ХАБАРИ ДОҒ
Панҷшанбе, Июл 05 2018


Дафтари матбуоти Ҳукумати вил.Суғд хабар медиҳад, ки дар ш.Хуҷанд намоишгоҳи байналмилалии тиҷоратии Суғд-2018" баргузор мешавад. Панҷумин намоишгоҳи байналмилалии тиҷории "Суғд-2018" 6 ва 7 июл дар Қасри варзишии Хуҷанд гузаронида мешавад. Интизор меравад, дар намоишгоҳ намояндагони доираҳои тиҷоратии Русия, АМА, Олмон, Қазоқистон, Қирғизистон, Узбакистон, Кореяи Ҷанубӣ ва ташкилотҳои байналмилалӣ ширкат кунанд.


Панҷшанбе, Июл 05 2018


Ахиран, баъди 25 сол баъди сари ифоқа ва виждон кашидани туҷҷори бозор, ки бе натиҷа анҷом мепазируфт, Ҳукумати ҶТ тасмим гирифт нархи 16 навъи маҳсулотро зери назорат бигирад.
Президенти ҶТ Эмомалӣ Раҳмон авохири моҳи май зери қароре имзои муборакашро гузошт ва Хадамоти зиддимонополии Тоҷикистон масъули иҷрои ин қарор қарор гирифт, ки минбаъд арзиши маводи хуроквории №1 таҳти назорати бевоситаи давлат қарор бигиранд. Тибқи ин қарор арзиши 16 навъи "маҳсулоти аз ҷиҳати иҷтимоӣ зарурӣ" таҳти танзими давлат қарор мегирад:
1. Орд (навъҳои 1 ва 2)
2. Нон (аз орди навъҳои 1 ва 2)
3. Маҳсулоти макаронӣ
4. Гандум
5. Биринҷ
6. Картошка
7. Сабзавот: сабзӣ, пиёз, карам
8. Қанди сафед, шакар
9. Равғани растанӣ: равғани пахта, офтобпараст ва маска
10. Маҳсулоти ширӣ: шир, кефир, қаймоқ, сметана, творог
11. Наск, нахуд, марҷумак, кашк, ярмаи ҷав
12. Гӯшт: гӯшти гов, гӯшти гусфанд, гӯшти мурғ
13. Тухми мурғ
14. Намак
15. Чой: навъи сабз ва сиёҳ
16. Ғизои кӯдаконa
Қарори мазкур танҳо рӯзи 4.07.2018 расонаӣ гардид.
Воқеан ҳам қарори бамавридест, зеро тавре дар хотир дорем, ҳамеша баландравии сунъии ин навъи маҳсулот мавриди накӯҳиши газетаи мардумии СССР қарор мегирифт. Шаҳрдори собиқи пойтахт-М. Убайдуллоев бо ин «паразитҳои бозор» (ибораи витсе-мири Душанбе) ҳар Рамазону Қурбон ҳарб мекард, вале бе натиҷа. Ҳамакнун бар боварем, ки лаҷоми ин беинсофон кашидаву болу пари ин «паразитҳо» буррида мешавад. Масъаларо пайгир мемонем. Мо Метавонем!

Панҷшанбе, Июл 05 2018


Ширкати "Чайна Нонферрос Голд Лимитед" (Сhina Nonferrous Gold Limited) эълон кард, ки баъди рафъи паёмади фалокатҳои табиӣ дар кони Покрути ноҳияи Ваҳдат 1.07.2018 расман ба тавлиди хиштҳои тиллоӣ оғоз кардааст. Истеҳсоли тилло дар Покрут с.2016 шурӯъ шуда, дар 1 сол аз ин кон 162 кг ба даст овардаанд. Ёдовар мешавем, ки феврали с.2017 тарма 3 хатти баландшиддати нерӯи барқи корхонаро вайрон кард ва нақбҳо пур аз об шуда, хатти коркарди маъдан ва тиллогудозӣ осеб диданд. Ин корхонаро июни с.2016 бо ҳузури Эмомалӣ Раҳмон-президенти Тоҷикистон ба истифода доданд ва дар он бештар аз 900 нафар кор мекунанд. Кони Покрут дар дараи Ромит ҷойгир аст ва ба ҳисоби геологҳои тоҷик тақрибан 134 тонна тилло дорад.

Панҷшанбе, Июн 21 2018

 

Ҳамватанони азиз шоҳид буданд, ки дар давоми моҳҳои охир бориши беисти борон сарбории онҳоеро, ки фаъолияташон ба нигоҳдории роҳ рабт дорад, дучанд намуда, аз онҳо тадбирандешиҳои фавриро тақозо намуд.  Гуфтан бамаврид аст, ки роҳи Душанбе-Чанок аз минтақаи релефаш душвори кӯҳистон гузашта, дар муқоиса бо дигар роҳҳои кишвар аз офатҳои табиӣ, аз ҷумла, тармафароӣ, лағжидани кӯҳпора, сангфароӣ ва омадани сел зиёдтар осебпазир аст. Ба шарофати чораандешии фаврии кормандони филиали ширкати саҳомии “Инновейтив Роуд Сорлюшнз ЛТД” пайомадҳои офати табиӣ бо истифода аз техникаҳои пуриқтидор ва механизмҳо сари вақт бартараф шуда,  ин омил замина фароҳам овард, ки ҳаракати воситаҳои нақлиёт умуман қатъ нагардад.
Хотиррасон менамоем, ки техникаву механизмҳои филиали Ширкат, ки теъдодашон 181 адад аст, дар ҳолати корӣ қарор доранд. Ба ғайр аз ин, хати доимоамалкунандаи филиали Ширкат бо шумораи 487011020 фаъол аст, ки тавассути он тамоми муроҷиатҳо қабул ва дар ин замина филфавр тадбирандешӣ  мешавад. Фаъолияти пурмаҳсули кормандони филиали ин Ширкат шароит фароҳам овардааст, ки хатарҳое, ки пештар ронандагону мусофирон бо он мувоҷеҳ буданд, бартараф шуда, тамоми сол аз роҳи автомобилгарди ба меъёрҳои байналмилалӣ ҷавобгӯ бархӯрдоранд. Корҳои ба таъмиру таҷдид рабтдошта дар раванди нигоҳдории роҳ падидаи маъмул ба ҳисоб рафта, хароҷоти зиёди маблағ ва сарфи неруи зеҳниву ҷисмонии кормандонро тақозо дорад. Новобаста аз ин, таъмиру таҷдид дар фаъолияти филиали «IRS» раванди муттасил буда, далели возеҳи масъулиятшиносии роҳбарият аст. Ҷоиз ба зикри  алоҳида аст, ки ин масъала зери назорати доимӣ ва ҷиддии роҳбарияти филиали Ширкат қарор дошта, дар сурати ба вуҷуд омадани вайроншавии кучактарин дар масири роҳ пайи рафъи он чораҳои бетаъхир андешида мешавад. Дар мавсими имсола доираи фаьолият хеле васеь гардида, тасмим гирифта шудааст, ки 117 км роҳ таъмири куллӣ шавад. Ашхоси огоҳ хуб медонанд, ки таьмири куллӣ аз таъмири ҷорӣ батамом фарқ дошта, аз лиҳози моҳият ва хароҷот аз бунёди роҳ кам нест.  Ҳоло дар минтақаҳои Варзоб ва Суғд таъмири куллии роҳ шурӯъ шудааст. Муҳимтар аз ҳама, барои таьмири роҳ мутахассисони ҳирфаӣ ва техникаву механизмҳои замонавӣ ҷалб шудаанд.
Ёдовар мешавем, ки 2 июни соли равон дар километри 138-уми роҳи Душанбе - Чанок, дар масофаи 35 метр роҳ фуру рафта, санаи 9 июн аз километри 332 то 335 сел канораҳои роҳро шуста буд. Аз лаҳзаҳои аввали рух додани ин ҳодиса кормандони филиали Ширкат пайи рафъи бетаъхири пайомадҳои он ҷаҳду талош намуда, тавонистанд собит намоянд, дар нигоҳдории роҳ собитқадаманд. Дар давоми 2 соат дар дили кӯҳ роҳ эъмор шудани роҳи муваққатӣ ва худи ҳамон рӯз барқарор шудани қитъаи мавриди назар шаҳодати масъулиятшиносӣ ва дорои имкониятҳои фарох будани филиали Ширкат аст. Ин дар ҳолест, ки бинобар фуруравии масоҳати на чандон зиёд дар дигар роҳҳои мамлакат ҳаракати воситаҳои нақлиёт чанд рӯз қатъ шуда буд. Ҳоло дар минтақаҳои Варзоб, Суғд ва Зарафшон 3 корхонаи истеҳсоли аслфалти марбут ба филиали Ширкат, ки иқтидори истеҳсолии ҳар кадомашон 70 тонна асфалт дар 1 соат аст, фаъолият доранд. 

Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон

Ҷумъа, Июн 08 2018


Президенти кишвар Эмомалӣ Раҳмон пеш аз фарорасии моҳи шарифи Рамазон ба соҳибкорону тоҷирон такроран хотиррасон намуд, ки дар моҳи Рамазон нарху навои маҳсулотро беасос баланд бардошта, ҳамватанонро ба азият гирифтор накунанд. Дар аксари кишварҳои исломӣ ва мусулмоннишин тоҷирон нархро, баръакс, дар ин моҳ арзон мекунанд, то ки бо ин роҳ низ соҳиби савоб шаванд. Аммо ҷои таассуф аст, ки соҳибкорону савдогарони мо моҳи шарифи Рамазонро на ҳамчун моҳи хайру саховат ва ибодату накӯкорӣ, балки ҳамчун моҳи даромад ва ҳарчӣ бо қимати болову бемисл фурӯхтани молҳои худ мешиносанду саъй мекунанд бо ҳар баҳона нархҳоро бардоранду даромади худро афзоянд.
Имрӯзҳо дар бозори «Ҳоҷӣ Шариф», ки яке аз бозорҳои яклӯхтфурӯшӣ дар вил.Хатлон ба ҳисоб меравад, нархи 1 кг помидор 8-12 сомонӣ, бодиринг 3-4 сомонӣ, сабзӣ-1,50-2 сомонӣ, картошка 2-2,50 сомонӣ, шакар 6,50 сомонӣ, себ 18-20 сомонӣ, нок 19-25 сомонӣ, гӯшти гов 36-40 сомонӣ, 1 кг гӯшти гӯсфанд 42-45 сомонӣ, 1 халта орд 143-145 сомонӣ, қулфинай 8-12 сомонӣ, тут-5 сомонӣ, 1 бандча кабудӣ 1 сомонист. Масъулону нозирони бозори мазкур мегӯянд, сабаби болоравии нархҳо дар бозор гуногунанд. Сабаби асосӣ ин афзудани содироти маҳсулоти кишоварзӣ ба хориҷи мамлакат буда, худи деҳқонон низ маҳсулотро нисбат ба ҳамин давраи соли гузашта қиматтар мефурӯшанд. Деҳқонони асил баланд шудани нархи маҳсулоти кишоварзиро дар гарон шудани сӯзишвории дизелӣ ё солярка мебинанд. Ин дар ҳолест, ки Хадамоти зиддиинҳисории ҷумҳурӣ то ҳол аз ӯҳдаи танзими нархи сӯзишворӣ дар ҶТ набаромада истодааст. Нарху навои ҳамин маҳсулот дар бозорҳои Кӯшониёну Леваканд бошад 10% гаронтар ба назар мерасад.

Баҳодур Уроқов, СССР, вилояти Хатлон


Дар ҳамин маврид
1000 моли калони шохдор барои таъминоти пойтахт бо гӯшт
Таъминоти бозорҳои пойтахтро бо гӯшти чорво дар моҳи мубораки Рамазон 1 нафар аз соҳибкорони шинохтаи мамлакат-Умар Алиматов бар зима гирифтааст. Алиматов, роҳбари ширкати шинохтаи «Алибобо ва 40 роҳзан» буда, соли 3-юм аст, ки ин амали некро анҷом медиҳад. Соли гузашта мавсуф беш аз 300 сар чорвои калони шохдорро харида, бо нархи тавсияшуда ба сокинони пойтахт пешниҳод намуда буд. Имсол бошад ӯ азм кардааст, ки 1000 моли калони шохдорро харидорӣ намуда, то ба итмом расидани ин моҳи муборак бо нархи арзон тавассути фурӯш дар бозорҳои коммуналӣ ва марказҳои калони савдо бо нархи ягонаи барои фурӯш пешниҳодшуда ба сокинон ва меҳмонони ш.Душанбе пешниҳод кунад. Ин аст, ки ҳар шом то 33 гови калон забҳ шуда, ҳамарӯза 5,5-6 тонна гӯшти тоза ба бозорҳо ворид карда мешаванд.
Алиматовро субҳи рӯзи якшанбеи 27.05.2018 дар бозори «Саховат»-и пойтахт дидем. Эшон пас аз воридоти гӯшт шахсан ба ин ҷо омада, нарху наво ва хариду фурӯшро назорат менамуд. Вақте дар бораи ин азму амалаш пурсидем, таъкид дошт, ки ин кори хайрро дар пайи дастуру супоришҳои роҳбарияти олии мамлакат, президенти кишвар Эмомалӣ Раҳмон ва раиси ш.Душанбе Рустами Эмомалӣ анҷом дода истодааст. Соҳибкор иброз намуд, ки барояш суду зиёни ин амали хайрхоҳона ва некаш муҳим нест, муҳим он аст, ки тавонад дастархони сокинони пойтахтро бо гӯшти хушсифату арзон таъмин намуда, бо ин роҳ нархи гӯштро коҳиш дода, нагузорад, ки он аз нархи тавсияшуда боло равад.
Воқеан ҳам, ҳамин аст, ки нархи 1 кг гӯшти гов айни замон дар бозорҳои пойтахт аз 36 сомонӣ боло нарафта, тайи 2 ҳафтаи аввали моҳи шарифи Рамазон ин нарх нигоҳ дошта шуда истодааст. Вагарна бо назардошти камбориш омадани зимистону баҳори имсола ва нарӯидани сабзаву алаф барои хӯроки чорво, ки боиси коҳиш ёфтани шумораи чорво дар мамлакат гаштааст, шояд нархи 1 кг гӯшти гов ҳоло дар бозорҳои кишвар то ба 50 сомонӣ мебаромад. Кош, сафи чунин ҷавонмардони Тоҷик бештар гардад! Офарин!!!

Ҷамила Ҳусейнова, СССР

саҳ 7 аз 34

Китобҳо

Flag Counter