ХАБАРИ ДОҒ
Чоршанбе, Авг 28 2019

Ҳама 1 тараф, Балҷувону Ховалинг 1 тараф!

16.08.2019. Сафари ман ба Ховалинг ғайричашмдошт сурат гирифт: 1 кори зарур пеш омаду бояд рафта дар ҷояш онро ҳаллу фасл карда меомадам.

Соат бо вақти Душанбе 7:30 дақиқа. Ба терминали мусофиркашонии Чимтеппа омадем-мошинҳои байнишаҳрӣ аз Душанбе ба самти Балҷувону Ховалинг маҳз аз ҳамин терминал мерафтаанд. Сабабашро аз Абдулнабӣ, ронандаи мошине, ки киро кардам, пурсидам. Ӯ гуфт, мизоҷони асосии ин масир маҳз дар атрофи бозори «Корвон»-у «Саховат» кору зиндагӣ намуда, рафтуомад аз ин терминал барояшон осонтар аст. Дар пайи ин барои ронандаҳо ҳам ин кор сабук буда, мизоҷони ҳамешагиро метавонанд тавассути зангҳои телефонӣ низ рафта, аз ҷои лозимӣ савор кунанду бубаранд. Терминали «Озод транс», ки ҳоло тамоми хатсайрҳои байнишаҳрӣ аз пойтахт ба шаҳру навоҳии минтақаи Кӯлоб тавассути он равуо доранд, барои мизоҷони Балҷувону Ховалинг дур будааст…

Нархи роҳкиро аз Душанбе то маркази ноҳияи Ховалинг 70 сомонӣ. Чун дидам Абдулнабӣ аз ин маблағ заррае ҳам кам накард, маҷбур розӣ шудам. «-1 нафар мизоҷи ҳамешагӣ дорам. Ӯро аз Автовокзал рафта мегирему меравем»- гуфт ронанда. То ба самти Автовокзали шаҳрӣ рафта, он мизоҷро байни биноҳо кофтаву пайдо карда гирифтем, соат 9-и расо шуд. Ба роҳ баромадем. 

 

То Ховалинг дар 2 соату 45 дақиқа!

Соат бо вақти Ховалинг 11:45 дақиқа. Абдулнабӣ ҳанӯз дар Душанбе гуфта буд, ки моро тавассути роҳи таҷдидшуда ва нави Кангурт-Балҷувон-Ховалинг дар 3 соат бурда мерасонад, аммо худ рекорд зад-дар 2 соату 45 дақиқа моро то маркази Ховалинг овард! Офарин! Инҷо бояд таъкид намуд, ки роҳи қаблан харобу валангори байни маркази н.Балҷувон ва Ховалинг ҳоло таҷдид ва азнавсозӣ карда шуда, масирро хеле наздик кардаасту ҳаракат аз болои он ба кас фараҳ мебахшад. Агар гӯям, ки ин роҳ ҳоло мисли оина аст, хато намекунам.

Бояд гуфт, ки маросими ботантанаи ба истифода супоридани ин роҳ субҳи рӯзи 6.08.2019 бо ширкати Президенти ҶТ Эмомалӣ Раҳмон сурат гирифта, пудратчии роҳи автомобилгарди Кангурт-Балҷувон-Ховалинг ширкати «Чайна роуд»-и Чин аст. Тибқи лоиҳа, дар масофаи 43 километри роҳ 6 пул бо дарозии 455 метр, 5 истгоҳ ва дигар инфрасохтори зарурӣ бунёд шуда, роҳ ба категорияи чоруми роҳсозӣ мутобиқ аст. 2 кӯпрук бо дарозии 339 метр аз нав сохта шуда, 4-тои дигар бо дарозии 114 метр таъмир шуданд. Корҳои сохтмонӣ дар роҳи автомобилгарди Кангурт-Балҷувон-Ховалинг моҳи июли соли 2018 оғоз гардида, пеш аз мӯҳлат бо сатҳу сифати баланд ба истифода дода шуд. Ин роҳ тӯҳфаи арзандаест ба сокинони ин 2 ноҳияи дурдаст дар арафаи 30-солагии Истиқлолияти давлатии ҶТ.

Ховалинг шаҳр шуд!

   Соат бо вақти Ховалинг 12:00 дақиқа. Ронанда Абдулнабӣ маро дар маркази ноҳия дар назди боғи нави фарҳангиву фароғатӣ фаровард. Ман, ки ҳанӯз 2 сол пеш ба ин ноҳия омада будам, ҳоло Ховалингро нашинохтам, гулгаштҳои нав дар шафати Гулгашти ҷавонон, рамзҳои давлатӣ-Парчам ва Нишони миллӣ, ки ба тозагӣ қомат афрохтаанд, маркази шаҳраки Ховалингро оро дода, шукуҳу шаҳомати хосса зоҳир менамуданд. Аз ҳама аҷиб барои ман он буд, ки то ба ин дам дар даромадгоҳи маркази ноҳия навиштаи «Деҳаи Ховалинг» насб шуда буд, имрӯз бошад дар даромадгоҳи ноҳия «Шаҳраки Ховалинг» навишта шудааст: Ховалинг воқеан ҳам акнун шаҳрак шуд! Муборак бошад!

 

Аз таҷдиди беморхона то бунёди Амфитеатр

   Соат бо вақти Ховалинг 15:00 дақиқа. Бо дӯстонам шаҳракро чарх задем. Агар қаблан танҳо 1 бинои баландошёна дар маркази ноҳия вуҷуд дошт, ҳоло шумораи онҳо афзуда, боз ҳам сохтмони чанд бинои дигари баландошёна идома дорад. Бинои беморхонаи марказӣ низ таҷдиду таъмир шуда, ҳоло бо имконоти наву замонавӣ дар хизмати мардум аст. Кӯчаҳои шаҳрак низ таъмиру асфалтпӯш гашта, дар паҳлӯи варзишгоҳи марказӣ Амфитеатр ва толори муосири варзишӣ бунёд шудааст. Майдончаҳои нави варзишӣ, сохтмони мактабҳои миёна ва биноҳои нав, меҳмонхонаҳои муосир аз қабили «Чилчанор» (бунёдкораш соҳибкор Қаландар Одинаев) ва даҳҳо иншооти дигар низ айни замон дар хизмати мардуми Ховалинганд. Зимни сафари сарвари давлат ба ин ноҳия танҳо дар 1 рӯз 14 иншооти нави ҳаётан муҳим расман ифтитоҳ ва ба истифода дода шуд, ки рақами рекордист! Браво, Ховалинг ва ховалингиҳо!

Ҷамила Ҳусейнова, СССР

Душанбе-Ховалинг-Душанбе, 

16.08.2019

 

Чоршанбе, Авг 21 2019

   Ин ҳафта ба феҳристи идҳои мавҷуда боз идҳои нав зам шуданд. 

   Тибқи Амри Президенти ҶТ ҳамакнун, ҳар сол дар кишвар шанбеи сеюми моҳи август Иди ангур ва шанбеи сеюми моҳи сентябр Иди себ баргузор карда мешавад. 14 сентябр Иди каду ҷашн гирифта шуда, ҳафтаи 1-уми моҳи сентябр бошад дар мамлакат Иди асалу харбуза таҷлил мегардад. Муборакамон бошад!

 

Чоршанбе, Авг 21 2019

 

Сари моҳи август дар Интернет чашмам бад-ин ғазали устод Саидалӣ Саиди ангубинсухан уфтод:

Агар аз барги гул хуни ҳаё рафт,

Ҷилои шабнам аз вай бар ҳаво рафт.

Падар бар духтараш илме набахшад,

Бидон, ин миллати мо зери по рафт!

Падарҳо дидаам бисёр-бисёр,

Занаш ғар, духтаронаш бе сафо рафт.

Намедонӣ, чаро аз домани Зан,

Пайи хидмат чӣ мардони Худо рафт?!

Саҳеҳ он вақт чашми ин ҷаҳон шуд,

Ки оҳи Модари вай то само рафт.

Фитад дар хок мард аз авҷи гардун,

Падар мазлуму аз вай бе дуо рафт.

Бибӯс аз пиччаҳои Модари хеш,

Кам андар кам дуояш бехато рафт.

Тамоми ганҷи олам дар каф орӣ,

Чун аҳли хонаат роҳи Худо рафт.

Магӯ бар худ, ки мехи ин ҷаҳонӣ,

Аз ин олам басо шоҳу гадо рафт.

Иҷорат омадем, Пири Ҳисорӣ,

Агар аз дори дунё Мустафо рафт!

Чун ғазалро хондам, дар поёнаш нигоштам: Шиботи борон!

Устод Саидалӣ навишт: Сайёдҷон, ҳазорҳо Ташаккур, ки назаре ба мо намудӣ! Аммо, хоҳиш, аз " ШИБОТИ БОРОН " бигӯ, ки ҳам дили мо оромиш ёбад ва ҳам аз хонандагон.

Хоҳиши ӯро ба ҷон пазируфтам: Дуруд, ё дӯсти гиромӣ! Нахустин бор шиботи боронро аз падари меҳрубонам шунида будам дар кӯдакӣ. Бо ҳам дар боғи нозанинамон сайр мекардем, ки гул-гули борон шуд. Боронаки диловезе маҳин-маҳин сабзаву гулбаргҳоро навозиш мекард. Падари гиромиям гуфтанд: Шиботи боронро тамошо бикун, бачам. 

Ин сухан дар ёди ман аз он рӯзгорон мондааст. Эй, ҳазорон дуруд, ё дӯсти нозанинсухан!

Устод Саидалӣ навишт: Қурбони Сайёди ҷон шавам ва Худой падарро махфират кунад, ки ин ШИБОТИ БОРОНро чун гавҳаре ба адабиёти форсӣ ёфтаву бахшидааст. Оре, ин ибора бисёр тасвири зебои боронро дорад, ки шояд дар дигар забонҳо набошад. Дар забони мардуми мо чӣ гавҳарҳое нуҳуфтаанд, Сайёди ҷон, ки мо бехабарем! Ҳазорҳо ташаккур ва ХУДОВАНД падари бузургворро дар ҷавори раҳматаш гирифта бошад! ОМИН!!!

Дар посух навиштам: Ҳазорон дуруд, ё дӯсти сухантар, ки моро ба ёди шиботи борону он рӯзгорони зебо бибурдед. Худо нигаҳбон!

Устод Саидалӣ навишт: Боз ҳам сипоси бепоён, Сайёди ҷон!

Ман бинавиштам: Дуруд бар Шумо!

Шаби 04.08.19 дар месенҷер нома кардам: Дуруд, ё дӯсти гиромӣ, бобои Саидалӣ! Чун аз назари мо гуфтед, инро ёдовар шавам, ки 20 сол пеш аз ин “Тафсири зарнигор” ҳар ҳафта дар “Адабиёт ва санъат” бо назари мо рӯйи чоп меомад. Он зарнигорию озарнигирии бисёр зебову дилрабо ҳамеша пеши рӯйи мост. Он ҳама рахшу дурахши диловез маро хушии бисёр бахшидаст. Аз он рӯзгор то бад-ин замон назари мо ба шеъри дӯсти гиромӣ дигар нашудаст.

Дуруд бар Шумо, Худои меҳрубон ҳамеша нигаҳбон!

Устод бомдоди 04.08.19 нома кард: Илоҳӣ, Омин, Сайёдҷон! Худой, Шуморо ҳамеша ёри Қуръон ва ЗОТИ Худаш гардонад! Охир, ман Шуморо ғоибона хело хуб мешиносам. Иншоаллоҳ, ба умеди дидор! Боз ҳам СИПОСИ бешумор!!! 

Ба хурсандӣ нигоштам: Бо ин бомдоди чунин хушҳаво дуруд мефиристамат, ё дӯсти бисёр гиромӣ!

Пагоҳӣ устод Саидалӣ нома кард: Қурбонатон, Сайёди ҷон! Овози телефонамро, ки намози бомдод паст карда будаам, садои ирсолатонро ҳоло дидам. Худованд субҳи Шуморо субҳи мардон ва рӯзи Шуморо ҳамеша хандон гардонад! ОМИН!

Бомдоди 06.08.19 посух гардондам: Худои нозанин ҳамеша нигаҳбонат, эй дӯсти арҷманд!

Чоштгоҳи 06.08.19 устод навишт: Бисёрҳо ТАШАККУР!...

Эй, дареғо, дӯш бишнидам, ки 10.08.19 ёру дӯстон устоди гиромӣ Саидалӣ Саидро бо сели ашк аз ин ҷаҳон гусел карданд...

Ҳар 2 дидам селбанде,

Ҳар 2 дидам селканде!

Селканде ҳар 2 дидам,

Селбанде ҳар 2 дидам!...

Сайёд ҒАФФОР

13.08.19

 

Чоршанбе, Авг 14 2019

   Дар шаҳри Панҷакент бо ширкати ошпазони шаҳру деҳот Фестивали оши палав баргузор гардида, ғолибон дар чанд бахш муайян ва қадрдонӣ карда шуданд.  

   Дар Фестивали мазкур 14 нафар ошпазон иштирок намуда, ҳунари ошпазии худро намоиш доданд. Раиси шаҳри Панҷакент Ислом Зиёзода аз маҳсули дастони ошпазҳо шинос гардида, изҳор дошт, ки оши Панҷакент воқеъан дар Тоҷикистон камназир аст. 

   - Соли оянда ҷашни 5500 солагии Саразм аст ва ҳар яки мо меҳмононро бо оши тоҷикӣ меҳмондорӣ хоҳем кард. Бояд меҳмонони хориҷӣ бубинад, ки тоҷикон дар ошпази чӣ қадар маҳорати хуб доранд ва ин таъоми моро ҳатто ЮНЕСКО эътироф кардааст,- гуфт Ислом Зиёзода. 

   Фестивал дар чанд бахш: оши беҳтарин, ошпази беҳтарин, беҳтарин сабзирезакун баргузор шуд. Дар фестивал меҳмонони хориҷӣ ҳам даъват ва иштирок намуда, аз оши тоҷикӣ бо камоли майл чашиданд. 

 

Хуршед Фозилов, махсус барои СССР аз ш.Панҷакент

 

Чоршанбе, Авг 14 2019

17 август устод Темур Зулфиқоров-шоир, нависанда, дармматург, сенариянавис, барди Русия, ки аз табори Тоҷиконанд, зодрӯз доранд. Чакидаҳои Шайх Хоҷа Насриддин ҳамчун табрикоти ишон пешкаши аҳли завқ гардид. Мо Метавонем!

                                                                                 

  МАСНАВИҲОЕ, КИ АЗ МӮРЧА ХУРДТАР… АЗ АЛАФАК НОЗУК

                       ВА АЗ ГАРД ҲАМ САБУКТАРАНД

 

 

 Хоҷа Насриддин ва чаҳор писари ӯ

 

Хоҷа Насриддин чаҳор зан дошт…

Зани аввала ба вай писаре ҳадя кард…

Писар калон шуд ва ба Па́года (Ибодатгоҳи буддоиҳо) рафт…

Зани дуввум низ ба вай писар ҳадя кард.

Писар бузург шуд ва ба Синаго́га рафт…

Зани сеюм ҳам ба вай писар туҳфа кард…

Вай калон шуд ва ба Калисо рафт…

Зани чаҳорум низ ба вай писар бахшид…

Писараш ба Масҷид рафт…

 

Эҳа!..

 

Рӯзе Хоҷа дар қуллаи Кӯҳи тилло нишаста буд…

Бо хурсандӣ менигарист, ки чӣ тавр фарзандон сӯи ибодатгоҳи хеш равонанд… 

Ба чаҳор тарафи дунё…

 

Оре!..

 

Дар олам чи қадар инсон бошад, ҳамон қадар роҳ аст сӯи Парвардигор…

Пири хирад як оҳ кашиду гуфт:

-Худовандо!.. 

Ба ман зани панҷумро ҳадя кун, то вай бароям духтаре ҳадя кунад…

Зеро танҳо духтар метавонад пирии маро дар қуллаи Кӯҳи Тилло осонтар кунад…

Умрамро дар ҳамон кулбаи хасдаргил…

Ки ба ахтарҳо наздик аст…

                                                     ***** 

 

                                     

  Шавҳари пиру зани ҷавон

 

Хоҷа Насриддин, ҳамин, ки шавҳари пири зани ҷавони хундарҷӯшро дид, табассум карду гуфт: 

-Бародар! Эҳтиёт бош, хамиву болоравиҳои мағзи ту дар хамиву болоравиҳои бадани ин ҷавонзан ғӯта нахӯранд!..

 

Эҳа!.. 

                                         *****

                             

Асои қадимаи Хоҷа Насриддин

 

Дар айёми пирӣ ягона дӯсти содиқ барои Хоҷа Насриддин асои ӯ буд: як асо аз чӯби чаҳормағзи қадима…

Пири хирад мепурсид аз асо:

-Дӯсти ман ҳастӣ?..

-Мо дар се по рӯи олам мегардем…

-Ё душманӣ?..

-Ки нагзорӣ ба бағали замини азиз уфтам?..

-Ва бо тани худ мӯрчагон ва кирмҳои доимгуруснаро сер кунам…

                                                     *****

 Исои Масеҳ ва асри XXI

 

Хоҷа Насриддин гуфт:

-Як суол матраҳ аст дар асри XXI, 

Ки басо дӯст дорад Пули тиллоро…

Он ҳам ин аст, ки як маркаби сафеди ором

Ва ҳамон яктаҳи кӯҳнаи Исои Масеҳ –

Оқибат лимузинҳои локзада гардиданд!..

Ва низ либосҳои гаронвазни зарандуди ходимони калисо… 

 

Оре!..

 

Падар қашшоқ, вале покиза аст, қоматаш рост…

Аммо писар доро, аз вазни тилло  - миёнаш куз шуда…

                                         *****

 

  Хоҷа Насриддин дар бораи барҳам хӯрдани СССР

 

Хоҷа бо андӯҳи зиёд ин рубоиро хонд:

 

Онҳоеро, ки Пиряхро васф кардаанд,

Онҳоеро, ки Пиряхро лаънат хондаанд, 

Ҳамаро бо худ бурд он Пирях…

Он Пиряхеро, ки аз ҷониби хоин Горбачев,

Тарканда шуд ва ба яғмо рафт…

Беному нишон рафт сӯи Уқёнуси яхбаста…

Мисли Элладаи Қадим… Абадӣ!.. Билкулл!..

                                     *****

 

    Меҳмонҳои якумра

 

Мебахшам ба Александр Судс,    рассом, баҳрнавард, нависанда

 

Уқёнусҳои беканор дар хоби баҳрнаварди куҳансол медароянд…

Субҳ вай рӯи болин хокаи намак мебинад…

Намак шояд аз пош хӯрдани обҳои уқёнус аст ё аз ашк…

Ман Меҳмонҳои Якумраро интизор будам…

Оре, мани оянда ба хокистар табдилшаванда, зуд аз чашмҳо ғайбзананда…

Меҳмонҳои Якумраро интизор будам…

Дар ҳамон кулбаи хасдаргили ларзон, ки дар теғаи Кӯҳи Тилло ҷойгир аст…

 

Хеле интизорӣ кашидам…

 

Ниҳоят, як шаб, ки садои  ҳазорзабон  ба гӯш мерасид…

Онҳо ба кулбаи эҳзони ман қадам гузоштанд…

 

Конфутсий ва Лао Тсзи…

Афлотун ва Суқрот…

Шоҳ Салмон ва Шоҳ Довуд…

Хайём ва Румӣ…

Сергий Радонежский ва Серафим Саровский…

Шопенгауэр ва Нитсше…

Маҳатма Ганди ва Такур…

 

Эҳа!..

 

Чи чеҳраҳои нурафшону ширин ва медалзеб!..

Либосҳо низ фохиру зебо ва ҳафтранг чун товус…

Оҳиста мавҷ мезананд… нозук…

 

Худовандо!..

 

Гохо чунин менамояд, ки хирадмандони асрҳои гуногун

Танҳо бо либоси худ фарқ мекунанд…

Ё худ ин як нафар пири хирад аст дар либосҳои гуногун…

 

Ва ногаҳ!..

 

Хишир - хишири либосҳо ба гӯш мерасад…

Вале дар кулбаам касе нест…

Меҳмонҳо омаданд, вале соҳибхона нест…

 

Ман паси буттаи хушобуранги гули ёси форсӣ паноҳ меёбам…

Ман – гадоям!..

Бо  нима ҷон!..

Донишам ҳам кам...

Руҳам шикаста…

 

Чиҳо мегӯям… ба Меҳмонҳои Якумра?..

Бо чӣ ҳикмати парешоне  ба ҳайрат мегузорам?..

 

Ана чаро ман аз кулба гурехта

Пушти буттаи ёс панаҳ ҷустам…

 

Пилҳо омаданд…

Мӯрчаҳо аз тарси зери пои онҳо маҷақ шудан ҳар сӯ гурехтанд…

 

Ман ба Меҳмонҳои Якумрӣ… ба либосҳои фохири онҳо менигарам…

Онҳо ку аз кишварҳои офтобӣ омадаанд,

Он ҷо ки Хирад – Духтари Офтоб аст…

Танҳо бохирадони Русияи Пурбарф дар тан либоси гаронвазн доранд…

 

Онҳо маро меҷустанд…

Зеро дӯст медоштанд, табассумкунон…

Чун падару модар айёми бачагиам…

Ниҳоят инҳо низ рафтанд…

 

Рӯи мизи қадимаи бухороӣ…

Дар сояи чанори ҳазорсола…

Дастнависи масалҳову шеърҳои тоза навиштаи ман хуфта буд…

 

Вай гум шуд…

 

Наход онро аккаи дузд ба осмонҳо бурда?..

Ё мушаке ба ҳуҷраи худ?..

Ё онҳо варо бо худ гирифта?..

Шояд барои ҳамин омада буданд?..

Намедонам, намедонам, вале тахмин мекунам… умед мекунам…

 

Эҳҳа!..

 

Шояд шохаи ёс меларзаду барги гулаш мерезад?..

Ё шояд манам гирёну нолон…

Худоё!..

Падари якумрии мо!..

Онҳо рафтанд…

Илтиҷо дорам: Ту нарав…

 

                                                               Аз русӣ тарҷумаи Нур Табаров

 

 

 

 

Панҷшанбе, Авг 08 2019

   14 сентябри соли ҷорӣ аз соати 15.00 то 21.00 дар майдони «800-солагии Москва»-и назди Муассисаи давлатии «Театри опера ва балети ба номи С.Айнӣ» Фестивал-намоишгоҳи 8-уми автомобилҳои коллексионии «Авто Ретро Душанбе» баргузор хоҳад гашт. Дар ин бора қарори дахлдори раиси ш.Душанбе Рустами Эмомалӣ ба тасвиб расида, ин чорабинӣ ба 28-умин солгарди Истиқлолияти давлатии ҶТ бахшида шуда аст.

  Бояд таъкид намуд, ки дар ин Фестивал-намоишгоҳ аз 80 то 120 автомобилҳои нодиру камёфт ва коллексионӣ, ки солҳои 1931-1970 истеҳсол шудаанд, ба маърази тамошобинон ва меҳмонони пойтахт гузошта мешаванд. Фестивал-намоишгоҳи «Авто Ретро Душанбе» ҳамасола то 30 ҳазор нафар дӯстдорони автомобилро ба ҳам ҷамъ оварда, дар он соҳибони автомобилҳои кӯхансол аз тамоми кишвар ширкат меварзанд.  

 

саҳ 8 аз 54

Китобҳо

Flag Counter