«Масъулияти заҳролудшавии агенти пешини Русия Сергей Скрипал ва духтари ӯ Юлия, шахсан бар дӯши президенти Русия Владимир Путин аст», - гуфт муовини вазири корҳои дохилии Англия Бен Уоллес. Ба гуфтаи хабаргузории Associated Press, Бен таъкид кард, ки маҳз Путин ҳамчун сарвари давлат "истихбороти низомии Русияро назорат, сармоягузорӣ ва раҳнамоӣ мекунад». Ӯ гуфт, ки Британия ба амалҳои душманонаи Русия муқовимат хоҳад кард. Хотиррасон мекунем, ки Скрипал ва духтари ӯ Юлия моҳи марти соли равон дар 1 боғи шаҳри Солсберии Британия дар ҳоли беҳушӣ пайдо шуданд.

Дар суди ш.Стокголми Швейтсария муҳокимаи парвандаи роҳбарони пешини ширкати Telia (TeliaSonera-и собиқ) шуруъ шуд. Онҳо барои додани тақрибан 350 млн доллар "пора" ба Гулнора Каримова-духтари президенти пешини Узбекистон Ислом Каримов муттаҳам шудаанд. Дар суд якбора 3 нафар аз роҳбарони пешини ширкат-Ларс Нюберг, Теро Кивисаарӣ ва Улӣ Туимаро муҳокима мекунанд, ки дар гузашта яке мудири молӣ, дувумӣ ноиб-президент ва севумӣ мушовири тиҷорӣ буданд. Суди ш.Тошканд бошад Гулнораро бо айби саркашӣ аз пардохти андоз, дуздӣ, тамаъҷӯӣ ва маҳв кардани ҳуҷҷати ширкатҳои офшорӣ 5 сол зиндонӣ кард.

Салом, СССРи гиромӣ ва мардумӣ! Ба ҳама мардуми шарифи Тоҷикистон маълум, ки тибқи супориши Сарвари Давлат то ҷашни таърихсози миллат - 30-солагии Истиқлолияти Давлатии Ҷумҳурии Тоҷикистон сар аз кӯчаю деҳ корҳои ободонӣ ва созандагӣ дар ҷумҳурӣ сурат мегиранд. Аз ин рӯ, Сарвари Давлат  бештар вазирону раисон, мансабдорону маъмурони пулдору молдорро даъват кардааст. Тибқи маълумоти оморӣ 70%-и аҳолии н.Фархор ҷавононанд. Пас моро лозим аст, ки тарбияи дурусти онҳоро аз кӯдакию наврасӣ ба роҳ монем, то оянда шикоят накунем, ки чаро баъзе ҷавонон ба ҳизбу ҳаракатҳои ифротӣ шомил шуданд?
Мушкили №1 дар шаҳраки Фархор ин набуди майдончаи (варзишӣ не!) бозӣ дар назди баландошёнаҳо барои кӯдакон аст. Зеро баландошёнаҳо дар чорроҳаи мошингард қарор дорад. Хушбахтона, дар замони Шӯравӣ дар назди биноҳо майдончаҳои хоси бозӣ барои кӯдакон бо тамоми шароиташ мавҷуд буд, ки аз он кӯдакон дилхушона, бо завқи зиёд истифода мекарданд. Мутаассифона, имрӯз аз он майдончаҳо нишоне намонда, қитъаҳои атрофи биноҳо шахсӣ шудааст. Аз ин рӯ, ҷои бозии кӯдакон дар дохили хона, даромадгоҳҳои бино, саҳни ҳавлӣ маҳдуд аст. Ҳар рӯз аз пушти кӯдакон ҷангу хархаша аст. Пас кӯдакон дар куҷо бозӣ кунанд? Ҳар оила 3-4 кӯдакӣ дорад. Ҳатто ҷои нишаст нест. Дар ин мавзӯъ 2 бор навишта, бо дасти худам нусхаи онро ба ҳукумати ноҳия низ супоридам, вале масъулонро парвое нест. Ҷонишинон гуфтанд, ки ноҳия чунин маблағ надорад. Фақат аз ҳисоби бошандагони бино сохтани майдончаҳо мумкин асту халос. Наход Ҳукумати ноҳия барои намуна 1 майдончаро ба воситаи соҳибкоре сохта ба истифода дода натавонад, то мардуми камбизоат ҳис кунад, ки ҳукумати маҳаллӣ низ нисбати онҳо таваҷҷуҳ мекардааст?
Вазифаи раиси маҳалла фақат пул ҷамъ кардан аз кабизоатон нест, балки бо соҳибкорон робитаи мустаҳкам дошта бошанд. Бо чунин бетаваҷҷуҳӣ аз ояндаи кӯдакон чиро интизор шавем? Воқеан агар хоҳем, ки кӯдакон оянда шахсони солиму бардам, ватандӯсту ҳисси баланди миллидоштаро ба камол расонем, ҳатман майдончаҳои бозии кӯдаконро барқарор бояд намуд. Дар акси ҳол чи гуна метавон аз боби иҷрои Қонуни ҶТ «Дар бораи масъулияти падару модар дар таълиму тарбияи фарзанд» ҳарф зад?

Таваралӣ Авсақолов,
узви Ихвон-ал-СССР, н.Фархор

Хатти мушкилхон
Зинҳор дар дурустии хат саъй кун, ки ҳаст
Хатти шикаста хоби парешон саводро!!!

Соиб

Ниёкони мо то ҷорӣ шудани алифбои арабӣ дорои алифбои мехӣ, оромӣ (паҳлавӣ)… буданд. Аммо истилои араб хатҳои пешинро билкулл аз байн бурда, хати мушкилхону гунгу беимлои арабиро ҷойгузини он кард ва миллатро на танҳо дар асорати сиёсиву иҷтимоиву иқтисодиву низомӣ, балки илмиву адабию фарҳангию маънавӣ қарор дод. Хушбахтона, Инқилоби Октябр тоҷиконро дар асри гузашта на фақат аз асорати бегонагон-аъробу атроку муғул, балки аз асорати алифбои арабӣ низ наҷот дод, лек ҳамзабонони мо дар Эрону Афғонистон (форсҳову тоҷикҳо) натавонистанд, ки худро аз асорати аъробу атроку муғул ва хосса, алифбои муаммогунаву мушкилхони арабӣ наҷот бидиҳанд ва аз неъмати савод, яъне хондану навиштан баҳраманд гарданд. Ин аст, ки имрӯз ҳам дар ин кишварҳо, ки алифбои арабӣ ҳоким аст, мардуми зиёд аз файзи хондану навиштан бархӯрдор нестанд, яъне хондаву навишта наметавонанд, зеро алифбои сарбаставу муғлақу гунги арабӣ барои саросар саводнок гардондани мардум мувофиқат ва мусоидат намекунад. Ин алифбо то ба ҳадде мушкил ва беқоидаву бенизом аст, ки онро на натанҳо авом, балки аҳли илму адаб, онҳое, ки дар макотиби миёнаву олӣ ин хатро таълим медиҳанд, матншиносон, хаттотон, катибахонҳо, бо 1 сухан мутахассисон ҳам хонда наметавонанд. Хосса, дастнависи ин хатро кам касон метавонанд бихонанд. Беҳуда шоир нагуфтааст:
Мо, ки сатри каҳкашон аз лавҳи гардун хондаем,
Дар хати девонии занҷир оҷиз мондаем.

Алифбои қориазёд
Зимнан бояд гуфт, ки алифбои арабиро аз қадим то имрӯз қориазёд мекарданд ва мекунанд. Лиҳозо, донандагону хонандагони он ҳам фақат матнҳоеро метавонанд бихонанд, ки онҳоро аз ёд карда, аз рӯи он сабақ гирифтаанд, матнҳое, ки аз ёд накардаанд, то ин дам ба онҳо рӯ ба рӯ нашудаанд, надидаанд, наметавонанд бихонанд. Аз ин рӯ, ҳини дучор шудан ба матнҳои ноошно ва ҳифз накардашуда даст ба баҳонасозӣ мезананд, то худро аз ҳолати ногувор раҳоӣ бахшанд. Баҳсҳое, ки то имрӯз доир ба гуногунии матнҳо, ба вежа, шеъри шоирон дар миён аст, аз ҳамин мушкилоти алифбои гунгу беимлои арабӣ маншаъ мегирад. Лиҳозо, мо бояд ба мардум, мутахассисон, матншиносон, баргардонандагони матнҳо, устодону муаллимоне, ки алифбои арабиро дар мактаҳои миёнаву олӣ дарс медиҳанд, аммо худ онро дуруст хонда наметавонанд (чӣ расад ба шогирдон), олимон, шоирон эрод нагирем, айб намонем, зеро айб дар мардум нест, балки дар алифбои иртиҷоию мавҳуму маҷҳулу муғлақу мушкилхону беимлову беқоидаи бегонаи арабист, ки бо рӯҳу тафаккуру андешаи мо созгор нест. Беҳуд нест, ки миллати мо баъд аз истилои араб то имрӯз на забони арабӣ ва на алифбои онро натавонист пурра аз худ кунад. Дар гузашта ҳам иддае маҳдуд, танҳо бархе аз олимону адибони мо, забони арабиро медонистанду хати онро хонда метавонистанд, лек омма бо зеру забар ҳам наметавонистанд, ки онро дурусту беғалат бихонанд.

Номае мерафту меомад…
Дар ин замина метавон садҳо мисол овард, аммо бо нақли чанд мисол, ки аз мушоҳидаҳоямон ба даст овардем, иктифо менамоем. Масалан, дар Институти осори хаттӣ, замоне ки онро ба бинои дигар (биное, ки ҳоло ҷои будубоши 201 дивизияи Русия аст) кӯчонда буданд, шоҳиди зиндаи хонда натавонистани номае шудем, ки аз 1 кишвари ҳамзабон бо хати арабӣ омада буд. Дар он ҷо аксари ҳозирон аҳли илму адаб, донишмандон, ҳатто даъвогарону талабгорони ҷорӣ кардани алифбои арабӣ ҳам буданд, лек мактуби омадаро, ки бо хати арабӣ буд, хонда наметавонистанд. Инҷониб, ки бо коре ба он ҷо ворид шуда будам, дидам, ки нома аз даст ба даст мегардад ва мепурсанд, ки кӣ дастнависро хонда метавонад? Мутаассифона, ҳеҷ кас овоз баланд намекард. Банда, ки он замон матнҳои чопии арабиро базӯр мехондам, дам фурӯ бастам. Номаро бурданд, хонда тавонистанд ё натавонистанд, намедонам…

Ҷамолиддин Саидзода,
адабиётшинос

 Такягоҳи журналистикаи Тоҷик, профессор Иброҳим Усмонов ба синни мубораки 70 расид. Муборакамон бод!!!

Рӯзибой Эргашев, сокини деҳаи Зарнисори ноҳияи Рӯдакӣ (тел: 909 95 22 27, 90 333 68 85) дар меҳмонии СССР гуфт, ки соли 2011 бори аввал дар қисми ҳарбии №2747-и Қӯшунҳои сарҳадии КДАМ ҶТ (воқеъ дар назди бозорчаи Балх) 2 сол хизмат карда, соҳиби билети ҳарбӣ шудам. Аз шароити хизмат ягон шикоят надорам! Аммо мушкили ман дар дигар чист. Бори дувум ба ҷои додарам-Эргашев Алимуҳаммад, ки он шабу рӯз дар Русия буд, с.2016 дар қисми ҳарбии №05170-и Вазорати мудофиаи ҶТ дар н.Панҷакент хизмат кардам. Билети ҳарбиро аз қисми ҳарбӣ ба ному насаби додарам ба ман доданд, аммо дар комиссариати ҳарбии н.Сино билети ҳарбиро аз дастам гирифта гуфтанд, ки «ин билетро мо бекор мекунем, зеро моро «подставит» кардӣ. Мо барои 1 билет 10.000 сомонӣ «расход» кардаем…». Прокуратураи генералӣ ва Вазорати мудофиа тамоми ҳуҷҷатҳоро ба номи додарам ва дар доираи қонун омода карда буданд, аммо аз раёсати Вазорати мудофиа билети ҳарбиро доданӣ нестанд! Лиҳозо, аз Вазорати мудофиа эҳтиромона хоҳиш дорам, ки ба гирифтани билети ҳарбии додарам мусоидат кунанд.

  
Дар пайи интиқоди президенти ҶТ Эмомалӣ Раҳмон аз вазъи тартибот дар маркази ВМКБ, хосса ш.Хоруғ Маҳтобшозода Арамбегим Бозор аз вазифаи раиси ш.Хоруғ барканор шуда, ба ҷойи ӯ Кишвар Шамиров раиси ин шаҳр таъин гардид.
Инчунин, бо фармонҳои президенти кишвар Имомназар Хӯчаназаров аз вазифаи раиси н.Рӯшон барканор шуда, ба ҷойи ӯ Фаррух Додихудоев ба ин мақом омада, ба ҷойи раиси н.Роштқалъа Юсуф Султонноёбов Давлатшо Мамадшоев таъин гашт.