Узви Ихвон-ал-СССР, Шамсиддин Салимов, соҳибкор аз бозори Ганҷинаи пойтахт ба СССР занг задаву гуфт, ки ман 1 нафар мухлис ва хонандаи доимии шумо ҳастам ва СССРро пайваста мехонам. Ҳоло 2 гуфтанӣ дорам. 1. Ҳама медонад, ки санъату фарҳанг сарҳад надорад. Мусиқии хубро, филми хубро ҳама халқу миллат тамошо мекунад. «Филми туркӣ, русию амрикоӣ тамошо накунед» мегӯем, дар ҳоле, ки худамон 1 филми бамазмун ва диданию ҷолиб ба навор гирифта наметавонем.
2.Тоҷикон дар асл соҳиби ин минтақа ҳастанд. Ин миллат зода ва сохти болшевикӣ нест ва ҳам мисли туркҳо саҳронишин ҳам нест. Касе ба ин сухан шак дорад ва бовар намекунад «Тоҷикон»-и аллома Бобоҷон Ғафуровро хонад. Мо миллати сохтаи сунъӣ на будем ва на ҳастем! Мо Метавонем!

Пролог: шабехун дар марз
Тибқи иттилои расмӣ, шаби 2-юми декабр, тақрибан соатҳои 19-и шаб гурӯҳи қочоқбарон иборат аз 16 нафар бо роҳбарии Кӯри Саттор ба хоки Тоҷикистон даромада, ба гурӯҳи марзбонони Тоҷик дармеафтанд. Ба ҳангоми расидани гурӯҳи ёрии марзбонони Тоҷик марзшиканон фирор карда, ба Афғонистон бозпас гаштанд. Полковник Аҳтамов, ки аз 4 ҷои ҳар 2 пояш тир хӯрда буд, бо иллати зиёд рафтани хун, дар ҷои ҳодиса ҳалок шуд. Захмиёни дигарро ба беморхона интиқол доданд. Гуфта мешавад, полковник Аҳтамов бадани худро барои ҳифзи аскарбачаҳо сипар кардааст…

Кӯри Саттор ва бандаи ӯ
Кӯри Саттор, яке аз қочоқчиёни аршади маводи мухаддир унвон шуда, тайи солҳои зиёд марзи Тоҷикистонро шикаста, бедодгариҳо нисбат ба мардуми наздимарзии Тоҷикистон кардааст. Аз ҷумла, аввали солҳои 2000 гову моли зиёди Тоҷикони рустоиро ба таври зӯрӣ ба он тарафи рӯди Панҷ мебурд. Дар 1 ҳолат ба якбор зиёда аз 160 говро аз дарё гузаронида, ба Афғонистон бурдааст. Ҳолатҳое ҳам ҷой дошт, ки ин кӯр дар якҷоягӣ бо ҳаммаслаконаш ҳатто шаҳрвандони Тоҷикро ба ҳайси «гарав» бо худ бурдаанд. Бино ба хабарҳо, баъди сардори қисми ҳарбӣ-сарҳадии ноҳияи Шамсиддини Шоҳин омадани полковник Хайриддин Аҳтамов роҳу гузаргоҳҳои қочоқчии Саттор якбора баста «бизнесаш» хароб шуд. Зимнан, кӯри Саттору дигар қочоқчиёни маводи мухаддири афғонӣ дар пайи полковники Тоҷик афтода буданд. Акнун ликвидатсияи Кӯри Саттор кори ҷонӣ ва ҳифзи шарафи мақомоти Тоҷикистон аст. Бо ҳар роҳу восита, масалан, чун Амрико, бояд ҳукумати мо низ сари ӯро нарх гузорад!!!

Хайриддин Аҳтамов-шогирди Сӯҳроб Қосимов
Сардори қисми ҳарбӣ-марзии н.Ш.Шоҳин, полковник, миллаташ Тоҷик. 1.03.1975 дар ҷамоати деҳоти ба номи «Ватан»-и н.Фархор ба дунё омада, с.1992 мактаби №39-ро бо баҳои хубу аъло хатм карда, ҳамон сол ба мактаби милисаи ш.Рязани Русия дохил мешавад. Ба шаҳодати бародари бузургаш Шариф Аҳтамов, баъди хатми мактаби милиса, дар қисми ҳарбии зудамали ВКД, таҳти роҳбарии генерал Сӯҳроб Қосимов ба ҳайси афсар хизмат ва дар ликвидатсияи полковники исёнгар Маҳмуд Худойбердиев дар вил.Суғд ширкат доштааст. Баъди хатми Академияи ҳарбии ш.Маскав ба қисми ҳарбӣ-сарҳадии н.Шурообод (ҳозира Шоҳин) ба вазифаи сардори қисми ҳарбӣ таъйин шуд. Мавсуф 4 фарзанд, 2 писару 2 духтар дошт. Писари калониаш дар синфи 7 мехонаду духтари кӯчакаш ҳамагӣ якуним сол дорад, ки мутаассифона, барвақт сағера монданд. Капитан Назар Лақаев, яке аз шогирдон ва дӯстони полковник, ки аз вил.Суғд ба ҷаноза омадааст, гуфт, «Бо ӯ зиёда аз 6 сол ҳамхизмат будам. Сарбозонро чун фарзанд дӯст медошт. Аз сару либос ва хӯрока, ҳатто чойи эшон санҷиш мекард. Худ шоҳидам, ки барои ширин набудани чойи сарбозон масъулинро ҷазо медод. Дар амалиёти Хоруғ баъди куштори генерал Абдулло Назаров 68 рӯз мондем. Медидам, ки генералҳо, ҳатто вазири мудофиаи вақт Шералӣ Хайруллоев ба полковник Аҳтамов сахт боварӣ доштанд ва дар аксари маврид ба ӯ ва гурӯҳаш такя мекарданд».

Эпилог: ҳама чӣ фаромӯш мешавад!!!
Дар бисёр давлатҳо зиёд қавму миллатҳо барои баланд бардоштани рӯҳи мардумашон аз ҳолатҳои набуда эҷод мекунанд, аз шахсони ношунида қаҳрамон метарошанд ва меофаранд. Танҳо мо-Тоҷикон, қаҳрамонҳои воқеиамонро дидан наметавонем, ҳолатҳои будаи қаҳрамониро нодида мегирем ва бо гузашти танҳо чанд рӯзе дигар аз он фаромӯш мекунем. Вагарна, (танҳо барои андеша) соле пештар дар ҳамин мавзеъ, ҷамоати деҳоти Саричашмаи н.Ш.Шоҳин 1 ҷавонмарди рустоӣ ба ҳангоми 2 нафар ба асири афғонҳо афтодан, бо ҷасорати қаҳрамонона аз дасти 1 афғон автоматашро зада гирифта, 2-тани дигарро кушта, Тоҷиконро аз қочоқбарони ҳамин Кӯри Саттор халос карда буд…Мутаассифона, дар мо «ҳама кас ва ҳама чиз фаромӯш мешавад». Корномаи ин полковники қаҳрамон ҳам ҳатман фаромӯш хоҳад гашт... Мо Метавонем?!

Аслиддин Достиев
СССР

Мактабу маориф яке аз рукнҳои устувори давлатдории навини миллати Тоҷик ба ҳисоб рафта, тарбияи насли наврас, омода намудани кадрҳои ҷавон дар самтҳои гуногун, баланд бардоштани рӯҳияи худшиносию ватанпарварии ҷавонону наврасон, шинохти ВАТАНу МИЛЛАТу ДАВЛАТ, дар маҷмӯъ рушди афкори зеҳнию тарбият намудани насли худогоҳу зирак аз мактаб вобастагии бузург дорад. Аммо шигифтангез он аст, ки иддае аз ашхоси бо ном «устод»-у «маорифчӣ» ва иддае аз роҳбарону «қудратмандон» худ дар саргаҳи маорифу тартиботу низом нишаста, бо истифода аз мақому манзалате, ки давлату миллат ба онҳо эътимод кардааст, ба чашми миллату давлат хок мепошанд ва талош менамоянд, ки ба ҷои бунёду ободсозии синфхонаҳову мактабҳо моликияти давлатро ғорат кунанд. Мисоли равшани ин дуздию ғоратгариро метавон дар сарнавишти Муассисаи таҳсилоти миёнаи умумии №4-и н.Қубодиён, ки дар деҳаи «Қиёт»-и ҷамоати «Носири Хусрав» ҷойгир аст, мушоҳида намуд. Мактаби мазкур с.1987 бо 2 ошёна дар шакли 4-бурҷа қомат афрохта, дорои 18 синфхонаи таълимӣ, бо утоқҳои лингафонӣ, ҳуҷраҳои физикаву химия, биология ва устохонаи дарси таълими меҳнат, толори варзишӣ ва консертӣ, маҷлисгоҳ, хонаи муаллимон, китобхона, маркази бузурги гармидиҳӣ ва дигар иншооти маъмурию идорӣ дар замони ҳокимияти Шӯравӣ аз ҳисоби заҳмати колхозчиёни ин деҳа бунёд шудааст.

Китоби Тоҷиксӯзӣ дар мактаб
Вале бо гузашти 5 сол аз бунёди ин мактаби муосир, ҷанги таҳмилӣ дар кишвари Тоҷикон ҳукмрон шуду сарнавишти мактаб низ чун сарнавишти миллати Тоҷик номуайяну номушаххас монд ва мактаб ба дасти чанд авбошу роҳзану хиёнаткор афтид, ки дар нахустин фурсат китобҳои дарсию бадеии бо забони Тоҷикӣ мавҷударо дар саҳни мактаб дар 2 гулхан ба оташ кашиданд. Аз соли 1993 то имрӯз дар ин мактаб 8 директор иваз шуд, вале ба ҷои ободию шукуфоӣ аз ин муассиса 4 насоси обкашонӣ, 8 генератори ҳавотозакунӣ, асбобҳои аёнии фанҳои дақиқ, дастгоҳҳои фанни таълими меҳнат, мошинаҳои дӯзандагӣ, дастгоҳҳои синфхонаи лингафонӣ, дару ҷевонҳои ҳуҷраҳои тахассусӣ пурра маҳв шуда, маркази мустақили гармидиҳии мактаб бо дегҳои азими обгармкунӣ, наздик ба 500 метр қубурҳои обтаъминкунӣ, радиаторҳои гармидиҳии аксари синфхонаҳо ва қубурҳои обтаъминкунии дохили бино нобуд карда шудааст. «Маорифчиён» бо ин таҳаммул накарда, ҷевонҳову рафҳои китобии синфхонаҳо ва утоқҳои таълимиро, ҳар кадоме дар давраи худ нест карда, ҳатто равзанаҳои синфхонаҳо ва даҳлезҳои мактабро, ки аз рӯи лоиҳа ва қавонини сохтмонии муассисаи таълимӣ 2 қабат оинабандӣ шуда буд, чингизвор дуздида, қабатҳои якуми тирезаҳоро аз самти даруни мактаб канда, ба манфиатҳои худ истифода намуда, ҳолати мактабро боз ҳам ба самти рукуд наздик кардаанд.

«Маорифчиён» ва ғорати мактаб
«Маорифчиён» ҳатто лӯлаҳои оҳанини обро, ки аз ҳуҷра ба ҳуҷра, аз ошёна ба ошёна бароварда мешуд, бурридаву дуздидаву фурӯхтаанд, ки ақли инсони одӣ ба ин амали омӯзгорон ҳеҷ моил намешавад. Вале дар деҳаи Қиёт ин амал аз дасти «маорифчиён»-и мо ба хубӣ иҷро шуд, ки дигар дар дохили утоқҳои дарсию тахассусӣ чизе ҷуз девор боқӣ намонд. Чун дар дохили бинои таълимӣ чизи арзишманду медуздиданӣ боқӣ намонд, масъулини маориф оғоз карданд ба дороиҳои беруни мактаб: бо баҳонаи он ки боми мактабро мепӯшонанд, чинорзори атрофи мактаб ва гирди майдони варзиширо бурридаву фурӯхтанд, дастгоҳҳои обнӯшии хонандагонро, ки дар 2 самти мактаб ҷой дошт, нобуд карда, тунукаҳои атрофи мактаб, ҳатто дарҳои чӯбини ҳоҷатхонаҳоро канда бурданд. Дар ин муддат, ягон нафар аз идораҳои дахлдори экологӣ сабаб ва омилҳои буррида шудани ин дарахтзори азимро напурсид ва мақомоти ҳифзи ҳуқуқ низ ин равандро пешгирӣ накардааст. Аз мактабе, ки муосиртарин мактаб дар замони сохташ маҳсуб мешуд, имрӯз 1 девораи дуошёна боқӣ мондаву халос.
Бо гузашти рӯзгор, барои шағолҳо дигар дар ин муассиса чизе боқӣ намондааст, ки меъдаҳои гандидаи худро пур кунанд, лек чанд рӯзи охир чашми «маорифчиён» ба муми боми мактаби №4 афтида, шабона иддае аз инсонҳои кирояи ношинос бо дастури хосаи Мирзо Эшов-мудири шуъбаи маорифи ноҳия болои бом баромада, муми бомро канда ҷамъ намудаанд, зеро мизоҷони он омодаи харидории мум будаанд. Бошандагони маҳаллаи Қиёт аз кирдори дуздонаи масъулин огоҳ шуда, пеши роҳи ғоратгарии навбатиро гирифта, аз мақомоти ҳифзи ҳуқуқу тартибот талабгори он ҳастанд, ки хиёнаткорони маориф ва дуздони амволи давлатӣ ёфт ва ба ҷавобгарӣ кашида шаванд, то барои дигарон низ панд гардаду эҳсос кунанд, ки ҳеҷ аъмоле беҷавоб намемонад.

Омӯзгор-ҷинояткор…
Дар масъалаи сифати таълим, хатми хонандагон ва дар кадом сатҳ тарбият намудани фарзандони мардум дар ин муассиса танҳо ҳаминро метавон гуфт, ки Назаров Ғафур-муовини директори Мактаби таҳсилоти миёнаи умумии №4 собиқаи маҳбусии 10-сола дошта, бо ҷурми тиҷорати маводи мухаддира дар вилояти Астрахани Федератсияи Русия беш аз 10 сол пушти панҷараи ҷазо нишастааст, вале ӯ имрӯз ҳамчун тарбиятгари фарзандони мардум кор мекунад. Суоле ба миён меояд, ки бо ин гуна омӯзгорону ин гуна муассисаи таълимӣ чигуна насли наврас ғурури миллию худшиносии миллӣ ва худогоҳии ниёиро аз бар менамоянду барои ояндаи кишвару давлат хизмат??? 

Атозода Муҳаммадиқбол,
рӯзноманигор

(идома аз шумораи пешин)

Бидуни ғараз-6

Дафтари матбуоти Сарраёсати Қушӯнҳои сарҳадии КДАМ Тоҷикистон хабар додааст, ки «гузаргоҳҳо дар марз бо Афғонистон баста нестанд ва сарҳадбонон бо реҷаи муқаррарӣ марзро посбонӣ мекунанд. Гузаргоҳҳои марзӣ дар сарҳад бо Афғонистонро касе набастааст, ҳама мисли пешин аст ва ҳамчунин купрукҳо низ тариқи дарёи Панҷ баста нашудаанд». Иттилои ҚС КДАМ ҶТ дар ҳолест, ки пештар оид ба баста шудани ҳама гузаргоҳу пулҳо бо Афғонистон ва қатъи фаъолияти 5 бозори марзӣ дар ҳудуди вилояти Бадахшону н.Ш.Шоҳин (Шӯрообод)-и вилояти Хатлон, хабарҳо паҳн шуда буд.

ВКД ҶТ хабар медиҳад, ки музояда-фурӯши «рақамҳои зебо» 23 декабр дар толори Раёсати БДА баргузор мешавад. Ба таваҷҷуҳи соҳибони воситаҳои нақлиёт расонида мешавад, ки 23.12.2017 аломатҳои сабти давлатии силсилаи "ЕМ"-01, "ВВ"-07 ва "АК"-08 ба таври музояда фурӯхта мешаванд. Музояда аз соати 10:00 дар толори Раёсати БДА оғоз мешавад. "Нархи 1 лот 630 сомониро ташкил медиҳад", — омадааст дар ин хабар. Манбаъ меафзояд, ки хоҳишмандон бояд нусхаи шиносномаи миллӣ, рақами мушаххаси андозсупоранда ва нусхаи ҳуҷҷатҳои ҳуқуқмуайянкунанда ба воситаи нақлиётро бо худ дошта бошанд.

   Кормандони Сарраёсати хадамоти давлатии оташнишонии ВКД ҷиҳати таҳкими вазъи бехатарӣ аз сӯхтор дар давраи тирамоҳу зимистон ва истифодаи оқилонаю самараноки нерӯи барқ, дар бозору марказҳои савдо, корхонаю муассисаҳо ва маҳаллаҳои аҳолинишин корҳои тарғиботу ташвиқотиро боз ҳам пурзӯр намуда, фаъолияти шабонарӯзии хешро ба роҳ мондаанд.
   Чуноне ки ба мухбири СССР дар маркази матбуоти ВКД ҶТ хабар доданд, новобаста ба корҳои профилактикӣ- фаҳмондадиҳӣ ва таъкидҳои доимию чораҳои андешидаи кормандони ХДО ВКД ҳамоно аз тарафи соҳибкор Ҷамшед Ҳафизов, ҷойи истифодаи ангишт дар нонвойхона, воқеъ дар кӯчаи Яккачинор-124, барои пухтани нон аз спиралҳои баландшиддати истеъмолкунандаи зиёди қувваи барқ ва фурӯзонакҳои тафсон фаровон истифода мешавад. Ҳамин гуна ҳолатҳои беинсофона роҳ додан ба харҷшавии барзиёди нерӯи барқ дар нонвойхонаҳои соҳибкор Диловар Хоҷаев, воқеъ дар кӯчаи Ҷомии н. Сино ва соҳибкор Аҳмад Асламов, воқеъ дар кӯчаи Саҳбои н.И.Сомонии шаҳри Душанбе низ аз тарафи гурӯҳи кории сарраёсат ошкор карда шуданд.
   Ҳолати дигари риоя нашудани талаботи истифодабарии оқилонаю сарфакоронаи нерӯи барқ, аз тарафи гурӯҳи кории СХДО ВКД, дар ҳаммоми кӯчаи Абай 1-и н. Фирдавсии шаҳри Душанбе, мансуб ба Сулаймон Чолов ошкор карда шуд. Дар иншооти мазкур низ ҷойи истифодаи ангишт, дар 3 адад буғхонаҳои ҳаммом, аз спиралу таҷҳизотҳои баландшиддати истеъмолкунандаи зиёди қувваи барқ ва фурӯзонакҳои тафсон фаровон истифода карда мешуданд. Чунин ҳолат дар ҳаммоми кӯчаи Гипрозем 36-и н.Сино ҳам ба чашм мерасад. Ҳарчанд дар ҳаммоми кӯчаи Фирдавсӣ 14-и н.Фирдавсӣ барои фаъолият аз ангишт истифода баранд ҳам, вале бухории он бархилофи меъёру талаботҳои бехатарӣ аз сӯхтор дар таҳхона ҷойгир карда шудааст, ки чунин ҳолат эҳтимолияти хавфи сӯхтор ва паҳншавии бемонеаи оташу дуди ғализи онро метавонад боис гардида, ба ҳаёту саломатии мизоҷони он зиён расонад.
   Дар тарабхонаи “Сапеда” низ мансуб ба соҳибкор Сайлигул Муродова, воқеъ дар кӯчаи Испечак-2, н.Синои шаҳри Душанбе, ба замми истифодаи фурӯзонакҳои тафсону спиралҳои баландшиддат, тартиби истифодабарии зарфҳои гази моеъ низ бар хилофи талаботи меъёру қоидаҳои бехатарӣ аз сӯхтор ба роҳ монда шудааст, ки чунин хунукназарии соҳибкор натанҳо эҳтимоли хавфи ба амал омадани ҳодисаи сӯхтор, балки таркиши зарфҳои гази моеъро ҳам дар пай дорад, ки он метавонад боиси фоҷиа гардад. Тааҷубовараш он аст, ки Сайлигул Муродова ба меъёру талаботи қоидаҳои бехатарӣ аз сӯхтор умуман диққат надода, дар тарабхона ҳатто ягон адад оташхомӯшкунак ҳам мавҷуд нест.
Самаранок истифода набурдани нерӯи барқ ва роҳ додан ба исрофшавии беҳудаи он дар Бозорчаи “Чашма”-и маҳалаи 46-уми пойтахт ҳам ошкор карда шуд. Ин ҷо шабонгаҳ пас аз анҷоми реҷаи корӣ низ фурӯзонакҳои дохили бозорча бе ягон зарурият фурӯзон буда, аз бемасъулиятии роҳбарону мутасаддиёни он шаҳодат медод.
   Вобаста ба далелҳои ҷойдошта, нисбати роҳбарону масъулони дахлдор, аз тарафи гурӯҳи кории СХДО ВКД протоколҳои ҳуқуқвайронкунии маъмурӣ тартиб дода шуда, барои муваққатан қатъ гардонидани фаъолияти иншооту коргоҳҳои номбурда қарорҳои дахлдор бароварда шуданд.

СССР