Федератсияи футболи Тоҷикистон ба самъи мухлисони ин бозӣ мерасонад, ки  рӯзи 4 ноябр, соати 18.00 дар Варзишгоҳи марказии шаҳри Ҳисор бозии ниҳоии Ҷоми AFC (Конфедератсияи футболи Осиё) - 2017 байни дастаҳои футболи “Истиқлол” (Душанбе, Тоҷикистон) – “Эйр Форс” (Ироқ) баргузор мегардад.
Дастаи Ироқ дорандаи феълии Ҷоми AFC мебошад. Барои "Истиқлол" бошад ин финал дар 3 соли баромадаш дар Ҷоми AFC дувумин маҳсуб меёбад. Соли аввал (2015), ки чемпиони Тоҷикистон барои бори аввал дар ин мусобиқа иштирок намуд, бозии финалиро дар Душанбе бо ҳисоби 1:0 муқобили "Ҷаҳор Дорул Такзим" (Малайзия) бохт.
Федератсияи футболи Тоҷикистон омодагиро ҷиҳати дар сатҳи баланди ташкилу баргузор намудани ин бозӣ аллакай шурӯъ кардааст. Клуби «Истиқлол» бошад тасмим гирифтааст барои мухлисони хеш, ки мехоҳанд ин бозии финалиро тамошо намоянд, автобусҳои ройгон ташкил намояд. Автобусҳо аз 3 нуқтаи пойтахт- Маркази савдои «Садбарг», «Қасри теннис» ва истгоҳи назди бозори «Саховат» мухлисонро то ба варзишгоҳи шаҳри Ҳисор хоҳанд бурд.

СССР

Дар 9 моҳи соли равон иҷрои нақшаи қисми даромади буҷети давлатӣ беназардошти андози иҷтимоӣ дар ш. Истаравшан ба андозаи 104% ба маблағи 80 млн 082 ҳазор сомонӣ таъмин карда шуд, ки нисбат ба нақшаи пешбини шуда 2 млн 762 ҳазор сомонӣ зиёд мебошад. Иҷрои нақшаи қисми даромади буҷети маҳаллӣ 104 фоиз таъмин гардида, ба буҷет 69 млн 405 ҳазор сомонӣ ворид шуд, ки нисбати нақша 2 млн 642 ҳазор сомонӣ ва нисбат ба ҳамин давраи соли гузашта 9 млн 326 ҳазор сомонӣ зиёд мебошад.
Бино ба иттиллои котиби матбуотии раиси ш. Истаравшан Шералӣ Азимӣ, дар ин давра барои сари вақт пардохт намудани нафақапулиҳо аз ҳисоби воридоти маблағи андози иҷтимоии худӣ 27 млн 357 ҳазор сомонӣ ва кӯмаки молиявӣ аз ҳисоби буҷети ҷумҳуриявӣ 17 млн 626 ҳазор сомонӣ равона гардидааст. Айни ҳол дар шаҳр 20 ҳазору 615 нафақахӯр ба қайд гирифта шудааст. Дар давраи ҳисоботӣ 1 638 ҷойи нави корӣ таъсис дода шуд, ки 86,4 дарсади нақшаро ташкил медиҳад.  
Корхонаҳои саноатӣ дар якҷоягӣ бо бахши хусусии соҳа ба маблағи 281 миллиону 366 ҳазор сомонӣ маҳсулоти саноатӣ истеҳсол намуда, нақшаро 119 фоиз таъмин намуданд. Кишоварзони Истаравшан дар 9 моҳи соли равон ҳаҷми маҳсулоти умумии кишоварзиро ба 594 миллиону 162  ҳазор сомонӣ расониданд.
Инчунин бояд қайд намуд, ки дар ин муддат ба соҳаи сохтмон 3 млн 266 ҳазору 432 сомонӣ равона гардид, ки аз ин ҳисоб ба таҷдиду азнавсозии Маҷмааи  “Қалъаи Муғ”  2 млн 230 ҳазору 529 сомонӣ, таҷдиду таъмири варзишгоҳи шаҳр 297 сомонӣ ва Майдони Ғалаба 631 ҳазору 284 сомонӣ сарф шудааст.

СССР

Ширкати саҳомии холдинги кушодаи  «Барқи тоҷик» мегӯяд, ки имсол ният дорад, бо истифода аз имконоти пайдошуда барои аҳолӣ маҳдудият ҷорӣ накунад ва мардуми шарифи кишварро тирамоҳу зимистони дарпешистода пурра бо барқ таъмин намояд.
Дар баробари ин ширкати мазкур, ба сокинони кишвар муроҷиат карда, ба ҳамаи онҳо хотиррасон менамояд, ки дар бобати истифодаи нерӯи барқ сарфаю сариштакор бошанд ва ба исрофкорӣ роҳ надиҳанд. Сарфакорона истифода бурдани нерӯи барқ ва пардохти саривақтии ҳаққи барқи истифодашуда нишонаи фарҳанги баланд ва масъулияти шаҳрвандии ҳар 1 сокини мамлакат буда, ба таъмини фаъолияти муназзаму боэътимоди шабакаҳои интиқоли барқ ва низоми энергетикӣ мусоидат менамояд.
Соли гузашта бошад танҳо аз 1-уми ноябри соли 2016 то 14-уми январи соли ҷорӣ интиқоли нерӯи барқ дар кишвар маҳдуд карда шуда буд.

СССР

Аксҳои 1 духтараки ноболиғ дирӯз дар шабакаҳои иҷтимоӣ боиси сару садои зиёде шуд. Дар аксҳо дар сар, пушт ва дастони духтар бештар доғҳо дида мешавад. Ҳукумати ин ноҳия хушунати кӯдаки ноболиғ Судоба Сафароваро, ки аз сӯи холааш дар кӯч.Ҷомӣ, хонаи 89 рух додааст, тасдиқ карда гуфт, ин ҳодиса 1 соли пеш рӯй додааст. Падару модари кӯдак ҳоло дар зиндон аст, вале хешовандони 2 тараф-холаю аммаҳои ноболиғи латукӯбшуда барои соҳиб шудани манзили кӯдакҳо вориди баҳс ҳастанд, вале кӯдак дар хонаи холааш мавриди хушунати ҷисмонӣ қарор гирифтааст.
Сайлигул Шарипова-мудири шӯъбаи ҳифзи ҳуқуқи кӯдаки ҳукумати ноҳия дар суҳбат бо СССР гуфт, «ин духтараки ноболиғ дар синфи 5-уми мактаби миёнаи №45-и ноҳия таҳсил мекунад. Аз ин ҳодиса додситони ноҳия огоҳ буданд, вале ин қазия ба куҷо расидааст, онҳо огоҳ нестанд. Барои маълумоти пурра гирифтан аз мақомоти дахлдор то 12 нафар табиб назди Судоба рафта, санҷиш гузаронидем. Дар бадани ӯ ягон осеб дида намешавад. Аз ӯ дар бораи ин аксҳои интернетӣ пурсидем. Судоба мегӯяд, «ман чанде пеш аз помонакҳо-“лестница”-и хона афтида будам ва аммаамро бениҳоят дӯст медорам”.
Директори мактаби миёна Қамариддин Шамос дар сӯҳбати СССР ҳодисаро тасдиқ карда гуфт, аз намояндаи ҳукумат низ омада тафтиш карданд. Худи ҳозир роҳбари синф, хола ва аммаи Судоба дар ШВКД-и ноҳия бозпурсӣ шуда истодааст. Гуфта мешавад, ки падари модари Судоба дар Русия зиндониянд ва ӯ дар тарбияи аммааш қарор дорад. Ин аксҳое, ки дар интернет нашр шудаанд, хусумати байни хола ва аммаи Судоба аст…».

Баҳодур Уроқов СССР вилояти Хатлон

Паёмбарро кӣ кафан кард?
Салом, СССРи гиромӣ ва мардумӣ! Аз домуллои гиромӣ Ҳоҷӣ Мирзо Ибронов пурсиданиям, ки баъди вафоти ҳазрати Муҳаммад (с) кӣ ӯро кафан кард, шуст ва қабрашро канд?

Афзал Салимов, кӯч.Айнӣ, н.Шоҳмансур

Муҳаммадро (с.) Алӣ…шуст
Посух: Ҳазрат (с) рӯзи Душанбеи 12-рабиъ-ул-аввал, соли 11-уми ҳиҷрӣ мувофиқ ба 20 апрели соли 570-и мелодӣ даргузашт.

Рамазон Қодиров-президенти Чеченистон дар 1 сафари корӣ ба Узбакистон бо ҳамтояш Шавкат Мирзиёев мулоқот ва рушди ҳамкориҳои дуҷонибаро баҳс карданд. Қодиров аз Мирзиеёв барои даъваташ ба Узбакистон, кишваре, ки он ҷо падараш таҳсил кардааст, изҳори ташаккур кард ва дар ин сафар аз оромгоҳи Муҳаммад Содиқ Муҳаммад Юсуф-рӯҳонии маъруф, ки падари ӯ - Аҳмад Қодировро таълим додааст, зиёрат кард. Аҳмад замони Шӯравӣ дар Узбакистон таҳсили расмии динӣ гирифтааст. Ҳангоми зиёрат аз оромгоҳи ин шахс ӯро Ойбек Турсунов, домоди Мирзиёев ҳамроҳӣ мекард.

Собиқ губернатори вилояти Одессаи Украина-Михаил Саакашвили (президенти пешини Гурҷистон) дар шаҳри Харков, зимни баромадаш дар митинги зиддикоррупсионӣ гуфт, ки “Ман аниқ медонам, ки раҳбарияти кунунии Украина тарҳи ҷисман аз байн бурдани маро кашида истодаанд, ё мехоҳанд, ки маро комилан аз Украина бадарға кунанд. Ман инро пешопеш ба шумо мегӯям. Аммо ман аз инҳо сари 1 мӯ наметарсам...”.

Мақомоти иҷроияи ҳокимияти давлатии ш.Душанбе мақолаҳои «Нашуд… натавонистед!» (СССР, 14.09.2017, №37(470) ва «1 қадам ба пеш, 2 қадам ба қафо?!» (СССР, 21.09.2017, №38(471)-ро мавриди баррасӣ қарор дод. Бо ташаббуси шаҳрдорӣ шурӯъ аз моҳи январи с.2017 ҷиҳати ба роҳ мондани хизматрасонии нақлиётӣ бо истифода аз тамоми имконият ва шароити мавҷуда чораҳои мақсаднок андешида мешавад. Таҳлили 8-моҳаи нишондиҳандаҳои иқтисодиву истеҳсолии корхонаҳои коммуналии воҳиди давлатӣ ва ҷамъиятҳои нақлиётӣ, ки фаъолияти мусофирбариро дар шаҳр амалӣ мекунанд, муайян кард, ки ҳаҷми мусофиркашонӣ нисбати ҳамин давраи с.2016 101,4% ё ин ки 1 млну 425 ҳазору 200 мусофир зиёд ва гардиши мусофирон бошад 101,7% ё ин, ки 12 млну  360 ҳазору 710 мусофир километр зиёд иҷро шудааст. Иҷрои машина-даврҳои воситаҳои нақлиёти мусофирбарии корхонаҳои коммуналӣ нисбат ба ҳамин давраи с.2016 15 ҳазору 959 ва воситаҳои нақлиёти сектори хусусӣ бошад нисбат ба ҳамин давраи с.2016 61 ҳазору 733 нишондод зиёд иҷро шудааст. Қобили зикр аст, ки дар хатсайрҳои шаҳр ҳаҷми мусофирбарӣ ба ҳисоби миёна дар 1 рӯз 540-550 ҳазор нафарро ташкил медиҳад. Аз 138 млну 473 ҳазору 400 мусофири дар 8 моҳи с.2017 интиқол додашуда 65 млну 361 ҳазору 400 мусофир ё 47,2% тариқи нақлиётҳои корхонаҳои коммуналӣ ва 73 миллиону 122 ҳазор мусофир 52,8% тариқи сектори хусусӣ интиқол дода шудааст. Шумораи кормандону донишҷӯёни муассисаҳои таҳсилоти олӣ ва миёнаи касбӣ ба 40%-и ин нишондиҳанда (ҳаҷми мусофирбарӣ) баробар аст. Бо вуҷуди он, ки парки воситаҳои нақлиёти корхонаҳои коммуналии воҳиди давлатии мусофирбарии пойтахт соли равон аз ҳисоби харидорӣ шудани 64 адад автобусҳои нави замонавии тамғаи «ISUZU» афзоиш ёфта, таъмини сокинон ва меҳмонон бо хизматрасонии сифатан баланд беҳтар гардида бошад ҳам, интиқолдиҳандагон дар 1 вақт имкони пурраи ҳамлу нақли мусофиронро дар соатҳои зиёдшавии анбуҳи мусофирон надоранд.
Новобаста аз ин, масъулони соҳаи нақлиёти мусофирбарии шаҳр муваззаф шудаанд, ки ҷиҳати пешгирӣ аз тамбашавии воситаҳои нақлиёт дар хиёбону кӯчаҳои ш.Душанбе, пурра қонеъ гардонидани талаботи аҳолӣ бо хизматрасонии нақлиётӣ ва баланд бардоштани сатҳу сифати хизматрасонӣ ба сокинону меҳмонони ш.Душанбе тамоми чораҳои мушаххаси мақсаднокро амалӣ намоянд.

Бо эҳтиром,
 Қурбон Саидзода