Суди вилояти Хатлон омӯзгори 28-соларо барои ҳаракатҳои барангехтани кинаю адоват ё низои миллӣ, нажодӣ, маҳалгароӣ, динӣ, ё паст задани шаъну эътибори миллӣ ба мӯҳлати 1,6 сол аз озодӣ маҳрум кард. Ин қазияро муовини раиси суд-Бойзода Темур ба СССР чунин шарҳ дод: “Ҳотамов Қурбоналӣ, с.тав.1989, сокини ҷамоати деҳоти “Бустонқалъа”-и н.Бохтар, оиладор, соҳиби 2 фарзанд. Ӯ дар н.Ёвон ба ҳайси омӯзгор фаъолият мекард. Қурбоналӣ рӯзи 16.10.2017 пеш аз оғози намози шом ба масҷиди маҳаллаи Хатлони ш.Қурғонтеппа рафта, ҳангоми ворид шудан ба бинои масҷид дидааст, ки духтарони маҳалла бо либосҳои аврупоӣ ва бе рӯймол ба рӯбучин ва тоза кардани масҷид машғуланд. Эмомхатиби масҷид Ибрагимов Абдусалим перомуни Қонуни ҶТ “Дар бораи масъулияти падару модар оид ба тарбияи фарзанд” таъкид карда, аз дохили масҷид онҳоро ба хонаҳояшон фиристод. Дар ин вақт Қурбоналӣ бо истифода аз барангехтани кинаю адовати динию маҳалгароӣ талаботҳои қонуни мазкурро нодуруст ҳисобида, тарзи либоспушии духтаронро ғайришариат дониста, шаъну эътибори миллии онҳоро паст задааст.” Суди вилоят Ҳотамовро бо моддаи 189, қисми 1 КҶ ҶТ гунаҳгор дониста, ӯро ба мӯҳлати 1,6 сол аз озодӣ маҳрум кард.

Баҳодур Уроқов,
СССР, вилояти Хатлон

Вазорати корҳои дохилии ҶТ эълон кардааст, ки сокинони мамлакат минбаъд метавонанд аз милисаҳое, ки аз мардуми корафтода пора талаб мекунанд, тавассути телефонҳои боварӣ шикоят намоянд
Бино ба иттилои маркази матбуоти ВКД ҶТ, ҳангоми ба кирдорҳои коррупсионӣ ё дигар ҳаракатҳои ғайриқонунӣ даст задани кормандони милитсия шаҳрвандон метавонанд ба воситаи «Телефони боварӣ»-и вазири корҳои дохилӣ 221-21-21 ва «Хабарнигори фаврӣ»-и ВКД бо рақами телефони мобилии + 992 939 222 111 тариқи шабакаҳои иҷтимоии Вайбер (Viber), Вотсап (WhatsApp), ИМО (IMO), Телеграмм (Telegrams), Вичат (WeChat) занг зада, ҳолатҳои мазкурро пешгирӣ намоянд. Махфият кафолат дода мешавад.

СССР

Лейтенанти калони милитсия Ҳукуматзода Камолиддин Раҷабали – бозраси калони Взводи махсуси Ротаи хадамоти роҳбонии РБДА ВКД ҶТ 15.01.2018 соати 20:00, ҳангоми иҷрои вазифаҳои хизматӣ дар кӯчаи Ҷ.Расулов, ноҳияи Синои ш. Душанбе, зимни боздошти воситаи нақлиётии тамғаи «Опел-Астра», рақами қайди давлатиаш 77-34 ЕА 01, ки ронандааш дар ҳолати сархушӣ қарор дошт ба ҳалокат мерасад. Ронанда пас аз истифодаи маводи мухаддир дар ҳолати сархушӣ қарор доштааст.
Чуноне ки дар сомонаи ВКД ҶТ омадааст, Ҳукуматзода Камолиддин Раҷабали 30 январи соли 1985 дар н.Файзобод, дар оилаи коргар ба дунё омадааст. Баъди хатми мактаби миёнаи №1 н.Файзобод соли 1999 ба Коллеҷи Техникии Тоҷикистон ба факултаи «Сохтмон ва роҳсоз» дохил шуда, онро бомуваффақият хатм намудааст. Дар соли 2015 ба Академияи ВКД Ҷумҳурии Тоҷикистон ба факултаи «Ҳуқуқшинос» дохил шуда, дар бахши 3-юм таҳсил менамуд.
Аз моҳи феврали соли 2013 дар мақомоти корҳои дохилӣ ба кор фаъолият намуда, дар ин муддат дар вазифаҳои ҳайати миёна ва роҳбарикунанда сарбаландона фаъолият намудааст.
Дар муддати кориаш дар мақомоти корҳои дохилӣ худро ҳамчун корманди фаъол ва ташаббускор нишон дода, баҳри волоияти қонун, тарбияи кормандони ҷавон, баланд бардоштани натиҷаҳои фаъолият дар мақомоти милитсия кӯшиш ба харҷ медод.
Ҳайати шахсӣ ва роҳбарияти ВКД ҶТ нисбати даргузашти Ҳукуматзода Камолиддин Раҷабалӣ сахт андӯҳгин буда, ба наздикон ва пайвандони марҳум изҳори тасаллият мекунанд.

Полковники милитсия Раҷабзода Кароматулло Сайфулло мушовири калони вазири корҳои дохилии ҶТ Раҳимзода Рамазон Ҳамро оид ба ҳифзи тартиботи ҷамъиятӣ таъин гардид.
Раҷабзода Кароматулло Сайфулло, ки дар байни мардум бештар бо тахаллуси «Капитан Клосс» машҳур аст, то ин дам вазифаи муовини аввали сардори Раёсати ВКД ҶТ дар ш.Душанберо бар ӯҳда дошт.

СССР

Раҷаббой Аҳмадзода, раиси тозатаъини вилояти Суғд дар рӯзи нахустини кории хеш дар ин вазифа, ба бозори “Панҷшанбе” омада. Аз вазъи он ва нарху навои маҳсулоти ниёзи мардум ошно гашт.  Вай таъкид дошт, ки нархи 1 килои гӯшти гов минбаъд бояд на бештар аз 33 сомонӣ ба фурӯш гузошта шуда, гӯшти гӯсфанд бошад на зиёда аз 36 сомонӣ барои ҳар 1 кило ба савдо равад.
Раҷаббой Аҳмадзода, субҳи рӯзи 13.01.2018 бо фармони президенти кишвар иҷрокунандаи вазифаи раиси вилояти Суғд таъин гашта, худи ҳамон рӯз бо ширкати Коҳир Расулзода, нахуствазири мамлакат ва Асадулло Раҳмон, мушовири президенти ҶТ оид ба масоили кадрӣ ба фаъолони вилоят муаррифӣ карда шуд. Дар пайи ин, фаъолони вилоят аз Абдураҳмон Қодирӣ, ки то ин дам раисии вилоятро бар дӯш дошт, барои гузоштани саҳми босазо арзи сипос намуда, эшонро ба нафақа гусел карданд.
Аз бойгонии СССР: Раҷаббой Аҳмадзода кист?
Раҷаббой Аҳмадзода 16.09.1971 дар ш. Хуҷанди в. Суғд дар оилаи хизматчӣ таваллуд шудааст, миллаташ тоҷик, таҳсилоташ олӣ.
Соли 1993 Институти химия- технологияи Ҷумҳурии Қазоқистонро бо ихтисоси «Муҳандис-химик-технолог» ва соли 2010 Академияи хизматчиёни давлатии назди Президенти Федератсияи Россияро бо ихтисоси «Иқтисодчӣ» хатм намудааст.
Фаъолияти кориашро аз соли 1993 ба ҳайси муҳандис-технологи заводи «Лаъл»-и шаҳри Хуҷанд оғоз намуда, солҳои 1994-2016 дар вазифаҳои муовини сардори заводи «Сангбурӣ», сардори идораи робитаҳои иқтисодии берунӣ, муовини директори генералӣ ва директори генералии ҶС «Ленинободпромстройматериал»-и Хуҷанд, раиси Кумитаи ҳифзи муҳити зист ва хоҷагии ҷангали вилояти Суғд, директори генералии КВД «Садаф»-и шаҳри Хуҷанд, раиси шаҳри Қайроққум ва раиси шаҳри Хуҷанд кор кардааст.
Бо Фармони Президенти Ҷумҳурии Тоҷикистон аз 30 марти соли 2016 раиси Кумитаи давлатии идораи замин ва геодезии Ҷумҳурии Тоҷикистон таъин гардид.
Бо медали ҷашни 20-солагии Истиқлолияти давлатии Ҷумҳурии Тоҷикистон мукофотонида шудааст. Оиладор, соҳиби 4 фарзанд.

Ҷамолиддин Убайдулло, писари Маҳмадсаид Убайдуллоев, раиси МММО ҶТ рӯзи 13.01.2018 бо фармони президенти кишвар Эмомалӣ Раҳмон сафири нави Ҷумҳурии Тоҷикистон дар Ҷумҳурии Фаронса таъин гардид.
Бино ба иттиллои расмӣ, рӯзи 13.01.2018 президенти ҶТ Эмомалӣ Раҳмон якчанд тағийроти кадрӣ ба амал овард. Аз ҷумла, Абдураҳмон Қодирӣ бо сабаби ба нафақа баромаданаш аз мақоми раиси вилояти Суғд озод карда шуда, бо фармони дигари президент Раҷаббой Аҳмадзода, ки то кунун дар мақоми раиси Кумитаи давлатии идораи замин ва геодезии Ҷумҳурии Тоҷикистон кор мекард, таъин гардид. Қурбон Ҳакимзода раиси Кумитаи давлатии идораи замин ва геодезии мамлакат таъин шуд.
Инчунин, бо қарори ҳукумат Камолзода Фарҳод Воҳид раиси Кумитаи навтаъсиси бехатарии озуқавории назди Ҳукумати Ҷумҳурии Тоҷикистон таъин карда шуд. Бемуродзода Султон Бекмурод аз мақоми сардори Хадамоти назорати давлатии фаъолияти фармасевт, Ғафур Муҳсинзода аз мақоми сардори Хадамоти назорати давлатии фаъолияти тиббӣ ва ҳифзи иҷтимоии вазорати тандурустӣ ва ҳифзи иҷтимоӣ, Таваров Ниматулло Ҳукматуллоевич аз вазифаи сардори Хадамоти давлатии фитосанитарӣ, карантини растаниҳо ва назорати тухмӣ ва Икромов Фазлиддин Маҳмазоитович аз вазифаи сардори Хадамоти давлатии зотпарварии вазорати кишоварзии Ҷумҳурии Тоҷикистон озод карда шуданд.
Бо қарори ҳукумат Бекмуродзода Султон Бекмурод сардори Хадамоти тозабунёди назорати давлатии тандурустӣ ва ҳифзи иҷтимоии аҳолии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таъин карда шуд.

Алексей Навалний-рақаби Владимир Путин-президенти Русия дар посух ба ҳукми Суди олии Русия гуфт, хостори бойкоти интихоботи президентӣ аст. Ӯ дар ин хусус дар саҳифааш-Твиттер навишт, ки интихоботи бе рақобатро намепазирем. Ин дар ҳолест, ки Комиссияи марказии интихоботи Русия мегӯяд, Навалний ба ҷурми даст доштан дар коррупсия муттаҳам аст ва ҳаққи иштирок дар интихоботро надорад. Аммо Навалний ин тӯҳматро рад карда гуфтааст, ки кор паҳлӯҳои сиёсӣ дорад.

Дар ш.Хуҷанд дар пайи сӯхтор дар манзили президенти собиқи Тоҷикистон Раҳмон Набиев, ҳамсари 80-солаи ӯ Майрам Саъдуллоевна Набиева фавтид. Ин ҳодиса баъди нисфирӯзии 28 декабр рух додааст. Хонаи якқабатаи Набиевҳо дар маҳаллаи Себзори ш.Хуҷанд, дар назди 1 роҳи калони мошингард воқеъ аст. Яке аз хешовандони Набиевҳо гуфтааст, хона нисфирӯзӣ оташ гирифта, дар замони ҳодиса Майрам дар хона танҳо будааст. Ҳоло мақомоти дахлдор тасмим гирифтаанд, ки ҷасади Набиеваро ба ташхиси тиббӣ бидиҳанд. Ёдрас мешавем, ки худи Р.Набиев 11.04.1993 даргузашт.