Бахтовар Азимов, сарбози қатории қӯшунҳои сарҳадии КДАМ ҶТ дар вақти адои хизмат бо мақсади наҷот додани писарбачаи 10-сола ҷони худро дареғ надошта, ба таври фоҷиавӣ ҳалокат расид.
Бино ба иттилои маркази матбуоти кумитаи номбурда, ҳодисаи фоҷибор 4.08.2017  рух додааст. Бахтовар Азимов барои наҷот додани писарбачаи хурдсол — Меҳрубони Ҷурахони 10-сола, ки дар об ғарқ шуда истода буд, худро ба об  андохта, ӯро аз марг наҷот медиҳад. Писарбача наҷот меёбад, вале мавҷи тезу тунди об, мутаассифона, сарбозро ба ҳалокат мерасонад.
Сарбози қаторӣ Бахтовар Азимов зодаи шаҳри Кӯлоб буда, аз баҳори соли 2017 дар  Дидбонгоҳи сарҳадии «Сайёд»-и Отряди сарҳадии «Ҳамадонӣ» хизмати Модар-Ватанро сарбаландона пеш мебурд.

СССР

Ҷума Насриддинов, аз ноҳияи Турсунзода (тел: 907 07 63 10) дар меҳмонии СССР гуфт, ман ветерани Хадамоти махсуси амниятии Вимпел буда, беш аз 30 сол дар мақомоти амниятии собиқ СССР ва ҶТ ҳастам... Маро дар асоси мактуби КГБ СССР аз 1.02.1983 таҳти №11/214 ба мактаби олии КГБ фиристоданд ва январи с.1993 барои хизмат ба ш.Душанбе гузарониданд. Оилаам аз 1 хона ба хонаи дигар иҷорашин буд. Анҷомҳои хонаам дар яке аз иншоотҳои хоҷагии КДАМ пурра хароб шуданд. Дар натиҷаи ситами бераҳмона ҳамсарам маъюб шуд ва духтарам ҳатто мактаби миёнаро хатм карда натавонист. Аз январи с.1995 то с.2000 ҳамчун иҷорашин дар кӯч.С.Шерозӣ, хонаи 20/5, ҳуҷраи 105, ки аз тарафи КДАМ ҶТ ба корманд Шароф Каримов, ки дар маркази ш.Душанбе бо манзил таъмин буд, зиндагӣ намуда, ба маблағи $3000 онро харидам. Вале Каримов хонаро бо баҳонаи беморӣ ба расмият надаровард. Соли 2007 дар Агентии коррупсия ва с.2010 дар Сарпрокуратураи ҳарбӣ баёнот дод, ки хонаро ба номи ман расмӣ мекунад, аммо боз ҳам фиреб кард! Болои ин, 18.06.2013 ба хонаи ман ҳуҷум намуда, анҷомҳои камбағалонаи моро ба кӯча партофт. Аз раиси Дастгоҳи иҷроияи президент хоҳиш дорам, ки ба мушкили ман расидагӣ кунад ва ҳақро ба ҳақдор расонад...

Собиқ муовини ҳокими ш.Остона, Нуралӣ Алиев-набераи калонии президенти Қазоқистон-Нурсултон Назарбоев президенти Федератсияи куҳнавардон ва варзиши куҳнавардӣ интихоб шуд. Сайти интернетии федератсия хабари ба ин мақом интихоб шудани набераи президентро нашр кард. Нуралӣ писари Дариға ва Илҳом Алиевест, ки дар зиндони Австрия кушта шуда буд. Моҳи апрели с.2016 номи Алиеви 32-сола дар бойгонии Панама-нашри хабар дар бораи суратҳисобҳои бонкии сиёсатмадорон ва тоҷирон дар офшор пайдо шуд.

Мақомоти иҷроияи ҳокимияти давлатии шаҳри Душанбе барои пайдо кардани ҳуқуқи хизматрасонӣ бо нақлиёти автомобилӣ дар хатсайрҳои мунтазами шаҳрии ҳамлу нақли мусофирон озмун эълон мекунад.Аз он ҷумла, дар озмун 1 лот дар доираи 2 хатсайр пешниҳод мегардад:
-хатсайри №50 (Ҷамоати Чоряккорон — Терминали мусофирбарии ҶСП “Фароз” ва хатсайри №28 (маҳаллаи Зарафшон — КВД “Насби нақлиёти барқӣ (троллейбус) ва велосипед”.
Хатсайри №28 то ин дам ба ҶСК «Нақлиёт» дахл дошта молики ин ҷамъият  Хуршед Қурбонзода, сардори Хадамоти давлатии назорат ва танзим дар соҳаи нақлиёти Вазорати нақлиёти ҶТ мебошад.
Дар озмун шахсони ҳуқуқӣ ва воқеӣ, новобаста аз шакли моликияташон, ки дорои воситаи нақлиёти худиянд ё тибқи қонун ба он моликанд ва иҷозатномаи Хадамоти давлатии назорат ва танзим дар соҳаи нақлиётро ҷиҳати дарёфти ҳуқуқи амалӣ намудани ҳамлу нақли мусофирон ҳамчун ширкати нақлиёти автомобилии истифодаи умум доро мебошанд, иштирок карда метавонанд.
Дархостҳо бояд дар лифофаи маҳкам, мӯҳрзада то соати 17:00-и 4 сентябри соли 2017 ба шуъбаи нақлиёти дастгоҳи Раиси шаҳри Душанбе пешниҳод карда шаванд. Озмун  5 сентябри соли 2017 соати 10:00 дар толори калони маҷлисгоҳи дастгоҳи Раиси шаҳри Душанбе, хиёбони Рӯдакӣ-80 баргузор мегардад
Хоҳишмандон барои гирифтани маҷмӯи ҳуҷҷатҳои озмун бояд ба Мақомоти иҷроияи ҳокимияти давлатии шаҳри Душанбе- ба суроғаи хиёбони Рӯдакӣ 80, ҳуҷраи 28 (ошёнаи 3),  бо дархости хаттӣ муроҷиат намоянд.
Довталабон метавонанд маълумоти иловагиро тавассути телефонҳои 221-83-56,  935 — 85-00-94 дастрас намоянд.

Мағфират Ҷенбуратоваи 55-сола, аз ҷамоати деҳоти Сайёд, деҳаи Хоҷадурбод (собиқ Партизан)-и ноҳияи Шаҳритус (тел: 900 25 53 55) меҳмони гиромии СССР шуд ва гуфт, ки ҷигарбанди ман Рафоат Шомиддинова 29-сола асту мубталои дарди гурда. Мехоҳам, ки духтари ман ҳам мисли атрофиёнаш тани сиҳат дошта бошаду дили беғам. Аммо шароити иқтисодӣ надорам, ки ба доруву дармон фаро гирамаш. Беш аз 1 сол шуд, ки тамоми молу амволи хонаамро маҳз барои шифо ёфтани ӯ фурӯхтам, аммо ягон беҳбудие дар саломатияш ба назар нарасид. 2 акааш дар Русия муҳоҷири меҳнатианд ва ҳич имкони кӯмак карданро барои хоҳар надоранд. Аз ин рӯ, аз Насим Олимзода-Вазири тандурустӣ ва ҳифзи иҷтимоии аҳолӣ эҳтиромона хоҳиш дорам, ки барои зери табобат гирифтани ҷигарбанди ман кӯмак расонад. Иншооллоҳ, савоби дунёро хоҳад гирифт.

Тарафдорони ҳизби сиёсии мухолифи Қирғизистон-"Ота Макон" ва наздикони лидери ин ҳизб-Омурбек Текебоев дар 1 нишасти хабарӣ гуфтаанд, ки ба ҷонибдорӣ аз ин лидер, ки бо гумони фасод боздошт шудааст, даст ба гуруснанишинӣ мезананд. Отамакониҳо талаб доранд, Текебоев ба имтиҳони забони давлатӣ, ки барои номзадҳо ба мақоми президентӣ ҳатмӣ аст, роҳ дода шавад.

Дар 1 барномаи таҳлилии шабакаи нави ТВ "Узбекистон 24” аз сиёсати даврони президенти пешин-Ислом Каримов сахт танқид карда гуфтанд, ки акнун кушодани ҳамаи гиреҳҳои ҷамъшуда аз он даврон ба дӯши президенти кунунӣ Шавкат Мирзиёев бор шудааст. Танқиди ин ТВ дар ҳолест, ки Генпрокуратураи Ӯзбекистон хабар дод, Гулнора Каримова-духтари калони Каримов бар асоси 6 моддаи кодекси ҷиноӣ ба ҳабс гирифта шудааст. Ба иттилои манбаъ, ӯ дар қаллобӣ, руст кардани асъори хориҷӣ, вайронкунии қонунгузории гумрукӣ, поймол кардани қоидаҳои тиҷорат ва хизматрасонӣ, сохтакории ҳуҷҷатҳо ва қонунигардонии даромадҳои бо роҳи ҷиноят бадастомада муттаҳам мешавад. Бино ба маълумоти тафтишот, Гулнора ба гурӯҳи ҷиноие шомил шудааст, ки дар хориҷи кишвар қариб 1,4 млрд доллар, 63,5 млн евро, беш аз 27 млн фунт ва 18.5 млн франки Швейтсариро пинҳон кардааст. Дар Русия дар комплекси истиқоматии «Камелот»-и ш.Маскав 1 хонаи боҳашамат, 1 ҳавлии бузург ва 8 дар хонаи дигар дар маҳаллаи Рублевка-минтақаи сарватмандон ба ӯ тааллуқ доштааст. Дар шаҳри Ялта ҳам ба гуфтаи тафтишот 1 меҳмонхона, ҳавлӣ ва замин ба номаш будааст.