Ғозибеки Авазиён, омӯзгори фанни забони русии мактаби №9-и ноҳияи Кӯҳистони Мастчоҳ, сокини деҳаи Худгифи Боло (тел: 92 811 85 97) дар меҳмонии СССР гуфт, ки ҳукумати ноҳия ба маъюбону беморон аслан таваҷҷӯҳ намекунад. Ман 4 сол боз ба бемории фишори чашм гирифторам, чандин бор ба сардухтури ноҳия муроҷиат кардам, ҳич таваҷҷӯҳ надорад, ки ман кистам. Мо дар масоҳати 500 км то Душанбе зиндагӣ мекунем, барои омадан ба ш.Душанбе шӯъбаи Ҳифзи иҷтимоии ноҳия барои роҳкиро ҳич кӯмак намекунад. Болои ин қадар мушкил маоши моҳи январи соли 2016-ро нагирифтаам. Ба раиси ноҳия хаттӣ навиштам, ки маоши моҳи январро диҳад, аммо ҳал накард. Писарам-Мубориз ба бемории қалб гирифтор асту ба ӯ саривақт кӯмаки моддӣ намекунанд. Агар муроҷиат кунем, рӯ турш карда мегӯянд, ки «мо аз шумо қарздор нестем-ку!». Ба шуъбаи маориф барои ёрӣ муроҷиат кардам, раиси иттифоқи касаба гуфт: «Шумо рафта чашматонро ҷарроҳӣ карда оед, баъд кумак мекунем». Соли гузашта нафақаи 6-моҳаи писарамро буриданд ва 780 сомонӣ пулашро надоданд, ҳол он ки ӯ маъюби модарзодист.
Майори Қӯшунҳои сарҳадии КДАМ, ҳоло дар нафақа, Абдушафеъ Тоҷов, аз ноҳияи Ш.Шоҳин (Шӯробод) меҳмони СССР шуд ва гуфт, ки 2 ҳафта пеш бо дасти сафири ФР дар Тоҷикистон ба президенти Русия-В.Путин нома фиристодам. Мӯҳтавои нома ин аст, ки чаро ТВҳои Русия, минҷумла, «Звезда», дар робита ба ҳамлаи хунин ба погранзаставаи 12, воқеъ дар Сариғори Шӯрообод навор ва гапҳои дурӯғу бофтаро намоиш медиҳанд ва худро қаҳрамони набард медонанд? Ҳоло он ки 23 сол пеш (13.07.1993) марзбонони алкашу масти ин дидбонгоҳ ҳушёр мебуданд ягон қурбонӣ намешуд. Ин аниқ аст!!! Зеро ҳамлагарон (бо роҳбарии Мулло Абдураҳим) низ пайт ҷуста, маҳз ба ҳамин дидбонгоҳ шабохун заданд. Ба ҳамаи аскару афсари руси кушташуда ва захмӣ баъди чанд рӯзи воқеа бо фармони вежаи президенти вақти ФР, Б.Елсин унвони Қаҳрамони Русияро доданд, дар мо бошад ҳеҷ чиз. Алами ман чист? Дар лаҳзаи ҳамла тамоми мардуми Сариғор ба кӯмаки марзбонон хестанд ва то вопасин қатраи хун зидди душман муқовимат карданд. Аммо чаро ТВҳои Путин номардона ҳақиқатро намегӯянд? Ақаллан ба ҷурми худ-алкашӣ ва беҳушӣ қоил намешаванд!!! Хуллас, номаро фиристодам, аммо номаълум, ки Путин хонда бошад, ё на…
Мерихол Қараева, сокини деҳаи «Партсъезд-18»-и ноҳияи Хуросон (тел: 915 26 72 90) меҳмони СССР шуд ва бо гиря гуфт, ки духтари ман-Ҳалимаро дар хонаи шавҳараш-Тағоймурод, дар деҳаи Боҳтурободи н.Сарбанд болояш бензин рехта оташ задаанд. 2 бор духтарам шавҳар карда бошад ҳам, бахт ба рӯяш нахандид.
Журналисти шинохта Садбарг Боқиева (тел: 901 708 901) меҳмони газетаи мардумии СССР шуд ва ғайриинтизор барои тафреҳи кормандони СССР 3-4 рубоии халқиро бо оҳанг зам-зама кард.
Хонум Робиаи Ҳиммат-сарояндаи эстрада ва маъруф бо номи «RABI RAM» меҳмони СССР шуд. Ӯ барои 10 рӯз аз Дубай ба Тоҷикистон омадааст, зеро ҳанӯз 7 сол пеш аз Эрон ба Тоҷикистон омада 5 соли умрашро дар кишвари мо паси сар карда, аз инҷо ба Аморати Муттаҳидаи Араб кӯч бастааст.
Шукрулло Маҳмадалиев, хонандаи синфи 10 аз н.Восеъ меҳмони СССР шуд ва гуфт, ки 4 рӯз боз дар бозори Шоҳмансури пойтахт бо мақсади формаи мактабӣ харидан ароба мекашам. Аробакашӣ воқеан мушкил.
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
