Дар толори МИҲД-и шаҳри Бохтари вилояти Хатлон маҷлиси васеъи ҳукумати шаҳр баргузор гардид. Дар маҷлис, дар мувофиқа бо Президенти ҶТ 2 муовини раиси шаҳри Бохтар Шоиста Абдуназарзода ва Исмоил Сайфиддинов аз вазифа барканор карда шуданд. Масъулини ҳукумати шаҳр расман ба хабарнигори СССР дар вилояти Хатлон ин хабарро тасдиқ карданд. Сабаби барканории онҳоро ҳукумати шаҳр шарҳ надоданд.
Баҳодур Уроқов
Ҳамватанони азиз!
Дар мамлакати мо манбаи асосии истеҳсоли нерӯи барқ оби дарёҳо ба ҳисоб рафта, ҳамасола ҳаҷми истеҳсоли он аз рӯи захираҳои об дар аввали сол ба нақша гирифта мешавад. Ин дар ҳоле, ки захира кардани об дар обанборҳо дар фасли баҳор оғоз гардида, дар фасли тобистон ба анҷом мерасад. Маҷрои оби дарёҳо ва вобаста ба он захира намудани об дар обанборҳо ба тағйирёбии иқлим, шароити обу ҳаво ва омилҳои дигари табиӣ алоқамандии бевосита дошта, пешгӯии ҳолат ва сатҳи оби дарёҳо хеле душвор мебошад.
Тавре ки қаблан ба шумо иттилоъ дода будем, маҳз бо таъсири омилҳои зикршуда, яъне камшавии захираҳои об дар ҳавзаи ташаккулёбии дарёи Вахш дар соли сипаришуда ба нақшаи таъмини соҳаҳои иқтисодӣ ва иҷтимоии мамлакат бо нерӯи барқ мушкилоти зиёд овард. Вобаста ба ин, ҳанӯз 28 июли соли 2020 Ҳукумати Ҷумҳурии Тоҷикистон дар “Муроҷиатнома ба мардуми Тоҷикистон” сокинони мамлакатро ба яке аз роҳҳои асосии ҳалли мушкилоти баамаломада - сарфакории нерӯи барқ даъват намуд.
Дар баробари ин, аз тарафи Ҳукумати Ҷумҳурии Тоҷикистон ва Ширкати “Барқи Тоҷик” низ ҷиҳати қонеъ гардонидани талаботи аҳолӣ ва иқтисодиёти миллӣ ба барқ як қатор чораҳои таъҷилӣ андешида шуданд. Аввалан, пеш аз муҳлатҳои дар шартномаҳои байнидавлатӣ зикршуда интиқоли нерӯи барқ ба кишварҳои ҳамсоя қатъ карда шуд.
Бо сабаби сардиҳои шадиди оғози фасли зимистон ва тӯлонӣ пешбинӣ шудани сардиҳои имсола, хавфи нарасидани захираи об то охири зимистон дар обанбори нерӯгоҳи барқи обии “Норак” пеш омадааст. Ҳоло сатҳи обанбори нерӯгоҳи барқи обии “Норак” дар муқоиса бо ҳамин давраи соли гузашта чор метр паст аст.
Дар Тоҷикистон дар солҳои соҳибистиқлолӣ иқтидорҳои нави энергетикӣ бунёд ва як силсила нерӯгоҳҳои мавҷуда таҷдиду навсозӣ карда шуданд. Вале захираи об дар кишвари мо то ҳанӯз фақат ҳамин обанбори нерӯгоҳи барқи обии “Норак” мебошад. Илова бар ин, Маркази барқу гармидиҳии дуюми шаҳри Душанбе, ки он бо муваффақият фаъолият дорад ва ду агрегати нерӯгоҳи “Роғун” муназзам кор карда истодаанд. Вале дар баробари ин талабот ба барқ дар мамлакат сол то сол меафзояд.
Ҳамватанони муҳтарам!
Ҳоло вазъият ҷиддист ва эҳтимоли то баҳор нарасидани захираҳои об ба миён омадааст. Аз ин рӯ, лозим меояд, ки чанд муддат дар кишвар - дар он мавзеъҳое, ки биноҳои баландошёна мавҷуд нестанд ва имкони истифодаи дигар манбаъҳои гармӣ мавҷуд аст, интиқоли барқ маҳдуд карда шавад. Маҳдудият аз рӯзи 5 январи соли 2021 асосан шабона ҷорӣ гардида, аз соати 23-00 шаб то соати 06-00 субҳ идома меёбад. Мо бовар дорем, ки ҳамватанони гиромӣ моро дуруст мефаҳманд, ки ин тадбир аз рӯи зарурат мебошад. Мақсад аз он пешгирӣ намудан аз пурра сарф шудани захираҳои об буда, дар сурати гарм омадани моҳҳои минбаъдаи зимистон, зиёд гардидани сатҳи об дар маҷрои дарёи Вахш ва захираи оби обанбори “Норак” имкони бекор кардани маҳдудият ба назар гирифта шудааст.
Ҳамватанони азиз!
Ширкати “Барқи Тоҷик” ҳеҷ гоҳ хоҳишманди маҳдуд кардани интиқоли барқ ва бебарқ гузоштани мардум нест. Вале имрӯз вазъият ҳаминро тақозо менамояд.
Аз ҳамаи муштариён хоҳиш менамоем, ки дар ин вазъият низ дар ҷои кор ва дар манзилҳои истиқоматии худ аз барқ сарфакорона истифода баранд ва дар бобати таъмини бештари кишвар бо нерӯи барқ саҳми худро гузоранд.
Ширкати “Барқи Тоҷик”
Ҳокими Сафар, мухлис ва муаллифи доимии газета аз н.Файзобод занг зада (тел: 93 707 38 67), аз хизматрасонии ширкати Тселл шикоят намуд.
- Ширкати Тселл бо маънои томаш пулхӯраки мардум шудааст. Моҳи октябр ба телефони мобилиам, ки рақамаш 937073867 мебошад 20 сомонӣ пардохт кардам, аз байн 2 рӯз нагузашта, аз ширкат занг зада, иброз намуданд; лутфан пешпардохт намоед! Аҷабо, гуфтам, наход дар 1 шабонарӯз 20-сомонии пешпардохтам тамом шуда бошад? 3 декабри соли 2020 ба ҳамин ширкат 10-сомонӣ пешпардохт намудам, ба телефонам 8 сомонӣ гузаштаасту 2 сомонии дигараш ғайб зад. Оё ҳастанд назоратчиёне, ки ин ширкатро назорат кунанд?
Бо даъвати садорати факултети журналистикаи ДМТ Саъдӣ Маҳдӣ мо аҳли кормандони редаксияи СССР барои вохӯрӣ ба ДМТ раҳсипор гардидем. Ҳадаф аз даъвати мо сӯҳбат бо журналистони ояндаи кишвар, яъне донишҷӯёни факултети журналистика буд. Ҳангоми даромад ба шаҳраки донишҷӯён мо, ки ҳама дар мошини устод Сайёфи МИзроб нишаста будем, бо 1 мушкилии ҷиддӣ рӯ ба рӯ шудем ва он, танбашавии аз ҳад беши нақлиёт дар назди ДМТ аст!
Посбонҳои даромадгоҳи асосии шаҳраки донишҷӯён маъруф ба номи “Ҷазира” танҳо иҷозати дохил шудани мошинҳои кормандони худи муассисаи олиро медоданду мошинҳои дигар ҳаққи вуруд ба дохили шаҳраки донишҷӯёнро надоштанд. Ва мошини моро низ, ки тибқи маъмул барои посбонон бегона буд, дар оғоз гузаштан намонданд. Баъди оне, ки мо ба посбонҳо гуфтем, ки аз газетаи СССР барои вохурӣ бо донишҷӯён омадаем, онҳо рақамҳои автомобили моро ба қайд гирифтаву барои дохил шудан роҳнамоӣ карданд. Пештар аз мо мошине истода, барои ҳаракати дигар мошинҳо монеа эҷод мекард. Маълум буд, ки ин кадом як “нелегал”-и дигар асту мехоҳад дарояд, аммо намегузоранд.
Таксӣ ва донишҷӯёни танбал
Баъди сӯҳбат ҳангоми бозгашт боз бо ҳамон тамбашавии нақлиёт, хосса таксиҳо дучор гаштем. Сабабгори тамбашавӣ таксиҳо буданд! Таксиҳои 5 сомонаву мошинҳои дигар ширкатҳои мусофиркаш ба монанди “33-33”, “70-00”, “16-16”, “11-11,” “888”. Анбӯҳи мошинҳои таксӣ аз он дарак медод, ки имрӯз донишҷӯёни мо танбалу серпул шудаанду 1 қадам бе таксӣ намегузоранд. Посбонҳо бошад ҳар рӯз бо ронандагон даст ба гиребонанд, ки дар ин ҷойҳо наистанд ва рафта мусофиронашонро дуртар аз даромадгоҳи шаҳраки донишҷӯён интизор бошанд. Дар ин бобат ронандае гуфт, ки мо танҳо хоҳиши муштариро иҷро мекунем ва ба хотири оне, ки дар охири соатҳои кориву дарсӣ, муштарӣ инҷо зиёд аст, мо дар ин даромадгоҳ меистем.
Масҷиди нав мушкилро зиёд мекунад?
Ҳафтаи гузашта яке аз хонандагони ҳафтанома аз тамбашавии нақлиёт дар ҳамин минтақа, аниқтараш дар назди масҷиди нав, ки ба наздикӣ нияти кушодашавиашро доранд, гуфта буд ва мушкилии инро дар набудани чароғак медонист. Дар 1 роҳи кӯтоҳ 2 проблемаи нақлиётӣ ва он ҳам бошад дар ҳолест, ки ҳоло на масҷид фаъолият дораду на он бузургтарин варзишгоҳе, ки дар дохили шаҳраки донишҷӯён сохта истодаанд.
Масҷид ку кайҳост омода шуда ва ин вабо, ки пушти сар гашт ҳатман боз мегардад. Бо камтарин ҳисоб ҳар рӯз зиёда аз 1000 автомобил танҳо дар назди масҷид таваққуф хоҳад кард. Ва агар масъулин то он вақт дар ин роҳ чароғак нагузоранд, проблема болои проблема мешавад. Сохтмони бузургтарин варзишгоҳ ҳам ба зудӣ анҷом меёбаду, ана баъд анбӯхӣ одамону мошинҳоро хоҳем дид дар ин минтақа. Мо пайгирӣ мавзӯ ҳастем.
Шералӣ Давлатов, СССР
Сокинони шаҳри Бохтар-маркази маъмурии вилояти Хатлон аз афзоиши бесобиқаи нақлиёти сабукрав ва тамбашавӣ дар роҳу ҷодаҳо амиқан нигаронанд. Мушкил ба ҳаддест, ки ҳатто 1 майдончаи кӯдаконаи биноҳои баландошёнаро ба таваққуфгоҳ (стоянка) табдил додаанд.
Карим Давлатов, собиқ раиси маҳалла, дар бинои истиқоматии №22, воқеъ дар кӯч.Ҷ. Мирзоқодироваи ш.Бохтар истиқомат дорад. Ӯ дар сӯҳбати хос бо мухбири СССР гуфт, атфолу наврасони ин бино аз бозиву тамрин комилан маҳрум шудаанд. Ба қавли ӯ: «Соҳибкорони бозори «Фаровон» майдончаи варзишии кӯдаконаро бо мошинҳояшон аз субҳ то шом банд кардаанд. Худсарӣ ва нописандии ронанда-тоҷирони ин бозор боис ба он гардидааст, ки кӯдакону атфоли мардум бозиву вақтхушии худро дар роҳи мошингузари кӯчаҳои Норинов ва Мирзоқодиров мегузаронанд-дар роҳе, ки ронандаҳои таксӣ бо суръати баланд мошинро меронанд. Пас чӣ хел дар ҳарос набошем, ки имрӯз ё фардо фарзанди касе зери чархи мошин намонад???».
Ҳамсуҳбати мо бо афсурдаҳолӣ меафзояд, ки «қаблан яке аз соҳибкорон пеш аз сохтмони баландошёнае ваъда дода буд, ки барои кӯдакону наврасон 1 майдончаи тафреҳиро сохта ба истифода медиҳад. Мутаассифона, қавли бизнесмен то гузашти хар аз лояш будааст! Мо дигар маҷбур байни роҳ ва майдончаҳо девори бетонӣ бардоштем. Соҳибкор бар зами ваъдахилофиаш девори бетониро канда партофт. Барои ҳалли ин мушкил борҳо шифоҳиву хаттӣ ба масъулини ҳукумати шаҳр муроҷиат кардем, аммо чораву натиҷае нест…».
Зимни сӯҳбат ронандаҳои «саросема», ки дар ин нуқтаи пуродам бо суръати хеле баланд мошинро меронанд, бо ҳавобаландӣ мегӯянд: «Ака, ма саросемаюм, чихели форам мерам…».
Карим Давлатов мегӯяд, мо ҳар рӯз дар ташвишу изтиробем ва ҳатто вақте кӯдаконро барои сайругашт мебарорем, паҳлӯяшон меистем, ки «мошине ӯро пахш накунаду дар балои ронандаҳо намонем!» Воқеан, имрӯз баракс шудааст: Мошин кӯдакро мезанаду волидайнаш гунаҳкор!!!
Баҳодур Уроқов,
СССР, вил. Хатлон
Ҳамасола рӯзи 3 декабр дар ҷаҳон Рӯзи байналмилалии маъюбон таҷлил карда мешавад. Ин қишр ҳамчун узви ҷудонашавандаи ҷомеа саъю талош доранд, ки аз ҷомеа дур набошанд ва саҳми худро дар пешрафти Ватани худ гузоранд. Пеш аз ҳама барои дуруст қабул кардани шахсони маъюбият дошта диди муосир даркор асту бас.
04.12.2020. Соат ба вақти Душанбе 13:26 дақиқа. Меҳмонхонаи “Хилтон Душанбе”. Бахшида ба ин рӯзи ҷаҳонӣ Иттиҳодияи миллии маъюбони Тоҷикистон бо шарикони хеш мизи гирд ташкил намуд, ки он ба фаъолияти иттиҳодия дар соли 2020, мушкилоти ин қишри ҷомеа дар вақти пандемия ва имкониятҳои густарда барои фаъолияти минбаъда баррасӣ гаштанд. Инчунин, зимни ин ҳамоиш филми махсус бахшида ба ҳаёти шахсони дорои маъюбӣ дар ҶТ намоиш дода шуд, ки ҳар қисмати он зиндагии 1 нафарест.
Асадулло Зикрихудоев, раҳбари Иттиҳодияи миллии маъюбони Тоҷикистон зимни суханронии худ гуфт, ки соли сипарӣ гашта барои иттиҳодия ва аъзои он низ осонӣ надошт, вале бо кӯмаки шарикон, аз он ҷумла созмони “Интернюс” онҳо тавонистанд 1 барномаи вежаро ба нафъи маъюбони кишвар пиёда намоянд:
-Мақсад аз амалӣ кардани ин лоиҳа ин боз 1 бори дигар таъкид намудан бар он аст, ки шахсони маъюбиятдошта низ метавонанд дар корҳои худ муваффақ бошанду дар ҷомеа сазовори мавқеи хосса. Моҳи апрел дар якҷоягӣ бо кормандон ин гурӯҳро ташкил карда, пардохтем барои наворгирии филмҳои кӯтоҳ дар бораи шахсони маъюбиятдошта. Веб-силсилаҳо ҳаёти шахсони маъюбиятдоштаро дар ҳаёти муқаррарӣ инъикос мекунанд ва мақсад аз ин веб-силсилаҳо боло бардоштани масъалаҳои муҳити дастрас барои шахсони дорои маъюбият дошта мебошад. Ҳар 1 филми кӯтоҳмуддат қиссаи зиндагии 1 нафаре аз мост, ки дар бари мост ва узви ҷомеаи мост!
108 сомонӣ ба 1 моҳ мерасад?
Вақте мо дар мавриди нафақаи ин ашхос пурсон шудем, ҳуқуқшиноси иттиҳодия Зарринабону афзуд, ки нафақапулии гурӯҳии маъюбон мувофиқи қонунгузории кишвар ба чанд қисм ҷудо карда шудааст. Аз ҳама нафақаи баланд ин нафақаи замимавист, ки аз моҳи октябри соли равон бо фармони Президент ҶТ то ба 270 сомонӣ боло бурда шуд. Аммо нафақаи аз ин дида паст ҳам ҳаст-108 сомонӣ, ки ҳатто ба 1 рӯз харҷи маъюбон кофӣ нест...
Имтиёзҳо
Шахсони дорои маъюбият дошта дар баробари ин аз 1 қатор имтиёзҳо бархӯрдоранд. Шахси маъюбият дошта метавонад бе маблағи пешпардохт вориди нақлиёти ҷамъиятӣ гардад, аз пардохти андоз, барои истифода бурдани телефони хонагӣ озод буда, барои дохил шудан ба мактабҳои олӣ имконияти бештар дорад. Ҳамчунин барои ин тоифа ёрии тиббӣ ройгон буда, гирифтани роҳхат ба осоишгоҳу истироҳатгоҳҳо, аз он ҷумла “Хоҷа оби гарм”, “Оби гарм”, “Шоҳамбарӣ” бенавбат дода мешавад.
Дилсӯзӣ накунед!
Раъно Додоҷонова, яке аз масъулони Иттиҳодияи миллии маъюбони Тоҷикистон мегӯяд, агар хоҳед, ки ба маъюбон кӯмак кунед, пас дилсӯзӣ накунед. Зеро дилсӯзӣ кардан ба шахсони маъюб бар зарари онҳост ва пеш аз оне, ки ба шахси маъюб пул дароз мекунед беҳтараш пурсед, ки чӣ мехоҳад:
-Соли 2016 ман тавассути сафорати Амрико барои бозомӯзӣ ва табодули таҷриба ба ИМА фиристода шудам. Дар ин муддат оид масъалаҳои чӣ тавр баланд бардоштани зиндагии шахсони маъюбият дошта мавзӯъҳои гуногунро мегузаштем. Пас аз сафар тасаввурот ва ақидаҳои ман нисбати шахсони маъюб дигаргун шуданд. Ман дарк кардам, ки дилсӯзии мо ба ин гуна шахсон хатосту ба ҷойи нерӯ додан, баръакс дар онҳо ақидаи 1 фарди нодаркор барои ҷомеаро бедор месозад. Пеш аз оне, ки хоҳӣ дарди дилу захми бадани инсонро фаҳмӣ бояд кафшҳои ӯро пӯшида роҳҳои тай кардаи ӯро худ пойи пиёда бо кафшҳои даридаи ӯ тай кунӣ.
Омиронаи Сайёф, СССР
Дар ҳамин маврид: Корхонаи “Қориён”аз байн рафт
Солҳои пеш дар ш.Кӯлоб корхонаи махсуси “Қориён” фаъолият дошт, ки он барои шахсони нобино ташкил карда шуда, маҳз ин тоифа дар ин корхона кор карда, маош ҳам мегирифтанд. Аммо бо гузашти замон нафаре бо номи Ғаффор Идиев, собиқ раиси “Ориёнбонк”, маъруфтар бо номи Ғаффор-бонкбизнес, ки бисёриҳоро фиреб дода, ҳоло дар қайди ҳайт нест, ин корхонаро бо фиреб харидорӣ кардаву баст. Имрӯз на нобиноён ва на шахсони маъюбият дошта на мактаби махсус доранду на корхона...Додари ин Ғаффори нобинофиреб-Идиев Ҳусайн Сафаралиевич, ҳоло Раиси Раёсати Иттифоқи Тоҷикматлубот аст. Шояд ӯ қарзи бародарашро дар назди нобиноҳо канда, ба ишон корхонаашонро бармегардонад? Зеро рӯзи қиёмат наздик аст ва агар ин кас эмони бародарӣ доранд, бояд ин корро кунанд. Вагарна войу дареғу доди бародариву вазириву пулдориву сарватмандӣ....
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
