Тибқи Фармони Президенти ҶТ Эмомалӣ Раҳмон, ки субҳи имрӯз ба тасвиб расид, интихоботи даъвати нави вакилон ба Маҷлиси намояндагони Маҷлиси Олии ҶТ ва ба маҷлисҳои вакилони халқи ВМКБ, вилоятҳо, ш.Душанбе ва шаҳру ноҳияҳо рӯзи 1 марти соли 2020 таъин карда шуд.

Тавре сомонаи www.prezident.tj хабар медиҳад, интихоботи даъвати нави аъзои Маҷлиси миллии Маҷлиси Олии ҶТ бошад рӯзи 27 марти соли 2020 баргузор хоҳад шуд.

  Рустами Эмомалӣ, раиси ш.Душанбе санаи 3-уми декабри соли ҷорӣ бо сафари нахустини расмӣ ба ҳайси шаҳрдори Душанбе ба пойтахти Ҷумҳурии Ӯзбекистон-ш.Тошканд сафар кард. Ӯро дар фурудгоҳи байналмилалии Тошканд ҳокими ин шаҳр Ҷаҳонгир Ортиқхоҷаев  истиқбол гирифт,- иттилоъ медиҳад Агентии миллии иттилоотии Ӯзбекистон «УзА».

    Рустами Эмомалӣ ва Ҷаҳонгир Ортиқхоҷаев баҳри иҷрои бандҳои Созишномаи ҳамкорӣ байни роҳбарони 2 пойтахтро, ки ҳангоми сафари давлатии Президенти Ҷумҳурии Ӯзбекистон Шавкат Мирзиёев ба Ҷумҳурии Тоҷикистон моҳи марти соли 2018 ва сафари давлатии Президенти Ҷумҳурии Тоҷикистон Эмомалӣ Раҳмон ба Ҷумҳурии Ӯзбекистон моҳи августи соли гузашта ба имзо расида буданд, баррасӣ карданд. 

    Аз ҷумла, дар ин мулоқот масъалаҳои ҳамкории тиҷоративу иқтисодӣ, фарҳангиву гуманитарӣ байни Душанбею Тошканд, инчунин тасдиқи барномаи ҳамкориҳои 2 шаҳр барои соли 2020 мавриди баррасӣ қарор гирифтанд.

Шералӣ Давлатов, СССР

    Рустами Эмомалӣ, раиси ш.Душанбе ба тамоми роҳбарони идораву сохторҳои шаҳрӣ дастур додааст, ки дар фасли зимистон навбатдории шабонарӯзиро ба роҳ монда, шахсони мансабдори идора ва сохторҳои ҳудуди шаҳр новобаста аз моликият ва тобеияти идоравӣ ҳангоми навбатдорӣ барои мусоидат намудан дар ҳаллу фасли мушкилоту ниёзмандиҳои сокинони пойтахт масъулияти шахсӣ доранд.

    Чуноне ки сомонаи www.dushanbe.tj хабар медиҳад, ин амал бо мақсади таъмини фаъолияти мунтазами соҳаҳои ҳаётан муҳими хоҷагидорӣ дар шаҳр, зоҳир намудани вокуниши фаврӣ аз ҷониби роҳбарияти МИҲД ш.Душанбе ва ноҳияҳои он, мусоидат намудан ба ҳаллу фасли саривақтии муроҷиатҳо  ва мушкилоти шаҳрвандон роҳандозӣ карда шудааст.

   Рустами Эмомалӣ ба маъмурияти  ҶСК «Шабакаҳои барқии шаҳри Душанбе», Муассисаи давлатии «Шабакаи гармидиҳандаи шаҳри Душанбе», Ситод оид ба ҳолатҳои фавқулода ва мудофиаи граждании ш.Душанбе ва дигар сохторҳои марбутаи шаҳр супориш додааст, ки ҷиҳати роҳандозӣ намудани чораҳои зарурӣ дар ташкили навбатдории шабона аз ҳисоби роҳбарони зерсохторҳои худ, қабули муроҷиатҳои шаҳрвандон дар робита бо беҳбуд бахшидани хизматрасониҳои коммуналӣ, таъмини энергияи барқу гармидиҳӣ ва дигар ҳолатҳои фавқулода мусоидат намоянд. 

   Шералишо Кабиров, раҳбари Федератсияи навтаъсиси триатлон дар Ҷумҳурии Тоҷикистон интихоб гардид. Бояд гуфт, ки Федератсияи триатлон ташкилоти нави варзишӣ дар кишвар буда, Шералишо Кабиров рӯзи 28.11.2019 зимни баргузории ҷаласаи нахустини интихоботӣ раиси он пазируфта шуд. Дар ин бора маркази матбуоти Кумитаи Миллии Олимпии кишвар хабар медиҳад.

    Триатлон (сеҳарба) намуди варзиш буда, 3 сабқати варзиширо муттаҳид мекунад: шиноварӣ, велосипедронӣ, дав. Ҳамчунин, моделҳои дигари триатлон мавҷуд аст, вале дар ҳоли ҳозир аз ҳама маъмул, ки ба Бозиҳои олимпӣ ворид гардидааст, шиноварӣ-велосипедронӣ-дав мебошад. Мусобиқот дар масофаҳои гуногун баргузор мешаванд. Масофаи стандартӣ ё олимпӣ аз 1500 метр- шиноварӣ, 40 километр-велосипедронӣ ва 10 километр-дав дар шоҳроҳ иборат аст.

25.11.2019. Соат ба вақти СССР 15:54 дақиқа. Ҳоҷӣ Исмоил Пирмуҳаммадзода, олими вораста ва дӯсти мо меҳмони редаксия шуд ва сӯҳбати мо сари сеҳру ҷоду қарор гирифт, ки имрӯз бисёр мадум, ба вежа занон ба он даст мезананду пеши фолбину рамл ва ҷодугарон мераванд. Ҳоҷӣ гуфт, ҳоло бонувони иззатманд мехоҳанд ину он ҷавонмардро ба худ сарду гарму хунук кунанд… Бачаҳо низ андак-андак мушоҳида мешаванд. Ман аз рӯи ҳадиси Пайғамбар мегӯям, на забони хеш. Эй мардум эҳьтиёт кунед, Муҳаммад (с.) гуфт:

-Ҳар мусалмоне бо нияти сеҳру ҷоду (хунукиву гармӣ низ аз сеҳранд!-Ҳоҷӣ Исмоил) пеши касе меравад ва ё барои сеҳру ҷоду рӯи коғазе чизе менависад, мекашад, номашро Аллоҳ Ҷалла Ҷалолаҳу аз дафтари мусалмонӣ хат мезанад!

Зимнан эҳтиёт бояд кард, мардум, эҳтиёт!

Азбаски солҳои ахир аз минбарҳои баланд дар ҳаққи шахсони алоҳида ва муайян ва ҳатто маъруф вожаи тарсбарангезандаи «кофир» 12 бор садо медиҳад, лозим донистам перомуни вожаи мазкур ва аниқтараш ин ҳукм андешаҳои худро иброз дорам. Бошад, ки аз ин гуфтаҳо хонандаи гиромӣ чизе баҳри худ ҳосил намояд. Куфр, кофир ѐ кофар аз масдари арабии каффара ѐ кафара гирифта шуда, маънояш пӯшидан ѐ пӯшондан мебошад. Мухтасарбаѐнкунӣ ва умуман маънидод аз мухтасарсозиҳо дар ҷумлаҳои арабӣ он қадар маъмулӣ гаштааст, ки китоби таълимиеро «Мухтасарулвиқоя» номидаанд. Агар ин китобро бо тақриру тарҷумаву тафсираш биѐрем, шояд 2 китоби дигареро дар бар дошта бошад. Калимаи кофир низ зинаи мухтасарсозиҳоро кайҳо аз сар гузаронидааст. Дар ибтидо шахсеро кофир мегуфтанд, ки бо сухане рӯи ҳақиқатро пӯшонад. Сухани куфр сухане буд, ки тавассути он бар гуфтаҳои Худову расул муқобил мебаромаданд. Як суханеро бо сухани дигар пӯшонидан, ин аст маънии куфр. Пӯшонидани сухани Ҳақ худ куфр аст. Кофир шахсеро гӯянд, ки Худоро инкор кунад, пайғамбар Муҳаммад (с)-ро пайғамбари барҳақ надонад ва мисли ҳамин ҷумлаҳое, ки маънии болоро ифода кунанд. Кӣ ҳаққи ҳукм карданро дорад? Рафта - рафта вожаҳои куфру кофир чун ду истилоҳи ҳуқуқӣ дар замони исломӣ ва имрӯз дар мамолики исломӣ тақдири одамонро ҳал мекард ва ҳам мекунад. Яъне, ҳукм ба куфр худ баробар буд ба ҳукми қатл дар даврони исломӣ. Пас кӣ ҳақ дорад ва метавонад ин масъулияти бузургеро ба дӯш гирифта, чунин ҳукмеро содир кунад. Дар олами ислом фатво ҳаст ва ҳукм аст. Фатво аз рӯи масъала дода мешавад. Ва ислом ин масъулияти бузургро бар дӯши муфтӣ ѐ фатводиҳанда вогузоштааст. Муфтӣ низ ҳукмро на ба фарди мушаххас, балки ба амал ва ҳодисаву воқеаҳо медиҳад. Ба таври дигар, муфтӣ вобаста ба ҳодисаву воқеаҳо ва масъалаҳои шаръӣ фатво медиҳад. Ҳукм бошад, бар дӯши қозӣ (судя) вогузошта шуда. Аз асарҳои Айниву Икромӣ маълум мешавад, ки қозиҳо ҳеҷ як масъалаи ҷиддиро бе маслиҳати муфтиҳо ҳал намекарданд. Аз ин рӯ қозӣ дар асоси маслиҳати муфтӣ ҳукми худро содир мекард. Дар ҷомеаи демокративу дунявии имрӯзаи мо ҳеҷ кас ҳаққи чунин ҳукм карданро надорад!!!

Дин ақл аст!

 Ва аз рӯи ақл амал кардан, асоси мусалмонист. Ҳадиси саҳеҳи расулуллоҳ (с) аст, ки «Башорат медиҳам шуморо ва башорат диҳед шумо шахсонеро, ки баъд аз шумо меоянд: ҳар кас, ки бигӯяд Ло илоҳа илаллоҳу Муҳаммад расулуллоҳ ба дурустӣ, ки 13 дохил мешавад ба ҷаннат». Баъди гуфтану дар дил тасдиқ намудани ин калима, ки Тайиба ном дорад, шахс мусалмон мешавад ва то даме, ки ӯ мегӯяд: «ман мусалмонам», ҳеҷ шахсе ҳақ надорад, ки ӯро абадулабад бо тамғаи кофарӣ дар дӯзах «андозад». Далели мо ҳамон ҳадиси саҳеҳ аст. Ва ҳеҷ як амале аз қабили нӯшидани шаробу нахондани намоз, ки инҳо ҳама гуноҳони кабираанд, дар эътиқоди ӯ халал ворид намекунад. Дар мазҳаби мо шахс бо содир кардани гуноҳи кабира гунаҳгор мешавад, вале кофир намешавад. Зеро шахс бо гуфтани калимаи тайиба мусалмон мешавад. Ва амалҳои ӯ боқӣ ҳама савобу ваболи ӯянд. Ин мисли он аст, ки шахсе нонро беҳурматӣ мекунад, пас ӯ ношукрӣ мекунад, ношукрӣ хилофи ояти «шукр кунед, зиѐда мекунам» мебошад, пас ӯ куфрон дар неъмат кардааст, на дар эътиқод. Эътиқод ѐ мусалмонии ӯ мисли кӯҳ устувор аст. 

Мусалмонро номуед накунед!

Ёд дорам, дар Русия чеченҳои бо русҳо унсгирифта, вале қавиэътиқодро, ки бо лафзи Ассаломуалайкум ҷаҳида мехестанд, ки мусулмон омад. «Я мусулман, ты мусулман, мы братя» гуфтанашон ҳанӯз аз гӯшам нарафтааст. Онҳо бо русҳо мешинанду мехезанд, арақ менӯшанд, чӣ корҳое, ки намекунанд, вале афсӯс мехӯранд, ки намоз намехонанд ва агар касе дар пеши ишон нисбати мусулмон таҳқиреро раво бинад, чечен ҳатман ба муҳофизати мусалмон бармехезад. Оѐ месазад, чунин шахсро кофир гуфтан, ки ӯ баъзе аз амалҳои дини мубини исломро иҷро намекунад? Одамонро аз Ислом ноумед накунед, муллоҳои камсавод!

С. Маҳдӣ

Барои СССР

28 ноябри соли 1943 дар пойтахти Эрон, шаҳри Теҳрон дидори таърихии се роҳбари кишварҳои иттифоқчӣ дар ҷанг алайҳи Олмон-СССР, ИМА ва Англия иттифоқ  афтод. Интихоби Теҳрон низ баъди музокироти тулонӣ ба амал омад. Дар оғоз Черчил барои дидор шаҳри Қоҳираро дар Миср пешниҳод намуд. Аммо роҳбари Шӯравӣ ин пешниҳодро напазируфт. Баъди ин Истамбул ё Бағдод пешниҳод карда шуд. Аммо ин ду шаҳр низ пазируфта нашуданд. Билохира қуръа ба номи Теҳрон афтид ва дидор дар ин шаҳр доир гашт. Ин нахустин дидори Сталин, Рузвелт ва Черчил дар рафти ҷанг ба шумор мерафт ва бо конфронси Теҳрон дар таърихнигории муосир маъруф гардидааст.

Роҳ ба сӯи Теҳрон

     Роҳи омадани се роҳбар ба Теҳрон низ гуногун буд. Иосиф Сталин охирҳои моҳи ноябр бо поезди № 501, ки бо хатсайри Маскав-Сталинград-Боку ҳаракат мекард, махфиёна ба пойтахти Озарбойҷон омад. Аз Боку ба Теҳрон бошад бо тайёра парвоз намуд. Роҳбари ИМА Рузвелт бошад, тавассути киштӣ ба бандари Орани Алҷазоир омад ва аз инҷо ба Қоҳира парвоз кард. Дар Қоҳира бо Черчил ҳамроҳ гашт ва ҳар ду якҷоя ба Теҳрон омаданд. Ҳар се роҳбар бо намояндагони худ 28 ноябр ба Теҳрон омаданд.                                                                                                                                           

 Сталин ба Рузвелт пешниҳод кард дар бинои сафорати СССР маскан гузинад ва роҳбари ИМА низ пешниҳоди ӯро пазируфт. Черчил бошад дар намояндагии Бритониё, ки рӯ ба рӯи сафорати СССР ҷойгир гардида буд, маскун шуд.                                        Асоситарин масъале, ки тарафҳо дар рафти конфронс баррасӣ намуданд, ифтитоҳи фронти дуввум гардид. СССР се сол боз бори асосии ҷангро ба дӯш дошт ва ба танҳоӣ алайҳи Олмон меҷангид. Дар Теҳрон тарафи Шӯравӣ ба ин масъала таъкид кард ва аз иттифоқчиён хост ба ҷанг ҳамроҳ шаванд. Сталин 7 маротиба ин масъаларо ба баррасӣ гузошт. Черчил дар оғоз пофишорӣ мекард ва намехост ваъдаи қатъии ифтитоҳи фронти дуввумро ба Сталин бидиҳад.