Хонанда, дӯст ва мухлиси ашаддии газетаи мардумии СССР-Файзулло Орифови 64-сола аз ноҳияи Айнӣ ба СССР занг задаву гуфт, ки ҳамин ҳоло 1 андеша дар сарам омад. 1 сабаби нотифоқӣ ва аз ҳам дурии мусалмонон диққати ҷиддӣ надоштан ба китоби муқаддаси Қуръон аст. Бинед, дар мо Қуръон 1 тост, Худо 1 тост, Расул 1 тост, аммо фикри мардум дар маҷмӯъ перомуни Ислом 100-тост. Ана акнун фаҳмидед, ки барои чӣ мусалмонон дар дунё имрӯз муттаҳид нестанд ва бар замми ин хуни ҳамдигарро мерезанд, худро метарконанд ба хотири рӯи биҳиштро дидан. Яктопарастие, ки имрӯз ҳамаи мо медонем, аммо дидаву дониста нодидааш мегирем. Ин гапи ман бештар ба рӯҳониёне дахл дорад, ки аз сари минбар дар бораи дӯзаху биҳишт ва намозу ибодат амри маъруф мекунанд, ваъз мегӯянд. Ман аз СССР хоҳиш дорам, ки дар ин росто андешаи домуллоҳои воқеиро чоп кунанд ва ба мардум фаҳмонанд, ки мо дар роҳи ростӣ ҳастем ва 1 китобу 1 Худову 1 паёмбари барҳақ дорем.

Сайёҳи Тоҷик Саид Аҳмад Давлаҳмадови 71-сола, сокини шаҳри Душанбе (тел: 919 03 62 81) дар меҳмонии СССР гуфт, ки ман аз соли 1982 то ин ҷониб 168 давлати дунёро чарх задам. То с.1989 тибқи паспорт ва сиёсати он давр ҳама давлатҳои собиқ шӯравиро гаштам, вале берун аз қаламрави СССР баромадан мумкин набуд. Бори аввал, баъди суқути Давлати Советӣ, соли 1992 вориди Хитой шудам. Баъди он сафари дуру дарозе доштам ба кишварҳои Осиёву Аврупо. Дар ҳар 1 давлати хориҷа одатан бо туристон муносибати дӯстона ва бародарона доранд, инчунин то ҳадди имкон кӯмаки башарӣ ҳам мекунанд, вале бархе кишварҳо қонунҳои сахт доранд. Ёд дорам, ки дар Хитой зану мардро бараҳна карда, тафтиш мекарданд... Ёдам ҳаст, солҳои нобасомонӣ дар Тоҷикистон мошини туристии маро, ки истеҳсоли Япония аст, дар Душанбе афроди номаълум рабуданд. Сахт миннатдорам, ки бо дастгирии Ёқуб Салимов-вазири собиқи ВКД ҶТ он вақт мошинамро ёфтам. Воқеан ҳам ният дорам, ин мошинро, ки қариб тамоми оламро гаштааст, ба ягон осорхонаи ҶТ ҳадя созам. Мо Метавонем!

Ҷалолиддини Балхӣ ноҳияи хушбоду ҳаво ва сарсабз буда, ҳама ҷо сабзу хуррам, талу теппаҳо сабзпӯш, гандум расидаву мардум ба даравидани он саргарм. Ҳар нафар бо кори худ андармону барои худ шароити беҳтаре муҳайё месозад ва барои ин ҳақ ҳам дорад.


Чуноне ки хонандагони газетаи мардумии СССР медонанд, тайи 2 моҳ аст, ки лоиҳа-озмуни «Раиси мардумӣ» идома дорад ва мухбирони газета ҳар ҳафта рӯзи шанбе ба қабули ин ё он раиси шаҳру ноҳия рафта, сипас дар ҳамон ноҳия меҳмон мешаванд. Ин маротиб мо ноҳияи Ҷалолиддини Балхиро интихоб намудем ва рӯзи шанбеи 27.05.2017 ба қабули раиси он Убайдуллои Файзулло рафтем.

 «Ман ҳаминам, ки мебинед…»
Субҳи рӯзи 27.05.2017. Соат бо вақти Ҷ.Балхӣ 07:45 дақиқа. Мо, ки субҳи барвақт аз пойтахт ба роҳ баромада будем, аллакай ба назди бинои Мақомоти иҷроияи ҳокимияти давлатӣ дар н.Ҷ.Балхӣ ҳозир шудему рост ба сӯи утоқи кории раис Убайдуллои Файзулло рафтем. Фикр намекардам, ки қабулгоҳи раиси ноҳия 1 утоқи оддӣ ва хоксорона асту дар назди дар мардуми зиёд дар интизори қабул нишастаанд. Пас аз 5 дақиқа Убайдуллои Файзулло моро қабул кард ва шод аз он гаштем, ки эшон сари фурсат газетаи СССР-ро мехондаасту номи ҳар яки моро ғоибона мешиносад.
-«Ман ҳаминам, ки мебинед, бо мардум мушкил надорам, зеро фарзанди ин диёрам ва қариб, ки ҳамаи сокинонро шахсан мешиносам, медонам, ки кӣ чӣ проблема дорад, кӣ бо фиреб меояд ва кӣ бо мушкили ҳақиқӣ, пас аз 3 дақиқа қабул сар мешавад. Биёед, бо ҳам равем, раис бояд дер накунад!» - гуфт Убайдуллои Файзулло ва мо бо ҳам аз утоқаш баромадем. Мардуми дар қабулгоҳ ҷамъшударо низ раис бо худ ба толори калони барои қабули шаҳрвандон пешбинишуда бурд...

 Раисе, ки ҳамаро шахсан мешиносад
27.05.2017. Соат бо вақти Ҷ.Балхӣ 8:00 дақиқа. Ба қабули раиси ноҳия 13 нафар аз сокинон омада буданд. Мушкили №1-и аксарияти ин мардум замин ва ҷудо намудани қитъаи наздиҳавлигӣ буд. Раиси рост гуфт, тамоми мардуми ба қабул омадаро Убайдулло Файзулло шахсан мешинохт:
 «Ту фалонӣ нести? Ту писари фалониӣ, а? Бародарат хуб аст? Падарат чӣ ҳол дорад?»-гуфта вай ба ҳар 1 сокин муроҷиат мекард. Аҷиб он буд, ки раис бо мардум бештар шӯхӣ карда, онҳоро рӯҳбаланд менамуд, таъкид мекард, ки то метавонад дасти кӯмаки хешро хоҳад расонид. Латифа мегуфту мардумро механдонд, то ин ки онҳо аз назди ӯ бо табъи болида бираванд. Чунин бархӯрдро то ҳол надида будем. Қабули шаҳрвандон аз 1,5 соат тӯл накашид ва пас аз он мо баромада, боз ба утоқи кори раис рафтем.
Инҷо низ чанд нафар омада буданд, ки мехостанд мушкили хешро дар танҳоӣ бо раис матраҳ намоянд. Убайдулло Файзулло ҳар яки онҳоро шахсан пешвоз ва гусел карда, боз таъкид менамуд, ки «ба ин ё он салом расон, аз ҳоли вай маро огоҳ кунед, гӯед ба хабаргирияш меравам, расонед худаш биёяд, интизорам». Раис дар ҳақиқат ҳар 1 сокини ноҳияашро мешинохт, ки ин хеле хуб аст!

 Шаҳраке, ки тартиб дорад
27.05.2017. Соат бо вақти Ҷ. Балхӣ 10:00 дақиқа. Бо ҳамкорам Баҳодур Уроқов, ки мухбири газета дар вилояти Қӯрғонтеппа аст, аз бинои ҳукумати ноҳия баромада, ба тамошои шаҳрак ва маркази ноҳия рафтем.
Маркази ноҳияи Ҷ. Балхӣ 1 шаҳраке будааст бо тартиб, ором, бе ҳаёҳӯи мошинҳову ронандаҳо, ҳар кас дар ҷойи худ, ҳар кас бо кори худ. Касе аз сокинон ба аксбардории мо аҳамият ҳам надод. Мо бо Баҳодур аз беморхонаи наву замонавӣ, бозори марказӣ, марказҳои савдо, терминали нақлиётӣ, ки ноҳияро бо пойтахт ва дигар шаҳру навоҳӣ мепайвандад, дидан кардем. Ҷалолиддини Балхӣ ноҳияи хушбоду ҳаво ва сарсабз будааст. Ҳама ҷо сабзу хуррам, талу теппаҳо сабзпӯш, гандум расидаву мардум ба даравидани он саргарм. Ҳар нафар бо кори худ андармону барои худ шароити беҳтаре муҳайё месозад ва барои ин ҳақ ҳам дорад.

 Толори тренажери апаи Давлатмоҳ
27.05.2017. Соат бо вақти Ҷ.Балхӣ 11:00 дақиқа. Бо Баҳодур ба тарафи деҳоти Калинини ноҳия роҳ гирифтем. Гуфтанд, ки он ҷо 1 зане ҳаст, ки аз ҳисоби худ барои мардуми деҳа 1 маркази маишӣ бунёд карда, онро бо тамоми имконоти муосир муҷаҳҳаз намуда, барои истифодаи ройгон пешкаш кардааст. Хостем бо ин зан ошно шавем ва аз толори варзишии бунёд кардааш боздид намоем.
Апаи Давлатмоҳ Мирзомуродоваро дар ошёнаи 2-юми марказ, ки ҳам барои толори варзишӣ ва ҳам барои маркази дӯзандагиву адрасбофӣ ҷудо шудааст, пайдо намудем. Ӯ кори зани ҷавонеро, ки дар дастгоҳи махсус адрас мебофид, назорат мекард. Таҷҳизоти нав, имконияти хуби корӣ, толори варзишӣ бо тренажерҳои замонавӣ, ки ҳатто дар пойтахт камтар дидан мумкин аст, барои ҷавонони ноҳияи мазкур ба таври ройгон пешкаш шуда буд. Апаи Давлатмоҳ мегӯяд, к мехоҳад ҷавононро аз ҳар гуна амалҳои нопок дур ва ба варзишу касбомӯзӣ ҷалб намояд. Кори ӯ боиси таҳсин аст!

 Фурудгоҳ барои авиатсияи хурд
Дар баробари рушд додани истеҳсолоту кишоварзӣ, тиҷорату савдо, маорифу илм, касбомӯзӣ ва бунёди иншоотҳои ҳаётан муҳим, Убайдулло Файзулло азм дорад дар ноҳия боз 1 иншооти дигари муҳим-фурудгоҳ бунёд намояд. Бояд қайд кард, ки дар ин ноҳия қаблан дар замони шӯравӣ фурудгоҳ будааст ва то ҳол ҳам хати парвози он арзи вуҷуд дорад. Акнун онро азнавсозӣ намуда, бо шароити лозима муҷаҳҳаз карда, барои авиатсияи хурд омода кардан лозим аст, - чунин тасмим дорад раиси ноҳия.
- Ҳар гуна ҳолат метавонад пеш ояд, барои ҳамин мо бояд 1 фурудгоҳ дошта бошем, ки барои чархболу ҳавопаймоҳои хурд фароҳам бошад. На танҳо омилҳои инсонӣ, балки барои пешбурди иқтисодиёту кишоварзӣ низ фурудгоҳ ва алоқаи ҳавоӣ нақши муҳим мебозад ва мо бояд онро таҷдиду азнавсозӣ намоем, иброз медорад Убайдуллои Файзулло, раиси н. Ҷ. Балхӣ.
Боздиди мухбирони СССР аз ноҳияи мазкур идома дорад. Мо метавонем!

Ҷамила Ҳусейнова, Баҳодур Уроқов,
н.Ҷ.Балхӣ, 27.05.2017

Ба хотири рӯзгузаронӣ сиркачҳои Тоҷикро ҳоло дар Миср маҷбур месозанд, ки дар театрҳои мюзикл ва шапито нимурён баромад намоянд... 

Дар ҳоле, ки аз вайроншавии кӯпрупи мавзеи "Сои Зебон" беш аз 1 сол гузаштааст, кӯпруки дигар дар ҳамин маҳалла дар ҳоли садамавӣ қарор гирифтааст. Соли гузашта сел пули мошингузари кӯчаи Борбадро, ки мавқеи дуввумдараҷа дорад тахриб намуда буд. Аммо бо гузашти 1 сол то ба ҳол ин пул бақарор карда нашудаасту равуои нақлиёт аз ин мавзеъ бо мушкилиҳо сурат мегирад. Сокинони ин маҳҳала мегӯянд агар кӯпруки дигаре, ки дар кӯчаи Борбад болои канали Тӯхсан - корез қарор дораду фурӯ равад, боз барои чанд моҳҳои дигар хатсайри маршруткаҳоро дигар хоҳад карду мушкилоти мардумро зиёд.

Хуршед Фозилов

Рӯзи 08.06.2017, дар синни 73-солагӣ, баъди бемории дурударози 8-сола, қалби Шариф Комилов аз таппидан бозмонд...
Комилов Шариф Комилович 6 июни соли 1943 таваллуд шудааст. Ӯ сар аз вазиши насими бозсозии Горбачев дар РСС Тоҷикистон аз нахустинҳо шуда, Партияи Демократиро таъсис дода, садри ин ҳизб дар вилояти Кӯлоб таъин гардид. Дар ҳамон солҳои ба масал «перестройка» ба тариқи алтернативӣ раиси к/зи Кирови н. Восеъ интихоб шуд ва ба колхозчиён озодии мутлақ дод. Ин барои нахустин бор дар маҳдудаи 6\1-и замин, яъне давлати паҳнои СССР буд, ки колхозчӣ ҳуқуқи мутлақи озодӣ пайдо карда, метавонист, бе мамониат аз колхоз бадар шавад ва ё дар колхоз ба тариқи шартномавӣ ва бо маоши калон кор кунад. Фаромӯш накардаем, ки «прописка» ё худ номнависии шаҳру қишлоқ деҳқононро дар тамомии шӯравӣ пойбасти кори колхоз менамуду аз к\з ихтиёран баромада рафтан хеле мушкил буд. Дар колхоз бошад, деҳқон пахтаву тамоку парвариш мекарду имкону илоҷи кори фермерӣ ва озодии интихоби обчакориро усулан надошт. Пасттарин маошро колхозчӣ мегирифт.
Шариф Комилов ин ҳамаро рафъ кард. Ҳар деҳқон акнун ҳуқуқи комил дошт, ки худаш таъйин кунад, ки чӣ мекораду чӣ мепарварад. Ва аҷабо, ин озодии демократи №1, дар вилояти Кӯлоб самар овард. К\зи миёнаҳол ва пасмонда ба яке аз хоҷагиҳои пешқадами республика табдил ёфт.

Гови қурбонӣ барои Нурӣ
Зиёд дар бораи ин фаолияташ наменависам. Бо ин иктифо менамоям, ки баъди имзои Протколи Сулҳ ва тақсими вазифаҳои ба масал «30-фоиза», ки ҷониби оппозитсия ба Комилови сахтсухану ростгӯ 1 курсӣ наёфт, колхозчиёни к\зи Киров ба назди ин ҷониб омада, дар редаксия гуфта буданд:
-Агар Комиловро дубора раиси колхози мо таъин кунанд, омодаем, дар пеши пои Нурӣ гов кушем!
Инро мардуме мегуфт, ки аз гуруснагӣ азият дошту нони хӯрдан на, гову молро бошад он шабу рӯз дар хоб медид. Вале онҳо омода буданд, ҳамакаса ҷамъ шуда, пул партофта, гов харанду пеши пои Сайид Абдуллои Нурӣ забҳ кунанд, то раиси дӯстдорашонро, ки ҷанги гражданӣ аз ватан берун андохта буд, дубора дар симмати раёсати колхозашон гузорад... Зеро ӯ умеди ҳазорон-ҳазор нафар боқӣ  монда буд...

Бухарин, яъне ростгӯ
Шариф Комиловро дар Тоҷикистон бо тахаллуси «Бухарин» мешинохтанд. Худаш ҳам ин номро дӯст медошт. Зеро мисли Бухарин ростгӯ, ростқавл ва якрав буд. Ҳаргиз пеши касе сар хам намекарду хатои ҳамаро дар рӯяш мегуфт. Ин аст, ки на дар суфуфи оппозитсия, на дар ҳизб ва на дар ҳукумат нағзаш намедиданд. Бо ин ҳама Шарафмандона зист, 2 гулдухтари зебо ва фарҳангие ба мерос монд.
Усулан марди аҷиб ва ғайритасаввур буд. Ҳатто пиндораш ба хости аксарият муғаййир меафтид. Ёдам ҳаст, рӯзе аз дасти Наргиси наврас гирифта, ба идораи корам, ба Ҷавонони Тоҷикистон омаду гуфт:
-Наргис шашмақом меомӯзад ва тасмим дорам ӯро мақомсаро кунам!
Ва аз нигоҳи маънодорам рамуз гирифта афзуд:
-Оре, бигзор донанд, ки кӯлобиҳо низ мақомсаро доранд...
Наргис ва Дилором Комиловаҳо 2 гулдухтари нозанин ва ширинкалом, ки доди суханро додаву аз журналистон ва наттоқони маъруфи давранд, самараи умри Шариф Комилови «ҷӯраи ман»-анд...
Рӯҳат шод ва хонаи ахиратат обод бод, дӯст, бародар, ҷавонмард ва Инсони вораста... Биҳиштӣ, ки будӣ, дар даҳаи Бахшиши Гуноҳон ва дар моҳи хосаи Худо рахти сафар бастӣ!

Сайёфи Мизроб
Ҳамфикр ва ҷӯраат