Узви Ихвон-ал-СССР, Мирзо Ҷабборов, сокини деҳаи Навободи ноҳияи Шаҳринав дар сӯҳбати телефонӣ бо СССР гуфт, вақти он расида, ки дар тамоми макотиби миёна донишҷӯёнеро, ки бо диплом аз Донишкадаи варзишӣ берун мераванд, ба кор ҷалб ва тамоми шароитро барояшон муҳайё созем. Онҳоро бояд дар мактабҳои дурдаст, дар музофот ба кор гирем. Зеро дар мавзеи барои устод ношинос кор кардану шогирд баровардан осон аст. Ба он хотир, ки одам вақте дар ҷои ба худ бегона меравад, қадр ва эҳтиромаш мекунанд ва ҳам метарсанд. Ба дигар маънӣ, дар деҳоти дурдаст наврасони ошиқи футбол ниҳоят зиёданд, аммо фақат дар ҳамон вақту соат ба онҳо мураббӣ намерасад, ки аз дасташ гираду роҳраваш кунад. Бинед, ки аксарияти футболистони номӣ ва худодод аз музофот баромада, шӯҳратёр гаштаанд. Футболисти асилро шароит ва муҳити деҳа меофарад.

1 гурӯҳ хонандагони синфҳои 9-и мактаби №3-и н.Фирдавсӣ барои латукӯби дастаҷамъонаи хонандаи синфи 9-и ҳамин мактаб Л.С.аз ҷониби мақомоти милитсия боздошт шудаанд. Қазияи мазкур рӯзи 12.06.2017 дар толори мактаби номбурда сурат гирифтааст. Дар ин бора ба мухбири мо 1 манбаи мӯътамад аз ҳамин мактаб хабар дод. Л.С. пас аз супоридани имтиҳон аз синфхона баромада мебинад, ки чанд нафар аз ҳамсинфон яке аз ҳамсинфонро латукӯб доранд. Ӯ ба халос кардани ҳамсинфон мешитобад, аммо бо ин ғазаби дигаронро меорад. Тамоми наврасон, ки теъдодашон аз 18 нафар бештар будааст, дарҳол ба Л.С.  дармеафтанд. Айни замон Л.С. дар беморхонаи «Истиқлол» бо бинии шикаста ва чанд захми дигар бистарӣ буда, ҳоло вазъи саломатиаш хуб аст.

СССР

Масъулини соҳаи нақлиёти ҷамъиятии пойтахт дар якҷоягӣ бо идораву сохторҳои дахлдор фаъолияти 7 ҷамъияти нақлиётии ш.Душанберо қатъ намуданд.
Чуноне ки ба мухбири СССР дар МДК «Душанбенақлиётхадамотрасон» иттиллоъ доданд, ин ширкатҳо сари вақт ва дар муддати лозима камбудиҳои хешро ислоҳ карда натавонистанд. Корхонаҳои басташуда инҳо мебошанд: ҶДММ «Лесинвест»-хатсайри №13, ҶДММ «Лоҷвард»-хатсайри №38, ҶДММ «Нури истиқлол»-хатсайри №11, ҶДММ «Шоҳроҳи абрешим»-хатсайри №26, «АВтотранс»-хатсайрҳои №№5 ва 35, ҶДММ «Маҳин»-хатсайри №16 ва ҶДММ «Шоҳроҳи Бадахшон»-хатсайри №1 мебошанд.
Дар баробари ин дар бархе хатсайрҳо роҳбарият иваз карда шуда қисмате аз хатсайрҳо ба ҷамъиятҳои дигари нақлиётӣ шомил гаштанд.

СССР

 
Санаи 13 - уми июни соли ҷорӣ Президенти Ҷумҳурии Озарбойҷон Илҳом Алиев роҳбарони хадамотҳои гумруки Федератсияи Руссия Белорусия, Тоҷикистон, Ӯзбекистон, Қирғизистон ва Қазоқистонро, ки дар шаҳри Боку бо сафари корӣ барои иштирок намудан дар ҷаласаи 65 - уми Шӯрои роҳбарони хадамотҳои гумруки Иттиҳоди Давлатҳои Мустақил қарор доштанд, ба ба ҳузур пазируфт.
Президент Илҳом Алиев изҳори қаноатманди намуд, ки дар ҷаласаи 65-уми Шӯрои роҳбарони хадамотҳои гумруки Иттиҳоди Давлатҳои Мустақил муҳокимаи самарабахш гузаронида шуда, аз натиҷаи он қарорҳои дахлдор қабул мегардад.
Сарвари давлат Илҳом Алиев зикр намуд, ки хадамотҳои гумруки Иттиҳоди Давлатҳои Мустақил барои рушди кишварҳо нақши муҳим дошта, ҷиҳати таъмини даромади Буҷет ва ҷараёни инкишофи иқтисодиёт саҳми калон доранд.
Инчунин санаи 14 - уми июни соли 2017 дар шаҳри Бокуи Ҷумҳурии Озарбойҷон ҷаласаи 65 - уми Шӯрои роҳбарони хадамотҳои гумруки Иттиҳоди Давлатҳои Мустақил баргузор гардид.
Дар ҷаласаи мазкур Абдуфатоҳи Ғоиб- Сардори Хадамоти гумруки назди Ҳукумати Ҷумҳурии Тоҷикистон ва Зайдуллоев Иззатулло – Сардори Раёсати батанзимдарории тарифию гумрукӣ ва назорати арзӣ иштирок доранд.

Рӯзномаи маҷлис аз як қатор масъалаҳои муҳими соҳа иборат мебошад. Аз ҷумла:
Дар бораи ворид намудани таъғиру иловаҳо ба Созишнома дар бораи ҳамкорӣ ва расонидани кӯмаки мутақобила дар фаъолияти гумрукӣ.
Оид ба мубодилаи маълумот барои муайян намудан ва назорати арзиши гумрукии мол дар давлатҳои Иттиҳоди Давлатҳои Мустақил.
Оид ба тартиби ҷорӣ намудани системаи идораи таваккал дар фаъолияти мақомотҳои гумруки давлатҳои ИДМ.
Дар чорабинии мазкур инчунин дигар масъалаҳои муҳими ҳамкориҳоии байналмиллалии гумрукӣ баррасӣ мегарданд.

Қобили зикр аст, ки дар ҳошияи иҷлосияи мазкур дар доираи гуфтушуниди корӣ ба имзо расонидани Протоколҳо байни мақомотҳои гумруки Ҷумҳурии Тоҷикистон ва Ҷумҳурии Ӯзбекистон оид ба ҳамкорӣ ва ёрии байниҳамдигарӣ дар фаъолияти гумрукӣ ва доир ба тартиби ҳамкори байни Хадамоти гумруки назди Ҳукумати Ҷумҳурии Тоҷикистон ва Кумитаи давлатии гумруки Ҷумҳурии Ӯзбекистон ҳангоми муқоисаи маълумоти омори гумрукии савдои дутарафа дар назар аст.
 
 

Маркази матбуоти Хадамоти гумруки назди Ҳукумати Ҷумҳурии Тоҷикистон

 
Кормандони Раёсати ташкили мубориза бар зидди ҳуқуқвайронкуниҳои гумрукии Хадамоти гумруки назди Ҳукумати Ҷумҳурии Тоҷикистон аз як соҳибкори тоҷик 20 номгӯйи моли қочоқро ошкор карданд.
Зимни дастгиршавӣ муайян карда шуд, ки шаҳрванд О. М. дар асоси ваколатнома ҳамчун намояндаи ҶДММ «Тозагии савдо» баромад намуда, даст ба содир намудани ҷиноят задааст. Ҳангоми тафтиш маълум гардид, ки қочоқ- интиқоли мол ва ашёи дигар аз сарҳади гумрукии Ҷумҳурии Тоҷикистон пинҳонӣ, бидуни назорати гумрукӣ, пинҳонӣ бо роҳи фиреб истифода кардани ҳуҷҷатҳо ё воситаҳои ҳаммонандкунии гумрукӣ ва декларатсия накардани онҳо ошкор гардид.
Шаҳрванд О. М. аз рӯи маслиҳати пешакӣ бо дигарон барои ба мақсади ба даст овардани даромади муфт, дар асоси ваколатномаи №30 аз 25 - уми марти соли 2017 ба ҳайси намояндаи ҶДММ «Тозагии савдо» баромад намуда, ба номи ҳамин ҷамъият аз Ҷумҳурии Исломии Эрон дар 6 вагон зиёда аз 20 номгӯйи молу маҳсулоти ниёзи мардум аз қабили чой, ҳалво, кафел, сару либоси мардонаву занона, қолин, гранул, селофани полиэтиленӣ ва ғайраҳоро бидуни барасмиятдарории гумрукӣ вориди Ҷумҳурии Тоҷикистон кардааст.

 
 Ӯ бо роҳи фиреб дар ҳуҷҷатҳои воридотӣ ҳисобнома ва декларатсияи транзити дохилӣ зиёда аз 20 номгӯйи молро бо вазни умумии 320 ҳазору 628 килограмм нишон дода дар дидбонгоҳи гумрукии «Регар» - и Раёсати минтақавии гумрукӣ дар шаҳри Турсунзода декларатсияҳои бори гумрукии дар боло дарҷгардидаро тартиб додааст. Дар натиҷа қатораҳои мазкур аз тарафи кормандони гумрук боздошт карда шуда, ба дидбонгоҳи гумрукии «Душанбе 1» - и Раёсати минтақавии гумрукӣ дар шаҳри Душанбе барои нигоҳдорӣ интиқол дода шуданд.
 Мувофиқи маълумотномаи Раёсати батанзимдарории тарифию гумрукӣ ва назорати арзии Хадамоти гумрук арзиши молу маҳсулоти тариқи қочоқ вориднамудаи шаҳрванд О. М. ба маблағи умумии 2 миллиону 590 ҳазору 607 сомониро ташкил медиҳад. Дар натиҷаи ин ҳаракатҳои ғайриқонунии номбурдагон ба давлат ба миқдори калон зарари моддӣ расонида шудааст.
Оид ба ҳолати мазкур нисбат ба шаҳрванд О. М. бо моддаи 289 қисми 2 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, барои тафтишот ба Прокуратураи шаҳри Душанбе фиристода шуд.
 
 

Маркази матбуоти Хадамоти гумруки назди Ҳукумати Ҷумҳурии Тоҷикистон

Масали маъруфи «1 гови рихин подаро касал мекунад»-ро ҳама медонад. Аммо онро танҳо шоми 13.06.2017 8 млн нафар бо чашм дидаву шоҳид шуд. Гови рихини ин шом дарвозабони Мунтахаби Тоҷикистон оид ба футбол-Абдуазиз Маҳкамов шуд...
Абдуазиз Маҳкамов-дарвозабони Алай-чемпиони Қирғизистон аст, ки ба ҳайси легионери ватанӣ дар ун кишвар ҳунарнамоӣ дорад. Гуфтан ҷоиз аст, ки ин дарвозабон агар дар маҳдудаи футболи Қирғиз хуб бозад ҳам, дар сатҳи ҷаҳонӣ хеле суст ҳунарнамоӣ дорад. Дар бозиҳои гурӯҳии АФК ,ӯ кам не-ғам не 18 гол сар додааст!!! Акнун тасаввур кунед, ки чигуна чунин дарвозабони сустро сармураббӣ ба хатти асосии мунтахаби миллӣ ҷо кард?!
Коршиносон мегӯянд, набуди дарвозабони хуби дигар, яъне набуди конкурентсия. Таври маълум Алишер Додов, яке аз муддаиёни асливу усулии дарвозаи мунтахаб захмист-травма дорад. Зимнан аз 2 дарвозабони дигар Қурбоналӣ Бобоев дар захираи мустаҳками Истиқлол нишастаасту гумон аст, Стошич захм нагирад, умуман ба майдон барояд. Беҳрӯз Хайриев дарвозабони №3, ки рангҳои Барқчиро ҳифз мекунад, аслан ба сатҳи байнулмилал баромад карда наметавонад. Аз ин ҷо бармеояд, ки Ҳаким Фузайлов имкони интихоб на дошту на дорад. Ва хоҳем-нахоҳем Маҳкамов дарвозабони мо дар ин марҳалаи гурӯҳӣ боқӣ мемонад.
Бо ин ҳама, фикр намекунам, ки Бобоев ё Хайриев ингуна голҳое, ки голкипери №1 сар дод, мегузаронида бошанд.
Ин ҳам дар ҳолест, ки дарвозабони дигари хубе дорем, ки масъулин бояд ӯро даъват кунанд. Сухан сари Ризоев-дарвозабони Ҳосилот ва голкипери чемпиони 2-карати ҶТ-Равшани Кӯлоб меравад. Бовар кунед, Рустам Ризоев дар ин бозӣ мешуд, ҳатман мо ҳадди ақалл аз 2 гол-ляпи Маҳкамов эман мемондем,  2 голе, ки кӯдак бояд бармегардониду Абдуазиз натавонист...
Ҳайфи бачаҳо, ки 3 гол заданду боз бозиро бохтанд!!! Ва агар дар хатти охирин дарвозабони профессионал медоштем, ҳатман дар ин дидор пирӯз мешудем. Мо метавонем!

Мунтахаби Тоҷикистон:
Дарвозабонҳо: Абдуазиз Маҳкамов («Алай», Қирғизистон), Қурбоналӣ Бобоев («Истиқлол»), Беҳрӯз Хайриев («Барқчӣ»);
Муҳофизатгарон: Александр Ҳубер (агенти озод), Давронҷон Эргашев («Тараз», Қазоқистон), Искандар Ҷалилов («Дунав», Болгария), Ромиш Ҷалилов, Сиёвуш Асроров, Аҳтам Назаров (ҳама – «Истиқлол»), Ойбек Абдуғаффоров («Ҳосилот»), Зоир Ҷурабоев (ЦСКА «Помир»);
Ниммуҳофизатгарон: Парвизҷон Умарбоев («Локомотив», Пловдив, Болгария), Нозим Бобоҷонов (СК «Баҳрайн», Баҳрайн), Умедҷон Шарипов («Машъал», Узбекистон), Фатҳулло Фатҳуллоев, Дилшод Восиев, Ҷаҳонгир Алиев, Амирбек Ҷурабоев, Эҳсони Панҷшанбе (ҳама – «Истиқлол»), Муҳаммадҷони Ҳасан («Ҳосилот»), Комрони Мирзонаҷот (ЦСКА «Помир»);
Ҳуҷумкунандаҳо: Манучеҳр Ҷалилов («Истиқлол»), Фарҳод Тоҳиров («Хуҷанд»).
Сармураббӣ  – Ҳаким Фузайлов

Саҳари имрӯз 14 июни соли 2017,  хабаре паҳн гардид, ки Бонки давлатии амонатгузории Ҷумҳурии Тоҷикистон “Амонатбонк” бо ҷурми душаҳрвандӣ 30 нафар кормандонашро аз кор сабукдуш кардааст. Ба хотири рушанӣ андохтан ба масъалаи мазкур чандин маротиб хостем бо Хадамоти матбуот, махсусан бо сардораш Сайфулло Салимов тамос бигирем. Аммо мутаасифона телефони мобилии С.Салимов "қулфу гиреҳ” (переадресатсия)-ю телефони оҷилии Амонатбонк (221-33-11) вайрону таъмирталаб будааст. Ҳамин тариқ маҷбур шудем ин хабарро тариқи дигар сарчашмаҳои муътамад дар ин бонки маъруф, пайгирӣ намоем. Ба қавли сарчашмаҳо чанд рӯз пеш Бонки милли Тоҷикистон мактуб-супоришеро ба ҳамаи бонку ташкилотҳо ирсол намуда, онҳоро муваззаф намудааст, ки оҷилан рӯйхати кормандони душаҳрвандиашонро пешниҳод намоянд. Дар мавриди сабукдуш шудани кормандон бо ҷурми душаҳрвандӣ, сарчашмаамон дар Амонатбонк чунин иброз намуд, ки дар ҳақиқат на 30 балки 8 нафар кормандон бо сабаби доштани душаҳрвандӣ аз кор озод шудаанд. Миёни сабукдушшудагон мутахассиси Хадамоти матбуот Нигина ... низ мебошад. Ҳамчунин сарчашмаамон дар Амонатбонк иброз намуд, ки тибқи иттилои ба онҳо расида дар Бонки миллӣ 30 нафар кормандонро бо ин ҷурм аз кор озод кардаанд. Хабари супориш ва мактуби мазкури БМТ-ро кормандони дигар бонкҳо низ тасдиқ намуданд.
Сардори Шӯъбаи матбуоти БМТ Мавҷуда Ҳасанова бошад мавҷудияти хабари мазкурро пурра инкор карда, мункири ирсоли мактуб ва ё супоришномае аз ҷониби БМТ ба ташкилотҳои қарзӣ гардид. Дар мавриди сабукдуш шудани теъдоди зиёди кормандон (300 нафар) дар БМТ, хонум М. Ҳасанова изҳори бехабарӣ карда, таъкид намуданд, ки дар давоми рӯз ҳатман ин масъаларо рушан карда, бевосита ба Сардабири ҳафтаномаи “СССР” Сайёфи Мизроб хабар хоҳанд расонд. Аз ин хотир мавзуъро пайгир монда аз хонум М. Ҳасанова ва масъулини дигар бонку ташкилотҳои иттилои дурусту расмиро интизорем. Мо метавонем!

О. Муродӣ
СССР

Аузу биллохи минаш-шайтони р-раҷим Бисмиллохир-раҳмонир-раҳим Ло иллоҳа иллалоҳ ва Мухаммад расули Худованд (омин)

Рухшонаи   Ватаншо