Шаҳрдории Душанбе тасмим гирифтааст то 10.12.2017 дар марказ ва гӯшаҳои дигари пойтахт арчаҳои солинавиро гузорад. Кормандони Муассисаи давлатии «Рекламаи берунӣ ва ороиши шаҳри Душанбе»  дар маркази пойтахт ба сохтани пойдевор ва қолаби арчаи солинавӣ аз дирӯз шурӯъ карданд. Арчаи идонаи асосии кишвар аз дарахти зинда бо баландии 25 метр дар маркази майдони «Дӯстӣ»,  дар рӯ ба рӯи  Муҷассамаи Исмоили Сомонӣ  гузошта мешавад.
Арчаи солинавӣ бо  муосиртарин таҷҳизоти ороишӣ зебу зиннат дода шуда, аз арчаҳои солинавии солҳои пешин бо ҳашамату зебоӣ фарқ хоҳад кард. Ҳамчунин, барои бошукӯҳ гузаронидани ҷашни Соли нави мелодӣ  дар дигар гӯшаву канори  пойтахт низ арчаҳои идона гузошта хоҳад шуд.

Аз ҷониби кормандони милитсия зани 22-солаи сокини ноҳияи Б.Ғафуров бо гумони қасдан расонидани зарари вазнин ба саломатӣ дастгир карда шуд.
Чуноне ки сомонаи расмии ВКД ҶТ хабар медиҳад, номбурда, рӯзи 5.12.2017, тахминан соати 18:00-дақиқа, дар ҳавлии истиқоматиаш аз сабаби муноқишаи ба миён омада, бо шавҳараш, марди 22-сола, ҷангу ҷанҷол кардааст.
Дар натиҷа гумонбаршуда бо корди ошхонагии дар дасташ буда, 1-маротиба ба қафаси синаи шавҳараш задааст, ки дар натиҷа номбурда ҷароҳати вазнини ҷисмонӣ бардошта, дар беморхона ба ҳалокат расидааст.
Аз рӯи ин ҳодиса парвандаи ҷиноятӣ оғоз гардида, тафтишот идома дорад.

Кумитаи байналмилалии олимпӣ тасмим гирифт узвияти Кумитаи олимпии Федератсияи Россияро дар кумитаи мазкур дар якҷоягӣ бо роҳбари он Александр Жуков қатъ намояд.
Ин тасмим дирӯз 5.12.2017 дар ҷаласаи КБО дар шаҳри Лозаннаи Швейсария гирифта шуда, сабаби он ин аз ҷониби сохторҳои давлатии ин кишвар пинҳон намудани истифодаи допинг дар варзишгарон ба ҳисоб меравад. Инчунин, КБО қарор кард, ки ҷониби Россия бояд гузаронидани тадқиқотҳо дар ин роҳ ва барои бунёди 1 системаи муосири тестӣ барои варзишгарон, ки 15 миллион доллар арзиш дорад, маблағгузорӣ намояд.
КБО гуфт, ки дар Олимпиадаи зимистонаи соли 2018, ки аз 9 то 25 феврал дар шаҳри Пхенчхан баргузор хоҳад шуд, танҳо он варзишгарони русе, ки дар истифодаи допинг даст надоштанд ҳуқуқи ширкат доранд ва он ҳам зери парчами нейтрал.

СССР

Пой ба остона ниҳода будам, ки панҷаи кӯчак дароз шуд ва садои бо назокат баланд:
-Ман Нигора, шуморо шинохтам дӯсти падарам ҳастед.
Худамро шиносонда, аз пешонааш бӯсидам:
-Аз шиносоӣ бо шумо хушнудам – гуфт ӯ.
Ва ҳама таоруфоти расмиро ба ҷо овардам. Чӣ аз сӯҳбат бо падараш медонистам, ки Нигора оину расми вохӯрӣ, сӯҳбат ва меҳмондориро риоя мекунанду аз дигарон тақозо.
-Шуморо дар ТВ дидам, - суханашро идома дод Нигора ва бо ҳамон назокати тифлона пурсид:
-Шумо маро мешиносед?
Ба ҷавобам маътал нашуда, афзуд:
-Ман Нигораи Аловуддин, хонандаи синфи 3. Бояд дуюм мехондам, вале синфи 1-ро нахондам. Дар тобистон, дар Анталия бо рақс ва суруд ғолиб шудам. Дар ТВ маро нишон доданд, акнун маро шинохтед?
-Бале, мешиносам,-гуфтам, ҳине, ки бо назари кунҷковона ба ман менигарист, ба ман дар бораат падарат қисса карда буд. Ҳамаашро гуфт, нагузошт, ки «сюрприз» кунам. Ва ба падараш реб нигариста идома дод:
-Боз чӣ гуфт?
-Боз гуфт, ки шумо забонҳои русӣ ва англисиро медонед ва ба Хитой, Аморати Муттаҳидаи Араб ва Туркия сафар кардаед?
-Тамом?-ба хандаи беғаш рӯяшро бо дастонаш пӯшида, сарашро то зонуҳояш бурд ва боло карду бафурҷа идома дод:
-Англисиро медонам, русиро… хайр алифбои имову ишорат (язык жестов)-ро медонам. Барои гунгҳо ҳаст-ку, ҳамонро. Расм мекашам, мерақсам, сурудҳое бо англисӣ медонам. Бо компютер кор мекунам.
Баъди лаҳзаи фикр кардан ҷамъбаст намуд: «Всё!». Вале боз шӯрид:
-Не,не! Ман мехоҳам боз ҳунарманд бошам, дар филмҳо маро ба навор бигиранд, Ме-хо-ҳам ситора шавам. Ва тоҷик шавам!
Нигора қариб гӯё ба ҳама саволҳоям посух дода, буд ки аз дастам гирифта ба хонаи кориаш хонд. Волидайнаш: Аловуддин-олим коршиноси байналмилалӣ аз занҷираи Камолиддин Бойматов, Парвина-номзади илми тиб, ҷарроҳ, ночор монданд ва моро ҳамроҳӣ карданд. Нигора ҳунари арғуштравиро намоиш доду суруд хонд… Ҳини хайрхуш монои 1 маъракадида пурсид:
-Боз кай вомехӯрем?
-Худо хоҳад, ба наздикӣ, ҷавоб додам.
-Падарам Берлин ва аз он ҷо Колумбия мераванд.
Баргарданд, Шуморо даъват мекунем, майлаш?
Ночор розӣ шудам.
Ин лаҳзаҳо бароям фараҳфизо буданд. Воқеан ҳунару андешаи 1 тифли тоҷик мафтунам карда буд. Ва Нигора танҳо ва ягона нест. Ба онҳо эътибор бояд дод.

Ҷонибек Асрориён,
журналист

Салом, СССРи гиромӣ ва мардумӣ! Дар газетаи СССР мақолаи бародар Ҳоҷӣ Шодибек Халилзода бо номи «Танзим дӯстиро аз байн мебарад», (СССР, №475, 19.10.2017) хондам. Бояд гуфт, тағйиру иловаҳое, ки ба Қонуни ҶТ «Дар бораи танзими анъана ва ҷашну маросимҳо дар Ҷумҳурии Тоҷикистон» ворид кардаанд, ягон анъанаи қадимаро барҳам надодаанд, ба истиснои хурофоту таассуб, худнамоиву зоҳирпарастӣ ва исрофкориву зиёдаравӣ. Ҳадаф анъанаҳои мардумиро аз хурофот тоза кардан асту халос. Танзим ҳамон дӯстиеро аз байн мебарад, ки воқеан он дӯст дӯсти нониву авқотӣ дар хонаи мо бошад. Қонун мухолифи манфиати эътиқоди ислом нест, 1 навъ дуруст риоя намудани талаботи ислом аст. Агар камбизоате мурғеро хун кунад, ба гуфти муаллиф, пас шахси доро гов ё гӯсфандеро хун мекунад, ки ин боз ба ҳамон хурофотпарастӣ баргаштан аст, яъне мақоли «Аз шарора аланга бархезад»-ро пеши рӯ меорад.
Ҷашну маросим ва анъанаю маъракаҳое, ки тобиши миллӣ ва динӣ доштанд, дар натиҷаи кибр, ғурур, худнамоӣ, таассуб ва тақлиди беҷо аз байн рафта, ба хурофот табдил ёфта буданд. Ин ҳама дар мардуми мо одат шуда, тамоми маъракаҳо фақат аз хӯрдани ғизо иборат буд, ба монанди оши наҳор, оши худоӣ, оши зиёфат… Ҳатто баъзе занҳои баддаҳон касеро дуо кунанд «ошатро хурам» мегуфтанд, ки ин ишора ба оши 7-у 40-у сол буд, ки дар маъракаҳои мотам бо харҷи зиёд таҳия мешуданд.
Хушбахтона, вобаста ба тағйиру иловаҳои пешниҳодшуда дар вохӯрӣ бахшида ба 10-солагии қабули қонун 11.07.2017 ба саволҳои Президенти кишвар кулли уламо ва донишмандони динӣ ҷавоб доданд, ки танзими маросими динӣ мувофиқ ба талаботи мазҳаби ҳанафӣ буда, на Қуръон ва на ҳадисҳои саҳеҳ баргузории маросими сари тахта ва солро ба он тавре, ки мо-тоҷикон баргузор менамоем, пешбинӣ накардааст. Яъне бовар кунед, он хурофотпарастие, ки мардуми мо то имрӯз мекард, дар ягон гӯшаи олам набуд!!!
Яъне қонун ба маҳдудкунӣ не, балки ба танзими мақсаднок сару кор дорад, муҳтарам Ҳоҷӣ Шодибек!

Табаралӣ Авсақолов,
Узви Ихвон-ал-СССР, н.Фархор

Хонанда, дӯст ва мухлиси доимии газетаи мардумии СССР Сотими Саидмуъмин, сокини ноҳияи Бохтар (тел: 919 42 66 80) дар меҳмонии СССР гуфт, ки навиштаҳои Маннон Махсумови истаравшаниро чанд шумора пеш оид ба Дивизияи 201-и Русия хонда, гуфтугузорҳои байни ҳукуматҳои Тоҷикистону Россия замони ба имзо расонидани шартномаи тарафайн оид ба тамдид намудани муҳлати будубоши дивизияи 201 ба хотирам омад. Он вақт ашхоси масъул дар ВАО мегуфтанд, ки баъди ба имзо расонидани ин шартнома дар Россия барои муҳоҷирони меҳнатии Тоҷик чунон шароитҳои хубу мусоид фароҳам оварда мешавад, ки муҳоҷирони дигар давлатҳои пасошӯравӣ чунин имтиёз нахоҳанд дошт. Аммо дар асл муҳоҷирони мо ягон имтиёз нагирифтанд. Гап сари ин аст, ки то имрӯз садри Кремл ба ягон ваъдаи худ вафо накардааст. Болои ин, ғалаба бар зидди фашизмро дастоварду пирӯзии худ медонанд. Ҳол он ки дар Ҷанги Бузурги ватании солҳои 1940-45 тамоми халқу миллатҳои СССР муқобили фашистони немис силоҳ гирифтанд ва ҷонро сипар карданду худро қурбон…

Собиқ президенти Гурҷистон-Михаил Саакашвили (раҳбари пешини вилояти Одесса), ҳоло лидери «Руха новых сил» (“Ҳаракати нерӯи ҷадид”)-и украиниро то охири ҳамин сол аз қаламрави ин кишвар абадан ронданиянд. Дар ин амалиёт раҳбарияти Киев омодагии сахт мебинад. Тибқи сарчашмаҳои хабарӣ, Михаил на ба Гурҷистон, балки ба Полша ва ё дигар кишвари хориҷӣ “депорт” хоҳад шуд. Дар дигар кишвар низ ин интригант ҳатман ягон инқилоб хоҳад карду мардуд хоҳад шуд. Неши ақраб...