегии Тоҷикистону Россия таъкид кард, ки рушди минбаъдаи ҳамкорӣ бо ин кишвар аз самтҳои афзалиятноки сиёсати хориҷии Тоҷикистон боқӣ мемонад.
   Президенти мамлакат ҳалли муштараки 1 қатор масъалаҳои мубрамро дар бахши ҳамкории тиҷоративу иқтисодӣ, омили муҳими таҳкими муносибатҳои дуҷониба арзёбӣ намуданд. Дар ин робита, қайд карда шуд, ки инкишофи минбаъдаи ҳамкории тарафҳо дар ин соҳа аҳамияти аввалиндараҷаро касб менамояд.
   Ҷонибҳо барои таҳия ва татбиқи лоиҳаҳои инвеститсионӣ дар бахши воқеии иқтисодиёти Тоҷикистон, васеъ кардани ҷуғрофияи робитаҳои байниминтақавӣ, татбиқи саривақтии қарорҳои қабулкардаи Комиссияи байниҳукуматӣ оид ба ҳамкории иқтисодиро, амри зарурӣ маънидод карданд. Дар мулоқот ҳамчунин яке аз бахшҳои муҳими муносибатҳои дуҷониба — муҳоҷирати меҳнатӣ, аз ҷумла содда кардани қоидаҳои будубоши шаҳрвандони Тоҷикистон, баланд бардоштани сатҳи некӯаҳволии муҳоҷирони меҳнатӣ ва ҷалби муташаккилонаи онҳо ба бозори меҳнати Россия баррасӣ гардид.



Чоршанбе, Май 23 2018


Болоравии арзиши маҳсулоти кишоварзиро деҳқонон дар гаронии арзиши сӯзишвории дизелӣ ё солярка арзёбӣ мекунанд. Солярка барои коркард кардани замин лозим асту деҳқонон маҷбуранд онро харида, сарфу хароҷотро болои нархи маҳсулоти полезӣ зам кунанд. Ҳарчанд нархи меваю сабзавот дар вил.Хатлон ва маркази он бояд нисбатан арзон бошад, лек соҳибкорон мегӯянд, вақти шудгор ва кишт маводи сӯхтро зиёд сарф мекунанд ва ин аст, ки имрӯз маҷбур нархи полезию сабзавотро мисли сӯзишворӣ гарон ҳисоб кунанд. Абдурозиқ Равшанов-ронандаи трактор аз н.Ҷайҳун (собиқ Қумсангир) дар сӯҳбат бо СССР аз гаронии нархи солярка, ки ба 7,60 дирам расидааст, бо изҳори нигаронӣ гуфт, барои хуб кардани ваъзи зиндагияш 10 сол пеш трактор харида буд.
-Ҳоло 1 литр соляркаро аз 7,60 то 8 сомонӣ харида 1 га заминро ба арзиши 8 сомонӣ ҷуфт мекунем. Ҳангоме дар заминҳои кишт бо деҳқонон чунин нархгузорӣ мекунем, онҳо дар навбати худ аз мо шиква мекунанд, ки мо заминро бо нархи қимат шудгор ва коркард мекунем. Лек онҳо нархи сӯзишвориро ҳам намедонанд ва ҳатто намепурсанд, 1 литр солярка чанд пул аст. Ин дар ҳолест, соляркаро аз пасмондаи нефт омода мекунанду аҷибаш ин, ки 1 литр навъи бензини А-95, 7 сомонӣ асту солярка бошад аз 7,6-8 сомонӣ арзон намешавад,- афзуд мавсуф.
Роҳбари хоҷагии деҳқонии “Меҳвар” Мирзоев Саид аз н.Ҷайҳуни вил.Хатлон, ки 11 сол боз ба деҳқонӣ сару кор дорад, мегӯяд, дар ҳудуди 57 га замин пахта ва полезии пиёз, сабзӣ, тарбузу харбуза кишт карда, ба бозорҳои ватанӣ пешкаши мардум менамояд. Ӯ афзуд, ки ҳангоми ҷамъоварии пиёз якбора нархи сӯзишвории солярка ба 7,60 расид. Ронандагони “Дулан” қаблан 1 кг пиёзро ба вил.Суғд бо нархи 12 дирам мебурданд, ҳоло бошад 1 кг пиёзро 20 дирам нарх гузоштаанд, ки нигаронкунанда аст. Мирзоев мегӯяд, деҳқонон танҳо имсол ба зиёни худ кор карда, доруҳои минералӣ ва сӯзишвориро қимат харидаанду намедонанд, ки ҳосил чӣ гуна мешавад. Ман сабаби якбора боло рафтани нархи соляркаро дар нуқтаҳои фурӯши сӯзишвории маркази вилоят аз идораҳои дахлдор пурсидам. Сабаби баланд шудани нархи соляркаро дар худи Раёсати зиддиинҳисории вилоят намедонанд! Думболи пайдо кардани ҷавоб ба ин суол ба чанд манобеи дигар муроҷиат кардам, лек посухи дуруст наёфтам.

Баҳодур Уроқов,
СССР, вил.Хатлон

Панҷшанбе, Май 10 2018


Ба маълумоти ВАО расонида мешавад, ки Бонки миллии Тоҷикистон қурби хариду фурӯши доллари ИМА ва рубли русии нақдро барои ташкилотҳои қарзӣ муайян намекунад. Қурби аз ҷониби БМТ муайянкардашаванда қурби расмии ин асъорҳои хориҷӣ буда, онҳо танҳо бо мақсади ҳисоббаробариҳо бо буҷет, пардохтҳои гумрукӣ ва баҳисобгирии муҳосибӣ истифода шуда, бо ин қурб хариду фурӯш анҷом дода намешавад. Қурби хариду фурӯш ва табдили асъори хориҷии нақд аз ҷониби худи ташкилотҳои қарзӣ, дар асоси талабот ва пешниҳод дар бозори дохилӣ, бо назардошти хароҷотҳои нақдикунонӣ ва амалиётии ташкилотҳои қарзӣ муқаррар карда мешавад ва аз қурби расмии ин асъорҳои хориҷӣ фарқ мекунад.
БМТ тибқи “Дурнамои самтҳои асосии сиёсати пулию қарзии Ҷумҳурии Тоҷикистон барои соли 2018 ва давраи миёнамуҳлат”, дар соли ҷорӣ бо дарназардошти гузариш ба реҷаи “ҳадафгирии таваррум” дар амалӣ гардонидани сиёсати пулию қарзӣ, сиёсати қурбии ба реҷаи “шинокунандаи танзимшаванда, бе муайян ва эълон кардани ҳудудҳои тағйирёбии қурб” асосёфтаро, амалӣ карда истодааст. Тибқи ин реҷа, қурби пули миллӣ дар асоси таносуби талабот ва пешниҳоди асъори хориҷӣ дар бозори дохилӣ муқаррар мегардад. Талабот ва пешниҳоди асъори хориҷӣ бештар хусусияти мавсимӣ дошта, ҳамеша дар оғози сол талабот ба хариди он зиёд ва пешниҳоди он барои фурӯш кам мешавад. Коҳишёбии қурби пули миллӣ ва баландшавии қурби асъори хориҷӣ, бахусус, қурби доллари ИМА-и нақд асосан зери таъсири ҳамин омил сурат мегирад.

Таъсири омилҳои мавсимӣ
Дар моҳҳoи январ-апрели соли 2018 қурби расмии сомонӣ нисбати доллари ИМА устувор боқӣ монда, ҳамагӣ 0,8 фоиз коҳиш ёфтааст (дар ҳамин давраи соли 2017 коҳишёбӣ ба 7,6 фоиз баробар буд). Айни замон, қурби фурӯши доллари ИМА-и нақд дар бозори ғайрирасмӣ 3,1 фоиз, асосан дар нимаи дуюми моҳи апрел баланд шудааст (дар ҳамин давраи соли 2017 баландшавӣ ба 12,0 фоиз баробар буд). Дар санаи 26.04.с.2018 фарқияти байни қурби расмӣ ва қурби нақдии бозори ғайрирасмӣ ба 3,2 фоиз (дар ҳамин давраи соли 2017 ба 4,6 фоиз) баробар шудааст. Баландшавии қурби доллари ИМА-и нақд ва аз 2 фоиз зиёд шудани фарқияти байни он ва қурби расмии доллари ИМА ва номуътадил гаштани вазъи бозори дохилии асъор дар нимаи дуюми моҳи апрели соли 2018, бинобар сабаби яку якбора паст рафтани қурби рубли русӣ нисбати доллари ИМА дар ин рӯзҳо (то 11,2 фоиз) ва таъсири омилҳои мавсимӣ ба амал омад. Аз эътидол берун паст рафтани қурби рубли русӣ нисбати доллари ИМА ба бадтар шудани вазъи геосиёсии ҷаҳон, бинобар афзудани зиддиятҳои Федератсияи Русия бо мамлакатҳои ғарб ва ҷорӣ гаштани таҳримҳои нав, алоқаманд аст.
Мубодилаи рубли русӣ ба доллари ИМА яке аз манбаъҳои асосии дарёфт кардани асъори хориҷии озод мубодилашаванда маҳсуб гашта, устувор будани қурби он ба ташкилотҳои қарзӣ имконият медод, ки муназзам доллари ИМА-ро бо қурби қобили қабул аз бозорҳои Русия харидорӣ карда, талаботи мизоҷонашонро ба он қонеъ намоянд. Мавҷудияти ҳамин механизм яке аз омилҳои асосии муътадил будани вазъи бозори дохилии асъор ва суботи қурби пули миллӣ дар нимаи дуюми соли 2017 ва семоҳаи якуми соли 2018 ба ҳисоб меравад. Тағйирёбии якбораи қурби рубли русӣ дар чанд рӯзи охир фаъолияти низоми мазкурро ҳалалдор намуда, боиси ба маротиб зиёд гаштани талабот ба доллари ИМА-и ғайринақдӣ аз ҷониби мизоҷони ташкилотҳои қарзӣ - субъектҳои хоҷагидорӣ (аз 16,6 млн. то ба 21,1 млн. доллари ИМА) ва чун натиҷа, ба доллари ИМА-и нақд аз ҷониби соҳибкорони инфиродӣ ва аҳолӣ гашт. Ҳолати мазкур ва инчунин таъсири омили равонӣ, дар навбати худ ба фаъол гаштани бозори ғайрирасмии асъор, баланд шудани қурби фурӯши доллари ИМА-и нақд дар он ва аз 2 фоиз зиёд шудани фарқияти байни қурбҳо сабаб гашт. Тағйирёбии қурби пули миллӣ дар рӯзҳои охир хусусияти бараълои мавсимӣ дошта, ба вазъияти дар моҳи апрели соли 2017 ҷой дошта, шабоҳати зиёде дорад. Фарқият танҳо дар он аст, ки дар соли 2017 коҳишёбии қурби пули миллӣ ва фарқияти аз 2 фоиза зиёди байни онҳо аз аввали сол оғоз гашта, аз коҳишёбии имсолаи моҳи апрел ба маротибаҳо зиёдтар буд.

Ноустувории қурби пули миллӣ муваққатист
Дар соли 2018 БМТ бо дарназардошти устувории вазъи бозори дохилӣ ва мутавозун будани талаботу пешниҳод ба асъори хориҷӣ, бо истифода аз механизми мутамаркази хариду фурӯши рубли русӣ, фаъолияти онро ба танзим медарорад. То санаи 26.04.2018 БМТ аз бозори дохилӣ (байнибонкӣ) 21,7 млрд. рубли русӣ харидорӣ ва дар он 19,9 млрд. рубли русиро фурӯхта, дар бозори беруна амалиётҳои вогардонии (конверсияи) асъори хориҷиро анҷом дода истодааст. Дар баробари ин, БМТ бо мақсади танзими ҳаҷми пули миллии дар муомилотбуда, ҳамарӯза амалиёти барориши (фурӯши) қоғазҳои қиматноки худро анҷом дода истодааст (аз аввали сол ба маблағи 5,3 млрд. сомонӣ). Бо назардошти мусбат будани нишондиҳандаҳои макроиқтисодии ба тағйирёбии қурби пули миллӣ таъсиррасонанда, раванди имрӯзаи ноустувории қурби пули миллӣ қӯтоҳмуҳлат арзёбӣ гардида, бо барқароршудани фаъолияти муназзами механизми мубодилаи рубли русӣ ва оғози дахолатҳои асъории бевосита бо назардошти имкониятҳои мавҷудбуда БМТ (фурӯши доллари ИМА дар бозори байнибонкӣ) бартараф хоҳад шуд.

Шуъбаи матбуот

Душанбе, Май 07 2018


Дар маркази вилояти Хатлони ш.Бохтар Форуми соҳибкорони в.Сурхандарёи Ҷумҳурии Ӯзбекистон ва в.Хатлони Ҷумҳурии Тоҷикистон баргузор гардид. Дар Форуми мазкур соҳибкорони пешсаф ва муваффақи 2 кишвари бо ҳам дӯсту бародар иштирок намуданд. Ҳадафи асосии баргузории Форум ин мустаҳкам намудани риштаи ҳамкориҳо дар соҳаи савдо ва бастани шартномаҳои нави ҳамкорӣ дар ин самт мебошад.
 Намоиши молу маҳсулоти в.Сурхандарёи Ҷумҳурии Ӯзбекистон дар доираи форуми соҳибкорон гузаронида шуд, ки дар он соҳибкорон аз Ҷумҳурии Ӯзбекистон молу маҳсулоти гуногуни худро бо нархҳои арзон пешниҳод карданд. Дар намоиши молу маҳсулоти вилояти Сурхандарёи Ҷумҳурии Ӯзбекистон раиси в. Хатлон Давлатшоҳ Гулмаҳмадзода Қурбоналӣ, масъулон аз мақомоти иҷроияи маҳаллии ҳокимияти давлатии ш.Бохтар ва дигарон меҳмононро қабул ва ҳамроҳи намуданд.
Гуфта мешавад, ки соҳибкорони кишвари дӯсту баробар Ҷумҳурии Ӯзбекистон равған, либосҳои гуногуни мардонаву занона, масолеҳи сохтмонӣ, маҳсулоти ширрӣ, обҳои гуногун, ороишот ва дигар лавозимоти зарурии рӯзгорро пешкаш намуданд. Маҳсулоти мазкур бо нархи нисбатан арзон пешниҳод карда шуд. Хатлониён бо дидан кардан аз намоишгоҳи мазкур ба сифат ва нархи маҳсулот баҳои баланд дода, пешниҳоди ҳамкорӣ карданд.
Шоми рӯзи 6.05.2018 дар театри Мусиқӣ-мазҳакавии ба номи Ато Муҳаммадҷонови в. Хатлон барномаи фарҳангии санъаткорони в.Сурхандарёи Ҷумҳурии Ӯзбекистон ва в.Хатлони Ҷумҳурии Тоҷикистон баргузор гардид, ки дар он сокинони шаҳри Бохтар ва дигар ноҳияҳои вилоят ширкат намуда, шукргузорӣ аз тинҷиву осоиштагии меҳан ва ягонагии мардуми сарбаланди тоҷик карданд. Таъкид гардид, ки ин намоишгоҳ метавонад, ки дар самти мустаҳкамтар гардидани ҳамкориҳо миёни соҳибкорони ду кишвари дӯст ва беҳтар гардидани дӯстиву рафоқат байни сокинони Ҷумҳуриҳои Тоҷикистону Ӯзбекистон мебошад.
 

Баҳодур Уроқов, СССР, вилояти Хатлон


Панҷшанбе, Май 03 2018

Чоршанбе, Май 02 2018


   Ҳафтаи гузашта ширкати CCI- «Coca-Cola Ичиҷек» дар Ҷумҳурии Тоҷикистон намояндагони воситаҳои ахбори оммаро ба корхонаи худ дар ш.Душанбе даъват намуд, то ин ки журналистони Тоҷик имкон пайдо намоянд бо фаъолияти кории ин ширкат ва тарзи истеҳсоли нӯшокиҳои ташнашикани бренди оламшумули Coca-Cola аз наздик ошно гарданд. Мухбири Газетаи мардумии СССР низ дар байни ин меҳмонон буд ва дар баробари боздид аз корхона тавонист ба суолҳои худ ҷавоб пайдо намояд.


   Бояд қайд намуд, ки нӯшокии Coca-Cola таърихи беш аз 130 сола дошта, яке аз брендҳои машҳури олам ба ҳисоб меравад. Ширкати «Coca-Cola Ичиҷек» намояндаи ин ширкати бонуфуз дар Туркия буда, корхонаи нахустини он соли 1954 ба фаъолият шурӯъ кардааст. Ба «Coca-Cola Ичиҷек» дар тӯли ин солҳо муяссар шуд бо таъсиси 26 корхонаи истеҳсоли дар 10 кишвари олам дар бахши фурӯши нӯшокиҳои ташнашикан ҷойи 2-юмро сазовор гардад. Айни замон корхонаҳои ширкати номбурда 27 намуди нӯшокӣ, афшура ва яхмосро истеҳсол менамоянд, ки аз рӯи сифату кайфият инҳо ҳамто надоранд. Корхонаи мазкур дар Душанбе соли 2015 ифтитоҳ ёфта, роҳбарии ширкати «Coca-Cola Ичиҷек» дар ҶТ бар дӯши Эзел Агаоглу вогузор шудааст.


   Эзел Агаоглу мегӯяд, ки барои истеҳсоли нӯшокиҳои ташнашикан ва газдор аз маҳсулоти босифат истифода бурда, оби барои нӯшокиҳо омода шуда аз системаи махсуси тозакунӣ чанд зина мегузарад. Дар корхона таҷҳизоти муосири истеҳсолӣ насб шуда, маҳсулот аз рӯи талаботи стандартҳои байналмиллалӣ тайёр гардида, сипас ба бозор бароварда мешавад. Маҳсулоти корхонаи «Coca-Cola Ичиҷек» дар Душанбе ба 50 нуқтаи фурӯшу савдо маҳсулоти хешро тақсим шуда, танҳо дар соли 2017 беш аз 120 миллион литр нӯшокиҳои истеҳсол кардааст. Ба гуфтаи Эзел Агаоглу, мардуми Тоҷик, алалхусус дӯстдорони нӯшокиҳои газдор зиёдтар ба нӯшокии «Fanta»-и ин ширкат таваҷҷӯҳ доранду бештар аз ҳама онро харидорӣ мекунанд.
- Мо саъю талоши хешро барои он равона месозем, ки маҳсулоти мо аз лиҳози кайфият босифат, хуштаъм ва безарар бошад ва тавонем ба мизоҷони Тоҷик нӯшокиҳои хеле хуб пешкаш намоем, - афзуд зимни сӯҳбати хеш бо журналистон Эзел Агаоглу.

Ҷамила Ҳусейнова, СССР

саҳ 8 аз 34

Китобҳо

Flag Counter