Абдураҳим Муъминов-раҳбари Хадамоти амнияти Шавкат Мирзиёев-президенти Узбекистон, аз мақоми худ барканор ва зидди Барот Маманов-раиси Идораи амнияти ҳаракат дар роҳҳои Тошканд парвандаи ҷиноӣ боз шуд. Ба чунин тағйироти кадрӣ 1 ҳодисае дар ҷараёни сафари президенти Туркманистон Қурбонгулӣ Бердимуҳаммадов сабаб шудааст, ки охири моҳи апрел ба Тошканд рафта буд. Шавкат Мирзиёев он рӯзҳо яке аз иншоот дар ш.Тошкандро медиду 1 корманди БДА хостааст, ба маҳалла дарояд. Маъмурони Хадамоти амният ба ӯ иҷоза додаанд, ки бе ягон сарусадо ворид шавад. Аммо ӯ бо садо ва суръати баланд мошинро рондааст, ки президент аз ин манзара хашмгин шудааст.

Президенти Чеченистон Рамазон Қодиров дар мусоҳиба бо ТВ "Россия 24" гуфт, ки омодааст аз симаташ даст кашида, агар лозим шавад, ба сифати боевик ба ватанаш хидмат кунад. Пештар ӯ авзоъ дар Сурияро фишор ба Русия номида буд: "Агар ин фишороварӣ идома ёбад, Русия ночор ба корбурди нерӯ хоҳад шуд. Ман ба сиёсат чун ҷанговар омадам. Мо омадаем, ҳамагуна фармони фармондеҳи олиро иҷро кунем. Ба фикрам, вақти он расидааст, ки мо генералҳо мақомҳои роҳбарии худро 1 сӯ гузошта, барои ҳифзи ягонагии давлати худ мубориза барем. Ҳоло дар Сурия манфиатҳои Русия ва мардумро ҳифз карда истодаем".

Инак, аз 18 март 2 моҳи мӯҳлате, ки президенти Тоҷикистон ба бонкҳои дучори бӯҳрон дода буд, сипарӣ шуд. Аммо дар ин миён бонкҳо тақрибан коре накарданд, ки аз бӯҳрон раҳо шаванду ҳаққи мардумро баргардонанд. Ин бонкҳо чун ширкати "МММ"-и Сергей Мавроди даргоҳе будааст, ки ҳазорон касро ба қавли русҳо "у разбытой кориты" гузоштанд. Аммо барои ман ба бонки "масъулиятшинос"-и Муродалӣ Алимардонов-"Агроинвестбонк" пул гузоштанам шояд бо фоҷиаи оилавӣ анҷом ёбад.

Хонандагони азиз! Чанд шумора пеш эълон намудем, ки мутахассисони Кумитаи оид ба корҳои дин, танзими анъана ва ҷашну маросимҳои миллии назди Ҳукумати ҶТ омодаанд ба суолҳои хонандагони Газетаи мардумии СССР ҷавоб гӯянд. Редаксия дар тӯли 3 ҳафта тамоми арзу саволҳои аз шумо ба унвонии ин кумита ирсол гаштаро ҷамъ ва ба Кумитаи мазкур равон карданд. Мо аз Сулаймон Давлатзода, раиси Кумитаи мазкур барои ин ҳамкорӣ арзи сипос менамоем, зеро на танҳо роҳбарияти ин ниҳод, балки тамоми кормандони он саъйю талош карданд, то ҷавобҳо дар фурсати кӯтоҳ ба дасти мо бирасанд. Мо метавонем!

Ибтидои солҳои 1970 дар мақомоти Ҳизби Коммунисти вилояти азнавбарқароршудаи Ленинобод (ҳоло Суғд) фаъолият доштам. Рӯзе баъди соати корӣ ба тамошои филми ҳунарии ҳиндии «Кусок хлеба» (Буридаи нон) ҷониби кинотеатри «Тоҷикистон» (ҳоло Қасри ҷавонон) мерафтам, ки бо корманди кумитаи комсомолии вилоят Тағоймурод вохӯрдам. Бо ӯ шиносоӣ доштам. Ин ҷавони хушқаду қомату бофарҳанг дилдодаи шеъру тарона буд. Ӯ ҳам нияти тамошои филмро доштааст. Ҷавҳари сӯҳбатамон шеъру шоирӣ шуд. Ман, ки он рӯз аз маҷаллаи «Шарқи сурх» шеъри М.Турсунзода «Ошёни баланд»-ро хонда, мафтун шуда, ҳатто 2 байти аввалашро аз ёд карда будам, бо шавқ ба ӯ хондам:
Ошён гар мегузорӣ дар баландиҳо гузор,
Дар баландиҳои кӯҳи сарбаланди мо гузор.
Осмон дар гунбади сабзаш агар ҷоят диҳад,
Ошёни фикри дурандеш дар он ҷо гузор.
-Ака, - гуфт ӯ, Шумо бо шеърҳои шоири ҷавон Лоиқ Шералӣ шиносед?
-Не, - гуфтам, ягон китоб ё шеърашро нахондаам.
-Афсӯс, - гуфт ва таъкид кард: Шоири ҷавон бошад ҳам, хеле болаёқат, шеърҳояш басо тару тоза.
-Таърифӣ бошад, - ҳазломезона гуфтам, Шумо ягон китобашро бо худ доред?
-Албатта, дирӯз китоби нави Лоиқ-«Нӯшбод» аз чоп баромад. Шоир лутфан бо соядаст бароям тақдим кард. Бо ӯ шиносам.
-Агар, ин тавр бошад, аз «Нӯшбод» намунае қироат мекардед, - гуфтам.
-Майлаш, - гуфту «Замин» ном шеърро хонд. Эҳсос кардам, ки шеър маҳсули эҷодии шахси истеъдодаш худодод буда, на аз рӯи ишқу ҳавас эҷод шудааст. Илтимос кардам, онро бори дуюм хонд. Хусусан, ин мисраъҳо ҳаётиву бо табъи баланд гуфта шудаанд:
…Замин дар зери по аз мо баланд аст,
Ба рӯяш нақши ҳар 1 пой панд аст.
Макӯбаш бо қадамҳои халалгор,
Замин чун фалсафӣ дар фикр банд аст.
-Ин китоб дар фурӯш ҳаст? - пурсидам.
-Не, -гуфт Тағоймурод, ҳамагӣ 5000 нусха чоп шуда буд. Китобдӯстон онро аз мағозаҳо якбардор карданд.
-Он китобе, ки аз шоир тақдим шудааст, бо Шумост? - пурсидам.
-Албатта, - гуфт ӯ.
-Барои якчанд рӯз хондан дода метавонед?
-Аммо бармегардонед, он бо соядасти муаллиф тақдим шудааст, - гуфт.
-Албатта, бармегардонам, - ҷавоб додам.
Пагоҳӣ ӯ китобро овард. «Нӯшбод»-ро ба даст гирифтам. Аҷаб китобчаи хурд, вале пур аз эҳсосоти ҳақиқати ҳастӣ. Гаштаю баргашта хондам. Лек дар мавриди баргардонидани китоб аз ҷониби ман ваъдахилофӣ шуд. Ба пурсиши Тағоймурод 2-3 бор китобро оварда медиҳам, хавотир нашавед, - гӯён ваъда додам. Аммо ҳангоме, ки аз сафари хизматӣ, аз ш.Панҷакент баргаштам, ӯро ба кор ба кадом 1 ноҳияи ҷануби кишвар таъин кардаанд. Бо ҳамин «Нӯшбод» ба соҳибаш насупорида монду то ҳол дар қатори китобҳои дигари Лоиқ-«Соҳилҳо», «Хоки Ватан», «Сапедадам», «Марди роҳ», «Хонаи чашм», «Хонаи дил», «Варақи санг», «Девони замон»… китобхонаи маро дар 1 саф бо кутуби шоирони классики тоҷик зеб медиҳанд. Ашъори Лоиқ аз ватандӯстиву ифтихори миллӣ, аз ишқи пок саршор буда, бо содагию равонии худ ба дили хонандагон маъво мегирад. Бешубҳа, 1 худи «Модарнома»-и шоир шаҳодати хуби ҳунару истеъдоди нотакрори ӯст. Камина шеърдӯстам, аммо на шоир. Бо вуҷуди ин, дар васфи устод Лоиқ шеъргунае навистам:
Зодаи мазҳари кӯҳҳои пурасрор, Лоиқ,
Раҳнаварди шоҳроҳи пур аз бор, Лоиқ.
Аз каломаш фузуд шукӯҳи шеъри Аҷам,
Қуллаи назми ҷаҳонӣ ёдгор, Лоиқ.
Ҳаминро ҳар бор замзама карда мегардам. Арвоҳат ҳамеша шод бод, Лоиқ!

Абдушукур Расулови 84 сола,
собиқадори меҳнат, ш.Хуҷанд

SMART-9

Ҷамъияти дорои масъулияти маҳдуди «Нақлиётгаз-2004» дар робита ба андешаи «Хатсайрҳои мо кай боодоб мешаванд?» (СССР, №13(498), 29.03.2018)-и  Заринаи Ғайрат-донишҷӯи курси 4-и ДДОТ бобати мушкилоти хизматрасонии воситаҳои нақлиёти мусофиркашонии хатсайрҳои сектори хусусии №№2,11,13,22 чунин иттило медиҳад: Роҳбарияти ҶДММ «Нақлиётгаз-2004» 30.03.2018 пеш аз ба хатсайри №11 (маҳаллаи Арбоб-хотун – кӯчаи Ҳусейнзода) сафарбар кардани ронандагони воситаҳои нақлиёт бо иштироки Давлатов Ҷ.Б. муовини аввали директори Муассисаи давлатии коммуналии «Душанбенақлиётхадамотрасон» ҷаласаи корӣ баргузор карда, муҳтавои матлаб, хосса, муомилаи дурушт ва бо овози баланд ҷалб кардани мусофирон аз ҷониби кондукторҳо ва дигар равандҳои ба сатҳу сифати хизматрасонӣ алоқамандро мавриди баррасии амиқ қарор дод. Дар ин самт бобати назорати доимӣ дар хатсайри №11 ба кормандони хурди хизматрасонӣ низ дастур дода шуд. Раванди коҳиш додани камбудиҳо дар фаъолияти воситаҳои нақлиёти мусофирбарии хатсайри №11 зери назорати доимии роҳбарияти Ҷамъият қарор дорад.

У.Саидов
директори генералӣ