Бо мақсади пешгирӣ намудани ҳодисаҳои роҳу нақлиёт, баланд бардоштани ҳолати техникӣ, ҷалб намудани воситаҳои нақлиёт ба муоинаи техникии давлатӣ ва назорати пардохти маблағи андоз аз соҳибони онҳо, РБДА ВКД Ҷумҳурии Тоҷикистон аз 20 то 30 ноябри соли 2017 дар қаламрави ҷумҳурӣ гузаронидани амалиёти «МУОИНАИ ТЕХНИКӢ»-ро ба роҳ мондааст.
РБДА ВКД ҶТ аз тамоми ронандагони воситаҳои нақлиёт хоҳиш менамояд, ки дар гузаронидани амалиёти мазкур саҳми арзандаи худро гузоранд.

Узви Ихвон-ал-СССР, мардикор Раҷабалӣ Зиёев, сокини пойтахт (тел: 98 557 38 03) дар меҳмонии СССР гуфт, ки рӯзи сешанбеи ҳафтаи гузашта 1 нафар ба ман бо телефони мобилӣ занг зада гуфт, ки «барои ман 1 электрик даркор». Дар ҷавоб гуфтам, ки ман электрик ҳастам. Маро назди мағозаи Ситора даъватам кард. Он ҷо рафтам. Маро гирифта ба сехи макаронбарорӣ бурда гуфт, ки «дар ҳамин ҷо 3 фаза сими барқ лозим, лекин яктоаш нест». Баъд ман щити якуму дуюмро аз назар гузаронидам. Дар щити сеюм нуқсро ёфтам. Аз мағоза чизҳои лозимаро аз ҳисоби худам харида оварда, онро дуруст кардам. Корфармо баъд гуфт, ки «соати 3, баъди обед ман дар ҷои кор ҳастам. Биёву ҳаққи хизмататро гир!» Дар вақту соати гуфтагияш наздаш рафта гуфтам, ки «ҳаққи хизмати ман бо тамоми лавозимоти масрафҳо 600 сомонӣ мешавад, Аммо аз рӯи инсоф чанд сомоние мехоҳӣ, бидеҳ». Лек 2 рӯз он ҷо хизмат кардам, ягон сомонӣ ҳаққи хизмати маро надод! Ва ҳатто маро тарсонид, ки «ман корманди Кумитаи амният ҳастам!» Мо-мардикорон вақте дар Ватани худамон азияту машаққат дорем, пас аз Русия чӣ гила кунем???

Тобистон зимни бозгашт аз деҳаи Яхч тибқи одат ба хотири “об гирифтан” бо яке аз дӯстонам ба Истироҳатгоҳи “Оби гарм” даромадему баъдан ба мақсади 1 пиёла чой нӯшидан ба ошхонааш ворид гаштем. Дар мизи ҳамсоя марди сиёчурдаи аз 60-сола бештаре ба суҳбатамон ҳамроҳ шуд. Ҳар мавзуе сар мекардем ба дину мавзуъҳои динӣ бармегашт ва оқибат “таркид”:
“-Ҳамин Бозор Собира як 5-6 мушту шатташ занӣ ҳай савобай-да, агар бо ягон кордчаш занӣ рост биҳишт мерай”.
Ба қавли баъзе бародарон “шок” шудаму бе ихтиёр сабабашро пурсидам:
“-Айбша намедонуму мардум намтарӣ меган, албатта, рост меган, халқ хубтар медона”...
Ростӣ намехостам дар ин мавзуъ бинависам, вохӯрӣ ва суҳбати муаллиме, ки мухлиси рӯзномаи СССР будаасту чанд мақолаи манро дар мавзуъҳои динӣ хонда будааст, таҳрикам дод.
“-Барои тақвияти донишашон ба хонандаҳо супориш додам, ки аз осори адибони классику муосир порчаҳои шеърӣ аз ёд кунанд, зимни пурсиш писарбаччае, ки бояд аз устод Бозор шеър қироат мекард, бо сари хам гуфт, ки падарам мегӯяд баҳои “2” ҳам гирӣ номи ин кофира дар хона нагиру шеърашам аз ёд накун, ки гунаҳкор мешавӣ”...
Фанатизм андак-андак ба радикализм бадал шудан дорад. Таърих беҳтарин устод аст. Маҳз ҳамин мутаассиб-радикалҳо Рӯдакиро бо ҷурми қарматӣ будан кӯр карданду даҳҳо шогирдонашро куштанд, ҳаминҳо Носири Хусраву Буалӣ Синоро дар ба дару хору зор намуданд, Насимиро пӯст канданду Ҳилолиро сангсор, гӯри Ҳазрати Ҷомиро оташ заданд...
Чӣ бояд кард? Назари худро бинависед.

Абдуқодири Абдуқаҳҳор,
журналист

Салом ба аҳли қалами газетаи дӯстдоштаи ҳамаи мо-СССР. Мо 1 гурӯҳ ҷавонон аз ноҳияи Хуросон барои боздид ва зиёрат ба «Чилучорчашма»-и ноҳияи Н.Хусрави сафар намудем, вале ҳангоми ворид шудан ба ин зиёратгоҳ табъи ҳамаи мо хира шуд. Агар қисме воқеан ҳам барои зиёрат кардан омада бошанд, қисми дигар барои истироҳат ва вақтгузаронию шиноварӣ инҷо меоянд. Ҳатто чанде аз ҷавонон бо табассум изҳор медоранд, ки барои дарёфти “арӯс” омадаанд…
Агарчӣ ин макон барои нишастану хӯрокхӯрӣ ва истироҳат ба талабот ҷавобгӯ набошад ҳам, аз ҷониби дигар, худи меҳмонону истироҳаткунандагон оддитарин қоидаҳои санитарию гигиениро риоя накарда, ҳар гуна партовҳо, аз қабили пасмондаи хӯроку коғазпора ва боқимондаи тарбузу харбузаро ба об мепартоянд. Ин ҳол, хоҳу нохоҳ, табъи бинандаро хира месозад. Вазъи санитарию эпидемиологии мавзеъ барои шиноварӣ муқарраршуда, аз ҷои нишасту хӯрокхурӣ бадтар аст. Оё беҳтар нест, ки барои меҳмонону истироҳаткунандагон ҳавзи махсус барои шиноварӣ сохта шавад, то оби ин макон зулолу покиза боқӣ монад!?
Тибқи маълумотҳои дастрасгардида, дар ҷамоати деҳоти “Наврӯз” 2500 хоҷагӣ ва дар ҷамоати деҳоти “Истиқлол” 400 хоҷагӣ аз канали “Чилучорчашма” ва дар ҷамоати деҳоти “Фирӯза” 337 хоҷагӣ бо истифода аз қубурҳои обгузар оби онро истеъмол менамоянд. Ин оби чашма, ки баъди “шиноварӣ”-ю шустушӯи сару либоси истироҳаткунандагон ба мавзеъҳои аҳолинишин ҷорӣ мешавад, магар боиси пайдоиши бемориҳо намегардад? Худо нахоста, агар ягон дарде тариқи ин об паҳн гардад, аҳволи мардуми поёноб чӣ мешавад? Наход раиси тозатаъини ноҳия Нуриддин Садриддинов боре ҳам ба ин мавзеъ қадам нагузошта бошаду аз ин аҳвол бехабар?!!

Таснифи Б.Уроқов, СССР, вилояти Хатлон

Президенти Қазоқистон Нурсултон Назарбоев алифбои нави забони қазоқиро тасдиқ кард, ки дар асоси ҳарфҳои лотинӣ таҳия шудааст. Фармони Назарбоев дар ин бора дар сайти расмии президенти Қазоқистон нашр шуд. Фармони Назарбоев ҳукумати Қазоқистонро вазифадор кард, ки барои гузаштан ба алифбои лотинӣ комиссияи миллӣ таъсис диҳад ва гузариши комил ба ҳуруфи лотиниро то соли 2015 таъмин кунад. Президент ҳанӯз моҳи январи с.2017 дастур дода буд, ки дар асоси ҳарфҳои лотинӣ алифбои нави қазоқиро то охири сол таҳия кунанд. Қарор аст, то соли 2025 тамоми ҳуҷҷатгузорӣ ва номи кӯчаву хиёбонҳои ин кишвар ба лотинӣ баргардон шаванд. Қазоқистон наздики 80 сол пеш ба ҳуруфи сирилик гузашта буд. Соли 1929 ҳукумати шӯроҳо алифбои арабиасоси қазоқҳоро нахуст ба ҳуруфи лотинӣ ва баъдан (соли 1940) ба хати сирилик баргардонд.

Президенти Узбакистон Шавкат Мирзиёев дабири кулли ООН дар Аврупо (САҲА) Томас Гремингерро, ки дар доираи 1 сафар вориди шаҳри Тошканд шуд, ба ҳузур пазируфт. Ӯ дипломати швейтсариро ба муносибати интихобаш ба ин пурмасъулият табрик карда алоқамандии кишварашро барои ҳамкориҳои фаъолтар бо САҲА баён дошт. Томас дар Узбакистон дар конфронси байналмилалие иштирок хоҳад кард, ки қарор аст, ки дар шаҳри Самарқанд ҷараён дорад.

Президенти Тоҷикистон муҳтарам Эмомалӣ Раҳмон дар воҳидҳои сохторҳои низомӣ, ҳифзи ҳуқуқу тартибот ва Вазорати рушди иқтисод ва савдо тағйироти кадрӣ намуд. Бо Фармонҳои президент Пиракзода Ҳикматулло-муовини якуми Фармондеҳи Қӯшунҳои сарҳадӣ-сардори Сарситоди Қӯшунҳои сарҳадии Кумитаи давлатии амнияти милии ҶТ ва Абдуллозода Нурулло Ҳамид-муовини Фармондеҳи Қӯшунҳои сарҳадии КДАМ ҶТ таъин шуданд. Пешвои миллат зимни суҳбати самимӣ ва ошкоро ба ҳар як хизматчии давлатӣ муваффақият орзу намуда, таъкид кард, ки зимни иҷрои масъулияти давлатӣ ва вазифаҳои хидматӣ поквиҷдон, содиқ ба давлату миллат ва ҳушёру зирак бошанд.

Медонам, ки ҳоло дар бораи бозори марказӣ ва Боғи фарҳангии шаҳр, ки номи устод С.Айниро дорад, гап бисёр аст ва бадхоҳон борҳо боғу бозорро баҳона карда, санги маломат мезананд. Лек то раиси шаҳр ҳастам намегузорам, ки дар ҷои истироҳату фароғати мардум, хоса, кӯдакон дӯконе сохта шавад.