Дирӯз дар Тошканд Рашид Қодиров-собиқ генпрокурори Ӯзбекистон ва ҳамзамон 2 муовини собиқаш низ боздошт шуданд. Ин амал тибқи дастури прокурори генералии кишвар сурат гирифта, Рашидро дар чанд иттиҳомот, аз ҷумла, азхудкунии амволи давлатӣ ва пулшӯӣ тавассути бонкҳои хориҷӣ айбдор мешуморанд. Тибқи иттилои матбуоти Тошканд, писари ӯ Алишер низ чанд рӯз пеш аз кишвар фирор карда, айни замон дар ҷустуҷӯ қарор дорад. Бояд гуфт, Рашид 15 сол ба ҳайси прокурори генералии Ӯзбекистон фаъолият намуда, апрели с.2015 аз вазифа сабукдӯш шуд. Ҳанӯз августи соли гузашта Шавкат Мирзиёев-президенти ҶӮ дар яке аз мулоқотҳои хеш аз прокуроронаш интиқод намуда, гуфта буд, ки онҳо дуздони калони кишваранд. Иттиҳомот зидди роҳбарони мақомоти қудратӣ ва интиқодҳои Мирзиёев аз фаъолияти кормандони ин ниҳодҳо дар чанд моҳи ахир бори аввал нест. 31.01.2018 президенти тозаинтихоби Ӯзбекистон Рустам Иноятов-раиси СНБ (КГБ)-и кишварашро аз вазифа сабукдӯш намуд. Иноятов аз с.1995 роҳбарии ин ниҳодро бар ӯҳда дошта, яке аз шахсиятҳои калидӣ дар даврони ҳукуматдории Ислом Каримов ба шумор мерафт. Коршиносон мегӯянд, маҳз СНБ ва дахолати шахсии ӯ буд, ки режими Каримов сахту сангин гашта, ҳар касе вокуниш нишон медод, зуд боздошт мешуд. Рустам ба қавле дар дохили давлат «давлат» сохта буд ва ахир Мирзиёев ӯро сабукдӯш намуда, бо тағйир додани системаи корӣ дар СНБ ба режими Иноятов нуқта гузошт.
Ҳафтае баъд, 26.01.2018 бо дастури Мирзиёев Адҳам Аҳмадбоев, собиқ вазири корҳои дохилии ҶӮ, ки ӯро президент «хоин» номида буд, боздошт шуд. Бино ба иттилоъ, Аҳмадов аз с.2013 то моҳи январи с.2017 вазири ВКД буда, ӯро низ дар хиёнат, пулшӯӣ, суистифода аз мансаб ва баромадан аз ваколатҳои хеш айбдор медонанд. Чанде пеш ҳангоми сафари худ ба Бухоро Мирзиёев ба роҳбарияти маҳбаси шаҳр, ки зертобеи КДАМ аст, дастур дод, ки маҳбусонро шиканҷа накунанд, зеро аз ҳар коре, ки дар маҳбас мешавад, президент хабар дорад.
«Ман дар Бухоро ахбори зиёд дорам ва медонам, чӣ гуна беадолатона мардуми зиёдро ба маҳбас кашидаанд. Шоҳиду аксҳои бисёр ҳаст, алалхусус, дар мавриди шиканҷа. Ному насаби пурсишкунандагон низ ҳаст. Вақташ ояд мо дар бораи ҳамаи ин хоҳем гуфт. Мо дар Бухоро «чистка»-ро сар мекунем!»-гуфта буд Мирзиёев.

Ман дар Армияи Советӣ хизмат кардаам ва аз ин 1 умр ифтихор дорам. Армия воқеан ҳам тақдирсоз аст. Акнун чанд қиссаи сарироҳӣ меорам. Ҳамту. Инфо к размышлению...

Матбуоти даврии Тошканд хабар дод, ки генерал Шӯҳрат Ғуломови 52-сола, собиқ муовини аввали раиси СНБ-Хадамоти амнияти миллӣ ва яке аз шахсиятҳои хеле бонуфуз дар кабинети Каримов-президенти қаблии раҳматӣ, абадан суд шудааст. Шавкат Мирзиёев-президенти Ӯзбекистон дар нутқи худ, дар 1 маҷлиси васеъ гуфт, ки "Ғуломов хеле одами ноинсоф буд...”. Ҳоло бо ҳукми суд ӯ ҳамчунин аз рутбаи генералӣ ва нишонҳои давлатиаш, аз ҷумла, аз унвони олитарин-"Қаҳрамони Ӯзбекистон” маҳрум карда шуд ва бояд беш аз 1 млрд. доллар зарари расондааш ба хазинаи давлатро барқарор кунад. Бояд гуфт, дар с.2007 Ислом Каримов ба Шӯҳрат унвони "Қаҳрамони Ӯзбекистон”-ро барои саҳмаш дар саркӯби ошӯбҳои Андиҷон дода буд. Баробари фавти Каримов дар таърихи 2.09.2016 ӯ аъзои хонаводаашро зуд ба Амрико гурезонд.

Мақолаи Сайёфи Мизроб «Вакуум» (СССР, №4(489), 25.01.2018)-ро хондам. Аҳсант! Вакуум, яъне ҷои холӣ аз ҳавост. Ҷои аслии зиёии Тоҷик воқеан ва бе муболиға холист. Ман зиёиёнро аслан қариб, ки дар ҳеҷ куҷо намебинам, онҳо дар ягон баҳсу мунозира иштирок надоранд. Гӯё ҳар масъалае, ки мавриди баҳс қарор мегирад, ба онҳо комилан дахл надорад. Сад ҳайфи ин қадар шоир, нависанда, номзадҳои илм, доктору профессору вузаро… Ин фикр тайи даҳсолаҳо маро ранҷ медиҳад, ки чаро зиёиён хомӯшанд? 1 мисол аз он чӣ, ки худ шоҳид будам, ба шумо мухтасар гуфтаниям.
Соли 1992. Ман бо ҳамроҳи 2 дӯстам (шодравон Ҳусейн Наботов-номзади илм ва Тағоймурод Тоҳиров-тоҷир) дар 1 маърака (тӯй)-и 1 номзади илм иштирок доштем. Дар меҳмонхонаи он кас тақрибан 35-40 нафар меҳмонон ҳузур доштанд ва аз онҳо ба фикрам 12-15 нафар (мутаваҷҷеҳ бошед!) доктори илм, номзади илм, профессорҳо… буданд. Вале мутаассифона, дар он маърака лаҷоми суҳбат дар дасти 1 домуллое буд, ки ба ҳама саволҳо ҷавоб медод. Он шабу рӯз ҳанӯз дар шаҳрҳои Кӯлобу Қӯрғонтеппа ҷанг мерафт. Дар ҷавоби худ домулло ба маҳалчигии рӯйирост роҳ медод. Дар аввал, ростӣ, хеле тоқат кардам ва умед доштам, ягон кас аз ин олимон даҳони домуллои «ҳамадон»-ро мепӯшад, вале ҳайҳот. Ниҳоят тоқатам тоқ шуд ва ба баҳсу мунозира пайвастам. Хуллас, ба зикри чанд далели муқаннаъ дар чанд масъалаи мавриди баҳс домулло аз «аспи» ғурур фуруд омада, ба ман «домулло» гуфта муроҷиат мекард. Аҷобати кор дар он буд, ки ғайр аз ман дигар касе дар он маърака ба домуллои маҳалчӣ ҳарфе нагуфт ва баракс ишора мекарданд: «Чӣ даркор ба домулло ин қадар баҳс кардан?».

Адами зиёӣ-рушди экстремизм
Тазаккур бояд дод, ки аз сабаби набуди зиёии асил ҷавонон аз паси домуллоҳои гумроҳ мераванд. Бародарони рус хуб фармудаанд, ки «свято место пусто не бывает». Гоҳо шоҳид мешавем, ки аз Россия тобути ҷавонеро меоранд, ки аз дасти миллатчиёни рус бо шиканҷаҳои зиёд кушта шудаанд. Гӯё ин ба ягон кас дахл надошта бошад. ВКХ, Вазорати меҳнат ва шуғли аҳолӣ ва кормандони ҳамаи вазоратҳо… хомӯшанд. Ҳол он, ки дахолат кардан ба ҳалли ин масоил вазифаи ҷонии онҳост!
Дар СССР зиёда аз 1 сол боз баҳсу мунозира перомуни ИНТ меравад, ки фалон шоир ё нависандаро нодуруст аз ИНТ хориҷ кардаанд. Чаро нодуруст будааст? Хоҳиш мекунам, каҷ шинеду рост гӯед! Кадоми онҳо бо кадом достон, роман ё китоби худ ё аққалан 1 шеър дар байни мардум маҳбуб шуда бошанд? Барои мисол Устод Бозор Собир аъзои ИНТ нестанд, аммо ман якчанд шеъри он касро аз ёд медонам. Кадом китобе, ки аз номи Б.Собир чоп шавад, бо ҳар қимате бошад, мардум мехарад. Пас аз он, ки шуморо аз ин ИНТ ронданд, баъд шумо коғазу қалам мегиреду зидди роҳбарияти ИНТ менависед? Чаро пештар камбудиҳои роҳбариятро фош накардед? Ғайр аз ин, магар ҷомеаи мо мушкили дигар надорад? Агар аз рӯи инсоф гӯем ба назари ман ин кори савоб, яъне «амалиёти поккорӣ»-ро дар Академияи Умум низ пиёда кардан аз манфиат холӣ нест. Хас каму ҷаҳон пок! Маданияти ҳалқи Тоҷик имрӯз ба таври стихиявӣ пеш меравад, чунки зиёии пешбаранда надорад. Ба касе ғараз надорам, лиҳозо, бисёр сахту дурушт гуфтам, зеро зиёӣ рисолати аслии худро бояд дуруст анҷом диҳад, вагарна ӯ вакуум-ҳавои холӣ аст!

Зиёҷон Хошматов,
деҳаи Шайнаки Муллогадо, н.Рӯдакӣ

Салом, редаксияи азиз! Дар газетаи СССР (№33, 17.08.2017) мақолаи журналист Абдуқодири Абдуқаҳҳор "Мо нафақахӯр не, зиндадаргӯрем!"-ро хондам, ки айни муддаост ва дар байни одамон боиси муҳокимаю дастгирӣ шуд. Нависанда арзи дили нафақахӯрони зиёдеро, ки солҳои тӯлонӣ барои халқу Ватан содиқона хизмат намуда, имрӯз бо нафақаи ночиз ҳаёти вазнинеро аз сар мегузаронанд, ба вакилони мардумӣ расондааст. Аламовараш он аст, ки роҳбарони корхонаю ташкилотҳо ва муассисаҳо шарм надошта, ба чашми кормандони шоистаи худ, ки солҳо номбардори коргох буданд, нигариста, мегӯянд:
"Шумо нафақа баромадед, аз кор озод!".
Куҷо шуд қадршиносию одамгарии Тоҷиконаи мо? Магар инсон ҳам дар пирӣ чун 1  ашёи нолозим ба кунҷе партофта мешавад? Агар ӯ ақаллан ба ҳисоби миёна 1000 сомонӣ нафақа мегирифт, шояд он вақт кор накарда, дами пирӣ меронд. Ку ҳақиқату адолат? Оне, ки хизмате накардааст ва оне, ки солҳо заҳмат кашидааст, ҳар 2 баробаранду 200-240 сомонӣ нафақа мегиранд?! Ин ба тарозуи ақл рост намеояд. Кош, ба ҷои ин қадар мактабҳои олӣ бештар корхонаҳои истеҳсолӣ месохтему мардумро бо кори доимӣ таъмин мекардем, шояд сатҳи зиндагиамон беҳтар мешуд.

Соли 2019-Соли пирон…
Ташвишовараш он аст, ки баъзе роҳбарони корхонаю муассисаҳо ба қадри мутахассиси хуб нарасида, "имсол соли ҷавонон"-ро дастак карда, ба иззати нафси калонсолон мерасанд ва захираҳои тиллоии ҷомеаро бо ҷавонони чаласаводи бетаҷриба иваз намуда, оқибаташро андеша намекунанд. Боиси афсӯс аст, ки баъзе ҷавонон саводу маҳорат ё хоҳиши кор кардан надоранд. Шояд сабаб дар гурӯҳҳои шартномавӣ таҳсил кардани донишҷӯён, ё ба "маршировкаҳои" тӯлонӣ банд шудани эшон бошад? Агар устодони пуртаҷриба дасти онҳоро нагиранд, пас ба онҳо кӣ роҳ нишон медода бошад? Ин ҷо бояд андеша кунем, ки чаро давлати Сосониён шикаст хӯрд? Шояд мақоли хуби "1 мард пас аз 40 сол ба воя мерасад"-ро шиор карда, соли ояндаро соли нафақахӯрон, ё калонсолон эълон намоем?
Мӯҳтарам вакилони мардумӣ! Аз шумо эҳтиромона хохиш дорем, оид ба мақолаи А.Абдуқаҳҳор, ки дар симои 1 нафақахӯр рӯзгори 100-ҳо нафарро мисол овардааст, чораи зарурӣ андешед!

Майсара Шералӣ
омӯзгор

Ҷашни "ишқ"
Рӯзи Валентини муқаддас, ё Рӯзи ошиқонро ҳамасола 14 феврал дар бештари кишварҳои дунё ҷашн мегиранд. Рӯзи Валентини Муқаддас 5 аср боз вуҷуд дорад, аммо ҷашнҳои "ишқ" тибқи анъанаҳои давраи ибтидоӣ ҳанӯз дар аҳдҳои бостон ҳам фаровон буданд. Барои мисол, ҳар сол 14 феврал дар Руми қадим ҷашни худои издивоҷ ва модарӣ-Юнонаро ҷашн мегирифтанд. Дар ин рӯз духтарон номаҳои ошиқона навишта, онҳоро даруни қуттиҳои бузург мегузоштанд.