ХАБАРИ ДОҒ
Ҷумъа, Июл 24 2020

Мавлуда Қаландарзода - раиси Суди олии иқтисодии Тоҷикистон зимни нишасти матбуотӣ оиди фаъолияти нимсолаи аввали соли 2020 аз баррасии 1851 парванда дар судҳои иқтисодӣ хабар дод. Зимнан ӯ қайд кард, ки “Дар давраи ҳисоботӣ ба маблағи 339.836,011 сомонӣ даъво қонеъ ва бо санадҳои судӣ ба фоидаи давлат ба маблағи 1.645,107 сомонӣ боҷи давлатӣ руёнида шудааст ”.

Ба иттилои масъулини Суди олии  иқтисодӣ дар давраи ҳисоботӣ дар ҳамкорӣ бо Хадамоти иҷрои назди Ҳукумати Ҷумҳурии Тоҷикистон иҷрои санадҳои судӣ ба маблағи 39.150.800 сомонӣ (зарару қарзҳои кредитӣ ва боҷи давлатӣ) таъмин карда шудааст

Исмоилҷон Маликов СССР

 

Ҷумъа, Июл 24 2020

Солҳои охир пардохти роҳкирои мусофирон дар автобусҳои дохили пойтахт тариқи ғайринақдӣ ба роҳ монда шудааст ва ба монанди ин дар чанд марказҳои бузурги савдо хариду фурӯши ғайри нақдӣ ба назар мерасад. Вале Тибқи қарори 815-и Ҳукумати Ҷумҳурии Тоҷикистон бояд аз 1-уми январи соли 2016 ҳамагуна хариду фурӯш тариқи ғайринадӣ дар тамоми кишвар ба роҳ монда шавад. Вале тавре мебинем, ин қарор амалӣ нашудааст. Чаро? Ин суоле буд, ки хабарнигори СССР ба раиси БМТ дод.

Ҷамшед Нурмуҳаммадзода зимни нишасти матбуотӣ ба ин суол чунин посух дод:

- Мо барои иҷрои ин қарори ҳукумат кӯшиш карда истодаем ва бубинед, ки мардум алакай барои истифодаи кортҳо кам-кам одат карда истодаанд ва мо яку якбора наметавонем, ки ин равандро пурра мавриди амал қарор диҳем. 

Вале ӯ нагуфт, ки тайи чанд соли дигар метавон раванди амалӣ шудани қарори 815-ро дар тамоми кишвар мушоҳида кард. Ҳамчунин дар варақаи итилоотии Бонки миллӣ омадааст, ки миқдори дорандагони кортҳои пардохтӣ 2 486,5 ҳазор нафарро ташкил дода, дар муқоиса ба соли гузашта 16% зиёд гардидаанд. Ногуфта намонад, ки шумораи терминалҳои электронӣ низ назар ба соли гузашта 398 дона зиёд шудааст. Вале ин муаммо, ки чаро кортҳоро ҳини харидуфурӯш корбаст намекунанд, то ҳанӯз норавшан аст. Ҳол он ки аз Қарори ба имзо расонидаи Президенти ҶТ аллакай 5 сол сипарӣ шуд.

                                                Шералӣ Давлатов СССР 

 

Чоршанбе, Июл 22 2020

Ман 16.09.2008 ҳангоми раиси ш.Кӯлоб будани Ҳамид Абдуллоев дар асоси Қонуни ҶТ «Дар бораи таъсиси хоҷагии деҳқонӣ» ба ӯ муроҷиат карда будам. 20.08.2009 ба ман қарори раиси Ҳукумати ш.Кӯлобро «Дар бораи дар ҳаҷми 2 гектар замин таъсис додани хоҷагии деҳқонӣ» доданд. Ва аз он замон то имрӯз банда дар заминам ба парвариши зироатҳои хоҷагии қишлоқ машғулам. 

Хонандаи азиз! Дар ин ҷо ман дар бораи фаъолияти соҳибкориам таъриф карданӣ нестам. Чунки дар шароите, ки арзиши сӯзишворӣ, равғанҳои молиданӣ, қисмҳои эҳтиётии мошину тракторҳо ва ҳаққи хизматрасонӣ ба деҳқон басо дандоншикан мебошад, рушд кардан мушкил аст. Ба ғайр аз ин, арзиши 1 халта нуриҳои минералӣ аз ҷумла фосфор, карбомит, селитра, нитроамафос, калий аз 200 то 300 сомониро ташкил медиҳад, ки ҳамаи ин омилҳо ба болоравии арзиши аслии маҳсулот ва болоравии хароҷотҳо мусоидат мекунад. Сабаби дигар набудани нуриҳои органикӣ мебошад.

Мо соҳибкорон фақат тариқи телевизионҳо ва воситаҳои ахбори омма мефаҳмем, ки ҳар сол бо мақсади рушди соҳаи кишоварзӣ ва ривоҷи хоҷагиҳои деҳқонӣ чанд млн. доллар грантҳои бебозгашти хориҷӣ ва чанд млн. сомонӣ грантҳои дохилӣ барои рушди хоҷагиҳои деҳқонӣ дар шакли пул, тухмӣ, техника, заҳрхимикат ва нурӣ сарф карда мешаванд. Акнун саволе ба миён меояд, ки ин грантҳо ба киҳо тақсим карда мешаванд? 

Ман дар муддати 11 соли соҳибкориам дар чандин семинару машғулиятҳои ташкилотҳои хориҷӣ ширкат варзидаам ва аз ҳеҷ кас боре нашунидам, ки ягон соҳибкори оддӣ аз чунин грантҳо бархурдор шуда бошад. 

Ҷаббор Раҷабов, 

хабарнигори мардумӣ,

ш.Кӯлоб 

 

Чоршанбе, Июл 15 2020

 

   Истиқлоли иқтисодиро бе бунёди роҳҳои мошингард, хусусан, роҳҳо ва пулҳое, ки Тоҷикистонро бо дигар мамлакатҳо мепайванданд, тасаввур кардан душвор аст. Биноан, Пешвои миллат аҳли кишварро бо азми қатъӣ ба эҳёи роҳу пулу иншооти инфрасохтори роҳдорӣ, даъват карда, Ҳукумати кишварро муваззаф намуданд, то ҷиҳати бунёди инфрасохторе, ки Тоҷикистонро аз бунбасти коммуникатсионӣ мебарорад, тадбирҳои зарурӣ андешад. 

   Моҳиятан бо азнавсозии роҳи Душанбе-Чаноқ қисматҳои ҷанубу шимоли Тоҷикистонро ба ҳам пайванд шуда, яке аз қисматҳои асосии Роҳи бузурги абрешим эҳё шуд. Муҳимтар аз ҳама, бо бунёд ва ба меъёрҳои байналхалқӣ мутобиқ гардонидани он на танҳо ҳаракати нақлиёти автомобилӣ дар ҳама фасли сол байни пойтахти мамлакат ва вилояти Суғд таъмин гардид, инчунин барои робитаҳои нақлиётии давлатҳои ҳамсояи ҷанубӣ ва шарқии Тоҷикистон бо дигар давлатҳо шароити мусоид фароҳам омад.

   Ҳукумати мамлакат бо дарназардошти нақши боризи роҳ ва бо мақсади дар ҳолати хуб нигоҳ доштани он ба хулоса омад, ки механизми инноватсиониро аз рӯйи низоми толлингӣ дар хизматрасонӣ ва идоракунии роҳи Душанбе-Чаноқ мавриди амал қарор диҳад ва тибқи шартномаи консессионӣ нигоҳдории шоҳроҳи автомобилгарди Душанбе-Чаноқ ба зиммаи филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон вогузор шуд. 

  Бо хулосабарорӣ аз корҳои анҷомёфта метавон гуфт, ки мавҷудият ва фаъолияти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон тақозои замон буда, маҳз ба шарофати фаъолияти пурмаҳсули кормандони он роҳи Душанбе-Чаноқ дар ҳолати хуб қарор дошта, рафтуомади шаҳрвандон аз тариқи он дар ҳама фасли сол таъмин аст. 

   Ба маълумоти ҳамватанон мерасонем, ки солҳои охир, сарфи назар аз таъсири буҳрони ҷаҳонии молиявӣ, болоравии сатҳи таваррум ва амалӣ гардидани як силсила ибтикор, аз ҷумла бунёди плазаҳои нав, харидории техникаҳои пуриқтидор, бунёди корхонаҳои истеҳсоли асфалт, таъмири асосии қариб 100 километр роҳ, ширкат ба боло бурдани тарофаҳо иқдом накард. 

    Аз он бояд ёдовар шавем, ки дар роҳ бо харҷи маблағи зиёд низоми нав­созишудаи толлингӣ ҷорӣ шуд, ки дар минтақа беназир аст. Муҳимтар аз ҳама, зиёда аз 800 нафар дар филиали ширкат фаъолият доранду маҳз ба шарофати меҳнати пурмаҳсули онҳо роҳи Душанбе-Чаноқ мунтазам кушода аст. 

  Ашхоси огоҳ медонанд, ки таъмири куллии роҳ масрафи зиёд дошта, дар ин замина роҳ пурра аз нав эъмор мешавад. Инчунин, бо роҳандозии фаъолият дар сатҳи хуб ва сифати баланд, аз ҷониби филиали ширкат ба масъалаи ободонӣ, ки дар навбати аввал ба таъмини бехатарии мусофирону ронандагон рабт дорад, таваҷҷуҳи хоса зоҳир шуда истодааст.

   Аз далелу арқоми мавҷуда метавон хулоса кард, ки таъмиру таҷдид дар роҳу қисматҳои он дар фаъолияти филиали «IRS», далели возеҳи масъулиятшиносии роҳбарияти он аст. Ин раванд зери назорати доимӣ ва ҷиддии роҳбарияти филиали ширкат қарор дошта, дар сурати ба вуҷуд омадани вайроншавии кӯчактарин дар масири роҳ пайи рафъи он чораҳои бетаъхир андешида мешавад. 

   Дар соли равон доираи фаъолият хеле васеъ гардида, бо ин мақсад зиёда аз 30 ҳазор тонна асфалт харҷ хоҳад шуд. Дар ояндаи наздик пурра нав намудани пироҳани роҳ (манзур асфалти роҳ аст) аз мақсадҳои асосии роҳбарияти филиали ширкат маҳсуб мешавад. Муҳимтар аз ҳама, барои таъмири роҳ мутахассисони ҳирфаӣ ва техникаву механизмҳои замонавӣ ҷалб шуда, се корхонаи истеҳсоли асфалти марбут ба филиали ширкат дар тавсеаи ин раванд саҳми бориз доранд. 

    Дар маҷмӯъ, фаъолияти пурмаҳсули филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон на танҳо дар боло рафтани сатҳи хизматрасонии ба бахшҳои роҳу нақлиёт рабтддошта мусоидат намуд, балки андешаи мардумро дар мавриди нигоҳдории роҳ мусбат  кард. , 

 

Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон

Чоршанбе, Июл 08 2020

 

Бо самимияти бепоён фаро расидани ҷашни мубораку хуҷастаи Ваҳдати миллиро  ба Шумо муборакбод мегӯям. Бигзор дар зиндагӣ сиҳатии бардавом, муваффақиятҳои беназир, иқболи баланд, рӯзгори саршори шодиву фараҳ ва саодатмандӣ ҳамеша насибатон гардад.

    Равшан аст, ки пас аз ба даст овардани Истиқлоли давлатӣ тақдир ба сокинони Тоҷикистони азиз сарвареро дод ва ин фарзонафарзанди миллат дар ҳақиқат Пешво ва раҳнамои мардум гардиданд. Бо ташаббусҳои хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон санаи 27-уми июни соли 1997 Созишномаи истиқрори сулҳ ва ризоияти миллӣ ба имзо расид ва инак 23 сол аст, ки бӯстони Ваҳдати миллӣ фазои Тоҷикистони азизро муаттар менамояд. Бигзор зебоии юсуфистони иқболи сокинон ва таровати бӯстони Ваҳдати миллӣ дар Ватани биҳиштосои мо ҷовидона бошад.

  Ҷашни эҳёбахши Ваҳдати миллӣ, ки ин бахти саодатофар бо ташаббуси Пешвои муаззами миллат насиби мо шуд,  дар таърихи миллат бо хатти зарин сабт гардидааст. Инак, 23 сол аст, ки  фазои зиндагии мо аз накҳати пояндаву ҷовидонаи гулистони ҳамешасабзи Ваҳдати миллӣ муаттар  гардидааст. Сокинони кишвар хуб медонанд, ки муқаддастарин рукни устувории бақои давлат Ваҳдат аст. Аз ин рӯ, ҳифзи ин неъмати тақдирро вазифаи ҷонӣ ва қарзи инсонии худ мешуморанд. 

   Бо камоли меҳру самимият ва эҳтироми  бепоён 23-юмин солгарди ҷашни Ваҳдати миллиро ба Шумо муборак бод мегӯям. 

Бо эҳтиром, Сироҷиддин Икромӣ, раиси Раёсати  БДА ҶТ «Амонатбонк

 

Хазинаҳои хизматрасонии бегоҳӣ ва шабонарӯзии БДА ҶТ «Амонатбонк» дар ин шабу рӯз бе мушкили фаъолият доранд

   Тибқи талаботҳои Дастурамали №227-и Бонки миллии Тоҷикистон “Оид ба корҳои хазинавӣ дар Бонки миллии Тоҷикистон ва ташкилотҳои қарзии молиявӣ” ва фармоиши роҳбарияти БДА ҶТ «Амонатбонк» дар филиалҳои БДА ҶТ «Амонатбонк» хазинаҳои хизматрасонии бегоҳӣ ва шабонарӯзӣ ташкил карда шуда буданд, ки дар ин давраи ҳасос ба мардум содиқона хизматрасонӣ кардаистодаанд.

   Бояд қайд намуд, ки хазинаҳои хизматрасонии бегоҳӣ ва шабонарӯзии МХБ №013-и филиали №05-и БДА ҶТ «Амонатбонк»  дар ноҳияи И.Сомонӣ, кӯчаи Турсунзода-30,(Донишгоҳи славянии Тоҷикистон ва Русия), МХБ №24-и филиали №06-и БДА ҶТ «Амонатбонк» дар ноҳияи Фирдавсӣ, кӯчаи Н.Қаробоев-4 (мавзеи Гулистон), МХБ №709-и филиали №07-и БДА ҶТ «Амонатбонк» дар ноҳияи Шоҳмансур, кӯчаи Назаршоев-11(вокзали Роҳи оҳан), МХБ №365-и филиали №24-и БДА ҶТ «Амонатбонк» дар шаҳри Хуҷанди в. Суғд, хиёбони И.Сомонӣ-37 (чорроҳаи маркази ш. Хуҷанд), МХБ №680-и филиали №10-и БДА ҶТ «Амонатбонк» дар шаҳри Ҳисор, кӯчаи И.Сомонӣ-4 (маркази шаҳр), №42-и БДА ҶТ «Амонатбонк» дар минтақаи Бохтар (кӯчаи Айнӣ-62, шаҳри Бохтар), филиали №56-и БДА ҶТ «Амонатбонк» дар минтақаи Кӯлоб (кӯчаи С. Сафаров-3, шаҳри Кӯлоб), филиали №66-и БДА ҶТ «Амонатбонк» дар ВМБК (кӯчаи Ленин-115, шаҳри Хоруғ) ва дар маркази хизматрасонии бонкии №698-и филиали №22 қаблан ташкил карда шуда буданд  ба реҷаи кории шабонарӯзӣ гузаронида шуданд.

   Мизоҷон ва меҳмонон метавонанд аз иҷрои амалиётҳои асъорӣ, интиқоли маблағҳо, қабули маблағҳои комуналӣ ва дигар пардохтҳо, ивази пулҳои фарсуда ва коршоям, пардохти нафақаву кӯмакпулиҳое, ки ки дар хизматрасонии хазинаҳои бегоҳӣ ва шабонарӯзӣ фаъолият мекунанд бе мамоният истифода намоянд.

 Роҳбарияти Бонк  бо мақсади ҷоннок намудани фаъолият фарогирии хизматрасониҳо инчунин фароҳам овардани шароитҳои мусоид ба мизоҷону меҳмонон ва сайёҳон дар оянда низ чораҳои таъхирнопазир меандешад.

Шуъбаи матбуоти БДА ҶТ «Амонатбонк»

 

Панҷшанбе, Июл 02 2020

   

Мусофиркашоне, ки дар самти Бохтар-Қубодиён ҳамарӯза дар сафаранд, мегӯянд, ки роҳҳои вайрон валангори маҳаллӣ хаста шудаанд.

   Абдулло Қурбонов ва 1 гурӯҳ ронандаҳои ин самт ба идораи минтақавии газета дар вилояти Хатлон муроҷиат намуда, мегӯянд. ки чаро бо дарназардошти он, ки ронандаҳо ҳар моҳ андози роҳро пардохт мекунанд, он маблағ барои тармиму таҷдиди роҳ истифода карда намешавад. Ронандаҳо мегӯянд, ки танҳо роҳҳои гирду атрофи маркази ноҳия таъмири капиталӣ карда шудааст, аммо роҳ аз маркази ноҳия то гардиши он ба талаботи имрӯза ҷавобгӯй нест. Дар 29 соли истиқлолият чандин раисон иваз шуданд, лек ин қисмати роҳро, ки аз даврони советӣ мондааст, касе таъмир накард.

   Масъулини Муассисаи давлатии нигоҳдории роҳҳои автомобилгарди вилояти Хатлон дар сӯҳбат бо мухбири СССР гуфтанд, ки ин арзи ронандаҳо бесабаб нест ва ин камбудӣ ҷой дорад. Айни замон дар н.Қубодиён 144 км роҳҳои аҳамияти маҳаллӣ дошта мавҷуданд, ки 30% барои рафтуомади воситаҳои нақлиёт мувофиқ буда, 70% дигар ба таъмир ниёз доранд. Барои таъмир ва кашидани хатҳои уфуқӣ аз ҳисоби буҷети ноҳияи танҳо дар 5 моҳ 14. 900 сомонӣ ҷудо карда шудааст, ки ин маблағ барои қисман таъмир намудани 144 км, қонеъ намекунад. Аммо 70% роҳҳои маҳалидошта ба таъмири асосӣ ниёз дорад. 

  Қурбоналӣ Хоҷаев, сардори Муассисаи давлатии нигоҳдории роҳҳои автомобилгарди ноҳияи мазкур гуфт, ки аз ҷониби соҳибкорони ноҳия бо харҷи 250.000 сомонӣ роҳҳои маҳаллӣ сангфарш ва таъмири ҷорӣ шуда, 1 пул ва 1 қубури обгузар таъмир гардидааст. Бояд дарҷ намуд, ки аз ҳисоби Вазорати нақлиёти мамлкат  дар 5 моҳи соли ҷорӣ барои таъмири 34 км роҳҳои байналмилалӣ 58.000 сомонӣ ҷудо карда шуд, ки бо ин маблағ роҳҳо таъмиру навсозӣ шуданд. 

Баҳодур Уроқов, СССР, Хатлон

 

саҳ 4 аз 49

Китобҳо

Flag Counter