Субҳи дирӯз Муҳаммадтақӣ Собирӣ, сафири нави Ҷумҳурии Исломии Эрон дар Ҷумҳурии Тоҷикистон вориди Душанбе шуд ва расман ба унвони сафири ин кишвар ба фаъолият оғоз намуд.
Чуноне ки ба мухбири СССР дар бахши равобит бо матбуоти сафорати ин кишвар дар Душанбе хабар доданд, қарор аст имрӯз Муҳаммадтақӣ Собирӣ бо Сироҷиддин Муҳриддин, вазири  корҳои хориҷии  ҶТ мулоқот ва эътимодномаи хешро ба ӯ супорад.
Ҳамчунин, сафири нави ҶИЭ Муҳаммадтақӣ Собирӣ пагоҳ, рӯзи 15.03. 2019 дар дидор бо Президенти ҶТ Эмомалӣ Раҳмон дар маросими расмӣ низ эътимодномаи хешро  тақдим хоҳад кард.

 Нуриддин Саид, вазири маориф ва илми мамлакат дар ҷамоати Сангтӯдаи н.Данғара аз ҳисоби худ 1 мактаб ва 1 боғчаи кӯдакона бунёд карда, инчунин ният дорад яке аз кӯчаҳои маҳалли зодгоҳашро мумфарш низ намояд.
 Гуфта мешавад, ки бо фарорасии гармӣ корҳои ободонӣ ва мумфаршкунии яке аз кӯчаҳои ин ҷамоат низ оғоз гардида, ин тасмими вазири Тоҷик дар пайи дастуру супоришҳои Президенти ҶТ Эмомалӣ Раҳмон дар мавриди обод намудани маҳалли зисту зодгоҳ дар арафаи 30-солагии Истиқлолияти ҶТ сурат гирифтааст.

Хабарнигори мардумии СССР, муаллим Назари Наврӯз аз ноҳияи Фирдавсии пойтахт дар меҳмонии газетаи мардумии СССР гуфт, ки дар асоси Қарори Ҳукумати Ҷумҳурии Тоҷикистон аз 9.02.2019 «Дар бораи ворид намудани тағйиру иловаҳо ба Қарори Ҳукумати Ҷумҳурии Тоҷикистон» аз 30.04.2018, №207-7 бояд дар давоми 6 моҳ симкортҳои ҳамаи ширкатҳои мобилӣ бо шиносномаи нави намунаи соли 2014 аз нав ба қайд гирифта шаванд. Дар ин қарор аз ҷумла омадааст, ки «Хадамоти алоқаи назди Ҳукумати Ҷумҳурии Тоҷикистон барои ба номи як шахс ба расмият даровардани на зиёда аз ду симкорт дар ҳамаи операторони хизмати алоқаи барқӣ ва азнавбақайдгирии симкортҳои шахсоне, ки шиносномаи шаҳрванди Ҷумҳурии Тоҷикистон намунаи соли 2014-ро надоранд, дар давоми 6 моҳ чораҷӯӣ намояд». Дар ин ҷо мехостам ба 1 саволи худ аз Хадамоти алоқаи назди Ҳукумати ҶТ ҷавоб гирам: Магар шарт аст шахсоне, ки синнашон аз 60-70 сола боло рафтааст, ба хотири азнавбақайдгирии симкорт шиносномаи нав бигиранд? Охир, шиносномаи ин гуна одамон бемуҳлат аст-ку?! Хоҳиш дорам, ки раҳбари Хадамот, муҳтарам Бек Сабур ба ин суол посух диҳад.

Полковник Владимир Квачкови 71-сола, фармондеҳи собиқи бригадаи 15-уми спетснази ГРУ (Главное разведывательное управление) дар ҳавзаи низомии Туркистон, ки 18.08.2017 ба 1,5 соли зиндон маҳкум шуда буд, рӯзи 19.02.2019 аз маҳбаси Мордовия озод шуд…

   Дар моҳи марти соли 2019 дар қаламрави кишвар 1 қатор мусобиқаҳои ҷумҳуриявӣ, чемпионати Ҷумҳурии Тоҷикистон дар доираи Тақвими ягонаи чорабиниҳои оммавию солимгардонӣ ва омодагии варзишгарон ба мусобиқаҳои ҷумҳуриявию байналмилалӣ дар назар дошта шудааст.
   Чуноне ки ба мухбири мо дар маркази матбуоти Кумитаи кор бо ҷавонон ва варзиши назди Ҳукумати ҶТ хабар доданд, аз оғози моҳи марти соли ҷорӣ мусобиқаи интихобии шаҳру ноҳияҳои тобеи ҷумҳурӣ оид ба намудҳои варзиши дастхобонӣ дар н.Шаҳринав, гӯштини тарзи озод дар ш.Ҳисор, гӯштини миллӣ дар ш.Турсунзода, таеквадо ВТФ дар ш.Ҳисор, гӯштини самбо байни наврасони солҳои таваллудашон 200- 2005 дар ш.Ҳисор ва н.Рашт доир мегардад. Дар ш.Душанбе чемпионати Ҷумҳурии Тоҷикистон оид ба таевкандо байни калонсолон ва ҷавонон (мардон ва бонувон) дар пойтахт роҳандозӣ гардида, инчунин баргузории мусобиқаи ҷумҳуриявӣ од ба тенниси рӯи миз ва футболи хурд миёни варзишгарони имконияташон маҳдуд ба нақша гирифта шудааст.
   Дар ин мусобиқаҳо дастаҳои шаҳру ноҳияҳои тобеи ҷумҳурӣ барои роҳхат пайдо намудан ба даври ҷумҳуриявӣ миёни ҳам рақобат менамоянд. Чорабиниҳои мазкур ба ифтихори ҷашни байналмилалии Наврӯз 2019 бахшида шуда, иштироки дастаҳо дар тамоми шуру ноҳияҳои кишвар дар назар дошта шудааст.

    Ҳафтаи гузашта ҷамъбасти озмуни кушоди қаблан эълоншуда бо иштироки Сарвазири мамлакат Қоҳир Расулзода ва Раиси ш.Душанбе Рустами Эмомалӣ ҷиҳати интихоби беҳтарин лоиҳаи ангоравии боғи «Истиқлолият» бо майдони маҷмааи меъмории рамзи «Истиқлолият ва Озодӣ» дар ш.Душанбе баргузор гашт. Дар маҷмӯъ дар ин озмуни кушода 32 лоиҳа пешниҳод гардида, баъди омӯзиши аъзои комиссия 6 лоиҳа барои омӯзиш ва баррасӣ ба даври дуюм роҳ ёфтанд. Дар ниҳоят 3 лоиҳа ба гирифтани ҷойҳои 1-ум, 2-юм ва 3-юм сазовор гаштанд.
ҷамъбаст гардид.
  Ҳамин тариқ, Лоиҳа бо рамзи «Тоҷ», ки аз ҷониби гурӯҳи эҷодии Сарраёсати меъморӣ ва шаҳрсозии Мақомоти иҷроияи ҳокимияти давлатии ш.Душанбе таҳти роҳбарии раиси ш.Душанбе Рустамӣ Эмомалӣ таҳия шудааст, бо гирифтани 45 хол сазовори ҷойи якум гашт. Ин лоиҳа бо бартариҳои афзалиятдор ифодакунандаи тамоми талаботи озмун   ва рамзи давлатдорию таъриху тамаддуни оламшумули миллати тоҷик  арзёбӣ гардид. Баландии муҷассамаи маҷмааи меъмории рамзи «Истиқлолият ва Озодӣ» дар маҷмӯъ 121 метрро ташкил дода, пояи муҷассама пирамидаи ҳаштрӯя буда, аз 7 даромадгоҳ иборат мебошад. Дар дохили муҷассама осорхона ва толорҳои баргузории чорабиниву маҳфилҳо ҷойгир мешаванд. Дар муҷассама тоҷ рамзи давлатдорӣ, Истиқлолият, соҳибдавлативу соҳибтамаддунӣ ва таърихи омӯзандаи миллати куҳанбунёди тоҷикро таҷассум мекунад.
        Боғи «Истиқлолият» бо майдони маҷмааи меъмории рамзи «Истиқлолият ва Озодӣ» дар ш.Душанбе бахшида ба ҷашни 30-солагии Истиқлолияти давлатии Ҷумҳурии Тоҷикистон дар қисмати марказии пойтахт, дар қитъаи замини масоҳаташ 30,0 гектар бунёд карда мешавад.
   Ин иншооти муҳташам аз минбар, дарвозаи марказӣ ва дарвозаҳои шимолию ҷанубӣ, фаввораҳо, шаршара, деворнигора, айвончаҳо, майдони баргузории роҳпаймоиҳо, гулгашт, ҳавзҳои декоративӣ бо наҳрҳо, таваққуфгоҳ ва ғайра иборат мешавад. Дар ҳудуди боғ зирк, сиёҳгилаи японӣ, ирғай, шамшоди ҳамешасабз, буттаҳои тобистонсабз, барфбуттамеваи сафед, ёсумани боғӣ, изғичи печон, бушол ва дигар намуди гулу бутта ва дарахтони нодир шинонида мешаванд.