Сохтмони Манораи муназзамӣ, ки дар асоси татбиқи Лоиҳаи грантӣ ва Созишномаи байни Ҳукумати ҶТ ва Ҳукумати Ҷумҳурии Фаронса марти с.2018 дар фурудгоҳи пойтахт барои КВД «Тоҷикаэронавигатсия» оғоз гашта буд, ба охир расида, рӯзҳои наздик маросими ифтитоҳи расмии он баргузор хоҳад гашт. Бояд гуфт, бунёди Манораи муназзамӣ, ки дар таърихи истиқлолияти кишвар иншооти беҳамтост, тӯҳфаи арзандест ба Рӯзи Ваҳдати миллӣ ва 30-солагии Истиқлолияти давлатии ҶТ. Лоиҳаи иншоотро ҷониби Фаронса бо назардошти таклифу пешниҳоди мутахассисони КВД “Тоҷикаэронавигатсия” тарҳрезӣ намуда, ба меъёрҳои сохтмонии ҶТ ва ҷаҳон мутобиқ гардонида, аз ҷониби мақомоти дахлдори тарафайн мувофиқа карда шуда, аз экспертизаи давлатӣ низ гузаронидааст. Дар ин замина Лоиҳаи Созишномаи байнидавлатӣ таҳия гардида, дар байни вазорату сохторҳои 2 ҷониб мувофиқа шуд ва то қадри имкон такмил ёфта, ниҳоят 13.07.2015 аз тарафи намояндагони расмии Ҳукуматҳои Тоҷикистон ва Фаронса дар шахси Вазири нақлиёти ҶТ ва Сафири Ҷумҳурии Фаронса дар Тоҷикистон ба тасвиб расид. Аввали ноябри с.2017 аз ҷониби ширкати франсавии «MARC MEUNIER” (МАРК МЁНЕ) оғози корҳои сохтмонии Манораи муназзимӣ ба роҳ монда шуд.
Зимни сафари расмӣ ба ҷумҳуриамон Котиби давлатии Вазорати Аврупо ва корҳои хориҷии Ҷумҳурии Фаронса Жан-Батист Лемуан 18.04.2019 ба КВД “Тоҷикаэронавигатся” ташриф овард. Ба ҳайати расмии Ҷумҳурии Фаронса ҳамчунин сафири Ҷумҳурии Фаронса дар ҶТ хонум Ясмин Гуедар ва 1 қатор меҳмонони олиқадр аз вазорату корхонаҳои мухталифи ин кишвар шомил буданд. Дар мулоқоти мазкур ҷониби Тоҷикистонро, ба ҷуз директори генералии КВД «Тоҷикаэронавигатсия» Ашуров Лоиқ, директори Агентии авиатсияи гражданӣ ҶТ Субҳонзода Икром ва муовини вазири корҳои хориҷии кишвар Ҳусейнзода Музаффар Маҳмурод намояндагӣ намуданд. Ҷонибҳо зимни мулоқот масоили марбут ба дӯстии дуҷонибаи кишварҳо ва тақвияти ҳамкориҳо дар самти рушди соҳаи авиатсияи гражданӣ ибрози назар карда, баъдан меҳмонон аз рафти корҳои сохтмонии Манораи муназимӣ дар фурудгоҳи байналмилалии Душанбе шинос шуда, ба кори анҷомдодаи пудратчии генералии сохтмон ширкати фаронсавии “Марк Мёне” баҳои баланд доданд. Инчунин, КВД “Тоҷикаэронавигатсия” дар с.2018 ҷиҳати амалишавии парвозҳои ҳавопаймоҳо тавассути фазои Ҷумҳурии Тоҷикистон 11 долонҳои ҳавоии нави транзитиро ташкил ва ба истифода дода, чуноне дар Маҷмӯи иттилоотии аэронавигатсионӣ (AIP) низ омадааст, ин амал ба маротиб парвозҳоро афзуд. Аз шумораи умумии хизматрасонӣ 4686 парвоз транзитӣ буда, нисбат ба с.2017 47,5% зиёд аст. Ин нишондиҳанда возеҳ баён менамояд, ки шароити мусоиди лозима барои афзоиши парвозҳои транзитӣ муҳайё карда шуда истодааст.
Ҳамзамон, дар соли 2018 КВД «Тоҷикаэронавигатсия» модернизатсияи низоми радиостансияҳои оварандаи навъи АРМ-150 МА, насб ва ба истифода супоридани радиоминои масофасанҷи ДМЕ/ДМЕ-таҷҳизоти аэронавигатсионии муосирро дар фурудгоҳҳои байналмилалии Душанбе, Хуҷанд, Бохтар ва Кӯлоб, ш.Истаравшан ва н.Данғара пурра ба анҷом расонид. Дар с.2018 аз ҷониби КВД “Тоҷикаэронавигатсия” ба 51574 адад ҳавопаймо хизмат расонида шудааст, ки нисбат ба с.2017 4,6% ё 2278 адад зиёд аст.
Ҷамилаи Мақсуд, СССР
27.05.2019 дар толори маҷлисгоҳи Раёсати БДА ҶТ “Амонатбонк”, раиси Раёсат Икромӣ С.С. бо Директори генералии Низоми миллии кортҳои пардохтии (НМКП) «Мир» Владимир Комлев вохӯрӣ анҷом доданд. Бояд қайд намуд, ки дар вохӯрӣ бо намояндагони Низоми миллии кортҳои пардохтии (НМКП) «Мир» ва БДА ҶТ «Амонатбонк» оператори низоми пардохти миллии "Корти миллӣ", ҳамоҳангсозии тарафайн ва шартномаи ҳамкорӣ дар самти пардохтҳо сурат гирифт, ки мақсад аз имзои Созишнома таҳкими равобити байнидавлатии Ҷумҳурии Тоҷикистон ва Федерасияи Руссия ҷиҳати муомилоти ғайринақдӣ бо кортҳои “Корти миллӣ” бо асъорҳои миллии ду кишвар, мусоидат хоҳад кард. Қобили зикр аст, ки (НМКП) «Мир» миёни давлатҳои ИДМ нақши муҳим дорад.
Раиси Раёсати БДА ҶТ “Амонатбонк” Икромӣ С.С. низ зимни сӯҳбат таъкид намуданд, ки ҳамкориҳо дар масоили иқтисодиву иҷтимоӣ бо Низоми миллии кортҳои пардохтии (НМКП) «Мир» барои Тоҷикистон муҳим буда, имзои Созишномаи ҳамкориро дар самти муомилоти ғайринақдӣ ва дастгирӣ намудани шаҳрвандони ҳарду кишвар барои бемамоният анҷом додани амалиётҳои пулӣ бо кортҳояшон дар ҳудуди давлатҳои ҳамсоя, хело осон ва қулай мегардонад. Директори генералии (НМКП) «Мир» Владимир Комлев иброз дошт, ки Низоми миллии кортҳои пардохтии (НМКП) «Мир» дорои имкониятҳои технологияҳои пешрафта мебошад, ки пас аз имзои Созишнамаи ҳамкорӣ шарикони мо аз давлатҳои дӯст, дар баробари имкониятҳои муосири истифодаи амалиётҳои кортӣ, инчунин мавқеи худро миёни дигар давлатҳои шарики (НМКП) «Мир» ҳифз менамоянд. Дар хотима ҷонибҳо аз вохӯрӣ, изҳори қаноатмандӣ намуда, танҳо хостори ҳарчи зудтар дар амал татбиқ намудани ҳамкориҳоро дар ҳамаи самтҳои афзалиятноки соҳа, зарур донистанд.
Маркази матбуоти БДА ҶТ «Амонатбонк»
Чархаи 2-юми НБО «Роғун» ба таври санҷишӣ ба кор оғоз кардааст. Чуноне ки сомонаи хабарии «Азия плюс» менависад, феълан он нерӯи барқ истеҳсол нахоҳад кард. То ба ҳол санаи дақиқи расман фаъол шудани чархаи 2-юми НБО «Роғун» ва истеҳсоли барқи он маълум нест.
Бояд гуфт, ки ду чархаи НБО «Роғун» ба таври муваққат насб карда шуда, мувофиқи нақша қарор аст то соли 2021 барқ истеҳсол намояд. Чархаи 1-уми ин нерӯгоҳ 16.11.2018 ба истифода дода шуда буд. НБО «Роғун» 6 чарха хоҳад дошт ва дар сурати пурра ба кор даромаданаш ҳамасола то 17 миллиард киловатт-соат барқ тавлид хоҳад кард.
15 майи соли 2019 дар бинои Бонки миллии Тоҷикистон таҳти роҳбарии Раиси Бонки миллии Тоҷикистон Ҷамшед Нурмаҳмадзода ва бо иштироки роҳбарони бонкҳо ва ташкилотҳои амонатии қарзии кишвар, оид ба иҷрои дастуру супоришҳои Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон, ки санаи 10 майи соли 2019, зимни мулоқот бо кормандони мақомоти молия, андоз, гумрук, сармоягузорӣ ва бонкҳо дода шуда буд, ҷаласаи корӣ баргузор гардид. Ҷаласаро Раиси Бонки миллии Тоҷикистон Ҷамшед Нурмаҳмадзода ифтитоҳ карда, таваҷҷуҳи ҳозиринро бори дигар ба дастуру супоришҳои Пешвои миллат, муҳтарам Эмомалӣ Раҳмон, ки дар мулоқот бо кормандони мақомоти молия, андоз, гумрук, сармоягузорӣ ва бонкҳо ироа гардида буд, ҷалб намуд.
“Низоми бонкии кишвар, яке аз омилҳои муҳими рушди иқтисодиву иҷтимоии Тоҷикистон ба ҳисоб рафта, аз ҳар кадоми мо тақозо менамояд, ки барои рушду такомули он фаъолияти босамар дошта бошем. Ва бо истифода аз имконияту шароитҳои мусоид баҳри бартараф намудани камбудиҳои соҳа, ки Пешвои миллат зимни суханронӣ дар мулоқот бо кормандони мақомоти молия, андоз, гумрук, сармоягузорӣ ва бонкҳо ироа намуданд, кӯшиш ба харҷ диҳем, то эътимоди аҳолиро ба бонкҳо барқарор намоем. Татбиқи сиёсати пулию қарзии Бонки миллии Тоҷикистон, назорат ва баҳодиҳии дурусти низоми бонкӣ, пешгирии талафоти имконпазир ва коҳиш додани сатҳи хавфҳои эҳтимолӣ ба низоми бонкӣ, дуруст ба роҳ мондани сиёсати қарздиҳӣ ва коҳиш додани меъёрҳои фоизӣ, кам кардани ҳиссаи қарзҳои ғайрифаъол, ҷалби бештари сармояи хориҷӣ ба иқтисодиёти кишвар ва баланд бардоштани маърифати молиявии аҳолӣ метавонад барои бартараф намудани камбудиву норасоиҳои соҳа ҳиссагузор бошад”,- иброз дошт Ҷ.Нурмаҳмадзода. Дар идома лоиҳаи Нақшаи чорабиниҳои БМТ оид ба иҷрои дастуру супоришҳои Пешвои миллат, Президенти Ҷумҳурии Тоҷикистон зимни вохӯрӣ бо кормандони соҳаҳои молия, андоз, гумрук ва бонкҳо ба баррасӣ ҷиҳати пешниҳоди таклифҳо манзур карда шуд. Бояд тазаккур дод, ки лоиҳаи нақшаи чорабиниҳо вобаста ба бартараф намудани камбудиҳои зимни мулоқот аз ҷониби Пешвои миллат ироагардида таҳияшуда, тамоми паҳлуҳои соҳаи низоми бонкӣ ва суғуртаро фарогир мебошад, аз ҷумла баланд бардоштани эътимоди аҳолӣ ба низоми бонкӣ, истифодаи фишангҳои иловагӣ баҳри татбиқи сиёсати пулию қарзӣ, дастрасии аҳолӣ ба хизматрасониҳои молиявӣ, ҳимояи ҳуқуқҳои истеъмолкунандагони низоми молиявӣ, ҷалби бештари бонувон ба низоми бонкӣ, коҳиш додани қарзҳои ғайрифаъол дар сандуқи қарзӣ, паст кардани меъёрҳои фоизӣ дар сиёсати қарзии бонкҳо, зиёд кардани доираи марказҳои хизматрасонии бонкӣ, интихоби дурусти кадрҳои баландихтисос дар воҳидҳои сохтории бонкҳо ва ташкилотҳои қарзӣ ва ғайра. Дар баробари ин, ба бонкҳо ва ташкилотҳои қарзӣ барои таҳия намудани пешниҳодҳои худ ҷиҳати ворид намудан ба нақшаи чорабиниҳои мазкур дастур дода шуд.
Дар рафти ҷаласа, инчунин масъалаҳои бедолларикунонии иқтисодиёт, поён бурдани таъсири асъори хориҷӣ дар бозори хизматрасониҳои бонкӣ, қобилияти пардохтпазирӣ ва сармояи бонкҳо, афзоиши дастрасии аҳолӣ ба хизматрасонии арзон, воситаҳои молиявӣ, таъсиси бештари филиалҳо ва марказҳои хизматрасонӣ, омода кардани мутахассисони баландихтисоси соҳаи бонкдорӣ ва ҷалби бештари бонувон ба низоми бонкии мамлакат, бахусус ба вазифаҳои масъулияти моддидошта мавриди баррасӣ қарор дода шуд. Муовини Раиси Бонки миллии Тоҷикистон Ҳамидулло Машрабзода дар навбати худ доир ба ҷараёни иҷрои қарори Ҳукумати Ҷумҳурии Тоҷикистон "Оид ба тадбирҳои вусъат бахшидани ҳисоббаробаркуниҳои ғайринақдӣ" (30.11.2018,№565) суханронӣ карда, зикр намуд, ки бо вуҷуди иҷрои корҳои назаррас дар самти тадбиқи қарори мазкур, зиёд кардани ҳиссаи ҳисоббаробаркунии ғайринақдӣ дар муомилот ҳоло ҳам баъзе мушкилот, аз ҷумла, аз ҷониби ташкилотҳои карзӣ фароҳам овардани шароити мусоид барои таъмини терминалҳои электронӣ ва истифодаи онҳо дар марказҳои савдою хизматрасонӣ дида мешавад. Аз ин рӯ, Раиси Бонки миллии Тоҷикистон Ҷ.Нурмаҳмадзода таъкид дошт, ки бонкҳо ва ташкилотҳои қарзӣ барои ҳарчи зудтар амалӣ намудани таъмини татбиқи қарори Ҳукумати Ҷумҳурии Тоҷикистон "Оид ба тадбирҳои вусъат бахшидани ҳисоббаробаркуниҳои ғайринақдӣ" чораҳои таъхирнопазир андешида, барои қабули ҳақи ҳама намуди хизматрасониҳо бо истифода аз воситаҳои электронӣ бо вазорату идораҳои дахлдор ҳамкории судмандро ба роҳ монанд. Дар охир ба намояндагони бонкҳо ва ташкилотҳои қарзии кишвар, ҷиҳати бартараф намудани камбудиҳои дар мулоқот зикргардида дастурҳои мушаххас дода шуд.
Фаъолияти ташкилотҳои суғуртавӣ ва рушди бозори суғурта
Дар робита ба иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки зимни мулоқот бо кормандони мақомоти молия, андоз, гумрук, сармоягузорӣ ва бонкҳо дода шуда буд, 24 майи соли 2019 дар Бонки миллии Тоҷикистон таҳти роҳбарии Раиси Бонки миллии Тоҷикистон Ҷамшед Нурмаҳмадзода бо иштироки роҳбарон ва сармуҳосибони ташкилотҳои суғуртавии кишвар ҷаласаи корӣ доир гардид. Ҷаласаро Раиси Бонки миллии Тоҷикистон Ҷамшед Нурмаҳмадзода ҳусни оғоз бахшида, қайд кард, ки cуғурта ҳамчун фишанги ҳимоя ва дастгири манфиатҳои шахсони воқеӣ ва ҳуқуқӣ дар самти таъмини бехатарии ҳаёт, саломатӣ ва молу мулк унсури асосии иҷтимою иқтисодии ҷомеа ба ҳисоб рафта, барои пешрафти соҳаҳои хоҷагии халқ муҳим арзёбӣ мегардад.
Зимни мулоқоти Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, санаи 10 майи соли 2019, бо кормандони мақомоти молия, андоз, гумрук, сармоягузорӣ ва бонкҳо, Бонки миллии Тоҷикистон вазифадор карда шуд, ки доир ба рушди низоми суғурта чораҳои зарурӣ андешад ва бешак, татбиқкунандагони вазифаҳои гузошташуда, албатта ташкилотҳои суғуртавии ватанӣ ба ҳисоб мераванд. Дар рафти ҷаласаи корӣ Раиси Бонки миллии Тоҷикистон Ҷ.Нурмаҳмадзода вобаста ба кору фаъолияти ташкилотҳои суғуртавӣ ибрози назар намуда, таъкид бар он дошт, ки фаъолияти бархе аз ташкилотҳои марбута ба талаботи имрӯза ҷавобгӯ набуда, ҳисоботҳои расмӣ саривақт ва босифату эътимоднок дастрас намегарданд. Тавре аз рӯи маълумотҳои оморӣ бармеояд, воридоти ҳаққи суғуртавии ташкилотҳои суғуртавии ватанӣ дар соли 2018 наздик ба 235 млн. сомониро ташкил дода, пардохтҳои суғуртавӣ дар ин давра 11 млн. сомониро ташкил дод, ки ҳамагӣ 5%-и ҳаҷми умумии воридоти ҳаққи суғуртавиро дар бар мегиранд.
Имрӯз ширкатҳои суғуртавии ватанӣ ба муштариёни худ аз рӯи 50 намудҳои суғурта хизмат мерасонанд, ки барои рушди соҳа кифоят намекунад. Таъкид гардид, ки мушкилоти асосии бозор аз як тараф нокифоягии имкониятҳои молиявии мизоҷони потенсиалӣ бошад, аз тарафи дигар мавҷуд набудани ҷаззобияти аҳолӣ ҷиҳати бастани шартномаҳои суғуртавӣ мебошад. Раиси Бонки миллии Тоҷикистон Ҷ.Нурмаҳмадзода зимни муҳокимаронӣ махсус ба масъалаҳои гуногуни рушди бахши суғурта таваҷҷуҳ зоҳир намуда, вобаста ба мушкилоти ҷойдоштаи соҳа, аз ҷумла риоя накардани талаботҳои қонунгузорӣ, паст будани сатҳи пардохпазирӣ, дар сатҳи паст қарор доштани корҳои фаҳмондадиҳӣ ва таблиғотӣ, пешниҳод накардани намудҳои нави суғурта ва механизмҳои татбиқи он, вуҷуд надоштани технологияи нав ва барномаҳои муосир, саҳми ночизи бахши суғурта дар пешбурди иқтисодиёт изҳори назар карда, барои минбаъд рушди бахши суғурта аз ташкилотҳои суғуртавӣ даъват ба амал овард.
Дар идома, Муовини Раиси Бонки миллии Тоҷикистон Ҳамидулло Машрабзода ба сухан баромада, изҳор дошт, ки яке аз самтҳои муҳими дигар дар бахши суғурта ҳимояи ҳуқуқи ташкилотҳои суғуртавӣ мебошад ва Ассотсиатсияи миллии ташкилотҳои суғуртавии Тоҷикистон, ки навтаъсис аст, маҳз барои тақвият бахшидани ин раванд вазифадор аст. Ҳ.Машрабзода инчунин вобаста ба бурдани корҳои тарғиботӣ ва ташвиқотӣ барои рушди бозори суғурта ба ташкилотҳои суғуртавӣ тавсия дода, оид ба тақвият додани ҳисоббаробаркунии ғайринақдӣ дар соҳа дастур дод. Дар рафти ҷаласаи корӣ аз фаъолияти низоми суғурта дар семоҳаи аввали соли 2019 сардори Идораи назорати суғуртавӣ Ҳусейнова Дилбар рӯнамоиро манзури ҳозирин гардонида, оид ба вазъи воқеии соҳа таҳлили мушаххас манзур намуд. Дар интиҳо Раиси Бонки миллии Тоҷикистон Ҷамшед Нурмаҳмадзода вобаста ба бандҳои алоҳидаи Нақшаи чорабиниҳо ҷиҳати иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон аз мулоқот бо кормандони мақомоти молия, андоз, гумрук, сармоягузорӣ ва бонкҳо, ки барои рушди бахши суғурта ва бартараф кардани камбудиҳо равона шудааст, ба роҳбарони ташкилотҳои суғуртавӣ дастуру супоришҳо дод. Аз ҷумла, аз масъулини соҳа даъват ба амал оварда шуд, ки бо истифода аз имкониятҳои мавҷуда барои бартараф намудани камбудиҳои ҷойдошта кӯшиш ба харҷ дода, фаъолияти худро мувофиқи талаботҳои иҷозатномадиҳӣ ва дар асоси рақобати солим ба роҳ монда, хизматрасонии босифатро таъмин намоянд ва ба ин васила ба боварии мардум сазовор гарданд. Бояд зикр кард, ки имрӯз дар ҷумҳурӣ 18 ташкилоти суғуртавӣ фаъолият доранд.
Шуъбаи матбуоти БМТ
Роҳи Душанбе-Чанок, ки нигоҳдориаш дар асоси шартномаи консессионӣ ба зиммаи филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон вогузор аст, асосан аз минтақаҳои сайёҳии кишвар мегузарад. Ба ғайр аз ин, истироҳаткунандагон ба осоишгоҳҳои машҳури «Хоҷа Оби гарм», «Баҳористон», «Шифо», «Зумрад» «Сафед-дара», «Гулобод», «Авис-сити», «Ҳавотоғ», «Кохи Малика» ва амсоли инҳо тавассути роҳи мазкур сафар мекунанд. Табиист, ки ҳолати роҳ ва раванди нигоҳдории он ба ҷалби бештари сайёҳон, таваҷҷуҳбарангез шудани минтақа барои ҷаҳонгардон, беҳбудӣ ёфтани инфрасохтори соҳаи сайёҳӣ... мусоидат карда, дар ин раванд омили калидӣ маҳсуб мешавад. Ҷоиз ба зикри алоҳида аст, ки аз ҷониби роҳбарияти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон пайваста навгониҳо ҷорӣ шуда, онҳа пеш аз ҳама, ба беҳтар намудани сатҳу сифати хизматрасонӣ, тавсеаи пардохти ғайринақдӣ, ба талаботи байналмилалӣ мутобиқ намудани ҳолати роҳ ва раванди нигоҳдории он рабт доранд. Мавриди истифода қарор гирифтани плазаҳои нави толлингӣ ба ҷои плазаҳои амалкунанда шаҳодати гуфтаи боло буда, дар баробари бартариҳои дигар, ба рушди соҳаи сайёҳӣ дар мамлакат низ мусоидат намуда истодааст. Далелу арқоми мавҷуда низ аз он шаҳодат медиҳанд, ки аксари сайёҳони дохилӣ ва хориҷӣ, ки тариқи роҳи Душанбе-Чанок сафар мекунанд, аз ҳолати роҳ ва ибтикороти амалинамудаи роҳбарият ва кормандони филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон қаноатманданд.
Эътироф бояд кард, ки чанд соли охир истифодаи кортҳои пардохтӣ аз ҷониби шаҳрвандони мамлакат тавсеа ёфта, раванди дастрасӣ низ ба онҳо хеле сода гардонида шудааст. Тибқи маълумоти оморӣ, айни замон дар ҷумҳурӣ теъдоди истифодабарандагони кортҳои пардохтӣ зиёда аз як миллион нафарро ташкил медиҳад ва ин раванд бемайлон идома ёфта истодааст. Ҳамрадиф бо ин иқдомот, бонкҳои кишвар низ фаъолияти хешро дар ин ҷода густариш бахшида, ҳатто дар дурдасттарин минтақаҳо банкоматҳои худро ба истифодаи мизоҷон вогузоштанд. Аммо фарҳанги истифодаи кортҳои пардохтӣ аз ҷониби шаҳрвандон «ба ҳар ду пой мелангад». Фаъол кардани марказҳои ҷараёникунӣ дар низоми бонкии мамлакат ва барориши кортҳои миллӣ имкониятҳои бонкҳо ва мизоҷони онҳоро дар самти истифодаи кортҳои пардохтӣ бояд васеътар мегардонид, аммо афсӯс...
Ҷои пӯшида нест, ки ҳоло қисми зиёди шаҳрвандони ҷумҳурӣ то чӣ ҳад муфид будани истифодаи кортҳои пардохтиро дарк накардаанд. Барои мисол, дар плазаҳои филиали Ширкат банкомат ва POS-терминалҳо насб шудааст, ки аз онҳо дорандагони кортҳои пардохтии Корти миллӣ, Visa International, Union Pay метавонанд бе комиссия гузаришро аз плазаҳои толлингӣ бипардозанд. Мутаассифона аз имконияти фароҳамшуда ронандагону мусофирон таври бояду шояд истифода намекунанд. Лиҳозо, барои таваҷҷуҳ зоҳир намудани ронандагону мусофирон ба ин масъала таври мухтасар шарҳу тавзеҳ додани манфиатҳои рӯ овардан ба пардохти ғайринақдиро мувофиқи мақсад мешуморем:
Ҳамватанон бояд дуруст дарк кунанд, ки истифодаи кортҳои пардохтӣ бартариҳои зиёд дорад. Аввалан, он воситаи хеле қулайи баҳравар шудан аз хизматрасониҳои молиявӣ маҳсуб ёфта, тавассути он харидории дилхоҳ молу маҳсулот аз марказҳои савдо, интиқоли маблағ, нигоҳдории маблағҳои амонатӣ (депозитӣ) имконпазир аст. Сониян, барои дорандагони кортҳо зарурати ба худ гирифтани маблағи зиёди нақд пайдо намешавад. Барои онҳо кифоя аст, ки дар он макон банкомат ё POS-терминалро пайдо карда, дар доираи хизматрасониҳои барои корти пардохтӣ пешбинишуда эҳтиёҷоти хешро қонеъ намоянд. Ин омил ба коҳиш ёфтани пули нақд дар гардиш, ки аз лиҳози иқтисодӣ хеле муҳим аст, боис мегардад. Дар маҷмӯъ, истифодаи васеи чунин кортҳо ба ғанӣ гардидани Буҷети давлат, ҷалби маблағҳои аз гардиши бонкӣ берунмонда, муътадил нигоҳ доштани қурби асъори миллӣ ва боз ҳам боло рафтани нуфузи Тоҷикистон дар арсаи байналмилалӣ ҳамчун кишвари бемайлон рушдёбанда кумаки амалӣ мерасонад. Насби банкомат ва POS-терминалҳо дар масири роҳи Душанбе-Чанок далели возеҳи он аст, ки роҳбарияти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон дар иҷрои ин муқаррароти қонунгузорӣ фаъол буда, дар ин самт корҳои зиёдро ба иҷро расонидаанд. Боварӣ дорем, ки ояндаи наздик истифодаи кортҳои пардохтӣ ҳангоми пардохти хизматрасонии филиали Ширкат ба падидаи маъмул табдил ёфта, аксари шаҳрвандони аз истифода хоҳанд кард.
Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон
Салом, СССР! Хизматрасонии бонкӣ дар давлати Шӯравӣ ба дараҷаи хуб ба роҳ монда шуда буд ва танҳо дар солҳои охири мавҷудияташ ба бетартибиҳо роҳ доданд. Аммо аз вақте ки соҳибистиқлол шудем, бонкҳои мо то ҳол мардумро фиреб медиҳанд ва аҷобати кор дар он аст, ки бонкдорон доимо хомӯшанд. Мардуме, ки пулҳои худро барои рӯзи мабодо ба чанд бонки муфлисшуда, аз ҷумла, Агроинвестбонк, гузошта буданд, дар муддати 6-7 соле, ки гирифта наметавонанд, медонед чӣ қадар он пулҳо беқурб шудаанд? Аллакай шумо-бонкирҳои «муҳтарам» 50-60% пули мардумро ба боди фано додед ва ҳамон 40-50 %-и боқимондаро ҳам ба назарам доданӣ нестед! Мизоҷон ҳар қадар, ки ба дари бонк биёянд, фақат 1 ҷавоб мешунаванд: «Пул нест, равед аз ин ҷо!» Гӯё талбандае назди банкир рафта бошад. Аммо дар ҳолате, ки агар ягон шахс аз бонк қарз гирад, дар он сурат пули бонк ҳар моҳ ҳатман фоиз кор мекунад ва хона ё мошини ба гарав гузошташуда бе мушкил ситонида мешавад. Ҳамон замон милиса, суд дар хизмати бонк тайёранд ва дидаем ҳолатҳоеро, ки қарздор бо аҳли оила дар кӯча мондааст.
Агар қонун чунин аст, пас чаро ин бонкҳо муфлис шуморида шуда, дороияш (с молотка!) ба фурӯш рафта, пули мардум бо фоизаш баргардонида намешавад? Бояд комиссияи ликвидатсионӣ созмон дода шавад ва дар он ҳайат ҳатман аз мардуми ҷабрдида 3-4 нафар шомил бошанд. Ақаллан 1 бор ҳақро ба ҳақдор бирасонед, давлатмардони муҳтарам. Ҳоло мардум ба бонкҳои кишвар бовар надоранд! Охир, бонк барои халқ аст, боварии халқро баргардонед. Бонк муфлис мешавад, вале хонаи халқ месӯзад, бонкир ягон зарар намебинад, чунки бонку мошинҳояш истодаанд, хонаҳояш дар ҷояш, ресторан, бозор, мағозаҳояш побарҷоянд. Аҷоиб муфлисшавие! Ба чунин муфлисшавӣ шумо чӣ мегӯед?
Зиёҷон Хошматов,
деҳаи Шайнаки Муллогадо, н.Рӯдакӣ
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
