7 июни соли 2021 дар Бонки миллии Тоҷикистон таҳти роҳбарии Муовини якуми Раиси Бонки миллии Тоҷикистон Нуралиев Ҷамолиддин Камолович, бо иштироки Муовинони Раиси Бонки миллии Тоҷикистон Толибзода Фирдавс ва Накҳатзода Моҳбону, инчунин роҳбарони сохторҳои калидии БМТ барои ташкилотҳои қарзии молиявии кишвар Тамсилаи (модели нав) мутавозуни ниҳодии шаффофияти гардиши воситаҳои асъории Маркази миллии протсессингии интиқоли маблағҳо (ТМНШГВАММПИМ) муаррифӣ карда шуд.
Нахуст Муовини якуми Раиси Бонки миллии Тоҷикистон Ҷамолиддин Камолович оид ба мақсадҳои асосии ТМНШГВАММПИМ, аз ҷумла таъмини шаффофияти ниҳодӣ ва рақобати солим дар бозори дохилии асъор, нигоҳ доштани таъмини мутавозунии дастрасӣ ба воситаҳои асъорӣ маълумоти мухтасар пешниҳод намуд. Ҷамолиддин Камолович таъкид бар он дошт, ки ҳадаф аз таҳия ва пешниҳоди ин тамсила тақвият дар самти дастрасӣ, шаффофият ва усули ягона барои ҳама ташкилотҳои қарзии молиявӣ, муътадил нигоҳ доштани қурби пули миллӣ нисбат ба асъори хориҷӣ, пешгирии хавфҳои эҳтимолии асъорӣ, бартараф намудани омилҳои инсонӣ, беҳтар кардани нишондиҳандаҳои ташкилотҳои қарзии молиявӣ дар рейтинги байналмилалӣ, вусъат додани ҳисоббаробаркуниҳои ғайринақдӣ ва бо ин восита коҳиш додани ҳиссаи пули нақд дар муомилот, беҳтар кардани дастрасии аҳолӣ ба хизматрасониҳои бонкӣ, баланд бардоштани эътимоди аҳолӣ ба хизматрасониҳои бонкӣ, баланд бардоштани саводнокии молиявии аҳолӣ ҷиҳати замина гузоштан ба рушди низоми бонкӣ дар сатҳи сифатан наву муосир мебошад.
Тавре дар идома Муовини Раиси БМТ Моҳбону Накҳатзода зикр кард, тамсилаи мазкур барои рушди ҳисоббаробаркуниҳои ғайринақдӣ тавассути зиёд шудани амалиётҳои интиқолӣ дар бозори кортҳои пардохтӣ боис гардида, ба баланд бардоштани маърифати рақамии молиявии аҳолӣ оварда мерасонад ва ба ин васила дастрасӣ, истифодабарӣ ва сифатнокии хизматрасониҳои молиявиро вусъат бахшида, фарогирии куллии молиявии аҳолиро таъмин менамояд.
Сипас, ба таваҷҷуҳи иштирокдорон дар мавзӯи ТМНШГВАММПИМ аз ҷониби масъулини Департаменти идораи захираҳои байналмилалӣ ва сиёсати қурби асъори Бонки миллии Тоҷикистон дар шакли рӯнамоӣ маълумоти васеъ пешниҳод гардид, ки дар он дороиҳои асъории ташкилотҳои қарзии молиявӣ, аз байн рафтани омилҳои инсонӣ, коҳишёбии хавфҳои асъорӣ, диверсификатсия ва афзоиш ёфтани даромади ташкилотҳои қарзии молиявӣ, рушди ҳисоббаробаркуниҳои ғайринақдӣ, камшавии талабот ба эмиссияи пули нақд, рушди ҳаҷми интиқол тавассути кортҳо, таъмини шаффофият, зиёд гардидани сандуқи амонатӣ ва сандуқи қарзии ташкилотҳои қарзии молиявӣ, тақвият бахшидани чораҳои зиддиковидӣ, рушди хизматрасониҳои фосилавии бонкӣ, коҳишёбии хавфи МҚД/МТ/МПСҚО, баланд бардоштани эътимоди аҳолӣ ба низоми бонкӣ ва баланд бардоштани маърифати молиявии аҳолӣ таҳлил ва мавзӯи муҳокима қарор дода шуд.
Муовини якуми Раиси БМТ зимни муҳокимаронӣ таваҷҷуҳи намояндагони ташкилотҳои қарзии молиявиро ба чанд нуктаи муҳим, ки тамсилаи мазкур имкон медиҳад, аз қабили ташкили шароити мусоид ва ҳавасмандгардонии ташкилотҳои қарзии молиявӣ ба тамсилаи солими бонкӣ, тағйир ёфтани биниш ва миссияи ташкилотҳои қарзии молиявӣ оид ба беҳтар намудани нишондиҳандаҳои бонкӣ, зиёд намудани тамоюли рушди ҳисоббаробаркуниҳои ғайринақдӣ, ташаккул додани буферҳои ҳимоявӣ, коҳиш додани осебпазирии ташкилотҳои қарзии молиявӣ аз шокҳои берунӣ, баланд бардоштани самаранокии ташкилотҳои қарзии молиявӣ дар рушди миёнаравии молиявӣ ва ба ин васила дар асоси омӯзиши рафтори истеъмолкунандагон ба роҳ мондани стратегияи фаъолият ҷалб намуд.
Дар муҳокимаронии ТМНШГВАММПИМ роҳбарони ташкилотҳои қарзии молиявӣ, аз ҷумла Раиси Раёсати БДА ҶТ “Амонатбонк” Сироҷиддин Икромӣ, Раиси ҶСК “Алиф Бонк” Абдулло Қурбонов, Муовини якуми Раиси ҶСК “Ориёнбонк” Шуҳрат Исматуллоев, Раиси ҶСП Бонки “Арванд” Шоира Содиқова, директори генералии ҶСП ТАҚХ “Ҳумо” Фирдавс Маюнусов вобаста ба тартиби роҳандозии Тамсилаи нав ба суолҳои худ посухҳои мушаххас гирифта, барои ҷолибтар гардидани он фикру мулоҳиза ва пешниҳоди худро баён доштанд.
Бо натиҷагирӣ аз ҷаласаи корӣ Муовини якуми Раиси Бонки миллии Тоҷикистон Ҷамолиддин Камолович дар хотима чунин изҳор кард: “Вақти он расидааст, ки ташкилотҳои қарзии молиявӣ аз тамоми имконоти фароҳам овардашуда бо истифода аз механизми шаффоф, ки таъсири омилҳои инсониро дар низом аз байн мебарад, барои беҳтар кардани нишондиҳандаҳои молиявӣ, роҳандозӣ намудани фаъолияти мустақилона ва ба ин васила барои ноил шудан ба эътимоди аҳолӣ ва хубтар кардани сифати хизматрасонӣ ва беҳтар намудани дастрасии молиявии аҳолӣ саъю талош варзида, рӯ ба рушд оварем”.
Шуъбаи матбуоти БМТ
Аз лиҳози моҳият роҳи Душанбе — Чанок дар ҷисми мамлакат шабеҳи шоҳраг буда, кишварҳои ҳамсоя, бандарҳои баҳрии қаламрави Осиёву Аврупоро ба ҳам пайваст намуда, барои ҳамлу нақли байналмилалӣ имконият фароҳам сохтааст.
Бо мақсади дар ҳолати хуб нигоҳ доштани он тибқи шартномаи консессионӣ нигоҳдории роҳи автомобилгарди Душанбе - Чанок ба зиммаи филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон вогузор аст.
Далелҳои зиёд мавҷуданд, ки маҳз ба шарофати фаъолияти пурмаҳсули кормандони «IRS» роҳи мазкур дар ҳолати хуб қарор дошта, рафтуомади шаҳрвандон аз тариқи он дар ҳама фасли сол таъмин аст. Матолиби дар расонаҳо ва шабакаҳои иҷтимоӣ нашршуда аз он шаҳодат медиҳанд, ки солҳои охир аз ҷониби соҳибназарон, хоса онҳое, ки пештар аз мавҷудияти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон интиқод мекарданд, эътироф гардид, ки бинобар надоштани нигоҳбони масъулиятшиносе чун «IRS» роҳҳои дигаре, ки ба тозагӣ навсозӣ шудаанд, дар муддати кӯтоҳ рӯ ба вайронӣ оварда, аксарият вазъи ногувор доранд.
Аз далелу рақамҳои мавҷуда метавон хулоса кард, ки таъмиру таҷдид дар фаъолияти филиали «IRS» мақоми меҳварӣ дошта, далели возеҳи масъулиятшиносии роҳбарияти он аст. Муҳим он аст, ки ин раванд зери назорати доимӣ ва ҷиддии роҳбарияти филиали ширкат қарор дошта, дар сурати ба вуҷуд омадани вайроншавии кӯчактарин дар масири роҳ пайи рафъи он чораҳои бетаъхир андешида мешавад.
Иттилоъ медиҳем, ки соли равон доираи фаъолият хеле васеъ гардида, бо харҷи 59 182 тонна асфалт таъмири 391190 метри квадратӣ роҳ дар назар аст. Давоми мавсими имсола дар минтақаи Варзоб 101304 метри квадратӣ бо масрафи 15742 тонна асфалт, минтақаи Зарафшон - 167580 метри квадратӣ бо сарфи 23776 тонна асфалт ва дар минтақаи Суғд 122306 метри квадратӣ бо харҷи 19667 тонна асфалт таъмири куллӣ ва ҷорӣ хоҳад шуд.
Ашхоси огоҳ хуб медонанд, ки таъмири куллӣ аз лиҳози моҳият ва хароҷот аз бунёди роҳ кам нест. Сарфи назар аз ин, роҳбарияти филиали ширкат дар ин самт собитқадам мебошанд, ки далели бебаҳси масъулиятшиносӣ ва муносибати дуюмдараҷа надоштан ба иҷрои рисолат маҳсуб мешавад.
Муҳимтар аз ҳама, барои таъмири роҳ мутахассисони ҳирфаӣ ва техникаву механизмҳои замонавӣ ҷалб шуда, ба сифати кори анҷомёфта таваҷҷуҳи хоса зоҳир мегардад. Корхонаҳои истеҳсоли асфалти марбут ба филиали ширкат, ки дар заминаи навсозӣ иқтидори онҳо низ зиёд гардидааст, баҳри тавсеаи ин раванд саҳми назаррас доранд.
Дар маҷмӯъ, густариши фаъолияти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон моро бори дигар мутмаин месозад, ки роҳи Душанбе –Чанок дар симои ин ширкат нигоҳбони боэътимод дорад.
Маркази матбуоти филиали Ширкати саҳмомии “Инновейтив Роуд Солюшнз ЛТД” дар Ҷумҳурии Тоҷикистон
Санаҳои 17 ва 18 майи соли 2021 бо ташаббуси Бонки давлатии амонатгузории Ҷумҳурии Тоҷикистон «Амонатбонк» ҷаласаи коршиносон ва ҳамоҳангсозони ИББ СҲШ қисман тариқи ҳузурӣ ва қисман маҷозӣ баргузор гардид.
Дар чорабиниҳои мазкур ҳайатҳо аз ҷониби Корпоратсияи давлатии рушди ВЭБ РФ, Бонки миллии фаъолияти иқтисоди хориҷии Ҷумҳурии Ӯзбекистон, РСК «Банк» - Қирғизистон ва Бонки Рушди Қазоқистон ҳузур доштанд. Дар ҷаласаи мазкур гурӯҳҳои кории Бонки давлатии рушди Хитой, Ҳабиб Бонки Ҷумҳурии Исломии Покистон ва Корпоратсияи давлатии молиявию инфрасохтории Ҷумҳурии Ҳиндустон низ тариқи маҷозӣ иштирок намуданд.
Дар оғози ҷаласа муовини Раиси Раёсати Бонки давлатии амонатгузории Ҷумҳурии Тоҷикистон «Амонатбонк» Ризвонзода Фирдавс Зикр суханронӣ намуданд. Ризвонзода Ф.З. дар баромади худ қайд намуданд, ки ИББ СҲШ саҳнаи муҳими ҳамкориҳои байнибонкӣ дар доираи Созмони ҳамкории Шанхай ба шумор рафта, дар шароити кунунии мураккаби иқтисодӣ бонкҳои аъзоро водор месозад, ки бо истифода аз тамоми имконоти мавҷуда ҷиҳати барқарор кардани вазъи иқтисодиёти кишварҳои аъзо якҷоя талош вазранд.
Ҳамчунин, қайд карда шуд, ки «Амонатбонк» омодааст бо шарикони рушд дар шакли дуҷониба ва бисёрҷониба ҳамкориро густариш дода, баҳри амалӣ намудани ҳадафҳои дарпешистода чораҳои заруриро амалӣ намояд.
Дар кори ҷаласаи мазкур ҷониби БДА ҶТ «Амонатбонк» барои муҳокимаи ҷонибҳо масъалаҳои зеринро пешкаш намуд:
1. Васеъ намудани ҳамкориҳо бо институтҳои молиявии давлатҳои нозир ва шарикони муколамаи СҲШ;
2. Ҳамкориҳо бо институтҳои байналмилалии молиявие, ки дар қаламрави кишварҳои СҲШ ва дар минтақаи Осиё фаъолият менамоянд;
3. Муҳокимаи қабули Стратегияи рушди минбаъдаи ИББ СҲШ барои давраи миёнамуҳлат (2022-2026);
4. Ҳамкориҳои сармоягузории бонкҳои аъзои ИББ СҲШ;
5. Ҳамкорӣ дар самти табодули таҷриба ва омода намудани мутахассисон;
6. Ҳамоҳангсозии санаҳои баргузории ҷаласаи Шӯрои ИББ СҲШ.
Масъалаҳои асосии ҷаласа, ин пеш аз ҳама дар таҳрири нав қабул намудани Стратегияи рушди минбаъдаи ИББ СҲШ барои давраи миёнамуҳлат (2022-2026) ва Ҳамоҳангсозии санаҳои баргузории ҷаласаи Шӯрои ИББ СҲШ ба шумор меравад.
Ҷаласаи кории Раиси Раёсати Бонки давлатии амонатгузории Ҷумҳурии Тоҷикистон “Амонатбонк” бо кормандони филиалҳо ва марказҳои хизматрасонии бонкии БДА ҶТ “Амонатбонк” дар минтақаи Бохтар
Санаи 22-уми майи соли ҷорӣ бо иштироки Раиси Раёсати Бонки давлатии амонатгузории Ҷумҳурии Тоҷикистон “Амонатбонк” мӯҳтарам Икромӣ С.С., муовини Раиси Раёсат Сайфзода Ш.Ҷ. ва роҳбарони воҳидҳои сохтории дастгоҳи марказии Раёсати БДА ҶТ “Амонатбонк” бо кормандони филиалҳо ва марказҳои хизматрасонии бонкии БДА ҶТ “Амонатбонк” дар минтакаи Бохтар ҷаласаи корӣ баргузор гардид.
Дар ҷаласаи мазкур аз фаъолияти филиалҳо ва марказҳои хизматрасонии бонкии минтақаи Бохтар дар 4 моҳи аввали соли ҷорӣ натиҷагирӣ карда шуд.
Дар оғози ҷаласа оид ба фаъолияти марказҳои хизматрасонии бонкӣ ва филиалҳо дар минтақаи Бохтар дар давоми 4 моҳи соли ҷорӣ Сардори Идораи танзим ва назорати Марказҳои хизматрасонии бонкӣ Ҳақназарзода Ҷурабек ҳисобот доданд.
Қайд гардид, ки дар минтақаи Бохтар 15 адад филал ва 100 адад марказҳои хизматрасонии бонкӣ ҳамаруза ба аҳолии ин минтақа хизматрасониҳои гуногуни бонкӣ мерасонанд. Дар марказҳои хизматрасонии бонкӣ амалиётҳои гуногуни бонкӣ аз қабили интиқоли пули шахсони воқеӣ бе кушодани суратҳисоб, хизматрасонии машваратӣ оид ба ҳамагуна амалиётҳои бонкӣ, амалиётҳои хазинавӣ, пардохт намудани маблағҳои нафақа ва кӯмакпулиҳо, қабул ва иваз намудани пулҳои фарсуда, қабули маблағҳои коммуналӣ ва дигар намуди пардохтҳо аз аҳолӣ гузаронида мешавад.
Кормандони Марказҳои хизматрасонии бонкӣ пайваста дар тренинг ва курсҳои омӯзишӣ ҷалб гардида, баҳри баланд бардоштани савияи дониши худ сайъу талош меварзанд.
Дар доираи ҷаласа натиҷаи нишондиҳандаҳои Марказҳои хизматрасонии бонкӣ дар монитор пешкаши кормандон гардида, барои бартараф намудани камбудиҳо пешниҳодҳои сардорони идора ва кормандон шунида шуд.
Аз ҷониби роҳбарияти Бонк оид ба баланд бардоштани сатҳу сифати хизматрасонӣ, риояи қатъии қоидаҳои одобу муошират бо мизоҷон ва эҳсоси баланди масъулиятшиносии кормандон дастуру супоришҳои мушаххас дода шуд.
Ҷавонон ояндаи давлату миллат!
Давоми солҳои соҳибистиқлолӣ таҳти сиёсати хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон мақому мавқеи ҷавонон дар ҷомеа ба маротиб баланд гардида, ҷалби бештари онҳо ба корҳои ҷамъиятиву идоракунӣ саҳми ин қишри фаъоли ҷамъиятро дар пешрафту ободии мамлакат бештар намуд.
Ҳамасола дар кишвар санаи 23-юми май ҳамчун рузи ҷавонон таҷлил карда мешавад. Бахшида ба ин сана дар Бонки давлатии амонатгузории Ҷумҳурии Тоҷикистон “Амонатбонк” ҳамоиши тантанавӣ баргузор гардид. Чорабинӣ бо иштироки муовини Раиси Раёсати Бонк муҳтарам Сайфзода Ш.Ҷ., муовини Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳмадзода Дилноза, барандаи медали биринҷии Бозиҳои олимпии Лондон 2012 Мавзуна Чориева ва аҳли кормандони «Амонатбонк» баргузор гардид.
Дар оғози чорабинӣ муовини Раиси Раёсати Бонк Сайфзода Ш.Ҷ. тамоми ҷавонони хуштолеъи даврони соҳибистиқлолро бо Рӯзи ҷавонон табрику таҳният намуда қайд карданд, ки имрӯзҳо ҷавонони ватандӯсту ватанпарвар ва қавиирода дар ҳамаи соҳаҳои иқтисоди миллӣ ва ҳаёти ҷомеа, фаъолона кору пайкори созанда дошта аз ҷониби давлат ва ҳукумати кишвар пайваста мавриди таваҷҷуҳи хос қарор доранд. Ҳамин буд, ки санаи 22 декабри соли 2016 Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рафти Пайёми солонаи худ ба Маҷлиси Олии Ҷумҳурии Тоҷикистон соли 2017-ро дар кишвар ҳамчун Соли ҷавонон эълон намуданд.
Воқеан ҳам аксар аҳолии Тоҷикистонро ҷавонон ташкил медиҳанд, ки онҳо давомдиҳандаи кору фаъолияти насли калонсол, нерӯи созанда ва иқтидори воқеии пешрафти ҷомеа, хулоса, ояндаи миллат ва давлат мебошанд.
Муовини Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳмадзода Дилноза низ зимни баромади хеш қайд карданд, ки Ҳукумати Тоҷикистон ташаббусу пешниҳодҳои созандаи ҷавононро ҳамеша дастгирӣ намуда, барои амалӣ гардидани онҳо имконият фароҳам меорад. Наврасону ҷавонони моро зарур аст, ки ҷавобан ба ин ғамхориҳо тамоми саъю талоши хешро ба донишандӯзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан, рушди илму техника ва бунёдкорӣ равона созанд.
Ҷавонон бояд аз ҳама қишрҳои ҷомеа бештар фаъол бошанд, ташаббусҳои созанда пешниҳод намоянд, рамзҳои давлатӣ, муқаддасоти миллӣ ва дастовардҳои истиқлолиятро ҳифз кунанд, дар ҳаёти сиёсиву иҷтимоии Тоҷикистони азиз бо дасту дили гарм ва нерӯи бунёдгарона ширкат варзанд, амнияти давлат ва шарафу номуси ватандориро ҳимоя карда, худро аз ҳама хавфу хатарҳои номатлуби ҷаҳони муосир эмин нигоҳ доранд ва парчамбардори ин сарзамин, марзу бум ва кишвари муқаддасамон бошанд.
Қайд кардан зарур аст, ки ҷавонони мо дар тарғиби тарзи ҳаёти солим ва оммавигардонии варзиш, ки яке аз ҳадафҳои муҳими Ҳукумати мамлакат мебошад, саҳми назаррас дошта варзишгарони тоҷик ҳамасола дар мусобиқаҳои сатҳи ҷаҳонӣ давлату миллати хешро ба таври шосита муаррифӣ менамоянд
Намунаи ин гуфтаҳо яке аз варзишгари мувафақ барандаи медали биринҷии Бозиҳои олимпии Лондон 2012, инчунин ҷоизадорӣ чандин мусобиқаҳои сатҳи байналмилалӣ Мавзуна Чориева мебошад, ки дар баробари парчамбардори ватан будан дар тарғибу ташвиқи тарзи ҳаёти солими ҷавонон ва машғул шудани онҳо ба намудҳои гуногуни варзиш саҳмгузор аст.
Ҷавонони фаъоли Амонтабонк низ бо маърӯзаҳои пурмазмуни худ баромад намуда дар васфи ҷавонӣ шеърҳои пурмазмун қироат намуданд.
Дар охири чорабинӣ як зумра ҷавонони «Амонатбонк» ба хотири фаъолияти созанда ва намунавӣ бо Ифтихорнома ва Раҳматнома қадрдонӣ гардиданд.
Ҳамзамон аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон як қатор ҷавонони фаъоли «Амонатбонк» ба хотири иштирок дар корҳои ҷамъиятӣ бо Сипоснома қадрдонӣ гардиданд.
Шуъбаи матбуоти БДА ҶТ «Амонатбонк»
Назди яке аз бозорҳои Душанбе. Акс аз бойгонӣ
Ҳукумати Тоҷикистон миқдори молу маҳсулотеро муайян кард, ки Оҷонси захираҳои моддии давлатӣ бе пардохтани боҷу андоз аз арзиши иловашуда (НДС) ба кишвар хоҳад овард. Санад рӯзи 28-уми май дастраси Радиои Озодӣ шуд.
Вакилони порлумони Тоҷикистон ҳанӯз дар охири моҳи марти имсол барои, ба гуфтаи худашон, муътадил нигоҳ доштани арзиши маҳсулоти ғизоӣ ва сӯзишворӣ ба ин идораи давлатӣ имтиёз доданд, аммо соҳибкорони дигар онро хилофи рақобат дар бозор донистанд. Дар пайи паҳншавии бемории коронавирус ва баста шудани марзҳо тайи бештар аз як соли охир сокинон аз гаронии арзиши маҳсулот шикоят доштанд.
Бо қарзи Бонки Исломии Рушд
Бино бар қарори ҳукумати Тоҷикистон, ки дастраси Радиои Озодӣ шуд, Оҷонси захираҳои моддии давлатӣ ҳақ дорад:
•80 ҳазор тонна гандум;
•20 ҳазор тонна шакар;
•5 ҳазор тонна равғани растанӣ;
•2 ҳазор тонна биринҷ;
•5 ҳазор тонна орд;
•200 тонна гӯшт;
•30 ҳазор тонна сӯзишвории дизелӣ;
•ва 15 ҳазор тонна бензинро бе пардохти боҷ, андоз аз арзиши иловашуда (НДС) ва аксиз аз хориҷа ворид кунад.
Дар ин қарор гуфта мешавад, ки маҳсулоти озуқа, сӯзишвории дизелӣ ва бензин "дар доираи маблағҳои қарзие, ки аз Бонки Исломии Рушд ҷалб гардидааст, харида ва ба Тоҷикистон оварда мешавад."
Имтиёз гирифтани як идораи давлатӣ барои ворид кардани бензину солярка бе пардохти гумрукиву андоз эътирози ширкатҳои фурӯши маводи сӯхтро дар Тоҷикистон ба бор оварда буд.
Моҳи апрели имсол роҳбарони 17 ширкати воридкунандаи сӯзишворӣ дар Тоҷикистон аз раиси ҷумҳурӣ, Эмомалӣ Раҳмон, хостанд, ки ба онҳо низ ба монанди Оҷонси захираҳои моддии давлатӣ дар пардохти боҷи гумрукӣ ва андоз имтиёз бидиҳад. Вагарна, ба гуфтаи онҳо, сабукиҳое, ки ҳукумат ба Оҷонсӣ дод, рақобатро дар бозор вайрон мекунад ва маҷбур мешаванд, фаъолияташонро қатъ кунанд.
Ин ширкатҳо 80 дарсади бозори сӯзишвории Тоҷикистонро зери даст доранд.
Норозиён чӣ мегӯянд?
Бар асоси ҳисоби ин ширкатҳо, пас аз озод шудани Оҷонси захираҳои моддии давлатӣ аз пардохти боҷу андоз нархи ҳар литр бензини АИ92 ду сомонӣ ва сӯзишвории дизелӣ 1 сомониву 20 дирам барояш арзон меафтад.
"Аз ин лиҳоз, дар нархгузорӣ фарқи калон ба вуҷуд омада, аъзои Ассотсиатсия наметавонанд дар бозори кишвар рақобатпазир бошанд ва маҷбур мешаванд аз бозор даст кашанд", -- гуфта мешуд дар номаи дастаҷаъмии ин ширкатҳо ба ҳукумат.
Ба иддаои ҳукумат, ҳадаф аз имтиёз додан ба Оҷонси захираҳои моддии давлатӣ ҷилавгирӣ аз гароншавии нархи маҳсулот ва мудохилаи молӣ (товарная интервенция) ба бозор аст. Ҳоло маълум нест, ки ин тадбир то чӣ ҳад ба нархи бозорҳо таъсир хоҳад дошт, чун раванди гароншавии нархи маҳсулот дар Тоҷикистон ҳанӯз идома дорад.
Оҷонси захираҳои моддии Тоҷикистон ба хариду воридот ва захираи маҳсулот машғул аст. Дар сурати камбуди мол ё гаронии нархи маҳсулот, Оҷонсӣ муваззаф аст, захираҳояшро барои танзими нарх бо арзиши пасттар ба бозор барорад.
Дар гузашта ҳангоми гарон шудани нархи баъзе аз маҳсулот мақомоти Оҷонсӣ маҳсулоти худро бо нархи нисбатан арзон ба мардум пешниҳод кардаанд, аммо сокинон мегӯянд, ин идора имкони таъмини қисми зиёди аҳолиро бо маводи арзон надорад.
Абдулло Ашӯров
Бонки миллии Тоҷикистон дар ҳошияи дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти дастгирии оилаҳои ниёзманд, маъюбон, ятимон ва табақаҳои ниёзманди аҳолӣ дар арафаи иди саиди Фитр ба бошандагони Муассисаи давлатии “Хона-интернати беморони руҳии шаҳри Ҳисор”, кумаки хайриявӣ ирсол намуд, ки он аз 85 адад рахти хоб ва маводи хӯрокворӣ иборат мебошад.
Ҳамзамон барои болидаруҳии бошандагон ва ҳайати кормандони ин муассиса бо истифода аз анвои гуногуни маҳсулоти хӯрокворӣ, аз ҷумла ду намуд хӯроки гарм, ширинӣ, кулчақанд ва меваҳои тару тоза дастурхони идона ороста шуд.
Роҳбарияти Бонки миллии Тоҷикистон бошандагони муассисаро бо иди саиди Фитр муборакбод гуфта, бо шароити буду боши онҳо аз наздик шинос шуданд ва таъкид бар он доштанд, ки яке аз рукнҳои моҳи шарифи рамазон, ин аёдати беморон ва дастгири шахсони ниёзманд маҳсуб меёбад. “Имрӯз, ки мо дар арафаи иди саиди Фитр қарор дорем, бояд анъанаҳои неки бузургонамонро дар бобати хайру эҳсон, дастгирии ятимону бепарасторон ва ниёзмандон идома дода, дар ободию пешрафти диёрамон саҳми муносиб гузорем. Бонки миллии Тоҷикистон суннатҳои неки ниёконро идома бахшида, дар арафаи ҳамаи ҷашну маросимҳо ба табақаҳои ниёзманди аҳолӣ дасти мадад дароз мекунад ва минбаъд низ, ин анъанаи некро идома хоҳад дод”, - гуфта шуд зимни супоридани маводи хайрия аз ҷониби Роҳбарияти Бонки миллии Тоҷикистон.
Роҳбарияти Муассисаи давлатии “Хона-интернати беморони руҳии шаҳри Ҳисор” дар навбати худ барои ғамхориҳои пайваста ба Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва роҳбарияти Бонки миллии Тоҷикистон изҳори миннатдорӣ намуданд.
Маврид ба зикр аст, ки Бонки миллии Тоҷикистон ба таври доимӣ новобаста аз иду айём ба бошандагони Муассисаи давлатии “Хона-интернати беморони руҳии шаҳри Ҳисор”, ки мутобиқи амри Президенти Ҷумҳурии Тоҷикистон аз 29 декабри соли 2017, таҳти №АП-983 сарпарастии онро ба зимма дорад, дасти ёрӣ дароз намуда, дархости онҳоро барои шароити созгори зист таъмин менамояд.
Бонки миллии Тоҷикистон ҳушдор медиҳад!
Бонки миллии Тоҷикистон ба маълумоти шаҳрвандони кишвар мерасонад, ки баъди ба вуқӯъ пайвастани қазияи марзии Ҷумҳурии Тоҷикистон бо Ҷумҳурии Қирғизистон баъзе шаҳрвандони кишварамон аз ин ҳолат истифода намуда, бо мақсади ҷалб намудани маблағҳои дар суратҳисобҳои махсус барои зарардидагони Ворух машғуланд.
Тибқи маълумоти фаврии мақомотҳо, Бонки миллии Тоҷикистон ба таваҷҷуҳи ташкилотҳои қарзии молиявӣ ва инчунин шаҳрвандони кишвар мерасонад, ки барои анҷом додани амали хайрия ба ҳар гуна суратҳисобҳои шахсони алоҳида ва ё гурӯҳҳои номаълум, ки дар шабакаҳои иҷтимоӣ барои кӯмак аз мардум даъват ба амал меоранд, худдорӣ намуда, бо мақсади расонидани кӯмак ба зарардидагони минтақаи Ворухи шаҳри Исфара, аз ҷониби Вазорати молияи Ҷумҳурии Тоҷикистон суратҳисоби махсус кушода шудааст ва шаҳрвандон метавонанд бемамоният маблағҳои хайриявии худро ба ин суратҳисоб ирсол намоянд.
Рақамҳои суратҳисобҳо чунинанд:
бо пули миллӣ-сомонӣ: 20204972664010100451
бо доллари ИМА: 22696840318014
бо рубли русӣ: 22696810118008
Баррасии масъалаҳои низоми суғурта дар Донишгоҳи давлатии тиҷорати Тоҷикистон
6 майи соли 2021 дар Донишгоҳи давлатии тиҷорати Тоҷикистон (ДДТТ) бо иштироки Роҳбарият, намояндагони Бонки миллии Тоҷикистон, ҳайати олимону устодон ва донишҷӯён семинари илмӣ – амалӣ дар мавзӯи “Мушкилоти суғурта дар давлатҳои аъзои ИДМ” баргузор гардид.
Семинарро муовини якуми ректори ДДТТ Саймаҳмуд Саидов ифтитоҳ намуда, ҳамоиши илмии мазкурро ҷузъе аз чорабиниҳое унвон кард, ки дар робита ба мактуби Бонки миллии Тоҷикистон оид ба иҷрои банди 8 протоколи ҷаласаи 15-уми Шӯрои ҳамоҳангсозии байнидавлатии роҳбарони мақомоти назорати суғуртавии давлатҳои аъзои Иттиҳоди Давлатҳои Мустақил баргузор карда мешавад.
Таъкид гардид, ки Донишгоҳи давлатии тиҷорати Тоҷикистон дар доираи ҳамкориҳои судманд ва татбиқи нақшаву барномаҳои таълимӣ, иҷрои дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, Вазорати маориф ва илми Ҷумҳурии Тоҷикистон ва Бонки миллии Тоҷикистон ҷиҳати омода намудани кадрҳои баландихтисос кӯшишҳо ба харҷ дода, минбаъд низ омодагии худро баҳри тайёр намудани мутахассисони касбии ҷавобгӯй ба талаботи бозори меҳнат иброз медорад.
Муовини якуми ректори ДДТТ Саймаҳмуд Саидов ҳамчунин, барои дастгирии пайваста ҷиҳати дар сатҳи баланд баргузор гардидани семинари илмӣ-амалӣ ба роҳбарияти Бонки миллии Тоҷикистон изҳори сипос намуд.
Баъдан, сардори Идораи назорати суғуртавии БМТ Дилбар Ҳусейнова ҳамчун намояндаи танзимгари бахши суғуртаи кишвар суханронӣ карда, ташкил ва баргузории семинарро омили муҳими рушд ва таҳкими низоми суғуртаи Тоҷикистон унвон намуд.
Инчунин, мавзӯи “Масъалаҳои суғурта дар Ҷумҳурии Тоҷикистон: ҳолат ва дурнамои рушди он” аз ҷониби Дилбар Ҳусейнова бо истифода аз рӯнамоӣ барои иштирокдорони семинар ба таври муфассал шарҳу тавзеҳ дода шуд.
Зикр гардид, ки суғурта яке аз унсурҳои таркибии иқтисодиёт ба ҳисоб рафта, дар шароити муносибатҳои бозорӣ ба ҳалли масъалаҳои муҳими иҷтимоию иқтисодӣ мусоидат менамояд. Аз ин лиҳоз, Бонки миллии Тоҷикистон ҳамчун мақоми танзимгар фаъолияти хешро барои таҳкими заминаи меъёрӣ-ҳуқуқӣ, таҳияи шароити мусоид ҷиҳати ҷалби бештари сармоя, аз ҷумла сармояи хориҷӣ ва фаъолияти озоди ташкилотҳои суғуртавӣ ва омода намудани мутахассисони баландихтисоси соҳаи суғуртаи кишвар равона намудааст. Минбаъд низ Бонки миллии Тоҷикистон барои таъмини устувории бозори суғурта, ба даст овардани эътимоди аҳолӣ ва дар маҷмӯъ, рушди низоми суғуртаи кишвар чораҳои зарурӣ меандешад.
Дар идомаи семинар, ҳамчунин аз ҷониби устодони донишгоҳ дар мавзӯҳои “Рушди бозори суғурта дар Тоҷикистон: мушкилот ва дурнамои он”, “Мушкилоти мубрами рушди бозори суғурта дар Ҷумҳурии Тоҷикистон” ва “Ташаккули низоми суғуртаи иҷтимоӣ дар Ҷумҳурии Тоҷикистон” маърӯза ва рӯнамоиҳо манзур гардонида шуд.
Семинарро муовини якуми ректори ДДТТ Саймаҳмуд Саидов ҷамъбаст намуда, кори онро пурмаҳсул ва барои донишҷӯён, ки мутахассисони ояндаи бахши суғуртаи кишвар мебошанд, манфиатовар баҳогузорӣ кард.
Ёдовар мешавем, ки Донишгоҳи давлатии тиҷорати Тоҷикистон ҳамчун муассисаи асосӣ дар сатҳи давлатҳои аъзои ИДМ оид ба тайёр намудан, бозомӯзӣ ва баланд бардоштани савияи дониши мутахассисон дар соҳаи суғурта пазируфта шуда, дар самти омода намудани кормандони ояндаи бахши суғурта саҳми арзанда дорад.
Шуъбаи матбуоти БМТ
Мусофирон мегӯянд, як ҳафта боз мунтазири парвоз ба Русия ҳастанд
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
