Қарор аст, Беларуссия ба Тоҷикистон 150 мусофирбари барқӣ ва 1000 трактор фиристад. Дар ин бора ТВи Минск-пойтахти ин кишвар бо такя ба мақомоти он кишвар хабар дод. Мақомоти Беларус гуфтаанд, ҳоло дар Тоҷикистон сохтмони роҳҳову лӯлаи газ ҷараён дорад ва хоҷагии қишлоқ рушд мекунад ва талабот дар ин кишвар ба техникаи Беларус хеле зиёд аст. Қаблан Александр Лукашенко ҳамкории 2 кишварро хело бузург ва “шартномаи таърихие монанди парвоз ба кайҳон” номида буд.

 Қурбонбой Ҳакимзода, раиси вилояти Хатлон барои рушди футбол дар вилоят ба дастаҳои Клуби футболи «Равшан»и ш.Кӯлоб 300 ҳазор сомонӣ ва ба дастаи «Ҳосилот»-и н.Фархор 100 ҳазор сомонӣ кӯмак кардааст. 

Қарори вежаи раиси вилоят вобаста ба ҷудо гардидани ин маблағ ба тасвиб расида, Қурбонбой Ҳакимзода аз 17.05.2019 ба ҳайси раиси Федератсияи футболи вилояти Хатлон низ фаъолият дорад. 

Баҳодури Абдусалом, СССР, Хатлон

Узви Ихвон-ал-СССР, Неъматулло Давлатов, газетфурӯши собиқадор аз шаҳри Роғун дар меҳмонии газетаи мардумии СССР гуфт, ки дар бораи газетгурезии ҷавонон ва ақибмондагии китобӣ гуфтаниям. Худ ба худ гоҳе мепурсам: Чӣ тавр СССРи абарқудрат 70 сол поид, сабаб чӣ буд ва чаро он замон мардум ташнаи хондан-дониш буданд? Ба ин суолот посухи худро ёфтам: Матбуоти тоҷикии шӯравӣ 1 хислати хело нодир дошт. Барои мисол, «Комсомоли Тоҷикистон» ё ягон нашрияи дигар чунин эълонеро бо 1 ҷумла чоп мекард: «Ҳар нафаре агар аз ҳамин шумораи мо 1 хатои грамматикӣ ёбад, 5 рубл туҳфа!» Инро кибр ё бузургии редаксияи нашрияҳои РСС Тоҷикистон буд. Дар натиҷа ҳам сафи хонанда меафзуд, ба хотири 5 сӯм ва ҳам масъулияти редаксия дар назди аудиториаи худ дучанд боло мерафт. Яъне корректору мусаҳҳеҳу муҳаррири редаксия кӯшиш мекард, ки барои аз даст надодани 5 рубл (!!!) ҳиҷҷа карда, ҳар 1 саҳифаро бихонад! Ку, имрӯз газетае, ки дилу гурда карда, ин гуна эълонро чоп кунад? Имрӯз ягон газетае нест, ки бе хато чоп шавад! Дар маҷмуъ, бузургии СССР, муҳаббат ба СССР ва қудрати идеологияи СССР низ ҳамин буд, ки ҳама, ҳатто деҳқону пахтачинаш дар сари ҷӯяку пуштаву хирман… мехонд! Бовар кунед, сахт дилам об мешавад, вақте он давраро ёд мекунам.

Мақсади мулоқоти мазкур баррасии фаъолияти сохторҳои марбута ва дарёфти роҳҳои бартараф намудани камбудиҳои ҷойдошта ва ҳалли мушкилоти соҳаҳои мазкур буд, ки барои рушди минбаъдаи иқтисоди миллӣ зарур аст. Пешвои миллат таъкид намуданд, ки ҷиҳати ноил шудан ба ҳадафи олии давлат, яъне баланд бардоштани сатҳу сифати зиндагии мардуми кишвар ва ҳифзи иҷтимоии аҳолӣ мо бояд пешрафти бахшҳои воқеии иқтисодиёт, такмили низоми идораи давлатӣ, суботи молиявӣ, беҳтар кардани фазои сармоягузорӣ ва дастгирии соҳибкорӣ, дар маҷмӯъ рушди муназзаму устувори иқтисодиёти мамлакатро таъмин намоем. Илова бар ин, қайд намуданд, ки низоми молияву бонкии кишвар ҳамчун омили муҳими рушди иҷтимоиву иқтисодии Тоҷикистон бояд ба афзалиятҳои давлат ва ба манфиати ҷомеа равона шуда, барои бо сармоя таъмин намудани соҳаҳои воқеии иқтисодиёт, ҳавасманд намудани соҳибкорону тоҷирон ва умуман, баланд бардоштани фаъолнокии иқтисодӣ дар ҷомеа, ташкили ҷойҳои корӣ ва ҳифзи иҷтимоии аҳолӣ хизмат намояд. Зимни мулоқот Асосгузори сулҳу ваҳдати миллӣ андешидани чораҳои заруриро дар самти татбиқи самараноки ислоҳот доир ба низоми идоракунии молияи давлатӣ лозим дониста, тавсеа бахшидани риояи интизоми давлатӣ, баланд бардоштани сатҳи касбият ва масъулияти кормандон ва пешгирӣ кардани амалҳои коррупсионӣ низоми идораи молияро зарур донистанд. Дар баробари ин, Пешвои Миллат қайд карданд, ки дар натиҷаи таъсири омилҳои дохиливу берунӣ, инчунин, ба талаботи замони муосир ҷавобгӯ набудани идораи як қатор бонкҳо ва ба таври зарурӣ ба роҳ намондани назорат вазъи умумии низоми бонкӣ дар кишвар буҳронӣ шуд. Хотирнишон намуданд, ки камбудиҳои мавҷудаи сохторӣ, аз ҷумла зиёд будани хавфҳо дар низоми бонкӣ ва қарзҳои ғайрифаъол, паст будани сатҳи захираҳои софи байналмилалӣ, қобилияти пардохт ва сармояи бонкҳо, сатҳи баланди долларикунонӣ дар иқтисодиёт, лапишҳои асъорӣ, таъмин нагардидани рақобати солим дар бозори хизматрасониҳои бонкӣ ва дастрасии пасти аҳолӣ ба воситаҳои молиявӣ ҳанӯз боқӣ мондаанд. Дар робита ба ин масъала дар БМТ бо иштироки раиси БМТ Ҷамшед Нурмаҳмадзода, раиси Раёсати БДА ҶТ “Амонатбонк” Сироҷиддин Икромӣ, мудирони филиалҳои Бонк аз миқёси кишвар ва сардорони воҳидҳои сохтории Раёсат ҷаласа баргузор шуд. Дар ин ҷаласа Нурмаҳмадзода ба ҳозирин ҷиҳати ислоҳи камбудиҳо ва саривақтӣ иҷро намудани ҳамаи дастуру супоришҳои Пешвои муаззами миллат маърӯза намуданд. Дар маърӯза бо таъкид ба супоришҳои аз ҷониби Пешвои муаззами миллат қайдшуда ва ислоҳи камбудиҳои ҷойдошта ба ҳозирин супоришҳои иловагӣ пешниҳод гардид.

Дар рафти ҷаласа барои баланд бардоштани саҳми низоми бонкӣ дар рушди иқтисодиву иҷтимоӣ, махсусан, саноатикунонии кишвар зиёд намудани ҳаҷми қарзҳо ба соҳибкории истеҳсолӣ, бахусус, ба соҳаҳои истеҳсоли маҳсулоти ивазкунандаи воридот ва ба содирот нигаронидашуда андешидани чораҳои қатъиро лар ин самт талаб намуданд. Зикр шуд, ки БДА ҶТ “Амонатбонк” ҳамчун бонкӣ давлатӣ ва низомсозӣ ҷумҳурӣ бояд дар дастгирии сиёсати давлат пешсаф бошад ва нақши он дар самтҳои зикргардида хеле ҳам муҳим аст. Аз ҷониби Нурмаҳмадзода ба мудирони филиалҳо ҷиҳати бартараф намудани камбудиҳо супоришҳои қатъӣ дода шуд. Инчунин, бояд қайд кард, ки ҷиҳати иҷрои дастуру супоришҳои Асосгузори сулҳу ваҳдати миллӣ, Пешвои миллат, Президенти ҶТ Эмомалӣ Раҳмон Нақшаи чорабиниҳо оид ба бартараф намудани камбудиҳои низомӣ бонкӣ омода карда шуда, барои иҷро ба Бонк ирсол карда шуд. Аз ҷониби раиси БМТ Ҷ.Нурмаҳмадзода таъкид шуд, ки зарур аст камбудиҳои дар фаъолият ҷойдоштаро бартараф карда, иҷрои саривақтӣ ва сифатнокии Нақшаи чорабиниро таъмин намоянд. Ҳамзамон дар идомаи ҷаласа аз ҷониби С.Икромӣ барои саривақтӣ иҷро кардани супоришҳои мазкур ва расидан ба аҳдофи манфиатовар ба ҳозирин маърӯза пешниҳод шуд. Раис иброз доштанд, ки Раёсати Бонки давлатии амонатгузории ҶТ “Амонатбонк” эродҳои асоснок ва дастуру супоришҳои муфиди ба фаъолияти Бонк нигаронидашударо бо як ҳисси масъулият дарк намуда, Ҳукумати ҷумҳурӣ ва БМТро бовар мекунонад, ки ҷиҳати бартараф намудани камбудию норасоиҳои ҷойдошта тамоми тадбирҳои заруриро роҳандозӣ менамояд. Бонк кӯшиш менамояд, нишондиҳандаҳои молиявиро дар соли ҳисоботӣ босифат ва сари вақт таъмин намуда, барои расидан ба натиҷаҳои боз ҳам назаррас талош намояд.  

Маркази матбуоти БДА ҶТ «Амонатбонк»

МИҲДТ н.Темурмалик шикояти шаҳрванд Азамати Шамсулло-табиби беморхонаи «Истиқлол»-и ш.Душанбе, сокини деҳаи Оби ширини Ҷамоати деҳоти Кангурти ноҳияро бо номи «Аз бехонагӣ чӣ хел зан гирам?» (СССР, №14(551), 4.04.2019) бо ширкати шахсони масъул мавриди баррасӣ қарор дод. Номбурда тибқи китоби хоҷагии Ҷамоати деҳоти Кангурт дар оилаи падараш дар деҳаи Оби ширин ба қайд гирифта шудааст. Падараш Ш.Назаров бо аҳли оилааш дар асоси муроҷиати хаттӣ ба Ҷамоати деҳоти Кангурт дар навбати оилаҳои эҳтиёҷманди гирифтани қитъаи замини наздиҳавлигӣ номнавис шуда буд ва бо назардошти эҳтиёҷмандӣ 20.12.2011 аз ҳисоби заминҳои фонди манзили ҷамоат дар майдони 0,08 га қитъаи замин ба онҳо ҷудо гардид. Ҳоло бародари калониаш Самадов Абдулло барои гирифтани қитъаи замини наздиҳавлигӣ дар китоби бақайдгирии эҳтиёҷмандони замин дар Ҷамоати деҳоти Кангурт таҳти №625 ба қайд гирифташуда, вақтҳои наздик бо қитъаи замини наздиҳавлигӣ таъмин мешавад. Аммо худи Азамат барои гирифтани қитъаи замини наздиҳавлигӣ на ба Ҷамоати деҳоти Кангурт ва на ба МИҲДТи ноҳия муроҷиат накардааст. МИҲДТ омодааст дар ҳолати муроҷиати ӯ барои гирифтани қитъаи замини наздиҳавлигӣ тибқи тартиби муқарраршуда ва бо назардошти эҳтиёҷмандиашон аҳли оилаи онҳоро бо қитъаи замини наздиҳавлигӣ таъмин намояд.

Аслзода Э.М.,

раиси н.Темурмалик

Аз масъули саҳифа: Ин матлаб бо дархости хонандаи СССР-Ҷоншоев Бунёд, омӯзгори Гимназияи №1-и н.Дӯстӣ пешкаши хонандагон мегардад...

Сиёсати шарқӣ ё "Ostraum"

Усулҳои умумии сиёсати миллигароёни олмонӣ нисбати СССР ва халқҳои маскуни он, ҳанӯз дар солҳои 1920-30 муайян шуда буданд. Тибқи ин усулҳо СССР ба сифати мустамликаи олмонӣ таҳти унвони "Ostraum" матраҳ мешуд. Баъди сари қудрат омадани фашистон дар с.1933 "сиёсати шарқӣ” ба яке аз асоситарин самтҳои сиёсати давлатии Рейхи 3-ум табдил ёфта, дар Олмон марказҳои зиёди илмӣ таъсис дода шуданд, ки муносибатҳои қавмӣ ва сиёсати миллии ҳукумати СССРро мавриди омӯзиш қарор доданд. Дар авохири майи с.1941 вазорати таблиғоти Рейхи 3-ум ҳуҷҷатеро бо номи "Иқдомоти пешгирона зидди Русия" тартиб дод. Тибқи ин ҳуҷҷат, ба артиши олмонӣ дастур дода шуд ҳамвора таъкид кунанд, ки душмани Олмон халқҳои Иттиҳоди Шӯравӣ нестанд ва немисҳо барои озод кардани онҳо аз юғи болшевикон ба Русия қадам ранҷа кардаанд. Тибқи сиёсати шарқии Рейхи 3-ум, дар ҳудуди ҷамоҳири Осиёимиёнагии СССР мебоист рейхскомиссариати "Туркистон" таъсис дода мешуд. Албатта дар оғоз Фюрер ва дову дастааш ҳамкорӣ бо мардуми таркнажоди СССРро пешбинӣ накарда буданд. Чун туркон мардуми "ғайриориёӣ" маҳсуб меёфтанд, мебоист барои нозиҳо хизмат мекарданд. Лек баъди шикасти олмониҳо дар назди Маскав ва ҳуҷуми зимистонаи Артиши Сурх сиёсати Фюрер нисбат ба ақвоми таҳҷоии СССР тағйир кард. Немисҳо дарк карданд, "блитскриг" ба нокомӣ дучор шуд ва ҷанг зидди СССР тӯлонӣ хоҳад буд. Аз ин лаҳза, давраи нави сиёсати олмонӣ нисбати миллатҳои СССР оғоз шуд. Фармондеҳии олии Вермахт қарор дод, дар ҳайъати артиши олмонӣ дастаҳои мусаллаҳи хориҷиро аз ҳисоби қавму миллатҳои ғайрирус таъсис диҳад. Ин дастаҳо мебоист таҳти фармони афсарони немис меҷангиданд, то талафоти низомиёни олмониро камтар кунанд.