Cанаи 20-уми августи соли равон ҳангоми гузаронидани амалиёти гумрукӣ дар роҳи мошингарди самти “Ҷаббор Расулов – Хуҷанд”-и ҳудуди ноҳияи Ҷаббор Расулов аз тарафи кормандони Раёсати минтақавии гумрукӣ дар вилояти Суғд воситаи нақлиёти тамғаи “Хундай-Портер”, рақами давлатиаш 0859КЕ02, таҳти ронандагии шаҳрванд Ҷ.Д., соли таваллудаш 1999, истиқоматкунандаи ноҳияи Бобоҷон Ғафуров, ҷамоати деҳоти Хистеварз, ҳангоми азназаргузаронӣ боздошт гардид.
Дар бордони воситаи нақлиёти мазкур ба миқдори 2000 кг хӯроки паррандаи навъи “Калтсий трифосфат”-и истеҳсоли Ҷумҳурии Қирғизистон муайян карда шуд, ки ин миқдор мол ба худи ронанда Ҷ.Д. тааллуқ дошта, номбурда онро аз деҳаи Зарафшони ноҳияи Ҷаббор Расулов аз як шахси ба ӯ ношиноси қирғиззабон, ки бидуни назорати гумрукӣ вориди марзи гумрукии Ҷумҳурии Тоҷикистон намудааст, харидорӣ намуда, мехост бе ҳуҷҷатгузории гумрукӣ барои фурӯш ба шаҳри Хуҷанд интиқол диҳад.
  
Ҳамин тавр, шаҳрванд Ҷ.Д. бо ин кирдори худ ҳуқуқвайронкунии маъмурии дар моддаи 597-и Кодекси ҳуқуқвайронкунии маъмурии Ҷумҳурии Тоҷикистон пешбинишударо содир намудааст.
 Дар асоси далелҳои мавҷуда бо дастрасии моддаҳои 81, 82 ва 86-и Кодекси мурофиавии ҳуқувайронкунии маъмурии Ҷумҳурии Тоҷикистон нисбати номбурда мутобиқи моддаи 597-и Кодекси ҳуқувайронкунии маъмурии Ҷумҳурии Тоҷикистон парвандаи ҳуқувайронкунӣ оғоз карда шудааст.
 

Маркази матбуоти Хадамоти гумруки назди Ҳукумати Ҷумҳурии Тоҷикистон

Шоми 19.09.2017 бо иштироки Раиси ш. Душанбе Рустами Эмомалӣ пули роҳи оҳан ва автомобилгард, воқеъ дар буриши кӯчаи Моёншо Назаршоев ва Аҳмади Дониши ноҳияи Шоҳмансур пас аз навсозӣ ва гулгашти назди истгоҳи Роҳи оҳан то маҷмааи меъмории муҷассамаи Садриддин Айнӣ, воқеъ дар хиёбони Рӯдакӣ расман мавриди баҳрабардорӣ қарор гирифтанд.
Пули роҳи оҳан ва автомобилгард аз ҷониби КВД «Роҳи оҳани Тоҷикистон» навсозӣ ва таъмиру тармим гардидааст. Тарҳи наву лоиҳаи навсозии он аз ҷониби ҶДММ «Кул-дизайн» ва ҶДММ «Инвест лоиҳа» таҳия гардида, корҳои сохтмонӣ ва васлу насби қисматҳои он аз ҷониби ҶДММ «Строймет» ва ҶДММ «Машҳад Коло» анҷом дода шудаанд. Маблағи умумии лоиҳа  беш аз 1 миллиону 400 ҳазор
сомониро ташкил медиҳад.
Гулгашти назди истгоҳи Роҳи оҳан то маҷмааи меъмории муҷассамаи Садриддин Айнӣ низ аз ҷониби КВД «Роҳи оҳани Тоҷикистон» пурра навсозӣ гардида, он дар масоҳати наздики 14 ҳазор метри мураббаъ доман паҳн кардааст.
Азнавсозии гулгашт аз ҷониби ҶДММ «Голддизайн студио» омода гардида, корҳои сохтмониро ҶДММ «Озодӣ-Ка» ба анҷом расонидааст. Маблағи умумии лоиҳа 7,8-ро ташкил медиҳад.

20.09.2017, тахминан соати 12:25-дақиқа, ронандаи автомашинаи тамғаи “Опел-Зефира”, Юсуфов Наимҷон Мирсаъдиевич, соли таваллудаш 1974, сокини шаҳри Душанбе, ҳангоми ҳаракат дар шоҳроҳи “Душанбе-Хуҷанд-Чаннок”, дар ҳудуди ҷамоати деҳоти Зарҳалоли шаҳри Истаравшан қоидаи ҳаракати роҳро вайрон намуда, ҳангоми ба сабқат баромадани автомашинаи газкашони тамғаи “Чанган”, таҳти идораи Ниматов Сайдаҳмад Саидҷаъфарович, соли таваллудаш 1967, сокини ноҳияи Фархор, ба автомашинаи самти муқобили ҳаракат омада истодаи тамғаи “Либеро”, таҳти идораи Улмасов Рустам Раҳматович, соли таваллудаш 1988, сокини ноҳияи Ҷ.Расулов, бархӯрдааст.
Баъдан, ронандаи автомашинаи тамғаи “Чанган” Ниматов С. аз уҳдаи идораи воситаи нақлиёт набаромада, хараробаро, ки дар он Усмонов Фахриддин Аҳмадович, соли таваллудаш 1989, сокини ш.Истаравшан савора буд, пахш намуда, чаппа шудааст.
Бино ба иттиллои маркази матбуоти ВКД ҶТ, дар натиҷа ронандаи автомашинаи тамғаи “Либеро” Улмасов Р., ронандаи автомашинаи тамғаи “Опел-Зефира” Юсуфов Н. ва мусофирони дохили автомашина тамғаи “Опел-Зефира” Абдураҳмонова Муҳаррам Бобоевна, соли таваллудаш 1965, сокини ноҳияи Б.Ғафуров, Сатторова Муътабар Бобоевна, соли таваллудаш 1975, шаҳри Бӯстон, Иззатова Руқиямоҳ Ҳукуматуллоевна, соли таваллудаш 1963, сокини ш.Душанбе ва савораи харароба, Усмонов Ф. ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидаанд.
Инчунин, мусофирони дохили автомашинаи тамғаи “Опел-Зефира”: Эсоев Собит, соли таваллудаш 1958, сокини ш.Душанбе, Ҳасанова Малоҳат Бобоевна, соли таваллудаш 1959, сокини ноҳияи Б.Ғафуров, Убайдуллоева Ойбону, соли таваллудаш 1963, сокини н.Б.Ғафуров, мусофири дохили автомашинаи тамғаи “Либеро” Муллоев Даврон Бурҳонович, соли таваллудаш 1961, сокини н.Ҷ.Расулов ва ронандаи автомашинаи тамғаи “Чанган” Ниматов С. ҷароҳатҳои гуногуни ҷисмонӣ бардошта, дар беморхона бистарӣ гаштаанд.

Ба ҳамин теъдод Тоҷикони шердилу багурда дар назди Маркази Савдои «Москва»-и ФР ҷамъ шуданд, то адаби чанд беадаберо диҳанд, ки ба 1 Тоҷики ҳаммол зӯргӯӣ кардаанд.
Ба иттилоъи Каромат  Шарипов-садри яке аз ҷамъиятҳои Тоҷикӣ дар Маскав, рӯзи чоршанбеи 20.09.2017 посбонони МС «Москва» 1 ҳаммол-грузчики Тоҷикро бе ягон далел мурданивор лату кӯб кардаву бадани нимзиндаву ниммурдаи ӯро ба кафане печонида, ба кӯча андохтаанд. Табиист, ки ин вандализми шовинистона ғазаби Тоҷикони ҷасурро ба бор оварду онҳо омаданд, то бо ин шағол-посбонон мардонавор ҳисоббаробарӣ кунанд.
Посбонон аз тарс пулис ҷеғ задаанд. Пулиси рус, ки таври маълум моломол аз афсарони фашистмаъоб аст, бе ягон пурсу ҷӯ 50 Тоҷикро дастгир кардааст. Аммо дар баробари посбонони ҷинояткор амалеро поин наовардааст.
Зимнан газетаи мардумии СССР сареҳатан аз Сафорати ҶТ дар ФР қотеъона талаб дорад, ки ба ин кор дахолат кунад ва манофеи сокинони кишвари хешро ҳифз намоянд. Наход Сафири ҶТ дар Маскав алоқадри Каромат Шарипов дар ғами ҳамватанон набошад?
Мавзуъро пайгир мемонем.
Мо Метавонем!

Марзшиканони афғонӣ боз 1 шаҳрванди тоҷикро ба гарав бурданд. Вале бо гузашти 5 рӯз ҳанӯз ҳам аҳволи шаҳрванди тоҷик норӯшан боқӣ мондааст.

Имрӯз Суди олии Тоҷикистон Фирӯз Холмуродзода, 1 корманди баландпояи Агентии зидди фасодро ба 15 соли зиндон маҳкум кард. Дар баробари ин, бо ҳукми суд молу амволи номбурда низ мусодира хоҳад гашт.
Фирӯз Холмуродзода пас аз ба итмом расидани ҷазо боз 5 соли дигар ҳуқуқи гирифтани мансабро нахоҳад дошт.

СССР

Шӯҳрат Мақсудшоев, писари Дилдор Мақсудшоев, директори собиқи фурудгоҳи ш. Хоруғ, ки рӯзи 13.09.2017 ба таври фоҷиавӣ ба ҳалокат расид, ба ҷойи падараш иҷрокунандаи вазифаи директори фурудгоҳи ин шаҳр таъин гашт.
Чуноне ки ба мухбири мо аз маркази матбуоти ҶСК «Фурудгоҳи байналмилалии Душанбе» хабар доданд, ин тасмим пас аз сафари ҳайати кории роҳбарияти фурудгоҳи байналмилалии Душанбе ба Хоруғ дар пайи ин ҳосида гирифта шудааст. Фурудгоҳи ш. Хоруғ зертобеи ҶСК «Фурудгоҳи байналмилалии Душанбе» буда шодравон Дилдор Мақсудшоев аз соли 1998 роҳбарияти онро бар ӯҳда дошт.

СССР