Вақтҳои охир теъдоди шахсоне, ки баъд аз сафар тариқи роҳи Душанбе – Чанок арзи сипоси хешро ба роҳбарият ва кормандони филиали ширкати “IRS” барои масъулиятшиносӣ мерасонанд, тамоюли афзоишро касб намудааст.
Зеро онҳо шоҳиди ҳол мешаванд, ки тадбирандешиҳо дар роҳи мазкур хеле зиёд буда, филиали ширкат рисолати хешро дар сатҳи хуб ва сифати баланд ба ҷо оварда истодааст.
Тавре ҳамватанони азиз иттилоъ доранд, дар чандин қитъаҳо роҳ пурра фурӯ рафт. Масъулиятшиносиву поквиҷдонӣ ва пойгоҳи пурқуввати техникӣ замина фароҳам овард, ки дар робита ба ҳолати баамаломада филфавр тадбирандешӣ шавад. Ин дар ҳолест, ки дар дигар роҳҳои мамлакат бар асари монеаи ҷузъӣ рӯзҳои зиёд ҳаракати воситаҳои нақлиёт қатъ мегардад.
Замони мавҷуд набудани роҳи муносиб дар ин самт истифодабарандагони роҳ ҳамарӯза бо мушкилоти зиёд дучор гашта, шумораи зиёди одамон ҳатто ҷонашонро аз даст додаанд. Имрӯз бо шарофати фаъолияти «IRS», фароҳам омадани шароити муносиб чунин хатарҳо бартараф шуда, аҳолӣ тамоми сол аз истифодаи роҳи автомобилгарди ба меъёрҳо ҷавобгӯ бархӯрдор аст. Пас, магар аз рӯи инсоф аст, ки ин омилҳоро нодида гирем?
Аз ҷониби дигар, вазъи ногувори роҳ боиси он мегардид, ки ронандагон хароҷоти зиёдатӣ намоянд. Барои мисол, бо сабабҳои фавқ мошинҳо сарфи назар аз сабукрав ва ё боркаш буданашон, зуд – зуд вайрон шуда, боиси нороҳатӣ ва хароҷоти зиёдатӣ мегардид.
Дар ёд дорем, ки бо мавриди истифода қарор гирифтани механизми институтсионалию инноватсионии истифодаи пулакии роҳи автомобилгарди Душанбе-Чанок баъзе «дӯстон» пешгӯӣ карданд, ки нархи роҳкиро дар масири мазкур баланд мегардад. Хушбахтона, ин «фолбинӣ»-и онҳо ғалат баромад ва нархи роҳкиро хеле арзон шуд.
Ҳамрадиф бо ин, қаноатмандии шаҳрвандон ба тавсеаи таъмиру таҷдиди роҳ, мавриди истифода қарор гирифтани плазаҳои нав, коҳиш ёфтани шумораи плазаҳо, аз байн бардоштани дидбонгоҳҳои БДА ва ғайра рабт дорад.Азбаски механизми толлингии идоракунии роҳҳо барои минтақа иқдоми нисбатан нав аст, роҳбарият ва кормандони “IRS” баъзан бо фаҳмиши нодуруст, арзу шикоятҳо ва изҳороти дурушт дар мавриди фаъолияти ширкат рӯ ба рӯ мешаванд. Биноан, бо мақсади муайян сохтани талаботи истифодабарандагони роҳ аз ҷониби Ширкат дар ҳар хати ҳаракати назди плазаҳои толлингӣ сандуқҳо барои арзу пешниҳодҳо гузошта шудаанд.
Ҳоло ҳар як истифодабарандаи роҳ метавонад пешниҳоду эродҳои худро ба таври хаттӣ баён намуда, дар сандуқи яке аз плазаҳои толлингии Ширкат гузорад. Илова бар ин, хати доимоамалкунандаи филиали Ширкат – 487011020 низ фаъол буда, дилхоҳ мусофиру ронанда метавонад шабонарӯзӣ занг зада, хоҳишу дархост ва эроди худро пешниҳод намоянд.
Бо хулоса аз корҳои анҷомёфта метавон гуфт, ки мавҷудият ва фаъолияти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон ба манфиати кор буда, маҳз ба шарофати фаъолияти пурмаҳсули кормандони он рафтуомади шаҳрвандон аз тариқи Душанбе – Чанок дар ҳама фасли сол таъмин аст.
Маркази матбуоти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон
Ҷамшед Ҷаҳонгирзода, мухлис ва хонандаи ҳафтаномаи СССР аз н.Ҳамадонӣ занг зада (тел: 201-01-02-03) гуфт, ки вақтҳои охир банкоматҳо бе пул мондаанд.
- Ҳафтаи сипарӣ шуда соатҳои 23-30-и шаб ҳамроҳи якчанд меҳмон барои гирифтани маблағ ба назди банкомати “Амонатбонк” ва “Эсхата” дар ш.Кӯлоб рафтем. Мутаассифона, банкоматҳое, ки дар ҳудуди шаҳр ҷойгиранд, пул надоштанд. Тасмим гирифтем, ки барои гирифтани маблағ ба н.Восеъ равем. Мошинеро кироя карда, ба роҳ баромадем. Дар банкоматҳои ин ноҳия низ пул набуд. Гуфтаниам, ки ин ҳолат бисёр нигаронкунанда мебошад ва ё агар ягон шаҳрванди хориҷӣ ба чунин ҳолат ру ба ру шавад чӣ? Ё Худое накунад, ки дар нисфи шаб пул лозим шавад ва мо бо умеди терминалҳо “подвадит” мешавем.
20 нафар соҳибкорони шинохтаи н.Шаҳритус азм кардаанд дар рушди ноҳия, алалхусус дар бунёди иншоотҳои ҳаётан муҳим дар деҳаву ҷамоатҳои Шаҳритус саҳмгузор бошанд.
Инҳо Додарбек Мунавваров, соҳибкор аз ҷамоати деҳоти «Обшорон», раҳбари ҶДММ «Дук», Нурмат Эшмирзоев, соҳибкор аз ҷамоати деҳоти Х.Холматов, директори ҶДММ «Эшмирзо Нурмат», Раҳимҷон Ҳаитов, соҳибкор аз шаҳраки Шаҳритус, роҳбари ҶСК «Робита», М. Аҳмадхонов, соҳибкор аз ҷамоати деҳоти Х. Холматов, раиси ҶДММ «Ватан МКМ», Холназар Достиев, соҳибкор аз шаҳраки Шаҳритус, раҳбари ҶДММ «Пайванд, Давлат Холматов соҳибкор, нуқтаи хусусии дандонпизишкӣ, Мамашариф Қурбонов, соҳибкор аз шаҳраки Шаҳритус, Рустам Зулмуродов, роҳбари ҶДММ «Ҳоҷӣ-Р», Қандил Ҳайдаров, роҳбари нуқтаи фурӯшӣ сӯзишвории газу бензин ва дизелӣ, Садод Нозимов, роҳбари нуқтаи хусусии фурӯши орд, Азиз Сатторов, раиси меҳмонхона ва тарабхона, Абдулазиз Абдуллоев, соҳибкор, ва Т.Бақоев соҳибкор аз ҷамоати деҳоти Х. Холматов, директори ҶДММ «Ганҷи Бақо» мебошанд.
Лозим ба таъкид аст, ки аксари ин соҳибкорони шаҳритусӣ то ин дам корхонаву марказҳои хизматрасонӣ бунёд кардаанд, вале маълум аст, ки ин тиҷорати хусусӣ буда ба фоидаи худи эшон аст. Айни замон сокинони ҷамоату деҳоти н.Шаҳритус ба мактабҳои муосиру бунгоҳҳои тиббӣ, муассисаҳои томактабиву марказҳои оммавии хизматрасонӣ, бунёди роҳ, алалхусус байнидеҳавӣ, хатҳои муҳандисии барқу обу коррез ниёз доранд. Ва агар ин нафарон воқеан ҳам сарбози Ватананду дар паҳлуи Ҳукумати ҶТ худро муаррифӣ мекунанд, пас бояд барои сохтмони иншооти ҳаётан муҳим камари ҳиммат банданд, на фоидаи худ!
Ҷ.Мақсуд, Баҳодур Уроқов, СССР
Салом СССР! Имсол тибқи пешгӯиҳои ҳавошиносон зимистони сарде дар пеш дорем. Бориши барфи зиёд агар аз тарафе барои мардум мушкилот эҷод кунад, аз тарафи дигар, як неъмати худост ва барои кишоварзӣ хуб аст. Мехостам аз деҳқони мӯҳтарами кишвар хоҳиш кунам, ки аз ин фурсати тиллоӣ ба таври аҳсан истифода баранд ва ҳар чи бештар заминҳоро кишт кунанд. Вазъи имрӯзаи ҷаҳон ба ҳамагон маълум аст ва мо агар бихоҳем аз якпорчагии давлатамом ҳифз кунем, бояд худкифоии озуқавории кишварро таъмин кунем. Тоҷикистон барои ин кор ҳамаи шароитро дорад. Дар мо мешавад бе заҳмати ончунонӣ 2 ҳосил бардошт. Роҳбарияти давлат низ ҳамеша дар ин робита таъкид мекунанд ва мардум ҳам бояд дар ин масъала бо давлат ҳамкорӣ кунанд.
Идибой Ҳамзалиев, н.Хуросон, тел: 887 00 07 10
Бозори “Саховат” дар хоби ғафлат?
22.11.2020. сот ба вақти Душанбе 14:16 дақиқа. Мо рейди навбатии худро аз КВД “Бозори “Саховат” шурӯъ кардем. Бо ҳамроҳи дӯстам вориди бозор шудем ва чизе аввал ба назарамон расид, набудани назорату назоратчиён дар даромадгоҳи бозор буд. Чун дар бозорҳои дигар муштариёнро пеш аз дохил шуданашон ба бозор, бо антисептику чизҳои дигар пешвоз мегиранд. Аммо дар бозори “Саховат” вазъият фарқ мекард. Чунин ба назар мерасид, ки ин бозор умуман назоратчӣ надорад. Ба дастони мо на касе антисептик пошид ва на ҳарорати баданамонро касе санҷид. Мо намехостем, ки боз ҳамон мавзӯи коронавирусиро зикр кунем, аммо маҷбурем, чун саломатии мардум дар мадди аввал бояд қарор гирад.
Бо вуҷуди ин, агар мушкили бозор танҳо масъалаи набудани назоратчиён мебуд, боз ҳам дарди бахайр буд. Аммо дар ин бозор як бесарусомонии аҷибе ҳукмфармост. Хусусан дар ошхонаҳои сарироҳӣ. Дегҳои ош дар ҳар кунҷу канори бозор дида мешуд. Ҳеҷ деге сарпӯш надошт. Ба назар чунин мерасид, ки дар инҷо ҳеҷ кас дар фикри саломатии ҷомеа ва худ нест. Мо, ки барои фаҳмидани нарху наво ба бозор омада будем, аввал аз нархи ош пурсон шудем. Оши инҷо 5 сомонӣ арзиш дошт. Ба назари мо бисёр арзон намуд ва бо дӯстам хостем аз оши 5 сомонаи “Саховат” тановул кунем. Аммо баъди дидани дегҳои бе сарпӯши ош, аз ниятамон гаштем. Ман аз масъулини ин бозор пурсиданиам, ки оё чангу хоки бозор, микробҳое, ки моро иҳота мекунад ва аз ҳама бадтар, вирусҳо магар ба ошҳои бе сарпӯши шумо сироят намекунанд? Шумо муҳтарам масъулини бозорпас чаро вазъиятро ҷиддӣ назорат намекунед?
Раис иҷозат намедиҳад?
Дохили бозор шудем ва рост ба назди савдогарон шитофтем. Нархҳои бозор воқеъан дандоншиканнанд. Мо бо яке аз савдогарон бобати нархгузории маҳсулоти хурока суҳбат кардем. Ин савдогар, ки нахост ки номаш ифшо шавад дар сӯҳбат бо мо гуфт, ки болоравии нархҳои маҳсулот аз мо вобаста нест. Сабаби ин болоравӣ, гаронии нархи доллар мебошад. Доллар, ки гарон шуд албата, ки нарх боло мераванд. Мо низ диламон ба мардум месӯзад. Масалан: мешавад рӯзе, ки харидорон омада гирён мешаванд, ки шароити зиндагиямон вазнин аст, каме нархҳоятонро пастар кунед. Ман ба онҳо мегӯям, ки охир шароити мо низ вазнин аст ва мо низ садҳо мушкил дорем. Ҳалли ин мушкил дар дасти мо нест. Мардум бояд ба сохторҳои зиддахл муроҷиат кунанд.
Нархҳои кайҳонии бозори “Саховат”
Нархҳои бозор воқеъан моро дар ҳайрат гузошт. Кас медиду бовараш намешуд. 1 кило биринҷ 8 сомону 50 дирам, ярманҷав (перловка) 8 сомону 60 дирам, 1 кило марҷумак 12 сомон. Нархи равғани “Золотая Корона”-и 2 литра 50 сомонӣ, равғани машҳуре, ки мардумро ба шӯр овард “Олейна”-и 2 литра 38 сомони, 3 литрааш 57 сомонӣ ва нархи равғани “Горнитса” бошад ба 89 сомонӣ расидааст. Мо аз тамоми гирду атрофи бозор гашту гузор карда, аз савдогарон пурсидем, ки чаро шумо равғани 5 литраи “Олейна”-ро ба фурӯш нагузоштаед? Яке аз фурӯшандаҳо, ки Азизова Шарофат ном дошт, ба мо посух дод, ки нархи “Олейна”-и 5 литраро 94 сомони нархгузорӣ кардаанд. Агар мо онро ба фурӯш барорем ва касе онро нахарад зарари моро кӣ ҷуброн мекунад.
Натиҷаи рейди мо: Нархҳои бозори “Саховат”
1. Тухм аз 1 сомону 60 дирам, то 1 сомону 95 дирам
2. Равғани 2 литра аз 57 сомони, 4 литра то 88 сомонӣ
3. Гӯшт сар аз 50 сомонӣ
4. Картошка 3-3, 60 дирам сомонӣ
5. Пиёз аз 2 сомонӣ то 2 сомону 30 дирам
6. Гулкарам-1 килло 6 сомонӣ
7. Помидор-1 кило 12 сомонӣ
8. Бодиринг 10 сомонӣ
9. Чакка 1 килло 14 сомонӣ
10. Меваҷот-себ 1 кило 21 сомонӣ, 1 кило ангур 35 сомонӣ.
Омиронаи Сайёф, СССР
Дар ҳамин маврид-рубрика
3 дона тухм 5 сомонӣ
Ҳудуди 1 моҳи охир нарху наво дар бозору фурӯшгоҳҳои Тоҷикистон муназзам боло меравад. Аз ҷумла, равған, орд, тухм, шакар ва дигар намуди маҳсулоти хӯрока. Дар чандин шумораҳои гузаштаи ҳафтанома низ, арзу доду шикояти хонандагон нашр шуда буд. Мо ҳам наметавонистем нархи аниқу дақиқи маҳсулоти хӯрокаро барои мардум пешниҳод кунем, зеро ҳар рӯз нархнома дар бозорҳо ба сӯи гаронӣ тағйир меёбад. Аз ҷумла:
20.11.2020. Соат ба вақти Душанбе 11:42 дақиқа. Мо аз бозори КВД “Деҳқон”-и ш. Душанбе дидан кардем. Дар ин бозор, гаронтарин маҳсулот равғани “Олейна” буд, ки тахминан 1 моҳ пеш зарфи 5 литри он 60 сомонӣ арзиш дошт, аммо айни замон ба 95 сомонӣ баробар шудааст. Ногуфта намонад, ки имрӯз ҳамаи намуди равғанҳо гарон шудаанд. Барои мисол, равғанеро, ки мардум пештар 11 сомонӣ мехарид, имрӯз ба 19 сомонӣ баробар шудааст. Шакар дар ин бозор аз 9,50 то 10 сомонӣ арзиш дорад. Нархи лубиё ва дигар навъҳои донагӣ ба 18-19 сомонӣ расидааст. Дар даромадгоҳи бозори мазкур ярмарка эълон кардаву барои мардум шакари арзон бо нархи 7 сомонӣ ва он ҳам барои 1 нафар то 2 кг мефурӯхтанд. Аммо ба гуфтаи чанд сокини ин маҳалла, мардум барои гирифтани шакари арзон соатҳои дароз бояд навбат истанд.
Ба гуфтаи мардум, ҳар он чизе ки дар Тоҷикистон гарон мешавад, асло нархаш поин намефарояд, аз ҷумла орду гӯшт ва бензину газ, ки баъди гарон шуданашон солҳост, ки арзон нашуда истодаанд. Ба гуфтаи яке аз фурӯшандагони маҳсулоти хӯрока, Раҷабалӣ Қаюмов нархнома барои ҳама намуди маҳсулоти ниёзи мардум зуд-зуд тағйир ёфта истодааст ва аламовараш он аст, ки ширкатҳо маҳсулоташонро ҳар пагоҳирӯзӣ 1-2 сомонӣ қиматтар мекунанд. Вақте сабабашро мепурсем, танҳо 1 ҷавоб медиҳанд: “доллар гарон шудааст”-мегӯяд ин фурӯшанда.
Давоми ҳамин ҳафта ба н.Темурмалик сафар доштем ва аз вазъи мағозаҳои маркази ноҳия дидан намудем. Медонед чӣ, хонандаи азиз, 1 дона тухм 1 с 40 д шудааст. Мисол мо 5 сомонӣ додем ва бар ивазаш 3 дона тухм гирифтем. Мардуми бечора бо кисаи холӣ аз назди мағозаҳо гузаштаву танҳо хаёлашонро гаронии маҳсулот фаро гирифтааст. Аз рӯйи мушоҳида маълум шуд, ки ҳамаи мардум танҳо ба 1 савол посух меҷӯянд:
-чаро нарх то ин дараҷа гарон шудаасту касе парво надорад???
Шералӣ Давлатов,
СССР, Душанбе-Темурмалик-Душанбе
Эълонҳои ташкилоти «Алиф Сармоя»-ро дар оинаи нилгун дидему хостем тавассути кредити онҳо 1 телевизор харем. 27.07.2020 ба идораи «Алиф сармоя» рафтем, ба мо ҳуҷҷат доданду ба мағозаи «Волна», ки дар рӯ ба рӯи Раёсати БДА ВКД ҶТ ҷойгир аст, фиристоданд. Пас аз интихоби зиёд 1 телевизори тамғаи «Остин»-ро бо нархи 2820 сомонӣ харидорӣ намудем. Ман ду моҳ аз нафақаам 160 сомонӣ пардохт кардам, вале баъди 1,5 моҳ телевизор дигар нишон надод. Баъди чанд рӯзи бе оинаи нилгун мондан ба писарам гуфтам, ки телевизорро бо ҳуҷҷатҳояш ба мағоза баргардонад. Писарам оинаи нилгунро бурда пасон гуфт, ки масъулони мағоза гуфтанд, ки он вайрон шудааст.
Номаи кафолат
Масъули мағозаи «Волна» ҳуҷҷатҳоро мебинаду мегӯяд, ки коғази кафолаташро биёред. Баъдан писарам телевизорро бурда, дар ателеи биноҳои Иттифоқи касаба монданӣ мешавад, аммо онҳо телевизорро намегиранд. Ман 50 сомонӣ дода, аз Роғун ба шаҳр омадам. Рӯзи дигар, яъне 28.09.2020 ба мағоза рафта, ба масъулони он муроҷиат кардам. 1 ҷавон бо ному насаби Сарфароз Дадабоев аз ман хост шиносномаамро диҳам. Шиносномаро гирифта нусхабардорӣ карду гуфт рӯзи ҷумъа биёед, номаи кафолати телевизорро медиҳем. Инро шунида шод шудам, лек шодиам дер давом накард. Он ҷавон бо 1 духтари рус гап заду маро манъ кард-афзуд, ки мактуби кафолат дода наметавонем. Тамоми ҳуҷҷатҳоро баровард, ҳамаи ҳуҷҷатҳо дар компютер ҳаст, аммо гуфтанд, ки шумо номаи кафолатро гум кардаед, ҳоло он, ки онро ба ман надода буданд.
Телевизор не, дарди сар шуд!
Ба ҳамон таксӣ нишаста, ба дафтари ташкилоти «Алиф Сармоя» рафтам, дар назди даромадгоҳ мизоҷи зиёде дар интизори навбат буданд. Ба 1 духтарак муроҷиат кардам, ному насабамро пурсида 10-15 дақиқа дар компютер чизе кофту баъд 1 ҷавони дигарро ҷеғ зад, ки номаш Насур буд. Насур иброз дошт, ки ба ҳамон мағоза равед ман занг мезанам. Боз назди Сарфароз Дадабоев омада, аз номи Насур гап задем. Ӯ таъкид кард, ки ба ателе-ҷои таъмири телевизор назди ҳуқуқшинос Галина Николаева равед, иҷозат диҳад мо мактуб медиҳем.
Назди ҳуқуқшинос омадем. Галина бо мағрур мактуб куҷо шуд гуфта, хеле дуғу пӯписа кард. 1 соати расо шиштам, баъд ҷеғ зада гуфт, ки телефонатона монеду равед, мо ҳал карда занг мезанем. Соати 2020 занг зада гуфт, ки роҳбарият барои додани номаи кафолат розӣ нашуданд. Нархи таъмири телевизорро бошад устоҳо 200 сомонӣ гуфтанд. Бегоҳ ба таксӣ 80 сомонӣ дода ноумед ба хона баргаштем. Ана фоидаи «Алиф Сармоя»!
Наҷмиддин Худоиев, ш.Роғун
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
