Парламенти Қирғизистон зери лоиҳаи қонуне имзо гузошт, ки механизми ба ҷавобгарӣ кашидани президентҳои пешинро пешбинӣ мекунад. Хулоса, дар сурати имзо шудани қонун аз сӯи президент, президенти пешин дар асоси айбномаи парламент метавонад ба ҷавобгарӣ кашида шавад. Прокурори генералӣ низ бояд нишонаҳои ҷиноятро дар кирдори президент тасдиқ кунад. Дар Қирғизистон унвони президенти пешинро танҳо Роза Отунбоева ва Алмосбек Отамбоев доранд. Аскар Акаев ва Қурмонбек Боқиев пас аз инқилобҳо аз ин мақом маҳрум шуданд.
Ҷулиан Ассанж 11 апрел аз ҷониби мақомоти полиси Англия дар Лондон, ҳабс шуд. Ӯро замоне қапиданд, ки барои ворид шудан ба сафорати Эквадор дар шаҳри Лондон даъват карданд. Ассанж аз с.2012 то дина дар ҳамин намояндагии дипломатии Эквадор паноҳ бурда буд. "Ҷулиан Ассанжи 47-сола, сар аз имрӯз, аз ҷониби ходимони полиси Хадамоти шаҳрии полис дар сафорати Эквадор ба ҳабс гирифта шуд" гуфтааст полиси Лондон ба хабарнигорон ва афзуд, ки Ассандж баъди он ҳабс шуд, ки "ҳукумати Эквадор ҳаққи паноҳандагии ӯро бозпас гирифт ва сафир иҷоза дод, ки ба дохили сафоратхона ворид шаванд".
Дар ҳамин маврид, Ленин Волтер Морено Гарсес-президенти Эквадор гуфт, ки ҳақи паноҳандагии Ассанж баъди он бозпас гирифта шуд, ки ӯ "чандин бор эъломияҳои байналмилалиро нақз кард". Ассанж-шаҳрванди Австралия, инчунин метавонад барои нашри тахмин 500.000 санади махфии низомӣ ва дипломатӣ дар робита бо низоъҳои мусаллаҳона дар Афғонистону Ироқ дар с.2012 муҳокима шавад.
Бо фармонҳои Президенти ҶТ ва Қарорҳои Ҳукумати мамлакат Зоҳидӣ Низомиддин аз вазифаи муовини якуми Вазири корҳои хориҷӣ озод ва ба вазифаи Сафири Фавқулодда ва Мухтори Ҷумҳурии Тоҷикистон дар Ҷумҳурии Исломии Эрон таъин гардид. Дар баробари ин Нозирӣ Хусрав аз вазифаи Сафири Фавқулодда ва Мухтори Ҷумҳурии Тоҷикистон дар Ҷумҳурии Мисри Араб озод гардида, ба вазифаи муовини якуми Вазири корҳои хориҷии ҶТ таъин гардид. Қодирӣ Ардашер бошад ба вазифаи Сафири Фавқулодда ва Мухтори Ҷумҳурии Тоҷикистон дар Малайзия таъин карда шуд.
Инчунин, бо Қарорҳои Ҳукумати ҶТ Сайфзода Шаҳло ва Ризвонзода Фирдавс муовинони раиси Раёсати Бонки давлатии амонатгузории Ҷумҳурии Тоҷикистон «Амонатбонк», Бақозода Сайрам-муовини раиси Кумитаи телевизион ва радиои назди Ҳукумати Ҷумҳурии Тоҷикистон, Мирзозода Ардашер-муовини сардори Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон таъин гардиданд.
Бо Қарорҳои Ҳукумати Ҷумҳурии Тоҷикистон Бобозода Ҳокимшоҳ-Директори Муассисаи давлатии «Фонди дастгирии соҳибкории назди Ҳукумати Ҷумҳурии Тоҷикистон» ва Назирмадзода Бахтиёр-муовини якуми директори Агентии содироти назди Ҳукумати ҶТ таъин гардиданд.
Мутобиқи моддаи 20-уми Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» барои аз вазифаи муовини якуми раиси ш.Бохтари вилояти Хатлон озод ва ба вазифаи муовини раиси ш.Душанбе таъин гардидани Гуреззода Умед розигӣ дода шуд.
Жогоргу Кенеш-Парлумони Ҷумҳурии Қирғизистон рӯзи гузашта масоили марзиро бо Ҷумҳурии Тоҷикистон баррасӣ намуда, санадеро ҳам ба тасвиб расонидааст, ки тибқи он аз ҳукумати кишвар хоста мешавад, ки ба мушкилоти сокинони ноҳия ва деҳаҳои наздимарзӣ расидагӣ карда шавад.
Вакилони Жогоргу Кенеш дар ҷаласаи навбатии парлумон аз мушкилоти сокинони деҳаҳои наздимарзии вилояти Бодканд, хосса аз норасоии хадамоти тиббиву маориф, оби тозаи ошомиданӣ ва об барои киштукор гуфта, вазъи роҳҳои маҳаллиро низ нигароникунанда арзёбӣ намуданд.
Инчунин, аз ҷониби чанд нафар вакилон пешниҳод карда шуд, ки осебдидагони муноқишаи марзии рӯзҳои 13-14 марти соли ҷорӣ аз тарафи ҳукумат қадрдонӣ карда шаванд…
Бекболот Талгарбеков, сиёсатмадори қирғиз барои ба суд кашидани президенти пешин Алмосбек Отамбоев ҳуҷҷат омода кардан дорад. "Моро боздошт ва дар омодагӣ ба табаддулоти давлатӣ айбдор карданд. Ин айбномаи ҷиддист. Бо ҳамин айб ман 3 сол дар зиндон будам. Акнун бигзор дар суд исбот кунанд, ки ман дар куҷо ин гапҳоро гуфтаам. Мехостанд, маро 17 сол зиндонӣ кунанд, аз ин хотир 17 млн сом ҷуброни зарарӣ маънавӣ талаб мекунам" гуфтааст ӯ. Ин сиёсатмадор 7.03.2019 шартан озод шуд.
Додгоҳи шаҳри Вилнюс-пойтахти Литва, собиқ РСС Литва, ки ҳоло узви Иттиҳоди Аврупо ва душмани №1 барои Маскав аст, Дмитрий Язов-собиқ Вазири мудофиаи СССР-ро 10 сол суд кард! Дар изҳороти додгоҳ омадааст, ки дар таърихи 13.01.1991, ки он вақт Язов сари қудрат буд, маҳз бо амри ӯ 14 литвонӣ кушта ва 700 тани дигар захмӣ шудаанд. Хотиррас мешавем, ки дар ин рӯз мардуми Литва барои комилан соҳибистиқлол шудан, ба бинои ТВ Вилнюс ҳуҷум карда буданд ва низомиёни Армияи Советӣ (АС) сӯи онҳо тир кушоданд.
Дмитрий Язови 94-сола ҳоло маскуни Маскав асту давлати пирӣ меронад.
Дмитрий Тимофеевич Язов-сиёсатмадори аршади шӯравӣ, сарлашкар, Маршали Иттифоқи Советӣ, Вазири мудофиаи СССР, узви Политбюрои СССР, узви Шӯрои амнияти шӯравӣ буда, дар охирин амалкарди ҳифзи ин абарқудрат, ГКЧП дасти тамом дошт. Вале баъди шикасти ГКЧП аз сари қудрат ва сиёсат рафт.
Воқеан ҳам, РСС Литва аз нахустин кишварҳои собиқ шӯравӣ буд, ки дар моҳи марти соли 1990 худро соҳибистиқлол хонда, деклоратсияи озодияшро имзо кард. Ин дар ҳоле буд, ки Тоҷикистон низ метавонист нахустин шуда, соҳибистиқлол гардад. Аммо депутатҳои собиқ парлумони РСС Тоҷикистон, ки имрӯз аз истиқлол меболанд, бар зидди Тоҳири Абдуҷаббор шӯридаву деклоратсияи соҳибистиқлолии ӯро дарондаву худашро дашном доданд. Минҷумла, депутат Валентина Абдусамадова Тоҳирро бо русӣ чунин ҳақорат дода буд:
-Ты, что лев (ишора ба рамзи Тоҷикистони соҳибистиқлол, ки дар он Шер сабт буд). Да ты мокрая курица…
Ва толор қарсак зад…
Замона дигар шудаасту ҳоло онҳо барои дигар чӣ қарса мезананд.
Мо Метавонем!
ХАБАРҲОИ ОХИРИН
- Деваштич: об нест, барқ проблема, картошка сӯхт... Назар
- Асрори мадрасаи Хоҷа Сарбоз Назар
- “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” Назар
- Резаахбор Назар
- Бародар қарори судро иҷро намекунад… Назар
- Таъминот кори мактаб нест Назар
- Абуҳанифа: таоруфи миллӣ ва Ислом Назар
- Беадолатӣ дар футболи тоҷик Назар
- Редаксия супориш дод: Чилучорчашма рав! Назар
- «Мардон» - мушкили №1 дар Душанбе Назар
- Дар як сатр Назар
- Адвокати хайрхоҳ меҷӯям… Назар
