Бо қарори раиси ш.Душанбе Рустами Эмомалӣ аз 29.05.2018 Саидзода Фирдавс Ҳамро муовини раиси ш.Душанбе таъин карда шуда, ӯ дар ин вазифа Саидзода Қурбон Тағайро иваз намуд. Саидзода Қурбон Тағай, ки назорати соҳаи роҳу фаъолияти нақлиёти ҷамъиятии пойтахтро бар зимма дошт, бо навиштани ариза бо хоҳиши худ аз кор рафт. Гуфта мешавад, ки Саидзода Қурбон Тағай ҳафтаи гузашта амалиёти ҷарроҳиро паси сар намуда, бо сабаби бад шудани саломатиаш маҷбур шудааст аз мансаб даст кашад.
Бояд қайд намуд, ки Саидзода Фирдавс Ҳамро то ин дам директори МДК «Душанбенақлиётхадамотрасон»-ро бар ӯҳда дошта, тӯли солҳои зиёд дар корхонаҳои коммуналии ш.Душанбе, аз қабили ККВД «Троллейбус» ва ККВД «Автобус-1» низ кор кардааст. Тибқи қарори раиси ш.Душанбе Рустами Эмомалӣ иҷрокунандаи вазифаи директори МДК «Душанбенақлиётхадамотрасон» Ҷумъахон Давлатов таъин гаштааст.

СССР

Корхонаи азими сементбарории кишвар «Моҳир-семент» дар моҳи шарифи Рамазон ба суратҳисоби ятимони кули н.Ёвон 59 000 сомонӣ ирсол кард. Ин иқдом дар якҷоягӣ бо Мақомоти иҷроияи ҳокимияти маҳаллӣ дар н.Ёвон сурат гирифта, ба суратҳисоби 59 нафар ятимони кулли ноҳия 1000 сомонӣ аз номи корхонаи мазкур гузаронида шуд.
Инчунин, аз ҷониби маъмурияти корхонаи «Моҳир-семент» ба ҳар яки онҳо тӯҳфаҳои алоҳида ва маблағи нақдӣ низ тақдим карда шуд.

Баҳодур Уроқов, СССР, вилояти Хатлон

Дар Боғи истироҳатии "Наврузгоҳ"-и ш.Хуҷанд "Боғи ҳайвонот" фаъол шуд. Чуноне ки ба мухбири мо аз маркази матбуоти раиси ш.Хуҷанд хабар доданд, айни замон дар ин боғи ҳайвонот 40 намуди ҷонварон, аз қабили шеру хирс, гургу шағолу уштур, уқобу мор, маймуну сангпушт ва ғайра бо теъдоди зиёда аз 100 сар парвариш ва маърази тамошо гузошта шудаанд.
Даромад ба боғи ҳайвонот барои хурдсолон 3 сомонӣ ва барои калонсолон 5 сомонӣ пешбинӣ гардидааст.Бояд қайд намуд, ки зиёда аз 20 соли охир ягона дар вилояти Суғд "Боғи ҳайвонот" дар мавзеъи номбурда, фаъол набуда, дар остонаи Рузи байналмилалии ҳифзи кӯдакон ба кор андохта шуд.

Назира Муллоҷонова, сокини ш.Душанбе бо таваллуд кардани духтарча субҳи рӯзи 26.05.2018 аҳолии Тоҷикистонро ба 9 миллион расонид.
Мувофиқи маълумоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Агентии омори назди Президенти Ҷумҳурии Тоҷикистон, модари тифл сокини ш.Душанбе, истиқоматкунандаи кӯчаи Асадулло Ғуломов, М2, ҳуҷраи 14 Назира Муллоҷонова, соли таваллудаш 1990 мебошад.
Назирабону соҳиби 1 фарзанд буда, фарзанди дуюмаш аҳолии  ҷумҳуриро ба 9 миллион расонид. Тифли навзод имрӯз соати 06-30 дақиқа дар Муассисаи давлатии «Таваллудхонаи  №1-и шаҳри Душанбе» ба дунё омад.
Вазни духтарча 3 киллограму 600 грамм буда, қадаш 51 сантиметр мебошад. Ҳолати кӯдаки навзод ҳангоми таваллуд аз ҷониби мутахассисон аз рӯи ҷадвали Апгар 8/9 хол баҳо дода шудааст.
Назира Муллоҷонова  баъди аз таваллудхона баромадан ба хонаи сеҳуҷрагии истиқоматии нави хеш гусел карда мешавад, қарори мазкурро дар ин бора алакай Рустами Эмомалӣ, раиси ш.Душанбе ба тасвиб расонидааст. Ҳамчунин бо ташаббуси раиси шаҳр манзили зисти тифли 9 миллиона бо тамоми ашёи рӯзгор таъмин мегардад.

Бахшида ба таҷлили «Рӯзи Ҷавонони Тоҷикистон 23-май», таҳти унвони «Ҷавонон пайрави Пешвои миллат», инчунин эълон гардидани соли 2018 – Соли  рушди сайёҳӣ ва ҳунарҳои мардумӣ аз тарафи, Президенти Ҷумҳурии Тоҷикистон мӯҳтарам Эмомалӣ Раҳмон рӯзи 22.05.2018 дар маркази вилояти Хатлон-ш.Бохтар, Ярмаркаи ҷойҳои кории холӣ ва вазифаҳои озод баргузор гашт.
 Дар  чорабиниҳои мазкур 182 ташкилоту муассисаҳои вилоятӣ, шаҳриву ноҳиявӣ иштирок намуда, барои бекорон 2517 ҷойҳои кории холии худро пешниҳод намудаанд. Дар чорабинии Ярмаркаи ҷойҳои кори холӣ ва вазифаҳои озод зиёда аз ҳазор нафар ҷавонону занон ва шаҳрвандони корҷӯ аз шаҳру ноҳияҳои вилоят иштирок намуданд, ки ба 233 нафар роҳхат дода шуд.  Ибрози зикр аст, ки дар чор моҳи соли 2018 аз ҷониби раёсату шуъбаҳо ва бахшҳои Агентии меҳнат ва шуғли аҳолӣ дар шаҳру ноҳияҳои вилояти Хатлон ва ташаббуси бевоситаи онҳо дар ин давра 100 маротиба ярмаркаи ҷойҳои кори холӣ ва вазифаҳои озод баргузор гардидаанд, ки дар рафти  чунин чорабиниҳо 1047 корхонаю ташкилотҳо ва муассисаю хоҷагиҳои гуногуни вилоятӣ ва шаҳриву ноҳиявӣ иштирок намуда, барои бекорон 9850 ҷойҳои кори холи ва вазифаҳои озоди худро пешниҳод намуданд.
Ин Ярмарка дар ҳамбастагии Раёсати кор бо ҷавонон ва варзиш, инчунин намоиши ҳунарҳои дастию мардумӣ ва дастовардҳои касбомӯзони филиалҳои Муассисаи давлатии «Маркази таълимии калонсолони Тоҷикистон» дар шаҳру ноҳияҳои вилоят дар даврони истиқлолият бо иштироки муовини раиси вилоят, Раҷабов Р, сардори Раёсати иқтисод ва савдои мақомоти иҷроияи ҳокимияти давлатии вилоят, Мирзоев Д. сардори Раёсати Агентии меҳнат ва шуғли аҳолӣ, Навруззода А. Абдулозода Ф.  сардори  Раёсати ҷавонон ва варзиш дар вилоят ва дигар роҳбарони ташкилоту муассисаҳои вилоятӣ баргузор намуд.

СССР

Сиҷоуддин Саломзода, раиси ш.Исфара иқдом кардааст, ки даромадгоҳи шаҳрро мутобиқ ба талаботи меъмории муосир ва фарҳанги шаҳрдорӣ мавриди азнавсозӣ қарор дода, пас аз 1 моҳ дар ин мавзе, ки симои комилан тозае ба худ хоҳад гирифт, таҷлили бошукӯҳи ҷашни Ваҳдати миллиро баргузор намояд.
Бино ба итиллои аз маркази матбуоти МИҲД дар ш.Исфара ба СССР расида, дар ин мавзе сохтмони иншооти пазиройии меҳмонон, ҷойи дамгирӣ ва мошинмонӣ, рамзҳои давлатии Ҷумҳурии Тоҷикистон, бунёди боғи ҳозиразамон, кабудизор ва гулзорнамоии қитъаҳои замини атрофи он ба нақша гирифта шуда, он аз ҷониби бинокорони гулдасти Ширкати сохтмонии Исфара бунёд хоҳад ёфт.
Арзиши лоиҳавии ин иншоот тақрибан 1 миллион сомониро ташкил дода, дар пештоқи иншоот бошад рамзи Исфара, ки аз ҷониби Маҷлиси вакилони халқи шаҳр тасдиқ гардидааст, насб мегардад.

Маъруф Муҳаммадзода, раиси ш.Хуҷанд бахшида ба Рӯзи Ҷавонон дар кишвар 100 нафар наврасону ҷавонони фаъоли шаҳрро ба ҳузур пазируфта, идрорпулии хешро ба эшон тақдим дошт.
Чуноне ки котиби матбуотии раиси ш.Хуҷанд Маъмур Юсуфов хабар дод, Маъруф Муҳаммадзода  наврасону ҷавононро бо Рӯзи ҷавонони Тоҷикистон табрику таҳният гуфт, изҳори умедворӣ намуд, ки дар ояндаи наздик низ ҷавонони мо дар дигаргунсозиҳои ҷомеаи навин фаъолона иштирок карда, дар муаррифии давлати тоҷикон ва баланд бардоштани парчами Тоҷикистон дар арсаи ҷаҳонӣ нақши шоиста мегузоранд. Ҷавонони саодатанд, масъулияти бузурги таърихӣ ва қарзи пурифтихори фарзандии худро сарбаландона адо намуда, ба хотири рушди рӯзафзуни кишвари биҳиштосоямон ҳамчун созандагони фардои Ватан хизмати арзандаро ба ҷо меоранд.
Иттилоъ дода шуд, ки ташаббусҳои созандаи ҷавонон аз ҷониби Ҳукумати кишвар ҳамеша дастгирӣ ёфта, ҷавонон дар корҳои роҳбарии шохаҳои ҳокимият, истеҳсолоту тиҷорат, илму таҳсилот ва ғайраҳо пурсамар фаъолият доранд. Аз ҷумла, 75 нафар олимони ҷавон ва 29 нафар ихтироъкорони ҷавон дар донишгоҳҳо фаъолият бурда, саҳми арзандаи худро дар пешрафти ҷомеа мегузоранд. Имрӯзҳо зиёда аз 365 - нафар ҷавонписарону ҷавондухтарони шаҳрамон дар муассисаҳои таҳсилоти олии касбии кишварҳои хориҷи кишвар таҳсил мекунанд.