Алмосбек Отамбоев-президенти Қирғизистон ҳангоми супоридани стипендияи президентӣ ба донишҷӯёни фаъол дар Бишкек гуфт, вақте бо эҳсосот дар бораи президенти Қазоқистон Нурсултон Назарбоев суҳбат мекард, шояд "ноҳаққӣ" кардааст. Пештар ӯ раҳбарияти Қазоқистонро барои ҳимоят аз Омурбек Бабанов-номзад ба мақоми президентӣ ва дахолат ба кори дохилии Қирғизистон муттаҳам карда буд. Ӯ вазъ дар марзи Қирғизистон бо Қазоқистонро, ки баъд аз изҳороташ ба вуҷуд омад, кори атрофиёни Назарбоев номид: “Фикр мекунам, президенти Қазоқистон ҳатто дар ин бора гумон намекунад. Атрофиёни Назарбоев-олигархҳое ин корро мекунанд, ки дар фикри Қазоқистону Назарбоев нестанд ва танҳо ояндаи худро меандешанд.” Тоҷикон мақоле доранд, баъди афтидан чорзону назан!

Ҳайати Парлумони Аврупо (ПА), ки барои ҳамкорӣ бо давлатҳои Осиёи Марказӣ вазифадор карда шудааст, ба Ҷумҳурии Тоҷикистон аз 2 то 4 ноябри соли 2017 ташриф овардааст. Ҳайати ПА иборат аз 7 вакил аст, ки онҳо ҳизбҳои асосии сиёсии Парлумони Аврупоро намояндагӣ мекунанд.
Мақсади асосии сафари меҳмонон ин иштирок дар ҷаласаи шашуми Кумитаи ҳамкории байнпарлумонист, ки онро хонум Ивета Григуле-Петерс аз тарафи Иттиҳоди Аврупо раисӣ мекунад.
Чуноне ки ба мухбири СССР аз дафтари намояндагии Иттиҳоди Аврупо дар Тоҷикистон хабар доданд, зимни сафар, ҳайати ПА 1 қатор мулоқотҳоро бо сиёсатмадорони олимақоми мамлакат мегузаронанд. Тибқи барномаи сафар, вохӯриҳо бо президенти Ҷумҳурии Тоҷикистон Эмомалӣ Раҳмон, Раиси Маҷлиси Миллии Ҷумҳурии Тоҷикистон Маҳмадсаид Убайдуллоев ва Раиси Маҷлиси Намояндагони Ҷумҳурии Тоҷикистон Шукурҷон Зуҳуров пешбинӣ шудаанд. Инчунин, ҳайати ПА бо намояндагони ҷомеаи байналмилалие, ки дар Тоҷикистон ҳузур дорад, ва бо ҷомеаи шаҳрвандии мамлакат вохӯриҳоро баргузор мекунад.
Вакилони ПА якчанд масъалаҳои муҳимеро, ки ба муносибатҳои миёни Иттиҳоди Аврупо ва Тоҷикистон иртибот доранд, аз ҷумла амну субот, муборизаи муштарак алайҳи терроризм ва ифротгароӣ, пешбурди ҳуқуқи инсон ва идоракунии демократӣ, дастгирии ислоҳоти иқтисодии Тоҷикистон ҷиҳати кам кардани таъсири номусоиди омилҳои берунӣ ва ниёзи ҳамкории минтақавӣ дар Осиёи Марказӣ муҳокима намуданд.

СССР

Оё воқеан айёми рукуди ин ҳайати “шоҳона” расидааст?
“Реал Мадрид” дар бозӣ бо “Тоттенхэм” ба шикасти дандоншикане рӯ ба рӯ шуд. Лондониҳо бесобиқа бозида, ҷоизадори феълии мусобиқотро мағлуб карданд. Вале маҳкум намудани бозии “Дастаи шоҳона” чун бозии “мурда” нодуруст аст. Аммо каме ҳам бошад, “Реал” ба ин эътирози расонаҳо ва коршиносон сазовор аст, зеро худро аз ҳад зиёд боло бардоштанд ва ин “нокдаун”-и аз “Тоттенхэм” ба онҳо расида, барои шуруъи ин эътирозҳо кифоягӣ мекунад. Ин ҷо мо низ каме бозии дастаи Мадридро баррасӣ мекунем.

“Реал” бад бозӣ мекунад?
Шояд. Вале на он қадар. Вохӯрӣ бо “Жирона” (диққат! Дастаи 13-уми Ла Лигаи Испания)-ро бозигарони “шоҳона” қариб аз ҳама ҷиҳат бохтанд. Ҳиссиёте ҳаст, ки баъди ранҷонидани “Барселона” дар бозӣ барои Суперҷоми Испания “Реал” каме худашро “гум” кардааст. Футболбозон гӯё ҳамон бозиҳоеро мекунанд, ки дар мавсими гузашта мекарданд. Дар назар бозиашон ҳам ҳатто ҳамон хел мебарояд, аммо он бозии қаҳрамонӣ, ҳиссиёти мағлубнопазирӣ гӯё аз байн рафтааст, ё муваққатан хомӯш шудааст. Мушкилӣ ҳам дар ҳамин аст. Ҳама бозигарон дар ҳамон мавқеъ ҳамон корро мекунанд, танҳо натиҷа дигар шудааст ва “Реал” худ намефаҳмад, ки чӣ хел аз ин афтиши натиҷа халос шаваду ба натиҷаҳои гузашта боз расад. Ба даста барои қувваи эҳтиётӣ ё ба истилоҳ “ротатсия” бозигарони нав наомадаанд. Не, аниқтараш омадаанду ҷойҳои Хамесу Мората ва Пеперо, ки дар баробари ба майдон баромаданашон қувваи “Реал” зиёд мешуду кам не, гирифта натавонистанд. Барои 1-2 бозии нохуб наметавон Роналдуро аз ҳайати асосӣ берун кард. Бенземаро низ ҳамчунин, чунки франсуз аз ҷиҳати системавӣ бисёр барои Роналду муҳим аст. Кроос, Модрич ва Каземиро то ҳол беҳтарин сегонаи нимҳимоятгаронанд. Ҳимоятгарон низ аз беҳтаринҳои ҷаҳон мебошанд. Системаи бозӣ бисёр олӣ гузошта шудааст ва дар назар бояд хуб кор диҳад. Ҳатто тибқи омори нишондодашуда, даста бисёр нишондодҳои нағз нишон медиҳад, лек натиҷа ва он қувваи бузурги ғолибӣ нест.

РеалVSРеформа!!!
Фикре ҳаст, ки муддати бозии қаҳрамононаи 1 даста 3 сол аст ва баъди он бозии даста рӯ ба рукуд мениҳад. Сипас, бояд ё сармураббӣ ё ҳайат иваз шаванд. Яъне реформа лозим аст! Мисоли бараъло-ин “Барселона”-и Гвардиола аст. Ин даста 3 сол беҳтарин даста буду 2 бор Лигаи Чемпионҳоро соҳиб шуд. Пеп баъди шикаст аз Челсӣ фаҳмид, ки вақти солории дастааш гузаштааст. Зидан бошад, қариб 2 сол шудааст, сармураббии “Дастаи шоҳист”, лек хишти аввали ин дастаи “қаҳрамонон”-ро на Зидан, балки Анчелоттӣ гузошта буд. Ӯ чунин сохторро гузошта буд: Роналду ва Бенземаи якдигарро хуб ҳискунанда ҳама хатти ҳимоя ва алоқаи Кроос-Модрич. Дар вақти Зидан танҳо ба 2 нимҳимоятгар Каземиро илова карда шудаасту халос. Шояд ин тактика оҳиста-оҳиста қувваи худро аз даст дода истодааст? Пас ин вазъиятро чӣ тавр Зидан бартараф мекарда бошад?

Тотенхэми гурусна барои дастовардҳо
Дар ҳамин ҳол ба “Дастаи шоҳона” беҳтарин ҳайати таърихии “Тоттенхэм” рӯ ба рӯ шуд. Айни ҳол лондониҳо дар ҳолати бисёр хуб қарор доранд ва бозии Топ-дастаро нишон медиҳанд. Тактикаи онҳо хеле хуб кор медиҳад ва аллакай, онҳоро ҳеҷ кас дастаи миёна намеҳисобад. Хатти ҳимоя бо ҳимоятгарон-Вертонгену Алдервейрелд чунон моҳирона гузошта шудааст, ки яке аз дастаҳоест, ки ба дарвозаи худ кам гол сар додааст. Шояд номҳои ин 2 ҳимоятгарро дар баъзе ҷойҳо шунидаед, вале Триппйер, ки ин қадар “Реал”-ро нороҳат сохт, кам касест, ки шиносандаш. Бозии лондониҳо то ҳамон дараҷа ҷолиб аст, ки ҳеҷ кас Уокери хеле муҳими мавсими гузаштаи фурӯхташударо ҳатто ба ёд намеорад. Якҷоя бо ин хатти ҳимояи пурқувват хатти ҳамла низ бисёр олӣ корашро анҷом медиҳад. Кейн, Аллӣ, Эриксен ва ҳатто Сон аллакай футболбозони топ маҳсуб мешаванд. Ин гуфтаҳо на дар назария, балки бештар дар амалия исботи худро ёфтаанд ва ҳатто зидди ҷоизадори феълии ин мусобиқот ин тактика хеле хуб аз худ хабар дод. “Тоттенхэм” дар ин вохӯрӣ ҳам миқдори лозимаи ҳолатҳои головар ва ҳам шумури лозимаи голҳоро ба ҳадаф расонд. Онҳо дар ЛЧ дигар мисли мавсими гузашта беғайратонаву беқувватона бозӣ намекунанд ва “Уэмблӣ”-ро низ ба 1 саҳнаи тамошобоб табдил додаанд. Ҳоло Зидан бояд 4 ракаат намози шукрона гузорад, ки Тотенхэм голи 4-ашро назаду Реалро шармандаи 2 олам накард!!!

Постскриптиум
Хуб. “Тоттенхэм” воқеан хуб аст. Ин маълум. Вале бозии “Реал” аз ҳад бад буд?  Не! Мадридиҳо бо “Жирона” дарвоқеъ бад бозиданд, вале бо лондониҳо аз бисёр ҷиҳат корашон омад накард. Аз рӯи ҳолатҳои головар ҳатто мизбононро мағлуб карда буданд. Аммо мо ин ҷо боз ҳам бо мушкилии нуқтаи охири ҳамла ё зарбаи ҳалкунанда задан рӯ ба рӯ мешавем. Ба бозии ҷолиби “Тоттенхэм” ба ваҷд наомада намешавад, лек Мадридро барои ин бозӣ танқиди сахт нашояд. Роналду дар ин вохӯрӣ бозии хуб нишон дод, ҳам зарба зад, ҳам бо Марсело бозигузориҳои ҷолиб кард, ҳам гузаришҳо ва ҳам партофтҳои хуб дошт ва низ лидер будан хост. Ва ҳатто гол ҳам зад. Ҳатто бозии аз ҳама нуқтаи заъфи даста-Ҳакимӣ низ на он қадар бад буд.
“Реал” миёнаҳои қисми дуюми дидор аллакай аз ҳисоби ҳолатҳои хавфнок аз мизбонон пеш гузашт, вале мушкилӣ дар он буд, ки он лаҳза ҳисоб 3:0 буд ва соҳибони майдон онҳоро барои камаҳамиятиашон ҷазо дода буданд. Ба ҳар ҳол, муҳокимаро аз рӯи гол ё худ натиҷа мебароранд, ки он то охири ин бозӣ ба шогирдони Зайнидин даст надод. Бо ин ҳама “Реал” воқеан даст бардоштааст? На, агар мушкилие ҳам бошад, он аз характери бозӣ дур аст. Аҷиб ҳам намояд, вале натиҷаи ин бозӣ бояд ба нафъи ҳар 2 даста шавад. “Тоттенхэм” ахиран ба ҳама фаҳмонд ва махсусан, ба худ, ки дар ҳақиқат топ-даста аст. “Реал” бошад, ки то ҳол дар ин мавсим бо дастаҳои пурқувват набозида буд, дар навбати худ бояд аз “осмон” каме фуруд ояд ва ҳис кунад, ки чизеро иваз кардан лозим аст. Вале оё Зидан калиди ин мушкилро меёфта бошад?

Муродов Маҳмадшариф,
шореҳи футбол

Салом, СССР! Дар матбуоти даврии мо роҷеъ ба ҳаёт, фаъолияти сиёсӣ ва раҳбарии раҳматӣ Ислом Абдуғаниевич Каримови Тоҷик (маҳз Тоҷик, аммо Ӯртоқ не!!!)-президенти собиқи Ҷумҳурии Ӯзбекистон ҳар гуна матолиб рӯи чоп меояд. Ман-кадри советӣ тамоми нашрияҳоро ҳиҷҷа карда мехонам, зеро банда тарбиятдидаи детдом-кадри интернати шаҳраки Колхозчиён (имрӯз Панҷакент) ҳастам. Минҷумла, газетаи СССР дар бораи сиёсати ғалати имрӯзаи Каримов зиёд менависад ва хуб ҳам мекунад, зеро миссияи ӯст.
Хуб, чаро дар бораи Каримов ва Ӯртоқ набудани ӯ гуфтам?

Ислом тарбиятдидаи сағерахона аст!
Соли таваллуди Исломи тоҷикбачча 1938 асту зодаи шаҳри Самарқанди Тоҷикон ва қариб ҳамсоли мо. Падараш Абдуғанӣ ӯзбек асту очааш-Санавбар Тоҷик! Таври маълум, дар даврони Советӣ рафтуо байни халқҳои шӯравӣ озод буд, зеро ҳама халқу миллатҳои 15 ҷамоҳири шӯравӣ дар 1 давлати абарқудрату сағерапарвари СССР зиндагӣ мекардем ва бачаҳои бепарасторро ба наздиктарин хона-интернатҳои атроф тақсим мекарданд. Аз Самарқанд то Панҷакент 1 қадам аст. Хуллас, вақте Каримови сағераро ба интернати бачагони шаҳраки Колхозчиён “партофтанд”, ман тақрибан 10-11-сола будам (Аҷиб, вақте автобиографияи ӯро дар сайтҳои интернетӣ мехонем, ягон ҳарф дар бораи Каримови интернатӣ нест).
Ҳатто аз овони интернатӣ акси гурӯҳӣ дорем, ки он ҷо Ислом дар сар тоқӣ, дар пой калӯши резинӣ дорад. Вақте “аспакбозӣ” мекардем, ӯ бой медод ва мезадемаш (на танҳо ӯро, балки ҳар касе дар бозӣ мағлуб мешуд, бояд лат мехӯрд), зеро қоидаи бозӣ чунин буд, охир! Ӯ бошад мегирист. Он замон аз куҷо медонем, ки Исломи детдомӣ бо мурури замон ва гардиши айём президенти 1 давлат дар Осиёи Марказӣ мешавад... Ман ӯро баъди аз интернат рафтану соҳибмансаб шуданаш ҳамагӣ 2 бор дидам ва охирин дафъа соли 1982, вақте ки дар Шӯрои Вазирони СССР кор мекард. Аҷибаш ин, ки чун бо мо якҷо дар “детдом” буд, комилан Тоҷикӣ гап мезад ва ягон калимаи ӯзбекиро намедонист...

Саидмухтор Сатторов,
Узви Ихвон-ал-СССР, ш.Панҷакент

 Кормандони Раёсати минтақавии гумрукӣ дар вилояти Суғд, ҳангоми гузаронидани амалиёти гумрукӣ дар ҳудуди деҳаи Ғулакандози ноҳияи Ҷаббор Расулов, воситаи нақлиёти тамғаи ДАМАС, рақами қайди давлатиаш 9643 ВК -ро барои азназаргузаронӣ боздошт намуданд.
Ҳангоми азназаргузаронӣ дар бордони воситаи нақлиёти мазкур ба миқдор 150 килограмм маҳсулоти қаннодии қанди наъви «DOLLY»-и истеҳсоли Ҷумҳурии Ӯзбекистон ошкор гардид.
Ҳангоми пурсиш маълум гардид, ки моли мазкур ба шаҳрванд С.Қ. соли таваллудаш 1976, истиқоматкунандаи ноҳия Спитамен тааллуқ дорад.
 
 
Номбурда ин миқдор молро аз минтақаи наздисарҳадии Платинаи ноҳияи Спитамен аз як шахсӣ ба ӯ ношиноси шаҳрванди Ҷумҳурии Ӯзбекистон, ки зимни вайрон кардани қоидаҳои гумрукӣ аз Ҷумҳурии Ӯзбекистон ба ҳудуди Ҷумҳурии Тоҷикистон ворид кардааст, харидори намудааст. Ӯ моли харидаашро бебарасмиятдарории гумрукӣ ҳамлу нақд намуда, мехост ба ноҳияи Ҷаббор Pacулов барои фурӯш барорад.
Ҳамин тавр, шаҳрванд С.К. бо ин кирдори худ ҳуқуқвайронкунии маъмурии дар моддаи 597-и Кодекси ҳуқуқвайронкунии маъмурии Ҷумҳурии Тоҷикистон пешбинишударо, содир намудааст.
Дар асоси гуфтаҳои зикршуда ва бо дастрасии талаботи моддаҳои 81, 82 ва 86-и Кодекси мурофиавии ҳуқуқвайронкунии маъмурии Ҷумҳурии Тоҷикистон, нисбат ба шаҳрванд С.Қ тибқи моддаи 597-и Кодекси ҳуқуқвайронкунии маъмурии Ҷумҳурии Тоҷикистон, парвандаи ҳуқувайронкунии маъмурӣ оғоз карда шуд.
 

Маркази матбуоти Хадамоти гумруки назди Ҳукумати Ҷумҳурии Тоҷикистон

ба плей-офф роҳхат гирифтани “ПСЖ” ва “Бавария”, мусовии чанде аз довталабони мавсим дар шарҳи даври ЛЧ

Субҳи имрӯз Гурбонгулӣ Бердимуҳамедов, президенти Ҷумҳурии Туркманистон бо сафари расмӣ ба Ҷумҳурии Тоҷикистон ташриф овард. Дар фурудгоҳи байналмилалии Душанбе эшонро Қоҳир Расулзода, сарвазири мамлакат ва Рустами Эмомалӣ, раиси ш.Душанбе пешвоз гирифтанд.
Дар назар аст, ки дар доираи сафари 2 рӯзаи хеш ба Душанбе Гурбонгулӣ Бердимуҳамедов бо президенти ҶТ Эмомалӣ Раҳмон вохӯрда, дар пайи музокироти ҳайатҳои ҳукуматҳои 2 кишвар 1 қатор тавофуқот ба имзо хоҳад расид.

СССР

Маъмурияти Маркази савдои «Садбарг» бо пешниҳоди шаҳрдории пойтахт соати кории ҳаррӯзаи хешро иваз намуда, онро ба 2 соати дигар тамдид кардааст.
Чуноне ки ба мухбири мо масъулони ин фурӯшгоҳи ш. Душанбе хабар дод, минбаъд маркази савдо то соати 19:00 боз буда сокинон ва меҳмонони шаҳр метавонанд пас аз рӯзи корӣ низ ба инҷо омада харид кунанд. Тамоми дӯконҳои Маркази савдои «Садбарг» то ин соат кушодаанд. Қаблан бошад ин марказ то соати 17:00 кор карда, баъзе аз тоҷирон пас аз соати 16:00 дарҳои дӯконҳои хешро баста мерафтанд.

СССР