Корхонаи муштараки AKIA AVESTO бори нахуст дар мамлакат ба бандубасти автобусҳои тамғаи «AKIA» оғоз кард. Ифтитоҳи расмии ин корхона дирӯз бо ҳузури президенти кишвар Эмомалӣ Раҳмон ва раиси ш.Душанбе Рустами Эмомалӣ сурат гирифта, иттилоъ дода шуд, ки бо мақсади навсозии парки техникии ш.Душанбе барои харидории 100 автобуси тамғаи “AKIA” бо дарназардошти бандубасти он дар ҳудуди ҶТ шартнома ба имзо расонида шудааст.
Бино ба итиллои расмӣ, ҷиҳати интиқоли автобусҳо ба ҶТ корҳо идома дошта, айни замон 13 автобус ворид гардид ва то имрӯз бандубасти 10 адади он ба итмом расидааст. Масъулони корхонаи муштарак нақша доранд, ки дар кишвар  истеҳсоли 5 намуд автобусҳои дохилишаҳрӣ ва беруназшаҳриро бо дарназардошти мутобиқати он ба стандартҳои байналмилалӣ ба роҳ монанд. Тибқи иттилои масъулон, баробари ба фаъолият оғоз намудани корхонаи нав иқтидори истеҳсоли автобусҳо дар 1 сол аз 250 то 300 ададро ташкил дода, шумораи кормандон аз ҳисоби мутахассисони маҳаллӣ на кам аз 200 нафар хоҳад шуд. Корхонаи мазкур дар мӯҳлати 1 сол сохта мешавад.

СССР

Ширкати саҳомии холдингии кушодаи «Барқи тоҷик» дар соли 2017 беш аз 15 млрд кВт.соат энергияи барқ истеҳсол намуд, ки он нисбат ба соли 2016 дар ҳаҷми 955,8 млн. кВт-соат зиёд мебошад. Аз ҷумла, истеҳсоли энергияи барқ дар марказҳои барқу гармидиҳӣ ба 980,9 млн.кВт.соат баробар шуд, ки нисбат ба соли 2016 380,8 млн. кВт-соат афзоиш ёфтааст. Дар ин бора ба намояндагони воситаҳои ахбори омма Мирзо Исмоилзода, раиси ШСХК «Барқи тоҷик» рӯзи 14.02.2018 хабар дод.
- Яке аз проблемаҳои асосии соҳа, ки имрӯз моро ба таш¬виш овардааст, ин дар сатҳи ниҳоят паст пардохт шудани маблағ аз тарафи баъзе истифодабарандагони азими ҷумҳурӣ мебошад. Новобаста ба дастгириҳои соҳаи хоҷагии оби ҷумҳурӣ аз тарафи Ҳукумати мамлакат, ки аз соли 2010 то ин ҷониб нисбат ба онҳо тарифи имтиёзнок татбиқ шуда истодааст, соли 2017 корхонаҳои Агентии беҳдошти замин ва обёрӣ пардохти маблағи барқро ҳа¬магӣ дар сатҳи 2,7% таъмин намуданд. Дар 7 соли татбиқ гардидани тарифҳои имтиёзнок барои насосҳои обкашӣ даромади молӣ ба маблағи зиёда аз 980 млн. сомонӣ кам гардида, ба вазъи молиявии ШСХК «Барқи Тоҷик» таъсири манфӣ расонида ис¬тодааст. Бо мақсади рӯёнидани қарзҳои дебиторӣ ширкати «Барқи Тоҷик» соли 2017 ба 2450 нафар муштариёни қарздор ба маблағи зиёда аз 173,2 млн. сомонӣ иддао пешниҳод на¬муд, ки аз ин маблағ 49,8 млн.сомонӣ, ё ин ки 28,8%-и маб¬лағи пешниҳодшуда ба суратҳисоби ширкат ворид шу¬даст, - иброз намуд Мирзо Исмоилзода.

СССР
 

Мирзо Исмоилзода, раиси ширкати «Барқи тоҷик» мегӯяд, ки аз ҳамроҳшавӣ ба системаи ягонаи энергетикии Осиёи Марказӣ Тоҷикистон бурд карда, имкониятҳои нави ҳамкорӣ ва содироти барқро ба даст меорад.
- Гуфтушунид дар бораи дубора ҳамроҳ шудани Ҷумҳурии Тоҷикистон ба системаи ягонаи энергетикии Осиёи Марказӣ айни замон идома дорад. Имрӯз коршиносон дар бораи зарару фоидаи ин амал зиёд мегӯянду менависанд, аммо ман мехоҳам таъкид намоям, ки аз ҳамроҳшавӣ ба системаи ягонаи энергетикӣ Тоҷикистон бурд мекунад, зарар не. То ба имрӯз системаи энергетики Тоҷикистон ба таври автономӣ кор мекунад, агар ба системаи ягона ҳамроҳ шавем, он гоҳ садамаҳо дар хатҳои интиқоли барқ ва талафотҳо ба маротиб кам шуда, доду гирифти нерӯи барқ ва сифати он меафзояд. Тавассути ин система мо метавонем дар фасли тобистон ба кишварҳои ҳамсоя барқи бар изофаро фурӯшем ва аз ин фоида ҳам ба даст биёрем, - гуфт Мирзо Исмоилзода зимни нишасти матбуотӣ ба хабарнигорон.
Бояд қайд намоем, ки моҳи ноябри соли 2009 ҷумҳурии ҳамсоя-Ӯзбекистон бидуни огоҳӣ аз системаи ягонаи энергетики Осиёи Марказӣ баромада, бо ин амал кишвари моро, ки ба воситаи Ӯзбекистон ба ин система шомил буд, бидуни барқу равшанӣ гузошта буд.

СССР

Вазорати тандурустӣ ва ҳифзи ичтимоии аҳолии ҶТ дар соли 2017 аз таваллуди 729 кӯдакони маъюби модарзод пешгирӣ намуд.
Бино ба итиллои Насим Олимзода, вазири тандурустӣ ва ҳифзи ичтимоии аҳолии кишвар, дар соли сипарӣ гардида, дар байни занони ҳомила 1380 нуқсонҳои дохилибатнии тифл дар давраи барвақти ҳомиладорӣ дарёфт гардида, ҳомиладории 729 нафар занон қатъ карда шуд. Ин омил боиси пешгирии таваллуди 729 кӯдакони маъюби модарзод гардид. Тибқи маълумотҳои солҳои гузашта ҳамасола таваллуди то 1200 кӯдакони маъюби модарзод ба қайд гирифта мешуд.

СССР

Айни замон дар муассисаҳои хусусии тиббии мамлакат 25 нафар мутахассисони бурунмарзӣ кору фаъолият намуда, ба шаҳрвандони Тоҷикистон кӯмаки тиббӣ менамоянд.
Чуноне ки дар нишасти матбуотии вазорати тандурустӣ ва ҳифзи ичтимоии аҳолии ҶТ маълумот дода шуд, аз ин 25 нафар-5 нафар шаҳрвандони Эрон, 8 нафар табибон ва 1 фелдшер аз Хитой, 4 нафар аз Ҳиндустон, 3 нафар аз ИМА, 1 нафар аз Дания, 1 нафар аз Норвегия ва 2 нафар аз Россия мебошанд.

СССР

Тими футболи «Вахш»-и Қӯрғонтеппа бо пешниҳоди бозингарон ва ҳукумати шаҳр  номашро ба «Хатлон» иваз намуд. Абдуалим Исмоилзода, раиси ш.Қӯрғонтеппа дар сӯҳбат бо мухбири СССР ин хабарро тасдиқ карда гуфт, ки ба дастаи футболи «Вахш»-и Қӯрғонтеппа, ки сарпараст надошт, ҳукумати шаҳр 1 000 000 сомонӣ ҷудо кардааст.
Гуфта мешавад, ки то омадани Абдуалим Исмоилзода ин даста муассиси ҳақиқӣ надошт. Дастаи футболи «Вахш»-и Қӯрғонтеппа соли 1969 дар водии Вахш таъсис ёфта, дар ин муддат чанд маротиба номашро иваз кардааст. «Вахш» аз дастаҳои  ҳирфаӣ дар кишвар ба ҳисоб рафта, борҳо ғолиби лигаи 1-уми мамлакат низ шудааст.

Баҳодур Уроқов, СССР, вилояти Хатлон

Далелҳои қасдан оташ задани моликияти давлатию ҷамъиятӣ дар шаҳру навоҳиҳои вилояти Хатлон дар соли 2017 39 ҳолатро ташкил намуд, ки нисбати соли гузашта 10 адад зиёд буда, нисбати онҳо бо модда 255 КҶ Ҷумҳурии Тоҷикистон парвандаҳои ҷинояти боз карда ба ШВКД ирсол карда шудааст.
Бино ба итиллои подполковник Садриддинхон Султонов, сардори Раёсати хадамоти давлатии оташнишонии в.Хатлон, шумораи умумии ҳодисаҳои сӯхтор  дар шаҳру ноҳияҳо 392 адад ба қайд гирифташуда, нисбати соли гузашта, 21 адад зиёд мебошанд. Аз ин шумора 308 ададаш дар хонаҳои истиқоматии шаҳрвандон ва биноҳи ёрирасони маҳаллии зист ба амал омадааст. 

Баҳоудр Уроқов, СССР, вилояти Хатлон

Зимни гузаронидани чорабиниҳои оперативӣ-ҷустуҷӯӣ аз ҷониби кормандони милитсия муайян карда шуд, ки зодаи ш.Панҷакент, шаҳрванди Федератсияи Россия, муваққатан истиқоматкунандаи шаҳри мазкур, дар вазифаи ноиби ректори Донишгоҳи Омӯзгории Тоҷикистон дар ш.Панҷакент оид ба илм ва иноватсия кор карда, дидаю дониста, ба 1 сокини ш.Панҷакент, ки пас аз хатми мактаби миёна умуман дар ягон муассисаи таҳсилоти олӣ, аз ҷумла дар ҳудуди Федератсияи Россия таҳсил накардааст, барои аз Донишкадаи Давлатии Омӯзгории шаҳри Омски ФР дастрас намудани маълумотномаи қалбакӣ, 3600-доллари амрикоирро ҳамчун пора талаб кардааст.
Бино ба итиллои ВКД ҶТ, номбурда, санаи 8-уми феврали соли 2018, дар утоқи кориаш дар вақти гирифтани пора ба маблағи 3600-доллар аз марди дар боло зикргардида аз ҷониби кормандони милитсия дастгир карда шуд. Аз рӯи ин ҳодиса парвандаи ҷиноятӣ оғоз гардида, тафтишот идома дорад.