Узви Ихвон-ал-СССР, муаллими собиқадор, узви ИЖТ, Шарифҷон Раҳимзода, аз ноҳияи Абдураҳмони Ҷомии вилояти Хатлон дар меҳмонии СССР гуфт, ки рӯзи шанбеи 7.07.2018 хостам ба ш.Турсунзода рафта набераҳоямро хабар гирам. Соатҳои 7:00 бо табъи болида аз хона баромадаму соатҳои 9:30 ё 10:00 дар ш.Душанбе аз назди бозори Саховат ба нақлиёти мусофирбари Старекс (хатсайри №28) нишастам. Ронанда ҷавони ҳузарби «сақичхояк» бо либоси сабзи остинкӯтоҳ ҳар дам ба мусофирон «или два рубля, или автобус» гуфта хитоб мекард. Аз ҳама мусофирон 2 сомонӣ гирифт. «Худаш шоҳу табъаш вазир» буду бо дағалӣ табъи моро хира кард. Ронандаи эркатулфор ҳама мусофиронро дар истгоҳи Зарафшон фаровард, чунки ба қавли ӯ, ин ҷо истгоҳи охирин будааст. Баъзе илтимос карда, ки то истгоҳи Зарнисор бояд бубарӣ. Ӯ бо дағалӣ боз 2 сомонӣ талаб кард. Мо нафаҳмидем, ки истгоҳи охирини №28 Зарафшон аст, ё Зарнисор? Хулоса, ҳамон  рӯзи «наҳс» камина 3 сомонӣ сарф карда, то маҳаллаи Зарнисор, 3 км пиёда рафтам. Дар Душанбеи нозанин, ки ҳар роҳу гулгашташ имрӯз биҳиштосо шудааст, чунин ронандагони дағалгуфтору баднафс чун заҳрпечак ҳоло ҳам ҳастанд.

Салом, СССРи гиромӣ ва мардумӣ! Қонуни ҶТ «Дар бораи танзими анъана ва ҷашну маросимҳо дар Тоҷикистон» дар давраи 10 соли амали худ барои мардум хеле манфиатбахш буд, вале бо мурури замон он беҳбудӣ, такмил ва тағйироту иловаҳоро талаб менамояд. Вобаста ба ин таклиф менамоям:
1.Пеш аз ҳама ҳайати комиссияҳои танзим пурқувват карда ва шумораашон зиёд гардида, шахсоне аъзои он бошанд, ки маълумоти олӣ дошта, аксарашон собиқ кормандони мақомоти ҳифзи ҳуқуқ бошанду поквиҷдон ва принсипнок!
2.Дар кишварамон анъанаю маърака ва маросимҳо чунон бисёранд, ки аксари онҳо арзише надоранд, танҳо 1 амалу кори бефоидаю бемаъниянд. Барои ҳамин дар матни нави Қонуни танзим ҳамаи анъанаю маъракаю маросимҳои нолозим пурра нишон дода шаванд, чунки мардум чунон қонундон шудаанд, ки ба ҳар калима эрод мегиранд.
3.Одати бад ва беақлонаи дигари мо ин аст, ки ба хонаи домод аз паси арӯс 10-15 нафар, ҳатто баъзе мавридҳо 25-30 зану духтар, янга шуда меравад. Инро манъ кардан лозим!
4.Ҳоло байни мардум қоидаи нонавиштае ҷорӣ шудааст, ки фикр мекунӣ, арӯсакон ва занҳои Тоҷик ақлу фаросатро аз даст додаанд. Онҳо падарону модарони худро маҷбур месозанд, ки барояшон тамоми ҷиҳози рӯзгор-кӯрпаю кӯрпача, таксарию қолин барои 2 кати хоб, диван, кресло, шифонеру шкаф, ТВ, мошинаи либосшӯӣ, чойнаку сатилу тағора ва дигар асбобҳои рӯзгорро пайдо намуда, ба хонаи домод фиристанд, то ин ки назди хусуру хушдоман худро сарбаланд донанд, аммо фикр намекунанд, ки падари заҳматкаши худро зери бори гарони қарз мегузоранд ва падари бечора доимо дар андешаи ҷамъ овардану баргардондани маблағи қарз мешавад. Рӯзгори вазнинеро аз сар мегузаронад. Ман фикр мекунам, ин одати бемаънӣ ҳам аз байн бардошта шавад.
5.Як одату расми номақбули дигаре, ки мо дорем, ин амали рӯкушоён ва ордбезон аст. Ҳамин маъракаро низ занҳо ташкил мекунанд ва хароҷоти зиёд дар пай дорад. Ин маърака ғайр аз худнамоӣ чизи дигаре нест.

Домод 40.000: Арӯс 100.000…!
Ҳоло бароятон аз хусуси ҳарҷи пулу молу ускуна дар тӯйи арӯсиву домодӣ мегӯям. Тарафи домод ба тарафи арӯс аз 2 то 3000 доллар, ё худ 18-25 ҳазор сомонӣ медиҳад. Тарафи домод барои гузаронидани тӯйи худ камаш 1500-2000 доллар (13-18.000 сомонӣ) хароҷот мекунад, ки ҷамъи хароҷот ба 31-40.000 сомонӣ мерасад. Аммо тарафи арӯс боз бештар харҷ мекунад. Тӯйу сур як бало, хариди колои арӯсӣ бо тамомии ҷиҳози хона то 80-100000 сомонӣ мерасад!
Агар шахс 1000 сомонӣ маоши ҳармоҳа дошта бошад ва он оила ҳеҷ чизе нахӯраду нанӯшад, 7-8 сол лозим аст, ки пул ҷамъ орад то фарзандашро оиладор кунад. Шумо-хонандагони азизро намедонам, вале ман ҳеҷ фаҳмида натавониста истодаам, ки куҷои ин маърака танзим шудааст?
Барои ҳамин дар Қонун нишон дода шавад, ки шаҳрвандон аз давраи маслиҳат-фотиҳа кардан ба Комиссияи танзим хабар диҳанд ва ҳам аз ҷониби домод ва ҳам аз ҷониби арӯс намояндагони Комиссияи танзим ва шӯрои маҳалла дар ин чорабинӣ иштирок ва харҷу сарфи тӯйро муайян кунанд. Агар маъракадорон ин талаботро риоя насозанд, пас ба гузарондани тӯй умуман иҷозат дода нашавад.

Комрони Далер,
ш.Бохтар, тел: 919 28 30 00

Аз СССР: Нимҳазлу нимшӯхӣ: барои кам кардани харҷи тӯй ва риояи Танзим бояд зани…рус ё аврупоӣ гирифт!!! Зани Тоҷик то вақте ҳаст, аз худнамоӣ даст намекашад ва қонуни танзим то бар ҳадди зиндонӣ кардан низ сахт шавад, Танзим на-ме-ша-ваддд. Инро аз таҷрубаи талхи худи мардони Тоҷик мегӯем. Мо метавонем!

Салом, СССР-и гиромӣ ва мардумӣ! Ҳоло, мутаассифона, дар куҷое чӣ садамае рӯй диҳад, ҳатман ба кисаи мардум умед мебанданд. Ҳукуматҳои маҳаллӣ чунин вонамуд мекунанд, ки гӯё маблағ надоранд. Лиҳозо, тамоми таъмиру ободкориҳо аз ҳисоби маоши ночизи мардум сурат мегиранд. Бигзор пул ҷамъ кунанд, лек ба истиснои онҳое, ки даромад надоранд, на замин, на боғ, на дӯкончае, на техникае ва на мардикоре дар Россия. Аз нодору доро баробар пул ҷамъ кардан ҳамон ҷашну маъракаҳои серхароҷоти пеш аз танзимро ба ёд меорад. Яъне мо-мардуми камбизоатро аз таги борон хезонда, дар таги новардон шинондем, ки ин аз рӯи инсоф нест. Дар ҷамъият зиндагии ҳама баробар нест. Яке зиндагии хуб дорад, дигаре миёнаҳол, сеюмӣ камбизоат. Имрӯзҳо зиёда аз 20 намуду номгӯи пулҷамъкуниҳо тавлид шудаанд. Рӯз аз рӯз афзудани пулҷамъкуниҳо шубҳанок буда, шояд нисфи он ба ҷайби баъзе масъулон дароянд? Магар ин ҳама паст задани шаъну шарафи миллати ба нангу номуси тоҷик нест?
Ман таклиф мекунам, ки мардуми одию камбизоатро аз пулҷамъкуниҳо озод кунанд. Раисони ҷамоату маҳаллаҳоро водор сохтан лозим аст, ки ба шахсони доро такя кунанд. Ҳатто президенти кишвар дар баромадҳои хеш борҳо гуфтааст, ки бештар аз саховатпешагону сармоядорони маҳаллӣ истифода кунанд, то ки ҳама зиндагии шоиста дошта бошанд.

Табаралӣ Авсақолов,
Узви Ихвон-ал-СССР, н.Фархор

Зиндаву ҷовид монд ҳар кӣ накӯном зист,
К-аз ақибаш зикри хайр зинда кунад номро.
Акбари Саттор аз он нафароне буд, ки бо саховату дасткушодӣ миёни мардум иззату обрӯ дошт. Банда бо ӯ падарошно будаму бо падараш ҳамкор ва қариб 15 сол ҳар 2 дар кори савдо будему рафту омади дӯстона доштем. Рӯзе чун ҳарвақта аз ГЖК «Шарқи озод», аз назди устод С.Мизроб баромадаму рост назди Акбарҷон  даромадам. Маро дидан замон аз ҷо хесту ба нишастан таклиф кард. «Ҳоҷӣ-бобо, аз куҷо омадед?» гуфт. «Аз назди устод Сайёф» гуфтам. Нағз кардед, гуфт. Аввал дуо кардем, баъд аз ҳолашон пурсон шудам.
Падари Акбарҷон баъди ба нафақа баромадан ба бисёр шаҳру ноҳияҳои Тоҷикистон сафар ва бузургонро зиёрат кардааст. Бо Акбарҷон аз ҳар боб суҳбат намудем. Дар идома аз ман хостанд, ки агар ягон хотирае дар бораи қиблагоҳашон дошта бошам, навишта орам, зеро дар бораи падарашон китобе карданианд. Баъди 2 рӯз 1 қиссаи аҷиберо, ки дар сафари ш.Панҷакент доштем, дар 2 варақи компютерӣ чоп карда овардам.
Охирон бор Акбарҷонро дар маъракаи ҷиянам-Суҳроби Зиё дида, бо ӯ анча суҳбат кардем. Бо ҳама дӯстоне, ки он ҷо ҳузур доштанд, бо чеҳраи кушоду лабони пуртабассум вохӯрӣ мекард. Мо-дӯстон аз куҷо медонистем, ки аз умри ӯ рӯзу соатҳои башумор мондааст? Ӯ 28.08.2016 тарки дӯстон кардаву бо қиблагоҳашон Ҳоҷӣ Қурбоналӣ бипайваст. Ҳарчанд, Акбарҷон бо мо нест, ному хизмати ӯву чеҳраи зебою лабони пуртабассумаш дар ёду дилҳои мо абадӣ мемонад. Ҷоят ҷаннату охиратат обод ва руҳат аз мо шод бошад, Акбарҷон! Орзуҳоятро бо худ бурдӣ! 100 дареғи чунин шахсони тавоно!

Шамсиддини Қудрат,
узви ИЖТ, ш.Ҳисор

Субҳи имрӯз Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати анҷоми сафари давлатӣ, ки рӯзҳои 17-18 августи соли ҷорӣ баргузор мегардад,  ба Ҷумҳурии Ӯзбекистон сафар намуд.
Дар фурудгоҳи байналмилалии Душанбе Президенти Ҷумҳурии Тоҷикистон Эмомалӣ Раҳмонро Раиси Маҷлиси намояндагони Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон, Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ гусел намуданд.
Дар ин сафар Президенти Ҷумҳурии Тоҷикистон Эмомалӣ Раҳмонро гурӯҳи калони ҳайати расмӣ аз ҳисоби аъзои ҳукумат, роҳбарони муассисаву идораҳои давлатӣ, раисони вилоятҳо, соҳибкорон ва аҳли ҳунару фарҳанг ҳамроҳӣ мекунанд.

   Вазорати корҳои дохилии Ҷумҳурии Тоҷикистон аз боздошти 1 гурӯҳи ҷавононе, ки шабона ба роҳзаниву ғоратгарӣ ва дуздии амволи шаҳрвандон машғул буданд, хабар медиҳад.
   Чуноне ки ба мухбири мо аз маркази матбуоти ин ниҳод хабар доданд, инҳо сокинони 23-солаи шаҳри Кӯлоб Шермуҳаммади Бозор ва Исмоил Мухторов мебошанд, ки бо ҳаммаслакони худ бо номҳои Баха, Манучеҳр ва Комрон, ки айни замон дар ҷустуҷӯӣ ҷиноятӣ қарор доранд, бо маслиҳати пешакӣ даст ба ҷинояткорӣ задаанд.
   Аз ҷумла, шаби 31 июли соли равон гумонбарон дар маҳаллаи Гипрозем ба шаҳрванд Маҳмадзариф Дамиров ҳуҷум карда, дар баробари ӯро буғӣ ва зери лату кӯб қарор додан, ҳамзамон бо корд ҷабрдидаро захмӣ карда, телефони мобилиашро рабудаанд.
   Гумонбарони ин ҷиноят кирдорҳои зиддиҷамъиятии худро идома дода, дар кӯчаи Борбад низ бо таҳдиди зӯроварӣ телефони мобилии шаҳрванд Абдуғаффор Давлатов, ки 1070 сомонӣ арзиш доштааст, аз они худ кардаанд.
Ба иттилои манбаъ, ин гурӯҳи ҷиноятпеша дар содир намудани се амали ҷинояти дуздӣ низ гумонбар дониста мешаванд.

    Рӯзҳои  18 -19 августи соли равон дар Муассисаи давлатии «Наврӯзгоҳ»-и пойтахт Фестивали тобистонаи Душанбе баргузор  мегардад.
   Фестивали мазкур бо мақсади муаррифии шаҳри Душанбе ҳамчун симои сайёҳии мамлакат  ва фароҳам овардани имконият ҷиҳати таъмини фароғату саёҳати сокинону меҳмонони пойтахт сурат гирифта, дар Фестивал барои сайругашти оилавии шаҳрвандон тамоми шароит фароҳам оварда мешавад.
   Дар ин рӯзҳо тамоми тарабхонаҳои пойтахт таҳти унвони «Ғизои болаззат»  хӯрок ва дигар маҳсулоти  миллиро  ба намоиш ва  фурӯш мегузоранд. Барои бачаҳо таҳти унвони «Шаҳри афсонаҳо» ҳар гуна барномаҳои фарҳангию фароғатӣ, аз ҷумла,  бо иштироки ҳунармандони театрҳои  пойтахт  намоишҳои мазҳакавӣ ва ҳазлу шухӣ пешниҳод  гардида, онҳо метавонанд дар ин ҷо аспсаворӣ намоянд.
   Ҳамчунин дар Фестивали тобистонаи Душанбе баргузории барномаи фарҳангӣ-фароғатӣ  бо иштироки санъаткорони машҳури мамлакат дар назар дошта шудааст.